Ditabuja didi mua kukushintulula

“KUDI mushindu wa kuikala ne bibidilu bimpe kadi kuyi witabuja Nzambi.” Aa mmêyi a muntu mukaji kampanda, umue wa ku bantu batu bamba ne: kakuena muntu udi mua kujadika bikala Nzambi udiku anyi kenaku. Wakamba ne: uvua mukoleshe bana bende bimpe bitambe, ne bana aba pabu mbakoleshe babu bana mushindu wa muomumue, kakuyi nansha umue wa kudibu udi witabuja Nzambi.

Bualu ebu budiku buleja ne: kuitabuja Nzambi kakuena ne mushinga anyi? Bilondeshile muntu mukaji eu, bidi nanku. Mbilelela bua se: muntu yonso udi kayi muitabuje Nzambi katu’anu muntu mubi nansha. Mupostolo Paulo wakakula bua “bantu ba bisamba” badi kabayi bamanye Nzambi kadi “bikale bakumbaja bidi mêyi a ku tshifukilu amba.” (Lomo 2:14, Mukanda wa Mvidi Mukulu) Buonso buabu, kusangisha ne badi bamba ne: kakuena udi mua kujadika bikala Nzambi udiku anyi kenaku, mbaledibue ne kuondo ka muoyo. Bavule batu badienzeja bua kutumikila malu adi kuondo kabu ka muoyo kabambila nansha buobu kabayi bitabuja Nzambi wakabapesha dimanya edi dia ku tshilelelu dia tshidi tshimpe ne tshidi tshibi.

Kadi, ditabuja Nzambi ne muoyo mujima didi Bible ufila ntshintu tshia mushinga mukole tshidi tshitusaka bua kuenza malu mimpe kupita malu adibu batuambila kudi kuondo ka muoyo kadi kakayi kalongesha. Ditabuja didi Dîyi dia Nzambi difila didi dilongesha kuondo ka muoyo, dikaleja mushindu wa kujingulula tshidi tshimpe ne tshidi tshibi. (Ebelu 5:14) Ditabuja didi kabidi dikolesha bantu bua kulonda mêyi makane padibu ne lutatu lukole. Tshilejilu, mu lukama lua bidimu lua 20 (anyi siekele wa 20), matunga a bungi avua ne tshididi tshibi, avua enzeja bantu ba bikadilu bimpe bua benze malu a tshikisu makuate buôwa. Kadi bantu bavua menemene bitabuja Nzambi bakabenga nansha bia kumona lufu bua kutupa ku mêyi avuabu balonda. Ditabuja didi Bible ufila didi kabidi mua kushintulula bantu. Didi mua kupikula bantu badi bamueneka bajimine ne didi mua kuambuluisha  bakuabu bua kuepuka bua kuenza bilema bipite bunene. Tangila bilejilu bikese bidi bilonda ebi.

Ditabuja didi mua kushintulula nsombelu wa mu dîku

“Bua ditabuja dienu nudi benze bualu buvua kabuyi mua kuenzeka to.” Mêyi aa ngakamba nzuji kampanda wa mu ditunga dia Angleterre pakakosaye tshilumbu tshivua pankatshi pa John ne Tania bua kuleja uvua ne bujitu bua kulama bana. Pavua John ne Tania baye ne tshilumbu tshiabu kudi mbulamatadi, kabavua baselangane to, ne nsombelu wabu kumbelu uvua mubi mutambe. Bu muvuaye ne tshibidilu tshia kunua diamba ne kunaya manaya a mfualanga, John wakabanga kuenza malu avua mikenji ibenga bua kupeta makuta a kuikalaye wenza nawu buenzavi bimpe. Wakalengulula bana ne mamuabu. Kadi ‘tshishima’ kampanda tshiakenzeka.

Dituku dikuabu, John wakumvua muana wa Tutuende wakula bua Mparadizu. Bu muvuabi bimusankishe, wakaya kukonka baledi ba muana eu bua kumanyaye bivule. Tutuende ne mukajende m’Bantemu ba Yehowa, bakalonga Bible ne John. Ku kakese ku kakese, John ne Tania bakapeta ditabuja didi Bible ufila diakalua kushintulula nsombelu wabu. Bakafundisha dibaka diabu ku mikanda ya mbulamatadi ne kulekelabu malu mabi. Bena mbulamatadi bavua balua kulondolola malu a dîku diabu bakamona bualu buvua bumueneka bu kabuvua mua kuenzeka kumpala: dîku dia disanka mu lubanza luimpe, muaba mukumbanyine wa kukoleshila bana. Nzuji eu uvua muambilemu pakalejaye ne: “tshishima” etshi tshivua tshienzeja kudi tshitendelelu tshivua John ne Tania bafuma ku dibuela.

