Tushemejayi bulunda ne Yehowa

‘SEMENAYI pabuipi ne Nzambi ne yeye neasemene pabuipi nenu,’ ke muakafunda muyidi Yakobo. (Yakobo 4:8) Ne mufundi wa misambu Davidi wakimba pende ne: “Bulunda bujalame bua Yehowa budi kudi badi bamutshina.” (Musambu 25:14) Bidi bimueneka ne: Yehowa Nzambi mmusue bua tushemeje nende bulunda. Pabi, ki mmuntu yonso udi utendelela Nzambi ne utumikila mikenji yende udi mua kudiumvua muikale pabuipi nende menemene to.

Bidi munyi buebe wewe? Nzambi utuku mulunda webe wa pa muoyo anyi? Bushuwa udi musue bua kusemena pabuipi nende menemene. Mmunyi mutudi mua kushemeja bulunda ne Nzambi? Ntshinyi tshidibi mua kumvuija buetu tuetu? Nshapita muisatu wa mukanda wa mu Bible wa Nsumuinu udi wandamuna ku nkonko eyi.

Leja bulenga bua muoyo ne lulamatu

Solomo mukalenge wa Isalele wa kale udi utuadija nshapita muisatu wa Nsumuinu ne mêyi aa: ‘Muananyi, kupu diyisha dianyi muoyo kadi mutshima webe utumikile mikenji yanyi. Bua neyikutentakajile dilepa dia matuku ne bidimu bia muoyo ne ditalala.’ (Nsumuinu 3:1, 2) Bu muvua Solomo mufunde ku buenzeji bua nyuma wa Nzambi, mubelu eu wa bu-tatu udi bushuwa ufumina kudi Yehowa Nzambi ne mmututumina. Muaba eu badi batubela bua kuitaba malu adi Nzambi utuvuluija​—mikenji yende peshi diyisha, ne mêyi ende—​mafunda mu Bible. Bituenza nenku, ‘nebatutentakajile dilepa dia matuku ne bidimu bia muoyo ne ditalala.’ Ee, nansha mpindieu, tudi mua kusomba talalaa ne kuepuka malu adi mua kutubueja mu njiwu ne kutufikisha ku lufu lua tshikoso lutu misangu mivule lukuata benji ba malu mabi. Kabidi, tudi mua kukolesha ditekemena dia kuikala ne muoyo wa tshiendelele mu bukua-panu bupiabupia bua ditalala.​—Nsumuinu 1:24-31; 2:21, 22.

Utungunuka, Solomo udi wamba ne: “[“Bulenga bua muoyo ne lulamatu,” NW] kabiumuki kûdi. Ubisuike mu nshingu muebe, ubifunde mu mutshima webe. Nunku neusangane diakalengele ne lumu luimpe ku mesu kua Nzambi ne kua bantu.”​—Nsumuinu 3:3, 4.

Muaku udibu bakudimune ne: “bulenga bua muoyo” mbawukudimune kabidi ne: “dinanga dia lulamatu” ne udi umvuija lulamatu, diumvuangana ne didisuika pamue. Tudiku bapangadije bua kushala balamate Yehowa nansha biatukuata bualu anyi? Tudiku tuleja bulenga bua muoyo mu malanda etu ne bena kuitabuja netu anyi? Tudiku tuditatshisha bua kushala nabu pabuipi anyi? Mu malu atudi tubenzela matuku onso, tudiku balame ‘diyisha dia luse pa ludimi luetu’ nansha padi nsombelu ikola anyi?​—Nsumuinu 31:26.

Bu mudiye mûle tente ne bulenga, Yehowa ‘mmusue kubuikidila bantu mibi.’ (Musambu 86:5) Bituikala banyingalale bua mibi yetu ya kale ne tululamija mpindieu njila bua makasa etu, mbatujadikile ne: ‘bikondo bia kutukankamija’ nebifumine kudi Yehowa. (Bienzedi 3:19) Katuenaku ne bua kuidikija Nzambi wetu pa kubuikidila bakuetu mibi yabu anyi?​—Matayo 6:14, 15.

Yehowa udi ‘Nzambi wa lulamatu,’ ne  mmusue bua bantu badi bakeba kushemeja nende bulunda bikale ne ‘lulamatu.’ (Musambu 31:5) Tudiku mua kutekemena bua Yehowa kuikalaye Mulunda wetu bituikala bena mpala ibidi​—tuenza malu umue mushindu patudi munkatshi mua bena Kristo netu ne tuenza malu munga mushindu padibu kabayi batumona—​bafuane “bantu badi balonda malu a mashimi” badi basokoka tshidibu anyi? (Musambu 26:4) Ndipanga lungenyi bushuwa, bualu “bintu bionso bidi butaka ne bibuluka ku mesu” kua Yehowa!​—Ebelu 4:13.

