1-2. Nsombelu kayi idi bantu ba Yehowa ba bungi bapeta? Idi mua kubenzela tshinyi?

TUANGATE bilejilu bisatu ebi: Mbakuate muanetu kampanda utshidi nsonga ne disama dia ditekesha mubidi. Mbipate muanetu kampanda wa bidimu bipite pa 50 ku mudimu pende muenji wa mudimu mukole. Mmuenze muende muonso bua kupeta mudimu mukuabu kadi kayi uwupeta to. Muanetu wa bakaji wa lulamatu ukadi mukulakaje udi wenda upangila makanda a kuenza bia bungi mu mudimu wa Yehowa.

² Wewe muikale ne lutatu lua ku itudi bafume ku ditela eyi udi mua kumona bu ne: kutshiena ne mushinga to. Nsombelu eyi idi mua kukujimijila disanka, kukupangisha bua kudimona ne mushinga, ne kukunyangila malanda ne bantu bakuabu.

3. Mmunyi mudi Satana ne bantu badiye ulombola bamona muoyo wa muntu?

³ Bena panu badi bamona muoyo wa muntu anu mutu Satana uwumona. Satana utu anu umona bantu bu tusonsa tua kunuina ku maluvu. Wakambila Eva kayi luse ne: yeye mutombokele Nzambi, neikale mudikadile, pende mumanye ne: bivua bimukebela lufu. Satana utshidi ne malu a bungenda mushinga, a tshididi, ne a bitendelelu mu bianza. Nanku tudi tumvua bua tshinyi bangenda mushinga ba bungi, bena tshididi, ne bamfumu ba bitendelelu mbamufuane bua mudibu kabayi bangata muoyo wa muntu ne mushinga ne kabayi bapesha muntu bunême.

4. Tshiena-bualu etshi netshiakule bua tshinyi?

 ⁴ Yehowa yeye mmusue bua tudimona ne mushinga, ne udi utukuatshisha patudi mu nsombelu idi itufikisha ku didimona katuyi ne mushinga. (Mis. 136:23; Lomo 12:3) Tshiena-bualu etshi netshiakule bua mushindu udi Yehowa utuambuluisha mu nsombelu eyi: 1) Patudi tusama, 2) patudi ne lutatu lua makuta, ne 3) pakadi bukulakaje butufikisha ku dimona bu ne: katutshiena ne bua nsongo butudi tuenza mu mudimu wa Yehowa. Kadi tuanji tumone bua tshinyi yonso wa kutudi udi mua kuikala mutuishibue ne: udi ne mushinga kudi Yehowa.

5. Ntshinyi tshidi tshileja ne: bantu badi ne mushinga kudi Yehowa?

⁵ Nansha mutudi benza ne lupuishi lua buloba, tudi ne mushinga wa bungi kupita dianza dia buloba. (Gen. 2:7) Tumonabi amue malu adi atusaka bua kuamba ne: tudi ne mushinga kudi Yehowa. Mmufuke bantu ne bukole bua kumufuana ku ngikadilu. (Gen. 1:27) Bu mudiye mutufuke nanku, mmutubandishe ku mutu kua bifukibua bionso bia pa buloba, kutupesha mudimu wa kutangila buloba ne nyama.​—Mis. 8:4-8.

6. Mbualu kayi bukuabu budi butujadikila ne: Yehowa udi wangata bantu bapanga bupuangane ne mushinga?

⁶ Nansha pakavua Adama muenze mpekatu, Yehowa wakatungunuka anu ne kuangata bantu ne mushinga. Udi utuangata ne mushinga wa bungi, kumufikishabi too ne ku difila Yezu wende bua kutupikula ku mpekatu. (1 Yone 4:9, 10) Ku diambuluisha dia tshia kupikulangana natshi, Yehowa neajule kabidi bantu ‘bakane ne badi kabayi bakane’ badi bafue bua mpekatu wa Adama. (Bien. 24:15) Dîyi diende didi dileja ne: nansha tuetu tusama, bikale ne lutatu lua makuta, anyi bakulakaje, tudi anu ne mushinga kudiye.​—Bien. 10:34, 35.

