Nsese mikole idi itua Mukengeshanganyi

SHAULA uvua ne tshiji tshikole bua bayidi ba Yezu. Buende yeye, bivua bikengela kusakidila makenga makuabu ku kanyawu kakavuabu bamone mu Yelushalema, kusangishamu ne tshilumbu tshia Stefano wakashipabu ne mabue. Mpindieu uvua ujinga bua kuya kule ne dibakengesha edi. ‘Shaula wakatshidi ufunyina bayidi ba Mukalenge bua kubashipaye, wakaya kudi muakuidi munene. Wakamulomba mikanda ya kuya nayi mu nsunagoga ya mu Damaseke bua kusuika basanganaye mu Njila eu wa Nzambi, nansha balume nansha bakaji, ne bua kuluaye nabu ku Yelushalema.’​—Bienzedi 9:1, 2.

Dîba divuaye uya ku Damaseke, Shaula uvua ne bua kuikala wela meji bua kumona mushindu uvuaye mua kukumbaja bimpe mudimu mumupesha. Bushuwa bu muvuabu bamupeshe bukenji kudi muakuidi munene, nenku kuvua mushindu wa balombodi ba misoko ya bungi ya bena Yuda ba mu tshimenga atshi kumueleshabu diboko. Shaula uvua ne bua kubalomba bua kumuambuluishabu.

Disanka dia Shaula divua dienda divula pavuaye wenda usemena kuvuaye uya. Luendu lua kilometre mitue ku 220 munkatshi mua matuku muanda-mutekete anyi muanda-mukulu, kumbukila ku Yelushalema too ne ku Damaseke luvua lutshiokesha bikole. Dia ka mpindieu, pabuipi ne mujalamu mu nkankala wa munya, nsese mikole ya dîba yakatua Shaula muîsu, e kudishindaye panshi. Wakumvua dîyi dimuambila mu tshiena-Ebelu ne: ‘Shaula, Shaula, udi unkengeshila meme tshinyi? Wewe udi udikengesha pautshidi usuba mikolo ku mutshi musonga.’ Shaula e kumuebeja ne: ‘Mukalenge, wewe udi nganyi?’ Yeye e kumuandamuna ne: ‘Ndi bianyi Yezu uudi ukengesha; kadi bika, wimane, bua bualu ebu ngakumuenekela kuudi bua kukusungula bu muenji wa mudimu wanyi ne bu mumanyishi wa malu awakumona ne wa malu angamuenekela kuudi; nenkusungile mu bianza bia bantu ne bia bisamba bia bende, bandi nkutuma kudibu.’ Shaula wakamukonka ne: ‘Mukalenge, nengenze tshinyi?’ ‘Bika, uye mu Damaseke, nebakuambilemu malu onso akukusunguilabu bua wewe kuenza.’​—Bienzedi 9:3-6; 22:6-10; 26:13-17.

Bavua mu luendu ne Shaula bakumvua dîyi, kadi  kabakamona uvua wakula anyi kumvua tshivuaye wamba to. Bua nsese mikole eyi, pakajuka Shaula katshivua umona ne bakamukuata ku tshianza bua kumuendesha. “Kushalaye matuku asatu majima kayi umona, kayi udia, kayi unua tshintu.”​—Bienzedi 9:7-9; 22:11, MMM.

Matuku asatu a dielangana meji

Yuda uvua musombele mu musesu uvuabu babikila ne: Mululame, wakakidila Shaula bimpe bitambe. * (Bienzedi 9:11) Too ne ku lelu, musesu eu udibu babikila ne: Darb al-Mustaqim mu tshiena-Arabe​—utshidi anu tshibeba tshinene mu Damaseke. Elabi meji bua malu avua mua kuikala mu mutu mua Shaula pavuaye mu nzubu mua Yuda. Bualu buvua bumuenzekele buvua bushiye Shaula mpofo ne bumushiye kayi ne tshia kuamba. Mpindieu uvua mua kuelangana meji bua kumanya bua tshinyi bualu abu buvua bumufikile.

Bualu buvuaye wangata bu bua tshianana buvua mpindieu buimanyine muntu eu uvua ukengeshangana. Mfumu Yezu Kristo uvuabu bakudike ku mutshi​—mupisha kudi bamfumu banene ba bena Yuda, ‘mupepeja ne mubenga kudi bantu’—​uvua ne muoyo. Eyowa, uvua mene ne dianyisha dia kuimana ku tshianza tshia balume tshia Nzambi mu “butoke kabuyi kubuela”! Yezu uvua Masiya. Stefano ne bakuabu bavua bamba bulelela. (Yeshaya 53:3, MMM; Bienzedi 7:56; 1 Timote 6:16, MMM) Shaula uvua mutupakane bikole, bualu Yezu wakadileja nkayende ku luseke lua bantu bavua Shaula ukengesha! Pa kumona bijadiki ebi, mmunyi muvua Shaula anu ne bua ‘kusuba mikolo ku mutshi musonga’? Tshitudi bamanye ntshia se: nansha ngombe wa mutu mukole batu kamanakamana bamutangija mu njila udi mfumuende musue. Nenku pa kubenga bua kutumikila malu avua Yezu umulomba, Shaula uvua udikengesha nkayende.