Bulenga bua muoyo ne lulamatu mbia kuangata bu busanga bua mushinga mukole ‘busuika mu nshingu muetu,’ bualu bidi bituambuluisha bua ‘kupeta diakalengele ku mêsu kua Nzambi ne kua bantu.’ Ngikadilu eyi kayena ne bua kuikala anu ya pambelupambelu nansha, kadi tudi kabidi ne bua kuyifunda ‘mu mutshima wetu,’ pa kuyivuija tshitupa tshia bumuntu buetu.

Tueyemenayi Yehowa

Mukalenge wa meji udi utungunuka wamba ne: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’​—Nsumuinu 3:5, 6.

Bushuwa, anu Yehowa ke utudi ne bua kueyemena. Bu mudiye Mufuki, udi ne “bukole bupite” ne udi Mpokolo wa “dikanda dia bungi.” (Yeshaya 40:26, 29, MMM) Udi ne bukokeshi bua kukumbaja malu onso adiye mulongolole. Dîna diende dine didi diumvuija ne: “Udi Uvuija,” ne didi dikolesha dieyemena dietu mu bukole budiye nabu bua kukumbaja tshidiye mulaye! Bu mudi ‘Nzambi kayi mua kushima,’ udi tshilejilu menemene tshia bulelela. (Ebelu 6:18) Ngikadilu wende munene ndinanga. (1 Yone 4:8) Udi ‘muakane mu njila yonso idiye uyilamu, udi uleja dinanga mu bienzedi biende bionso.’ (Musambu 145:17) Bu tuetu katuyi mua kueyemena Nzambi, nnganyi mukuabu utudi mua kueyemena? Eyowa, bua tuetu kufika ku dimueyemena, bidi bikengela ‘kuteta, kulabula, kumvua ne: Yehowa udi muakane’ pa kutumikila mu nsombelu wetu bitudi tulonga mu Bible ne kuela meji pa malu mimpe adibi bipatula.​—Musambu 34:8.

Mmunyi mutudi mua ‘kumanya Yehowa bimpe mu bienzedi bietu bionso’? Mufundi wa misambu muenzeja ku spiritu udi wamba ne: “Nengelangane meji a mudimu webe wonso, nengelangane meji munda muanyi a bienzedi biebe.” (Musambu 77:12) Bu mutudi katuyi mua kumona Nzambi, dielangana meji pa malu manene adiye muenze ne pa makuabu adiye wenzela bantu bende bidi bituambuluisha bua kushemeja nende bulunda.

Disambila didi padi ne mushinga bua kuleja ne: tudi bamanye Yehowa bimpe. Mukalenge Davidi uvua ubila Yehowa ku ‘dinda too ne ku dilolo.’ (Musambu 86:3) Misangu mivule Davidi uvua usambila butuku, nangananga mu tshikondo tshiakanyemenaye mu tshipela. (Musambu 63:6, 7) Mupostolo Paulo wakatubela wamba ne: ‘Nutendelele Nzambi misangu yonso mu nyuma.’ (Efeso 6:18) Mmisangu bungi kayi itutu tusambila? Tutuku tukuatshila Nzambi malu adi mu mutshima wetu anyi? Tutuku tumusengelela bua atuambuluishe patudi mu nsombelu mikole anyi? Tutuku tukeba ne muoyo umue bua atuludike bangabanga ne kuangata mapangadika manene anyi? Patudi tusambila Yehowa ne muoyo umue, udi utuangata ne mushinga. Ne tudi ne dishindika dia se: neateleje masambila etu ne ‘neatululamijile njila yetu.’

Ndipanga lungenyi menemene bua ‘kueyemena dijingulula dietu dia mianda’ anyi dia bantu bende lumu pa buloba pamutu pa tuetu kueyemena Yehowa tshishiki! Solomo udi wamba ne: “Kuikadi muena meji ku mesu kuebe wewe.” Kadi, udi ubela wamba ne: ‘Utshine Yehowa, umuke ku malu mabi. Muanda eu neuvuije kusangaja kudi mubidi [anyi muofo] webe, neuvuije kukankamija kudi mifuba yebe.’ (Nsumuinu 3:7, 8) Ditshina dimpe dia kubenga kubungamija Nzambi didi ne bua kulombola bienzedi bietu bionso, ngenyi ne meji etu onso. Ditshina dia kanemu dia mushindu’eu didi dituepula ku dienza malu mabi, ditusanguluja ne ditukankamija mu nyuma.