7. Mmalu kayi makuabu adi asaka batendeledi ba Nzambi bua kuitabuja ne: Yehowa udi ubangata ne mushinga?

⁷ Kudi malu makuabu adi atusaka bua kuitabuja ne: Yehowa udi utuangata ne mushinga. Mmutukoke kudiye ne mmumone mushindu utudi bitabe lumu luimpe. (Yone 6:44) Patuakatuadija kusemena pabuipi nende, yeye pende wakasemena pabuipi netu. (Yak. 4:8) Yehowa utu wangata kabidi dîba ne udienzeja bua kutulongesha, bileja ne: tudi ne mushinga ku mêsu kuende. Mmumanye tshitudi mpindieu ne tshitudi mua kulua. Utu kabidi utupesha dinyoka bualu mmutunange. (Nsu. 3:11, 12) Malu onso aa adi aleja ne: Yehowa utu utuangata ne mushinga wa bungi be!

8. Mmunyi mudi mêyi adi mu Misambu 18:27-29 mua kushintulula mushindu utudi tumona ntatu yetu?

⁸ Kuvua bantu bavua bamona mukalenge Davidi bu kantu tshianana, kadi yeye uvua mumanye ne: Yehowa uvua mumunange ne uvua umukuatshisha. Dimanya adi divua dimuambuluishe bua kuikala ne mmuenenu muimpe bua nsombelu wende. (2 Sam. 16:5-7) Padi malu atutonda anyi tutuilangana ne ntatu, Yehowa udi mua kutuambuluisha bua kumona malu mu mushindu mukuabu, ne kutantamena lutatu nansha lua bishi. (Bala Misambu 18:27-29.) Padi Yehowa utuambuluisha, kakuena tshintu nansha tshimue tshidi mua kutupangisha bua kumuenzela mudimu ne disanka to. (Lomo 8:31) Mpindieu tumonayi nsombelu misunguluke isatu ayi nangananga dîba ditudi ne bua kuvuluka ne: Yehowa mmutunange ne udi utuangata ne mushinga.

9. Disama didi mua kutushiya tukadi tudimona mushindu kayi?

⁹ Disama didi mua kututshiokesha mu lungenyi, ditufikisha ku dimona bu ne: katutshiena ne mushinga kudi muntu to. Bidi mua kututonda padi bantu bamona ne: katutshiena kabidi  mua kuenza malu bu kumpala anyi patudi tudimona benzejibue bua kueyemena bakuabu bua batuambuluishe. Nansha bakuabu kabayi bamanye ne: tudi tusama, tudi mua kumvua bundu bua mudi disama ditushiye. Mu bikondo bikole bia nunku, Yehowa utu utukolesha. Mushindu kayi?

10. Bilondeshile Nsumuinu 12:25, ntshinyi tshidi mua kutuambuluisha patudi tusama?

¹⁰ Patudi tusama, “dîyi dimpe” didi mua kutukolesha. (Bala Nsumuinu 12:25.) Yehowa mmutulamine mêyi mimpe mu Bible. Adi atuvuluija ne: tudi ne mushinga kudiye nansha tuetu tusama. (Mis. 31:19; 41:3) Patudi tubala mêyi adi Yehowa mufundishe ku nyuma wende aa anyi tuabalulula, neatuambuluishe bua kupita bimpe ne meji mabi adi atuluila patudi tusama.

