Mbabueje bantu bakuabu mu Kasumbu Kaludiki

MU Disambombo dia matuku 2 a ngondo wa dikumi, mu 1999, Tshisangilu tshia ku Tshidimu tshia Société (Watch Tower Bible and Tract Society of Pennsylvania) tshiakajika ne dimanyisha divua bantu kabayi batekemene to. Bantu 10 594 bavua bateleje tshisangilu etshi bakasanka bikole pakumvuabu ne: mbasakidile bantu banayi mu Kasumbu Kaludiki ka Bantemu ba Yehowa. Bantu aba bapiabapia, bonso bikale bena Kristo bela manyi, mbuobu aba: Samuel F. Herd; M. Stephen Lett; Guy H. Pierce; ne David H. Splane.

• Samuel Herd wakatuadija bumpanda-njila mu tshidimu tshia 1958, ne kubangila mu 1965 too ne mu 1997, uvua mutangidi wa tshijengu pashishe wa distrike. Kunyima, yeye ne mukajende Gloria bakalua ku Betele mu États-Unis, ne Muanetu Herd wakabuela mu Tshibambalu tshia Mudimu. Uvua kabidi wambuluisha mu Komite wa Mudimu.

• Stephen Lett wakatuadija bumpanda-njila mu Tshisua-munene wa tshidimu tshia 1966, ne kubangila mu 1967 too ne mu 1971, uvua ku Betele mu États-Unis. Mu ngondo wa dikumi, mu 1971, wakasela Susan, ke kumutumabu bu mpanda-njila wa pa buende. Kubangila mu 1979 too ne mu 1998, uvua mutangidi wa tshijengu. Katshia mu ngondo muinayi, mu 1998, yeye ne Susan badi mu dîku dia Betele ku États-Unis. Ku Betele uvua mu Tshibambalu tshia Mudimu ne wakambuluisha kabidi mu Komite wa Dilongesha.

• Guy Pierce uvua tatu wa dîku, pashishe yeye ne mukajende kutuadijabu bumpanda-njila mu ngondo muinayi, mu 1982. Uvua mutangidi wa tshijengu kubangila mu 1986 too ne mu 1997, ne kumubikilabu ne mukajende ku Betele wa ku États-Unis mu 1997. Muanetu Pierce uvua wambuluisha mu Komite wa Badi mu Mudimu.

• David Splane wakatuadija bumpanda-njila mu ngondo wa tshitema, mu 1963. Bu muvuaye mujikije mu kalasa ka 42 ka Gilada, wakaya mu bu-misionere mu ditunga dia Sénégal, mu Afrike, pashishe kuenzaye bidimu 19 bu mutangidi wa tshijengu mu ditunga dia Canada. Yeye ne mukajende Linda badi ku Betele mu États-Unis katshia mu 1990, kuvua Muanetu Splane muikale mu Tshibambalu tshia Mudimu ne tshia Difunda. Katshia mu 1998, uvua muikale wambuluisha mu Komite wa Difunda.

Pa kumbusha bantu bapiabapia aba banayi, mpindieu mu Kasumbu Kaludiki mudi: C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, ne D. Sydlik. Tuetu bonso tudi tusambila bua se: bena mu Kasumbu Kaludiki aka kadibu badiundishe mpindieu batungunuke ne kulombola midimu ya bantu ba Nzambi pa buloba bujima ne babakumbajile majinga abu a mu nyuma, ne kabidi Yehowa atungunuke ne kubabenesha ne kubakolesha.