Pesha Yehowa bintu bitambe buimpe biudi nabi

Mmushindu kayi mukuabu utudi mua kusemena kudi Nzambi? Mukalenge udi utuambila ne: “Tumbisha Yehowa ne biuma biebe ne mamuma a kumudilu a mu madimi ebe.” (Nsumuinu 3:9)  Kutumbisha Yehowa kudi kumvuija kumunemeka ne kumutumbisha munkatshi mua bantu pa kumanyisha dîna diende ne kukuatshisha mudimu eu. Bintu bietu bia mushinga bitudi tutumbisha nabi Yehowa n’dîba dietu, mamanya etu, makanda etu ne bintu bietu. Ebi ke bidi ne bua kuikala mamuma a kumudilu​—bintu bitambe buimpe bitudi nabi. Mushindu utudi tuenza mudimu ne bintu bietu kawenaku mua kuleja dipangadika ditudi nadi dia ‘kukeba diambedi bukalenge ne buakane bua Nzambi’ anyi?​—Matayo 6:33.

Kabakupanga kutufuta patudi tutumbisha Yehowa ne bintu bietu bia mushinga nansha. Solomo udi utujadikila ne: ‘Nunku mayeba ebe neûle tente ne bintu bia bungi, bikaminu biebe nebipongolole mvinyo mipiamipia.’ (Nsumuinu 3:10) Nansha mudi bubanji bua mu nyuma nkayabu kabuyi butufikisha ku bubanji bua ku mubidi, difila ne kalolo bintu bietu bua kutumbisha Yehowa didi ditutuadila mabenesha a bungi. Kuenza disua dia Nzambi kuvua “tshiakudia” tshivua tshikolesha Yezu. (Yone 4:34, MMM) Bia muomumue, kudifila mu mudimu wa diyisha ne dienza bayidi udi utumbisha Yehowa kudi kutudiisha mu nyuma. Bituananukila mu mudimu au, mayeba etu a mu nyuma neuwule tente ne bintu. Disanka dietu, difuanyikija ne mvinyo mupiamupia, nedivule kuya ne kua tshianana.

Katuenaku kabidi tutangila kudi Yehowa ne tumulomba bua atupeshe biakudia bikumbane bia dituku dionso anyi? (Matayo 6:11) Bushuwa tshintu tshionso tshitudi natshi ntshia kudi Tatuetu wa mu diulu udi mutunange. Yehowa neatupongoluele mabenesha makuabu a bungi bilondeshile mutudi tutula bintu bia mushinga bitudi nabi bua kumutumbisha.​—1 Kolinto 4:7.

Itaba dinyoka dia kudi Yehowa

Mumanye mushinga wa dinyoka bua kushemeja bulunda ne Yehowa, mukalenge wa Isalele udi utubela wamba ne: ‘Muananyi, kupetudi [“dinyoka,” MMM] didi Yehowa ukuyisha nadi, kubela kuende kakukutondi. Bualu bua Yehowa udi ubela udiye munange, bu mudi tatu ubela muanende mulume udi umusankisha.’​—Nsumuinu 3:11, 12.

Kadi bidi mua kutukolela bua kuitaba dinyoka. Mupostolo Paulo wakafunda ne: “Diba didibo banyoka muntu, dinyoka didi dimueneka bu bualu bua dibungama, kabuyi bua disanka. Kadi pashishe, didi dipetesha bavua badipete tshimuma  tshia bupole ne buakane.” (Ebelu 12:11, MMM) Mibelu ne dinyoka bidi ne bua kuikala tshitupa tshia dilongesha didi ditusemeja pabuipi ne Nzambi. Padi Yehowa utululamija​—ni ku butuangaji bua baledi betu, peshi bua tshisumbu tshia bena Kristo anyi patudi tuelangana meji pa Mifundu mu didilongela dietu—​bidi bileja mudiye mutunange. Tudi tuleja meji pa kuitaba dilongesha edi.

Katulekeledi meji ne busunguluji

Pashishe, Solomo udi ushindika mushinga wa meji ne busunguluji bua kushemeja malanda ne Nzambi. Udi wamba ne: “Muntu mupete meji, muikale kabidi ne [“busunguluji,” NW], ngwa diakalenga. Mbimpe kupeta meji pa mutu pa kupeta biuma, tshiuma tshia kudi meji ntshipite mpawungi ku mushinga. . . . Meji mmutshi wa muoyo bua muntu yonso udi uapeta, muntu udi nawo udi upeta diakalenga.”​—Nsumuinu 3:13-18, MMM.