11. Mmunyi muvua muanetu kampanda mumone tshianza tshia Yehowa?

¹¹ Tumone tshivua tshifikile Jorge. Patshivuaye nsonga, wakapeta disama divua ditekesha mubidi. Disama adi diakavuma ne lukasa luonso, kumufikishadi ku didimona katshiyi ne mushinga. Udi wamba ne: “Tshivua mumanye ne: disama divua mua kunshiya mushindu eu anyi kunshiya nkadi diumvua bundu bua muvua bantu bantangila to. Pavuadi dienda dikola, mvua ngela meji a muikala nsombelu wanyi ne bua kushintuluka. Meji akanshikila, meme kulomba Yehowa diambuluisha.” Mmunyi muvua Yehowa mukoleshe Jorge? Udi wamba ne: “Bu mumvua tshiyi mua kuteka meji kaba kamue, bakankankamija bua kuikala kubala tutupa tua mvese ya mu mukanda wa Misambu idi ileja mudi Yehowa utabalela batendeledi bende. Mvua mbala mvese ayi dituku dionso nyibalulula; yakankolesha, kunkankamijaye. Pakapita matuku, bantu bakuabu bakabanga kumona ne: nkavua ntamba kutua mimuemue. Bavua bamba ne kuamba ne: disanka  dimvua nadi divua dibakankamija. Ngakajingulula ne: Yehowa uvua muandamune masambila anyi! Uvua mungambuluishe bua kushintulula mushindu umvua ndimona. Ngakabanga kutuma meji ku tshidi Bible wamba bua mudiye ummona nansha mumvua nsama.”

12. Paudi usama, mmunyi muudi mua kumona tshianza tshia Yehowa?

¹² Biwikala usama, ikala mutuishibue ne: Yehowa mmumanye ne: udi usama. Mulomba diambuluisha bua wikale umona nsombelu webe mu mushindu muimpe. Pashishe ikala ubala Bible bua kupeta mêyi mimpe adi Yehowa mukulaminamu. Imanyina pa mvese idi ileja mudi Yehowa wangata batendeledi bende ne mushinga. Wewe wenza nanku, neumone ne: Yehowa udi wenzela bantu badi bamuenzela mudimu ne lulamatu malu mimpe.​—Mis. 84:11.

13. Mfumu wa dîku yeye mujimije mudimu, udi mua kudiumvua mushindu kayi?

¹³ Mfumu wa dîku yonso mmusue kukumbajila bena mu dîku diende majinga abu a buatshia buila. Kadi tutekabi ne: mbipate muanetu kampanda ku mudimu kayi muenze bualu. Udi wenza muende muonso bua kupeta mudimu mukuabu, kadi kayi uwupeta. Nsombelu wa nunku udi mua kumufikisha ku didimona katshiyi ne mushinga. Mmunyi mudi kuimanyina pa milayi ya Yehowa mua kumuambuluisha?

14. Mmalu kayi adi enza bua Yehowa akumbaje milayi yende?

¹⁴ Yehowa utu anu ukumbaja milayi yende. (Yosh. 21:45; 23:14) Utu wenza nanku bua malu a bungi. Bualu bua kumpala budi ne: dîna diende anyi lumu luende didi mu tshialu. Yehowa mmulaye ne: neatabalele batendeledi bende ba lulamatu, ne udi udimona muenzejibue bua kukumbaja dîyi adi. (Mis. 31:1-3) Bualu bukuabu, Yehowa mmumanye ne: yeye kayi mutabalele bena mu dîku diende, bidi mua  kututonda bikole. Mmulaye bua kutupesha bintu bia ku mubidi ne bia mu nyuma, ne kakuena tshintu tshidi mua kumupangisha bua kukumbaja mulayi au to!​—Mat. 6:30-33; 24:45.

15. a) Ndutatu kayi luvua bena Kristo ba kumpala bapete? b) Misambu 37:18, 19 udi utujadikila tshinyi?

¹⁵ Patudi tuvuluka tshidi Yehowa ukumbajila mêyi ende, nansha tuetu mu lutatu lua makuta, tudi bamanye ne: neatuambuluishe. Tuangate tshilejilu tshia bena Kristo ba kumpala. Pavuabu batuadije kukengesha tshisumbu bikole mu Yelushalema, “bantu bonso, pa kumbusha bapostolo, bakatangalaka.” (Bien. 8:1) Tshivua mua kubafikila ntshinyi? Bakapeta lutatu lua makuta! Pamuapa bena Kristo bavua bajimije nzubu yabu ne midimu yabu. Nansha nanku, Yehowa kavua mubalekele to; bobu pabu kabakajimija disanka diabu to. (Bien. 8:4; Eb. 13:5, 6; Yak. 1:2, 3) Yehowa neatukuatshishe petu anu muvuaye mukuatshishe bena Kristo ba lulamatu abu.​—Bala Misambu 37:18, 19.

