Mbumvuije mukanda wa Danyele!

BANTU bavua babuele mu mpungilu bavua bajinga bikole bua kupeta mukanda mupiamupia wa mabeji 320 uvuabu bapatule wa: Prêtons attention à la prophétie de Daniel! (Tuteyayi ntema ku mulayi wa Danyele!) Bakadiumvua munyi bua mukanda eu? Tangila malu avua bamue bambe.

“Anu bu bansonga ba bungi, bitu binkolele bua kulonga malu a kalekale. Nunku pangakapeta mukanda mupiamupia eu (Prêtons attention à la prophétie de Daniel!), tshivuaku ngumvua menemene bua kuubala to, kadi ngakateta patupu. Bakuetu, se mvua mutupakane! Eu mmukanda mutambe buimpe ku yonso inkadi mubale. Kakuena mushindu wa kulekela diubala bualu udi usankisha be! Tshiena ngumvua kabidi bu ndi mbala malu adi menzeke kukadi bidimu bia bungi to. Bua musangu wa kumpala, ndiku panyi mua kuditeka pa muaba wa Danyele. Bulelela ndi mua kumona mu lungenyi tshivuabi ne bua kuikala, padibu bakuata muntu mu dîku diende, bamutuma ku ba bende ne utetshibua bikole misangu ne misangu. Tuasakidilayi wa manza tente bua mukanda eu.”​—Anya.

“Tshidi tshitamba kungambuluisha mmukenji udi kauyi kalema wa se: Yehowa udi ne bukokeshi bua kujikija ntatu yonso idi ikuata bantu bende. Mu bikena-kumona ne bilota bia Danyele ne bia bakuabu bivuaye mumvuije, bidi bimueneka bimpe se: Nzambi wetu kakulekela nansha kakese malu enzeka kabiyi mu mushindu uvuaye mualongolole to. Bidi bikolesha ditekemena ditudi nadi mu bimfuanyi bia tshiprofete bidi mu Bible bidi bitangila bukua-panu bupiabupia budiye mulongolole.”​—Chester.

“Ndi musue mushindu unudi bavuije Danyele anu bu utshidi ne muoyo. Ndi mulue kudiumvua anu bu tuvua nende, bua mushindu unudi baleje ende mabika ne mala. Mpindieu mvua mufike ku diumvua bimpe bua tshinyi Yehowa uvua mumunange bikole. Pavuaye mu mateta ne mu makenga onso avua amukuata, kavua uditatshisha bua bualu buende nkayende nansha. Uvua utamba kuditatshisha bua Yehowa ne bua dîna Diende dilengele. Tuasakidilayi bua munudi baleje malu aa patoke.”​—Joy.

“Etshi ke tshituvua bindile! Kabavuaku banji kuleja menemene mushindu udi mukanda wa Danyele utangila muntu yonso wa kutudi bu mudibu benz’emu to. Dilolo adi, kunyima kua meme mumane kupeta ne kubala tshitupa tshinene tshia mukanda eu mupiamupia, ngakauteka ku luseke bua kuanji kusambila Yehowa bua kumuela tuasakidila.”​—Mark.

“Tshituvua katuyi batekemene tshivua mushindu uvuawu ne bua kuambuluisha bana betu balela. Umue udi ne mvula itanu mukuabu ne isatu. . . . Nansha mutubu misangu yonso banange bikole miyuki ya Danyele, Hananiya, Mishaele ne Azaliya idi mu mukanda wa Miyuki ya mu Mukanda wa Nzambi, mushindu unudi bayileje mu mukanda wa Prophétie de Daniel mmulue kubanangishishayi bikole kupita ne mutuvua belele meji. Nansha mutshidibu anu bapuekele, badi mua kuenza malu mushindu wa muomumue ne bansonga bakane aba. Basonga aba badi bilejilu bilenga bua bana batudi balele! Bushuwa nudi batupeshe tshia-mudimu tshilengele! Tuasakidilayi, tuasakidilayi wa bungi!”​—Bethel.

“Ngakumvua anu bu mvuapu tshikondo tshivua bansongalume bena Ebelu abu mu mateta; ne malu aa akangelesha meji bua meme kukonkonona ditabuja dianyi. Kazubu ka malu a diambulula kadi ne mutu wa bualu ne: “Ntshinyi tshiudi musunguluje?” kadi kambuluisha bua kubueja malu adi mu nshapita mu mutshima. Tuasakidilayi, tuasakidilayi bua mukanda mulengele eu.”​—Lydia.