Bantu ba bitupa, kadi bikale ne muoyo wa kalolo

BU WEWE muikale bule bua santimetre 76 patupu, ntshinyi tshiudi mua kumvua paudi wambila bantu baudi kuyi mumanye malu a Bukalenge bua Nzambi? Laura udi mua kukumvuija bualu ebu. Udi ne bidimu 33, kadi tangila bule budiye: santimetre 76 patupu. Yeye ne muanabu wa bakaji María, udi ne bidimu 24 ne bule bua santimetre 86, mbasombele mu tshimenga tshia Quito, mu ditunga dia Équateur. Imana bakulondele ntatu itubu bapeta mu buambi.

“Bua kuya mu buambi ne mu bisangilu, tudi tuenda ku makasa mutantshi wa metre matue ku 500 bua kuangata bise. Kumbukila muaba udi bise uya kututuluila, tudi tuenda kabidi ku makasa mutantshi wa metre matue ku 500 bua kuangata bise mukuabu. Diakabi, mu njila au mutu mbua itanu ya lonji. Mbua eyi itu itutshinyisha bikole bualu tutu tuyimona bu idi bunene bumue ne nyama ya tubalu. Patudi basue kuyipata, tutu tuambula mutshi, tuusokoka muaba kampanda mu njila kumpala kua tuetu kuangata bise bua kuipata nawu mbua ayi mu dipingana ku nzubu.

“Mbualu bukole bua tuetu kubuela mu bise. Tutu tuimana pa kakunakuna ka mushiki wa bintu bia butshiafu kadi muaba utu mashinyi imanyina bua tuetu kumona mua kubuelamu kakuyi lutatu. Bamue ba-kanyemesha batu basemeja mashinyi pabuipi ne kakunakuna aka, kadi bakuabu kabatu benza nanku to. Patubu babenga kusemeja mashinyi pabuipi ne kakunakuna aku, wa kutudi udi mule udi wambulula wa tshitupa bua kubuela mu bise. Bua tuetu kuangata bise mukuabu bitu bikengela kusambuka njila munene utu ne mashinyi a bungi; eu mmuanda udi ututatshisha kabidi bikole bualu mikolo yetu mmîpi menemene. Bu mutudi bantu ba bitupa, kuambula tshibuta tshia mikanda tshia bujitu ndutatu lukuabu. Bua tshibuta kuikalatshi tshipepele, tutu tuelamu Bible wa bunene bua mpaya ne tukepesha bungi bua mikanda.

“Katshia ku buana buetu, katuvua tutamba kuakuisha bantu to. Bena mutumba betu bavua bamanye ne: tuvua tutshina bua kuakula ne bantu batudi katuyi bamanye. Kadi badi bakema bikole padibu batumona mpindieu tukokola ku nzubu yabu, ne pa tshibidilu batu batuteleja bimpe. Kadi miaba idibu kabayi batumanye bimpe, bantu batu bamona anu ne: tudi njeku; ke bua tshinyi kabatu batamba kuteleja mukenji utudi tubatuadila mudibi bikengela. Nansha nanku, patudi tumona mushindu udi Yehowa mutunange, tudi tupeta dikima dia kutungunuka ne mudimu wetu wa buambi. Patutu tuvuluka mêyi adi mu Nsumuinu 3:5, 6, dikima ditu kabidi dituvuila.”

Amu mudi Laura ne María baleja, kunanukila nansha tuetu ne bulema kampanda bua ku mubidi kudi mua kutumbisha Nzambi. Mupostolo Paulo wakalomba Nzambi bua amumbushe “dieba mu mubidi” wende, pamu’apa tshivua bulema kansanga. Kadi Nzambi wakamuambila ne: “Bulengele buanyi mbukuakanyine, bualu bukole buanyi  budi bumueneka padi butekete.” Bushuwa, bua tuetu kumona mua kusadila Nzambi kabiena anu bilomba bua kuanjibu kujikija bulema butudi nabu to. Tuetu beyemene Nzambi ne muoyo mujima, tudi mua kuenza malu mimpe menemene nansha tuetu bikale mushindu kayi. Bu muvua Paulo ne lungenyi elu bua “dieba [divua] mu mubidi” wende, wakamba ne: “Pandi ne butekete ke pandi ne bukole.” (2 Kolinto 12:7, 9, 10, MMM) Kunyima kua bidimu ndambu, Paulo wakafunda ne: ‘Ndi mumanye mua kuenza malu onso mu Mukalenge udi unkolesha.’​—Filipoi 4:13.

Mu bikondo bietu ebi, Nzambi udi ukumbaja mudimu munene ku butuangaji bua balume, bakaji ne bana badi badifile kudiye ne muoyo mujima. Bamue badi ne bulema kampanda. Nansha mudibu batekemene bonso bua Nzambi abondope mu Bukalenge buende, ki mbashale bavunge maboko too ne padi Nzambi ujikija ntatu yabu bua kushishabu kumuenzela mudimu to.

Udiku ne butekete kampanda bua ku mubidi anyi? Kolesha muoyo! Ditabuja diebe didi mua kukuambuluisha bua kuikala munkatshi mua bantu badi bafuane Paulo, Laura ne María. Bua bualu buabu, tudi mua kuamba amu muakambabu bua balume ne bakaji ba ditabuja ba mu bikondo bia kale ne: “Mu butekete bakandamuka bakole.”​—Ebelu 11:34.

[Bimfuanyi mu dibeji 8]

María

Laura

[Tshimfuanyi mu dibeji 9]

María udi wambulula Laura bua kubuela mu bise

[Bimfuanyi mu dibeji 9]

‘Mbua eyi itu itutshinyisha bikole bualu tutu tuyimona bu idi bunene bumue ne nyama ya tubalu’

Kuinshi: Laura ne María ne bantu badibu balongesha Bible