Kupinganyi muaba wa njiwu!

MUDIMU wa bashikuluji ba malu a mikuna itu iluka kapia utu wa kukenketa ne kulonga bimanyinu ne pashishe kudimuija bantu. (Diakamue pakatudika mukuna wa Fugen, bampulushi bakakandika bantu bua kabapinganyi muaba uvua njiwu.) Bia muomumue, balongi ba Bible badi bakenketa tshimanyinu tshia ‘nshikidilu wa tshikondo etshi’ ne badimuija bantu nabu bua njiwu idi yenda isemena.​—Matayo 24:3.

Mu nshapita muine eu wa mu Bible mudibu badimuija bua disemena dia tshipupu tshia buloba bujima mbumvuijemu kabidi malu adianjila kuenzeka bamba ne: ‘Tshisamba tshikuabu netshiluangane ne tshinga, bukalenge bukuabu nebuluangane ne bunga, biyole nebikaleku ne buloba nebukanke ku nseke ne ku nseke. Baprofete badi ne mashimi ba bungi nebabike, nebapambuishe ba bungi. Dinanga dia ba bungi nedikepe, bualu bua tshishiku tshiakudiunda munda muabu. Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’​—Matayo 24:7-14.

Kabiena bikengela kuikala bakonkononyi ba ngumu ya malu adi enzeka bua tuetu kujingulula dikumbana dia mulayi eu lelu to, bualu katshia nangananga mu 1914, tudi bamone mudiwu ukumbana. Mu lukama lua bidimu lushale elu nkuenzeke mvita ibidi ya buloba bujima, mvita mivule ya bena ditunga, ya basalayi buobu pa buobu, ne ndululu pankatshi pa bisa ne bitendelelu. Biyole bia nzala bikebesha kudi mvita eyi mbikengeshe bantu bikole, kusangisha ne mikuabu ntatu idi bipupu bia ku bintu bifuka bikebeshe. Bikumina mbishipe bantu ba bungi. Baludiki ba bitendelelu bidiku lelu ki mba kueyemena ne batendeledi badimu mbena bitabataba. ‘Didiunda dia tshishiku’ ndifikishe bantu ku dibula dinanga, ne kakutshiena muntu udi dijinga ne bena mutumba nende.

Kadi mudimu wa buambi (udi muikale tshitupa tshikuabu tshia tshimanyinu etshi) udi wowu wenzeka pa buloba bujima. Tangila pa tshizubu tshia tshibejibeji etshi, neumone miaku eyi: “Tshidi tshimanyisha Bukalenge bua Yehowa.” Tshibumba tshia Nsentedi, tshipatula mu miakulu 132 ne mu bungi bua miliyo mipite pa 22, ke  tshiamu tshinene tshia mudimu bua bantu badi bamanyisha ‘lumu luimpe elu lua bukalenge’ pa buloba bujima. Mu lumu luimpe elu mudi mukenji wa se: Yehowa Nzambi Mufuki wa bionso, mmujadike mu diulu Bukalenge buabutula ndongoluelu eu mubi wa malu ne bualua ne mparadizu pa buloba. Bulelela, tshimanyinu tshidi tshileja ne: mu tshitupa tshîpi emu Nzambi ukadi pa kukumbaja malu aa ntshimane kumueneka, ne bidi bileja ne: mioyo ya bantu badi mu ndongoluelu eu wa malu idi mu njiwu.​—Tangila 2 Timote 3:1-5; 2 Petelo 3:3, 4; Buakabuluibua 6:1-8.

Dituku dia Yehowa didi dikuatshisha buôwa

Ntshinyi tshienzeka pakumbana tshikondo tshikala Yehowa ne bua kubutula bantu babi? Teleja mudiye umvuija malu enzeka tshikondo atshi: ‘Nendeje bantu malu a kukema mu diulu ne pa buloba: mashi, kapia ne mulanjilanji wa muishi. Dîba nedikudimuke mîdima ne ngondo neakudimuke mashi, diambedi dituku adi dinene dia Yehowa didi dikuatshisha bantu buowa kadiyi dianji kulua.’​—Yoele 2:30, 31.

