Bamanyishi ba Bukalenge badi balonda

Badi bambuluisha bantu ba mishindu yonso mu Pays-Bas

ABALAHAMA uvua muntu wa ditabuja dikole dia dikema. Mupostolo Paulo wakamba ne: Abalahama, ‘pakabikidibuaye,’ wakatumikila dîyi dia Nzambi ne ‘wakalopoka kayi mumanye kuakadiye uya.’ Mumane kumuangala ne dîku diende dijima, Abalahama “wakashikama mu buloba bua mulayi; bu udi mu buloba bua bende” mu bidimu lukama biakalonda.​—Ebelu 11:8, 9.

Bia muomumue lelu’eu, Bantemu ba Yehowa ba bungi mbitabe bua kuya mu ditunga dikuabu bua kuambuluisha muaba udi dijinga dinene. Banga mbalonge muakulu mukuabu bua kumona mua kuyisha benyi badi balue kusombela mu ditunga diabu. Anu mudi bilejilu bidi bilonda ebi bileja, lungenyi lulenga elu ndunzulule “tshibi tshinene ne [bua] kuenza mudimu mukole” mu Pays-Bas mudi bantu muliyo mujima wa ku bantu bonso miliyo 15 badi basombelemu bafumine mu matunga makuabu.​—1 Kolinto 16:9.

▫ Bahram, mulongeshi wa kale wa dinaya dia ditutangana miseba (Kung Fu), wakafumina mu ditunga kampanda ku Proche-Orient. Wakapeta Bible ne imue mikanda ya Bantemu ba Yehowa. Mu ngondo umuepele Bahram wakafika ku dijadika se: mmupete bulelela. Bakatuadija kubalongesha yeye ne mukajende, kadi kuvua lutatu, mulongeshi wabu wa Bible kavua wakula muakulu wabu to. Bavua bayikila ku diambuluisha dia bimanyinu, buobu bine bakamba ne: bavua bakula “ne bianza ne makasa.” Kunyima kua matuku, Bahram ne mukajende bakamanya muaba uvua tshisumbu tshivua tshienza bisangilu mu muakulu wabu, ne pashishe bakaya kumpala mu nyuma ne lukasa luonso. Bahram udi mpindieu Ntemu mutambule.

▫ Muanetu wa balume ne mukajende bampanda-njila ba mu Pays-Bas bakayikila ne muntu mukuabu wa mu ditunga dia Indonésie uvua muimane kumpala kua makazen manene. Wakakema ne kusanka pakabumvuaye bamuakuisha mu muakulu wende. Anu pine apu bakapunga dîyi bua kuya kumutangila kuende. Bana betu aba bakafika ku dimanya ne: muntu eu uvua muenze bidimu bipite pa 20 mu ditunga dia Russie, ne kulonga tshikondo atshi mudimu wa diondapa masama a bantu bakaji. Kumpala uvua wamba muvua Nzambi kayiku, kadi kunyima wakitaba ne: misangu yonso ivuaye ulelesha bakaji, uvua ukatshila wamba ne: “Mubidi wa muntu mmuenze bilenga bia dikema! Etshi ntshishima!” Wakanyisha bua kulonga Bible ne kunyima kua katupa kîpi wakatuadija kuitaba ne: kudi Mufuki udi ukuba bantu bonso. (1 Petelo 5:6, 7) Mpindieu ukadi muanetu mutambule ne udi mu tshisumbu tshia muakulu wa bena Indonésie ku Amsterdam.

▫ Ku Rotterdam, tshimue tshia ku bitudilu binene menemene bia mazuwa a mâyi bidiku pa buloba, bampanda-njila tshisumbu mbalue kumanya bimpe mushindu wa kuyisha bantu badi bakula miakulu mishilashilangane batu balua dituku dionso muaba eu. Bua mudimu wakenzabu kudi bamanyishi aba ba musangelu, benji ba ngendu ku mazuwa ba bungi, ne muendeshi wa mazuwa umue, musalayi umue wa ku tshitudilu ne muntu mukuabu uvua mulami kale, mbitabe bulelela. Mpindieu badi pabu bamanyisha lumu luimpe lua Bukalenge bua Nzambi pa buloba bujima.​—Matayo 24:14.

Anu mutubi mu bitupa bikuabu bia buloba, Bantemu ba Yehowa ba mu Pays-Bas mbapangadije bua kumanyisha lumu luimpe lua tshiendelele mu tshisamba tshionso, tshisa, muakulu ne bantu bonso.​—Buakabuluibua 14:6.