Udi mua kumanya malu atshilualua!

Bantu ba bungi batu bela meji bikole bua matuku atshilualua. Batu basue kulongolola malu, kulama mfranga ya kudiambuluisha nayi ne meji. Kadi kudiku mushindu wa kujadika tshienzeka makelela anyi?

BANTU mbatete ne ngenzelu ya mishindu yonso bua kumanya malu atshilualua. Bamanyi ba malu a nsombelu wa bantu badibu babikila ne: balongi ba malu atshilualua batu bakonkonona malu adi enzeka mpindieu ne bashindamenapu bua kumanyisha atshilualua. Ke mudi bamanyi ba malu a mpetu benza pabu. Bantu ba bungi batu bitaba malu atubu babambila kudi bena lubuku lua mitoto, batempi ba mbuku, bena lubuku lua lumuenu ne bena malu a majimbu. Tshilejilu, Nostradamus, muena lubuku lua mitoto wa bena France, mmumanyike bikole too ne lelu’eu nansha mukadiye mufue kukadi nkama ya bidimu.

Mbilue kumueneka se: bantu bonso aba bavua bajinga bua kuikala baprofete ki mba kutekela muoyo to, bualu mbelangane mâyi ku makasa. Bua tshinyi? Bualu kabena bangata Yehowa Nzambi ne Bible ne mushinga. Ke bua tshinyi ki mbakumbane bua kuandamuna nkonko minene bu mudi eyi: ‘Bua tshinyi ndi mua kujadika ne: malu madianjila kumanyisha mu Bible neenzeke? Mmunyi mudiwu akumbana bua bantu bilondeshile mudi Nzambi mulongolole? Mmunyi mudi dîku dianyi ne meme muine mua kupetela masanka ku milayi eyi?’ Bible udi wandamuna nkonko eyi.

Milayi ya mu Bible idi kabidi ne mushinga wa bungi mu mishindu mikuabu. Mishilangane ne malu mamanyisha kudi bena lubuku lua mitoto, milayi ya mu Bible idi ipesha muntu budikadidi bua kudisunguila malu. Nunku, kakuena udi witaba lungenyi lua se: malu onso adi enzeka adi enzeka anu mukavuabu baafunde to. (Dutelonome 30:19) Malu bu mudi aa avua Nostradamus mufunde kaena ne dikuatshisha ne mianda idimu idi ipampakaja bantu ne mmakole bua kuajandula. Kadi milayi ya mu Bible idi ne malu malenga atudi tukengela. Idi yumvuija bua tshinyi Nzambi neenze malu anu mushindu udiye mulongolole. (2 Kulondolola 36:15) Ne milayi ya Yehowa kayitu yela panshi to, bualu ‘Nzambi kêna mua kudinga.’ (Tito 1:2) Ke bua tshinyi bantu badi Dîyi dia Nzambi dilombola badi ne nsombelu mulenga udi usankisha, ne kabena bajimija dîba ne bintu biabu bia mushinga mukole bua malu a patupu to.​—Musambu 25:12, 13.

Bavua bakonkonone malu aa ne makuabu a bungi mu Mpungilu ya Distrike ya “Dîyi dia mulayi dia Nzambi” ya mu tshidimu tshia 1999 ne tshia 2000 ivua Bantemu ba Yehowa benze pa buloba bujima. Miyuki, diela bantu nkonko, manaya a tshilejilu ne drama wa mu Bible bivua bikoke ntema ya bateleji ku bumpianyi bulenga bua mu nyuma budi nabu bantu badi balonga ne batumikila dîyi dia mulayi dia Nzambi. Tshiena-bualu tshidi tshilonda netshikonkonone amue malu manene a mu mpungilu au atusankisha.