Dituku adi dikadi pabuipi, dienzeka malu a kabutu adi akuatshisha buôwa kupita ditudika dia mukuna anyi dituta dia tshikumina. Muprofete Sefanya udi wamba ne: ‘Dituku dinene dia Yehowa didi pabuipi. Didi pabuipi ne didi didiendesha lukasa! Buloba buonso nebupie ku kapia ka mukawu wende. Bualu bua neabutule bantu bonso badi bashikame pa buloba ne dibutula didi dikuatshisha bantu buôwa.’ Nansha muikala ‘biamu biabu, nansha bia argent, peshi bia or, kabiyi mua kubapandisha mu dituku dia njiya ya Yehowa,’ kudi mushindu wa kupanduka mu dituku adi didi dikuatshisha buôwa.​—Sefanya 1:14-18.

Bua kupanduka, Sefanya udi wamba ne: ‘Diambedi tshiji tshikole tshia Yehowa katshiyi tshianji kufika kunudi; diambedi dituku dia tshiji tshia Yehowa kadiyi dianji kufika kunudi. Kebayi Yehowa, nuenu bena kalolo bonso ba pa buloba, kebayi buakane, kebayi kalolo; bumue nebanusokoke mu dituku dia tshiji tshia Yehowa.’ (Sefanya 2:2, 3) Tudi mua kupeta muaba wa kunyemena pa ‘kukeba Yehowa, buakane ne kalolo.’ Mbanganyi badi bakeba Yehowa lelu’eu?

Kakuyi mpata, paudi umvua batela “Yehowa” udi uvuluka Bantemu ba Yehowa bua mudimu wa diyisha utubu benza. Pamu’apa umue wabu ke udi mukupeshe tshibejibeji etshi. Mbamanyike mutubu bena-muabu ba tshitembu badi ne bikadilu bilenga. Batu badienzeja bua kuvuala “bumuntu bupiabupia” budi bubalomba kabidi bua kuikala ne kalolo. (Kolosai 3:8-10, NW) Mbajadike ne: bua kuvuala bumuntu bupiabupia ebu bidi bikengela babalongeshe kudi bulongolodi bua Yehowa budi bumueneka ne mêsu buleja mpala kudi bisumbu bia Bantemu ba Yehowa pa buloba bujima. Bushuwa, pamue ne Bantemu ba Yehowa ba miaba yonso, udi mua kunyemena munkatshi mua ‘bana betu badi batangalake pa buloba.’​—1 Petelo 5:9, MMM.

Peta muaba wa kunyemena mpindieu

Bua tuetu kupeta muaba wa kunyemena patudi tukeba Yehowa, mbimpe tuikale balunda bende. Mbuena kuamba tshinyi? Bible udi wandamuna ne: ‘Kanuena bamanye ne: bulunda bua malu a pa buloba budi ne Nzambi lukuna anyi? Nunku muntu yonso wasua kuikala mulunda wa malu a pa buloba, udi udivuija muena lukuna kudi Nzambi.’ (Yakobo 4:4) Bua tuetu kuikala balunda ba Nzambi, tudi ne bua kumbusha lungenyi luonso lua dilamata ku bukua-panu ebu bubi buenza ne bantu badi batombokele Nzambi.

Bible udi utubela ne: ‘Kanusu malu a pa buloba, anyi bintu bia pa buloba. Biasua muntu malu a pa buloba, dinanga dia Tatu kadiena munda muende. Bualu bua malu onso a pa buloba, lukuka lua mubidi, ne lukuka lua mêsu, ne kudisua kua muoyo, kaena mafume kudi Tatu, kadi adi mafume ku buloba. Buloba budi bujimina ne lukuka luabu kabidi; kadi yeye udi wenza mudi disua dia Nzambi udi ushalaku tshiendelele.’ (1 Yone 2:15-17) Lelu bantu ba bungi badi balonda majinga a mibidi yabu bu mudi: lukuka lua masandi, lukuka lua mfranga ne kuenza mudimu bibi ne bukokeshi. Kadi bua muntu kuikalaye ku luseke lua Yehowa, udi ne bua kulekela majinga aa.​—Kolosai 3:5-8.