Muikale utuvuluija meji ne busunguluji bidi bimueneka mu bintu bilengele bidi Yehowa mufuke, mukalenge udi wamba ne: ‘Yehowa wakafuka buloba ne meji ende; wakajadika bia mu diulu ne [“busunguluji,” NW]. . . . Muananyi, malu aa kaumuki ku mêsu kuebe; ulame meji adi akukuatshisha, ne bukole bua kupangidija malu. Nunku nebikale muoyo ku mutshima webe ne tshilenga mu nshingu muebe.’​—Nsumuinu 3:19-22.

Meji ne busunguluji nngikadilu milenga. Katuena anu ne bua kuyipeta, kadi tudi kabidi ne bua kushala nayi katuyi tulengulula bua kulonga Mifundu ne tshisumi ne kutumikila malu atudi tulonga. Solomo udi utungunuka wamba ne: ‘Pashishe, newende mu njila webe kuyi ne ditshina, dikasa diebe kadiena dilenduka.’ Udi usakidila ne: ‘Pawalala panshi, kuena utshina; bulelela, pawamana kulala panshi, tulu tuebe netuikale tuimpe.’​—Nsumuinu 3:23, 24.

Eyowa, tudi mua kuenda katuyi tutshina ne tulala ne lungenyi lutalale, bindile dituku dia “dibutuka dia tshintuluntulu” dia bukua-panu bubi bua Satana dialua bu muivi. (1 Tesalonike 5:2, 3; 1 Yone 5:19) Nansha mu dikenga dinene dikadi pabuipi, tudi mua kuikala ne dishindika edi: ‘Kutshinyi buôwa budi bulua kuudi lukasa, anyi kubutuka kua bantu babi pafikaku kudibu. Bualu bua Yehowa neikale tshieyemenu tshiebe, nealame dikasa diebe bua kadikuatshibu mu buteyi.’​—Nsumuinu 3:25, 26; Matayo 24:21.

Enza malu mimpe

Solomo udi utubela wamba ne: ‘Kupadi bantu tshintu tshimpe, badi bakumbane bua kuikala natshi, pawikala ne bukole bua kubapatshi.’ (Nsumuinu 3:27) Kuenzela bakuabu malu mimpe kudi kumvuija kubapesha bitudi nabi ne kalolo, ne tudi mua kuenza nunku mu mishindu ya bungi. Kadi kuambuluisha bakuabu bua kudiabu malanda makole ne Nzambi mulelela kakuenaku tshintu tshitambe buimpe tshitudi mua kubenzela mu ‘tshikondo etshi tshia ku nshikidilu’ anyi? (Danyele 12:4) Nunku, aa ke matuku a kuikala ne lukunukunu mu mudimu wa diyisha Bukalenge ne dienza bayidi.​—Matayo 28:19, 20.

Mukalenge wa meji udi utela kabidi amue malu atudi ne bua kuepuka, wamba ne: “Paudi ne tshintu, kuambidi mukuenu ne: ‘Anji kuya, upingane makelela, nenkupeshe.’ Kuedi meji a kuenzela mukuenu bibi, padiye muteke muoyo wende kuudi. Kutandi ne muntu tshianana, kayi mukuenzele bualu bubi. Kujingi diakalenga dia muntu mubi, kulondi njila yende nansha.”​—Nsumuinu 3:28-31, MMM.

Bua kuleja mu tshikoso tshidiye ufidila mibelu eyi, Solomo udi wamba ne: ‘Bualu bua Yehowa udi ukina muntu udi ne tshishiku, kadi bunyana buende budi kudi badi ne mitshima miakane. Mulawu wa Yehowa udi mu nzubu wa bantu babi, kadi udi uvudijila nzubu wa bantu bakane disanka. Udi ubuidia babuidi, kadi udi uleja badi bapuekele luse. Bena meji nebapiane butumbi, kadi bundu budi bumpianyi bua bapote.’​—Nsumuinu 3:32-35.

Bua tuetu kushemeja bulunda ne Yehowa, katupangadiji mu mutshima wetu bua kuenza malu mabi nansha. (Nsumuinu 6:16-19) Nzambi neatuanyishe ne neatubeneshe anu bituikala tuenza malu adi makane ku mêsu kuende. Bantu badi mua kututumbisha padibu bamona ne: tudi tuenza malu adi mumvuangane ne meji a Nzambi. Nunku, katubuedi mu njila mikonyangale ya bukua-panu ebu bubi ne bua tshinyangu. Bushuwa, tuikale ne nsombelu mululame ne tushemeje bulunda ne Yehowa!

[Bimfuanyi mu dibeji 25]

“Tumbisha Yehowa ne biuma biebe”