Patudi tumbuka mu Angleterre tuya batangile kule, mu Asia wa Proche-Orient, tudi tusangana muntu mukaji mukuabu ukavua pabuipi ne kuenza bualu bubi. Ukavua usua kushipa dibaka, anu bu mutu bantu bakuabu miliyo ya bungi benza tshidimu tshionso. Uvua ne muana umue, kadi bayende uvua muntu mukole kudiye ku bidimu bia bungi menemene. Bua bualu ebu, balela bende bavua bamusaka bua kushipaye dibaka, ne ke tshikavuaye mutuadije kudilongolola bua kuenza. Kadi uvua ulonga Bible ne Ntemu wa Yehowa. Pakamanya Ntemu eu bualu ebu, wakamumvuija tshidi Bible wamba bua dibaka. Tshilejilu, wakamuambila ne: dibaka ndipa dia Nzambi ne ki ntshintu tshia patupu to. (Matayo 19:4-6, 9) Muntu mukaji eu wakadiambila mundamunda ne: ‘Ebu mbualu bupiabupia budi muntu mukaji eu udi kayi nansha muanetu, ujinga kuambuluisha dîku dietu eku balela betu bajinga bua difue.’ Malu avuaye ufuma ku dilonga akamuambuluisha bua kukuba dibaka diende.

Bungi bukuabu budi bubungamija ne bunyanga nsombelu wa dîku mbua mafu adibu batula. Luapolo lua bulongolodi bua O.N.U. luakaleja ne: ku tshidimu tshionso badi batula mafu matue ku miliyo 45 ku bukole. Malu onso aa adi abungamija bikole. Kadi dimanya dia mu Bible diakambuluisha muntu mukaji kampanda wa mu ditunga dia Philippines bua kubenga kuikala munkatshi mua bantu aba batu batula mafu.

Muntu mukaji eu wakapetangana ne Bantemu ba Yehowa, bakamupesha broshire wa dilonga nende Bible udi ne tshiena-bualu tshia ne: Ntshinyi tshidi Nzambi utulomba?, * ne kutuadijaye kulonga Bible. Kunyima kua matuku a bungi, wakumvuija bua tshinyi uvua muanyishe bua kulonga Bible. Muntu mukaji eu uvua ne difu pakaya Bantemu kuende musangu wa kumpala, kadi yeye ne bayende bavua bapangadije bua kutudisha difu adi. Kadi tshimfuanyi tshia muana mu difu dia mamuende tshidi mu dibeji dia 24 dia broshire eu tshiakalenga mutshima wa muntu mukaji eu. Diumvuija dia mu Bible didibu bafilemu dia se: muoyo ng’wa tshijila bualu ‘Nzambi ke mushimi wa muoyo’ akamusaka bua kubenga kutula difu divuaye nadi. (Musambu 36:9) Mpindieu udi ne muana mulengele ne wa makanda a mubidi.

Ditabuja didi diambuluisha bantu badibu bapepeja

Mu ditunga dia Éthiopie, bantu babidi bavuale bilamba bifuatuluke bileja bupele bakabuela mu tshisangilu tshia Bantemu ba Yehowa. Ku ndekelu kua tshisangilu, Ntemu kampanda wakayukila nabu ne disanka. Bantu aba bakamulomba ka-pa-luse. Ntemu eu wakabapesha tshintu tshipite makuta. Wakabakankamija bua kuitabuja Nzambi, bualu dimuitabuja “didi ditamba ngolo . . . [ku] mushinga.” (1 Petelo 1:7) Umue wa ku bantu aba wakatuadija kulonga Bible. Dilonga edi diakashintulula nsombelu wende. Pakakola ditabuja diende, wakalekela kunua makanya, dikuatshika dia maluvu, buendenda ne dinua bintu bifuanangane ne diamba. Wakamanya mua kudiambuluisha pamutu pa kulomba ka-pa-luse. Patudi tuakula apa, udi ne nsombelu muimpe ne udi wenza mudimu bua kupeta ka kudikuatshisha naku.

Mu ditunga dia Italie, bavua bafundile muntu kampanda wa bidimu 47 buloko bua bidimu dikumi  ne bakamulama mu lupitadi lua bena masama a mpala bavua ne bilumbu ku tubadi. Ntemu wa Yehowa mukuabu udibu banyishile bua kubuela mu lupangu lua buloko ebu bua kufila dikuatshisha dia mu nyuma wakalonga nende Bible. Muntu au wakadiunda ne lukasa. Ditabuja diakashintulula nsombelu wende bikole, ke bualu kayi nansha bena buloko badi mpindieu bamulomba mibelu bua mushindu wa kujikija malu adibu nawu. Bua ditabuja diende dipetela mu Bible, batangidi ba buloko bakabanga kumunemeka, kumuangata ne mushinga ne kumueyemena.

Bidimu bidi panshi ebi bikandakanda mbiakule bua mvita ya bena mu matunga a mu Afrike. Tshidi nangananga tshikuatshisha buôwa mmalu adibu balonda bua bana ba balume bapuekele badibu bangata ku busalayi. Badi banuisha bana aba diamba, babenzela malu a tshikisu ne babasaka bua kuenzelabu balela babu malu a luonji bua kujadika ne: mbalamate anu tshisumbu tshidibu baluila mvita. Ditabuja didi Bible ufila didiku ne bukole bua kushintulula nsombelu wa bana ba mushindu’eu anyi? Diakambuluisha bana bapite pa babidi.