Pamu’apa utu ubala bibejibeji bietu ku musangu ne ku musangu ne udi mua kuikala muanyishe mushindu udibi biumvuija milayi ya mu Bible. Imue misangu udi mua kuelakana bua kutuadija kudisanga ne Bantemu ba Yehowa. Kadi anji kuamba tung: tshipupu tshiotshi tshilua, bidi bikengela kumvua patupu didimuija anyi? Anu  mutudi mua kubimuena ku ditudika dia Mukuna wa Fugen, tudi ne bua kutumikila malu adibu batudimuija nawu. Vuluka ne: ba-kamona-kamba ne bakuatshi ba foto batue ku 15 bavua basue kupeta malu a kuambila bantu bakajimija mioyo yabu. Bua kumanya, mukuatshi wa foto umue wakafua ne munu pa mbote wa tshiamu tshiende tshia foto. Munga mushikuluji wa malu a mikuna itu iluka kapia wakafua anu muvuaye ujinga, bualu uvua mudianjile kuamba ne: “Meme ne bua kufua dimue dituku, ndi musue kufuila ku lusongo lua mukuna udi uluka kapia.” Buonso buabu bavua badifile mu mudimu ne kipatshila kampanda. Kadi bakafua bualu bavua babenge kuteleja didimuija.

Lelu’eu, bantu ba bungi batu bumvua mukenji udi utangila dipangadika dia Yehowa dia kubutula ndongoluelu eu mubi wa malu ne mbamanye ne: didimuija edi ndilelela. Pamu’apa badi mua kuela meji ne: ‘kabutu aka nekalue anu kulua, kadi ki mpindieu to.’ Badi basemeja dituku dia Yehowa kule bua kumonabu mua kulonda malu adi amueneka ne mushinga wa bungi ku mêsu kuabu.

Baluka uvua pende ne lutatu lua mushindu’eu. Bu muvuaye mufundi wa malu avua muprofete Yelemiya umanyisha, wakadimuija bena Isalele ne dikima bua kabutu ka Yelushalema kavua kalua ne lubilu. Kadi musangu mukuabu mudimu wende wakamutonda. Ke Yehowa kumululamija lungenyi wamba ne: ‘Wewe udi udikebela malu manene. Kudikebediwu nansha.’ Baluka kavua ne bua ‘kudikebela malu manene’ to, ni mbiuma, lumu anyi bubanji. Uvua ne bua kukeba bualu bumue: kuenza disua dia Nzambi pa kuambuluisha bantu bua kulamata ku luseke Luende. Nenku uvua mua kupeta ‘muoyo wende bu tshintu tshivuaye munyenge mu mvita.’ (Yelemiya 45:1-5) Bia muomumue, pamutu pa ‘tuetu kukeba malu manene,’ tudi ne bua kukeba Yehowa bua tuamona mua kupandisha mioyo yetu.

Ku Mukuna wa Fugen, bampulushi ne bena budisuile bajimi ba tupia bapite pa 12 bavua munkatshi mua mudimu pakabakuata bitotshitotshi bia mudilu mukole biakafumina ku mukuna eu. Bavua bakeba kuambuluisha ne kukuba bantu bavua mu njiwu. Bavua anu mutu bantu ba meji mimpe badi badituta eku ne kuaka bua kulongolola nsombelu udi pa buloba apa. Nansha buobu ne bipatshila bimpe bia mushindu kayi, “tshintu tshikonyangale kabena mua kutshilulamija kabidi.” (Muambi 1:15, MMM) Bantu kabena mua kululamija ndongoluelu eu wa malu mukonyangale to. Mbimpe kudienza ‘mulunda wa malu a pa buloba’ pa kukeba bua kupandisha ndongoluelu udi Nzambi mufundile kabutu anyi?

Wewe mumane kunyema, kupinganyi kabidi

Kunyema ndongoluelu eu udi mu njiwu mbualu pa bule, kadi kushala mu bukubi munkatshi mua ‘bana betu ba mu Kristo’ mbualu bukuabu. (1 Petelo 2:17) Katupu muoyo babidime bakapingana kabidi bua kutangila madimi abu pabuipi ne mukuna wa Fugen, pabi bakavua bamane kunyema. Pamu’apa bavua basue kupingana ku malu abu a “pa tshibidilu.” Kadi dipangadika diabu dia kupingana kadivua dia meji nansha. Pamu’apa awu kauvua musangu wa kumpala uvuabu babuele mu tshitupa etshi tshia njiwu to. Bavua mua kuikala babuele mu tshitupa etshi tshia njiwu bua katantshi kakese kakuyi bualu nansha bumue buenzeke. Musangu wakalonda, bavua mua kuikala bashale muaba au mutantshi mule ndambu, kadi kakuyi bualu buenzeke. Bumue bakabanga kusambuka mukalu uvuabu bele ne bakapeta dikima dia kunenga mutantshi mule muaba au.