Nzambi kavua mua kupisha Yezu bualu yeye uvua Masiya. Kadi Yehowa wakalekela bua Yezu kukengaye ne kufua lufu lua tshibawu ne kukumbaja dîyi divuabu bela mu Mikenji ne: “Muntu yonso muowa ku mutshi udi muedibue mulau kudi Nzambi.” (Dutelonome 21:23) Yezu wakafuila ku mutshi uvuabu buowela bantu. Uvua muedibue mulawu, ki mbua mpekatu yende to, bualu kavua ne mpekatu nansha umue, kadi bua mpekatu ya bantu. Shaula wakumvuija pashishe ne: ‘Bonso badi beyemena kuenza kua mikenji badi muinshi mua mulawu; bu muakafundabu ne: Muntu yonso udi kayi ulonda malu onso adi mafunda mu mukanda wa Mikenji bua kuênza udi ne mulawu. Nunku bualu ebu budi bumanyibua patoke ne: Kakuena muntu udi ubingishibua bua mikenji ku mêsu kua Nzambi. Kristo wakatupikula ku mulawu wa Mikenji, wakadivuija bu mulawu bua bualu buetu; bu muakafundabu ne: Muntu yonso udi mukudika ku mutshi udi ne mulawu.’​—Galatia 3:10-13.

Mulambu wa Yezu uvua ne mushinga wa kupikula nawu bantu. Pa kuitaba mulambu au, mu ngakuilu wa mu tshimfuanyi Yehowa wakapopela ku mutshi Mikenji ne mulawu wayi. Pakajingululaye bualu abu, Shaula wakangata bu ‘meji a Nzambi’ mutshi wa tshinyongopelu uvua ‘tshilenduishi kudi bena Yuda.’ (1 Kolinto 1:18-25; Kolosai 2:14) Bu muvua bantu kabayi ne bua kupetela lupandu ku midimu mienza bua kulonda mikenji, apo ku bulenga bua Nzambi bukena butuakanyine budiye uleja bena mpekatu bu Shaula muine, bantu bavua Mikenji ya Mozese kayiyi itangila bavua pabu mua kulupeta. Ne Yezu uvua utuma Shaula kudi bantu ba Bisamba bia bende.​—Efeso 3:3-7.

Katuena mua kuamba kujadika tshiakajingulula Shaula pa bualu ebu dîba diakakudimunaye mutshima wende to. Yezu uvua pamu’apa ne bua kuyikila nende njila ne njila bua kumuambila malu avua atangila mudimu uvuaye ne bua kuenza mu bantu ba bisamba bia bende. Kabidi, kuakapita bidimu bia bungi bangabanga ne Shaula kufundaye malu onso au ku buenzeji bua spiritu wa Nzambi. (Bienzedi 22:17-21; Galatia 1:15-18; 2:1, 2) Kadi, kunyima kua matuku makese patupu, Shaula wakapeta mêyi makuabu a kudi Mukalenge wende mupiamupia.

 Anania udi ulua kumutangila

Mumane kumbuka kudi Shaula, Yezu wakamuenekela kabidi Anania, umuambila ne: ‘Uye ku njila wa musoko udibu babikila ne: Mululame, ku nzubu wa Yuda, ukonkeku muntu, dîna diende Shaula, udi biende muena Tâso, bua tangila, yeye udi utendelela Nzambi; yeye kabidi wakamona muntu, dîna diende Anania, ubuela kudiye mu tshikena-kumona, umulenga tshianza bua kutabalaye.’​—Bienzedi 9:11, 12.

Bu muvua Anania mumanye Shaula, mbiumvuike bua tshinyi wakakema bua mêyi a Yezu aa. Wakamba ne: ‘Mukalenge, ngakumvua kudi bantu ba bungi lumu lua muntu eu, ne bu mudi malu mabi a bungi akenzelaye bansantu bebe ba mu Yelushalema; kunu kabidi, udi ne bukole buakangataye kudi bakuidi banene bua kusuikaye bonso badi batendelela dîna diebe.’ Kadi Yezu wakambila Anania ne: ‘Ya biebe, bualu bua yeye udi bu lupanza lungakasungula bua kutuala dîna dianyi ku mêsu kua bisamba bia bende, ne kua bamfumu, ne kua bana ba Isalele.’​—Bienzedi 9:13-15.