Mu Liberia, Alex uvua muitabi wa misa mu Katolike. Kadi pakakumbajaye bidimu 13, wakabuela mu tshisumbu tshia bena mvita ne wakalua musalayi wa dilambu. Wakapakisha manga bua kuikala ne bukitu mu mvita. Wakamona muvuabu bashipa balunda bende bavule, kadi yeye wakapanduka. Mu 1997 wakapetangana ne Bantemu ba Yehowa, kumonaye ne: kabavua bamupepeja to. Pamutu pa buobu kumupepeja, bakamuambuluisha bua kumanya tshidi Bible wamba bua malu a tshinyangu. Alex e kulekelaye busalayi. Pakatuadija ditabuja diende kukola, wakalonda dîyi dia mu Bible dia se: “Umuke ku malu mabi ne enze malu mimpe, akebulule ditalala ne adilonde.”​—1 Petelo 3:11, Muanda Mulenga Lelu.

Pinapu, muntu mukuabu uvua musalayi ku buana, diende Samson, wakalua mu tshimenga tshivua Alex musombele. Kumpala uvua mu tshisumbu kampanda tshia bimbi ba misambu ya Nzambi, kadi mu 1993 wakalua musalayi, kubangaye kunua diamba, kupakishaye manga ne kudituaye mu buendenda. Mu tshidimu tshia 1997 bakamumbusha mu tshisumbu tshia basalayi atshi. Pakavua Samson uya mutangile ku tshimenga tshia Monrovia bua kuya kubuela mu tshisumbu tshia basalayi tshiende lumu, mulunda wende mukuabu wakamusaka bua kulonga Bible ne Bantemu ba Yehowa, ne Bible wakamuambuluisha bua kupeta ditabuja. Ditabuja edi diakamupesha dikima dia kulekela malu a mvita avuaye nawu. Mpindieu Alex ne Samson mbantu ba ditalala ne ba bikadilu bimpe. Pakumbusha ditabuja didi Bible ufila, kudiku tshintu tshikuabu tshidi mua kushintulula nsombelu wa bantu bavua benza malu a tshinyangu tshikole anyi?

Ditabuja dilelela

Ebi mbilejilu bikese tshianana biangatshila munkatshi mua bia bungi bitudi mua kutela bua kuleja bukole budi nabu ditabuja dilelela didi Bible ufila. Bushuwa, muntu yonso utu wamba mudiye witabuja Nzambi ki ng’utu utumikila mêyi a mushinga a mu Bible nansha. Bulelela, bamue bantu badi babenga kuitaba ne: Nzambi utuku badi mua kuikala ne bikadilu bimpe kupita bamue badi badiamba mudibu bena Kristo. Bidi nanku bualu ditabuja didi Bible ufila didi diumvuija bivule kupita diamba patupu ne: ndi ngitabuja Nzambi.

Mupostolo Paulo wakabikila ditabuja ne: ‘didi dimanya dia malu atudi tutekemena ne didi dijadika dia malu atudi katuyi bamone.’ (Ebelu 11:1) Nanku didi diumvuija dituishibua dikole didi dishindamene pa bijadiki bidi kabiyi kutonkola bua malu adi kaayi amueneka. Didi diumvuija nangananga kubenga kuikala ne mpata nansha mikese bua kuitaba ne: Nzambi udiku ne kabidi udi uditatshisha bua bualu buetu ne neabeneshe badi benza disua diende. Mupostolo Paulo wakamba kabidi ne: ‘Muntu udi ulua kudi Nzambi budiye nabu mbua kuitaba ne: yeye udiku, ne udi mufutshi wa badi bamukeba.’​—Ebelu 11:6.

Ditabuja dia mushindu’eu ke diakashintulula nsombelu wa John, wa Tania ne wa bantu bakuabu batudi batele mu tshiena-bualu etshi. Diakabafikisha ku dieyemena Bible ne muoyo mujima bua abalombole padibu bangata mapangadika. Diakabambuluisha bua kuanji kudipangisha amue malu bua tshitupa tshîpi bua kumonabu mua kuepuka njila mibi. Nansha muvuawu mashilangane, malu onso aa akatuadija mushindu wa muomumue. Ntemu wa Yehowa kampanda wakalonga Bible ne bantu aba, ne bakamona mudi mêyi a mu Bible adi alonda aa mikale malelela: ‘Dîyi dia Nzambi didi ne muoyo ne bukole.’ (Ebelu 4:12) Bukole bua Dîyi dia Nzambi buakabambuluisha bua kupeta ditabuja dikole diakalengeja nsombelu wabu.

Bantemu ba Yehowa badi benza mudimu mu matunga mapite pa 230 ne bidiila. Badi bakulomba bua kulonga Bible. Bua tshinyi? Bualu mbatuishibue ne: ditabuja didi Bible ufila didi mua kulengeja kabidi malu ebe a bungi.

[Mêyi adi kuinshi]

[Bimfuanyi mu dibeji 3]

Ditabuja didi Bible ufila didi dilengeja nsombelu wa bantu

 [Mêyi a dianyisha bua tshimfuanyi mu dibeji 2]

Tshizubu tshia Biblia nieswieska wa Szymon Budny, mu 1572