Yezu Kristo wakakula bua bualu bua muomumue buvua ne bua kuenzeka ‘ku nshikidilu kua tshikondo etshi.’ Wakamba ne: ‘Pa matuku au, mvula ya bungi kayiyi mianji kulua, bantu bakadi badia, bakadi banua, bakadi babaka, bakadi babakibua too pakalua dituku diakabuela Noa mu buatu bunene, kabakamanya bualu too ne pakalua mvula ya bungi kubabutula; kulua kua Muana wa muntu nekuikale nunku.’​—Matayo 24:3, 38, 39.

Mona ne: Yezu wakatela kudia, kunua ne kusela anyi kusedibua. Ku bintu ebi kakuena tshidi tshibi ku mêsu kua Yehowa to. Kadi tshilema tshivua penyi? Bantu ba mu tshikondo tshia Noa “kabakamanya bualu,” bavua bashindamene anu pa malu abu a pa tshibidilu. Padiku muanda wa njiwu, muntu kêna ne mushindu wa kuenza malu ende a “buatshia buila” nansha. Wewe mumane kunyema anyi kuditapulula ne ndongoluelu eu mufundila kabutu, udi ne bua kuluisha dijinga dionso didi dikusaka bua kupinganamu  bua kupeta tshintu tshionso tshiudi mua kuangulamu. (1 Kolinto 7:31) Udi mua kuikala ne mushindu wa kuya kuendakana pambelu pa muaba uudi mu bukubi bua mu nyuma ne kupingana kakuyi bualu bukufikile peshi kakuyi muntu nansha umue udi mumanye bualu ebu. Kadi kuenza nanku kudi mua kukupesha dikima ne kukusaka bua kupingana mu bukua-panu, kushalamu mutantshi mule ndambu. Nanku udi mua kulua kupeta meji a se: “Nshikidilu kakulua lelu to.”

Vuluka kabidi bendeshi ba taksi basatu bakafua pavuabu bindile ba-kamona-kamba ne bakuatshi ba foto pakasompoka bitotshitotshi bia mukuna eu mu tshibadi tshiawu. Lelu bamue bantu badi mua kuya kufila bakuabu badi ne dikima dia kupingana mu bukua-panu. Nansha kuoku kuikale kabingila kayi, mbiumvuike ne: kulekela bantu batufikisha ku dipingana muaba wa njiwu kakuena kutukuba ku njiwu to.

Bantu bonso bakafua pakaluka Mukuna wa Fugen kapia bavua basambuke mukalu uvuabu bele bua kukuba bantu ne bakabuela mu tshitupa tshia njiwu. Nansha muvuabu batekemene ne: mukuna au uvua mua kutudika dimue dituku, muntu nansha umue kavua muele meji ne: bivua mua kuenzeka dituku adi to. Padibu bamona tshimanyinu tshia nshikidilu wa ndongoluelu eu wa malu, bantu ba bungi mbamanye ne: dituku dia Yehowa nedilue anu kulua kadi pamu’apa ki mpindieu menemene to. Bamue badi mene bela meji ne: dituku adi kadiena mua kuikala “lelu” to. Bushuwa, lungenyi lua mushindu eu ludi lufikisha ku njiwu.

Mupostolo Petelo wakadimuija ne: “Dituku dia Mfumu nedifike bu muivi.” Tudi ne bua kuikala badimuke, ‘bindile dituku dia Mfumu, tujinga bua difike lukasa,’ tuenza muetu muonso mua kuenza bua ‘tuikale katuyi katoba, katuyi kalema, bua batusangane basombe mu bupole.’ (2 Petelo 3:10-14, MMM) Kunyima kua kabutu ka ndongoluelu eu mubi wa malu, buloba nebuandamuke mparadizu mu Bukalenge bua Nzambi. Muoyo kautushimi nansha kakese bua kupingana kabidi mu tshitupa tshia njiwu bua muanda kayi wonso to, bualu anu dituku ditudi tusambuka mukalu bua kupingana mu bukua-panu ebu ke didi mua kuikala dituku dia Yehowa.

Nyemena muaba udi bantu ba Yehowa ne ushale musombe nabu.

[Bimfuanyi mu dibeji 7]

Nyemena muaba udi bantu ba Yehowa ne ushale musombe nabu

[Mêyi a dianyisha bua tshimfuanyi mu dibeji 4]

Iwasa/​Sipa Press