Bamane kumutukija muoyo, Anania wakaya muaba uvua Yezu mumuambile bua kuya. Pakasanganaye Shaula ne pashishe kumuela muoyo, Anania wakamutenteka bianza. Muyuki udi wamba ne: “Diakamue, bintu bu mamba a mushipa kupatuka mu mesu a [Shaula], kumonaye.” (MMM) Mpindieu Shaula uvua mua kuteleja. Mêyi a Anania akashindika tshikavua pamu’apa Shaula muine mumvue mu mêyi a Yezu a ne: ‘Nzambi wa bankambua betu wakakusungula bua wewe kumanya budiye musue, ne bua wewe kutangila Udi Muakane, ne bua wewe kumvua dîyi dia mukana muende. Bua wewe newikale mumanyishi wende kudi bantu bonso wa malu awakatangila ne awakumvua. Udi ujangulukila katataka tshinyi? Bika, ubatijibue, uvuwibue ku mibi yebe, ubikila dîna diende.’ Ntshinyi tshiakenzaye? Shaula ‘wakabika, bakamubatiza. Wakadia biende, wakakankamana.’​—Bienzedi 9:17-19; 22:12-16.

Pakajikijaye mudimu uvuabu bamupeshe, Anania muena lulamatu wakajimina mu tshialu lukasa anu bu muvuaye mubuelemu, ne Bible kêna wakula muaba mukuabu bua bualu buende to. Kadi Shaula wakakemesha bantu bonso bavua bamuteleja! Muntu eu uvua ukengeshangana kale, uvua mulue ku Damaseke bua kukuata bayidi ba Yezu, wakatuadija kuyisha mu nsunagoga ujadikila bantu ne: Yezu uvua Kristo.​—Bienzedi 9:20-22.

“Mupostolo kudi bisamba bia bende”

Bualu buakenzekela Shaula pavuaye uya ku Damaseke buakamukandika bua kutungunuka ne kukengeshangana. Mumane kujingulula eu uvua Masiya, Shaula wakamona muvua ngenyi ya bungi ne milayi ya mu Mifundu ya tshiena-Ebelu ikumbanyina Yezu. Kumanya se: Yezu ng’uvua mumumuenekele ne ‘mumukuate’ ne pashishe mumuteke bu “mupostolo kudi bisamba bia bende” kuakashintulula bikole nsombelu wa Shaula. (Filipoi 3:12; Lomo 11:13) Mpindieu ukavuaye mupostolo Paulo, uvua ne diakalenga ne bukenji bivua ne bua kuikala ne buenzeji pa matuku ende a muoyo avua mashale, ne pa ditungunuka dia malu a Buena-Kristo.

Kunyima kua bidimu, pakelabu mpata bua bupostolo buende, Paulo wakadibingisha pa kutela bualu buvua bumufikile mu njila wa ku Damaseke. Wakakonka ne: ‘Tshiena mupostolo anyi? Tshiakatangila Yezu, Mukalenge wetu wanyi?’ Yeye mumane kutela misangu ivua Yezu mubisha ku lufu mumueneke kudi bakuabu bayidi, Shaula (Paulo) wakamba ne: ‘Ku nshikidilu kua bonso wakamueneka kundi, [“bienze bu kudi,” NW] muana wa kabishi.’ (1 Kolinto 9:1; 15:8) Bivua anu bu ne: mu tshikena-kumona tshiende tshiakamonaye Yezu mu butumbi bua mu diulu, Shaula uvua mupete mushindu wa kuledibua, anyi kubishibua bua kuikala ne muoyo bu tshifukibua tshia mu nyuma dîba kadiyi dianji kukumbana.

Shaula wakitaba mudimu uvuabu bamupeshe ne kuenza muende muonso bua kuikala ne nsombelu mumvuangane ne mudimu eu. Wakafunda ne: ‘Meme ndi muntu mutambe kupuekela munkatshi mua bapostolo, udi tshiyi ne buimpe bua kumbikilabu mupostolo, bualu bua ngakakengesha ekeleziya wa Nzambi. Kadi [“bulenga bua Nzambi bukena butuakanyine,” NW] kundi kabuakalua patupu, bualu bua meme ngakatamba [bapostolo bakuabu bonso ku] dienza mudimu.’​—1 Kolinto 15:9, 10.

Pamu’apa, anu bu Shaula udi muvuluke dîba diwakajingulula ne: bua Nzambi kukuanyishaye, uvua ne bua kushintulula mmuenenu yebe ya kale ya malu a Nzambi. Bushuwa uvua wanyisha bikole muvua Yehowa mukuambuluishe bua kumanya bulelela. Nsese ya butoke pakatuayi Shaula ne kujingululaye tshivuabu bamulombe, kakelakana bua kutshienza nansha. Ne wakatungunuka ne kuenza mudimu eu ne lukunukunu ne disuminyina mu matuku ende onso a muoyo pa buloba. Ntshilejilu kayipu bulenga bua bantu bonso badi bajinga lelu bua Yehowa kubanyishaye!

[Mêyi adi kuinshi]

[Tshimfuanyi mu dibeji 27]

Musesu udi ne dîna ne: Mululame, mu Damaseke wa lelu

[Mêyi a dianyisha]

Foto wa kudi ROLOC Color Slides