16. Nsombelu kayi udi mua kutufikisha ku didikonka bikala Yehowa wangata mudimu utudi tumuenzela ne mushinga?

¹⁶ Patudi tuenda tukulakaja, tudi mua kutuadija kumona bu ne: katutshiena ne tshia nsongo tshia kupesha Yehowa to. Pavua mukalenge Davidi wenda ukulakaja, meji a buena aa avua mua kuikala amuluila pende. (Mis. 71:9) Mmunyi mudi Yehowa mua kutuambuluisha?

17. Bualu bua muanetu Jheri budi mua kutulongesha tshinyi?

¹⁷ Mona bualu buvua bufikile muanetu kampanda wa bakaji diende Jheri. Bavua bamubikile bua kubuela mu tshisangilu tshia kuleja bantu mua kulama Nzubu wa Bukalenge bimpe; kadi yeye kavua musue kuya to. Wakamba ne: “Nkadi mukulakaje, mukamba, ne tshiena ne dimanya nansha dikese dia kuenza nadi mudimu au to. Tshitshiena ne bua nsongo  to.” Butuku bua muladilu wa tshisangilu atshi, wakaleja Yehowa bualu abu. Pakatshiabu, wakaya ku Nzubu wa Bukalenge, muikale anu udiebeja ni uvua anu ne bua kuyaku. Mu tshisangilu atshi, umue wa ku bana betu bavua batshilombola wakashindamena pa bualu bua ne: dimanya didi ne bualu nkuikala mudiakaje bua Yehowa atulongeshe. Jheri udi uvuluka wamba ne: “Meme kudiambila ne: ‘Adi si ke dimanya dindi nadi!’ Bu mumvua mujingulule ne: Yehowa uvua wandamuna disambila dianyi, ngakatuadija kudila. Uvua wenda unjadikila ne: mvua ne tshintu tshia mushinga tshimvua mua kumupesha ne uvua musue kundongesha!” Jheri udi wamba bua muvuaye mumvue dituku adi ne: “Ngakabuela mu tshisangilu atshi ngenda ndiela makonka, muteketangane, bintondakane. Kadi ngakapatukamu ne makanda, mudimone ne mushinga, ne mutuishibue ne: mvua mua kuenza tshintu!”

18. Mmunyi mudi Bible uleja ne: Yehowa udi anu wangata mudimu utudi tumuenzela ne mushinga patudi tuenda tukulakaja?

¹⁸ Patudi tuenda tukulakaja, tuikale anu batuishibue ne: Yehowa utshidi ne mudimu wa kutupesha. (Mis. 92:12-15) Yezu mmutulongeshe ne: nansha tuetu tumona bu ne: makande etu mmakepe anyi ne: tudi tuenza anu malu makese menemene mu mudimu wa Yehowa, yeye udi wangata tshionso tshitudi tumuenzela ne mushinga. (Luka 21:2-4) Nanku wewe enza anu tshiudi mua kuenza. Tshilejilu, udi mua kuakula bua Yehowa, kusambidila bena Kristo nebe, ne kukankamija bakuabu bua kushalabu ne lulamatu. Yehowa udi ukuangata bu muenzejanganyi nende wa mudimu, kabiyi bua tshiudi wenza, kadi bualu udi musue kumutumikila.​—1 Kol. 3:5-9.

19. Lomo 8:38, 39 udi utujadikila tshinyi?

¹⁹ Tudi ne disanka dia bungi bua mutudi tutendelela Yehowa Nzambi udi wangata bantu badi bamuenzela mudimu ne mushinga wa menemene! Mmutufuke bua kuenza disua diende, ne ntendelelu mulelela ke udi wenza kabidi bua nsombelu wetu alue wa nsongo. (Buak. 4:11) Nansha mudi bena panu batumona bu tusonsa tua kunuina ku maluvu, Yehowa yeye kena utumona mushindu au to. (Eb. 11:16, 38) Padi masama, dipangila dia makuta, anyi bukulakaja bitutekesha mu mikolo, tuvulukayi ne: kakuena tshintu tshidi mua kutupandulula ku dinanga dia Tatu wetu wa mu diulu to.​—Bala Lomo 8:38, 39.