Teleja didimuija!

BUMM! Mu ditunga dia Japon, mu dia 3 ngondo muisambombo wa tshidimu tshia 1991, mukuna wa Fugen wakaluka lubungibungi lua muishi ne kusompola mushiki wa butu ne mukungulu mukole. Bitotshitotshi bia luya lukole biakapuekela mu tshibadi tshiawu. Ditudika dia mukuna edi diakashipesha bantu 43. Bantu bakapanduka bavua bapie bikole. Bamue bakela mbila bamba ne: “Mâyi, mâyi, bakuetu.” Bajimi ba midilu ne bampulushi bakaya ne tshipapu bua kubambuluisha.

BANTU bakavua bamone bitotshitotshi bisambakane ne mabue ku lusongo lua mukuna eu wa Fugen mbingu bu ibidi kumpala, ke bualu kayi bamfumu ne bantu bavua basombele muaba eu bavua bashale badimuke. Lumingu lujima ne ndambu wa matuku kumpala kua bualu ebu kuenzeka, bavua badimuije bantu bua kumbuka muaba au. Dituku dimue kumpala kua mukuna eu kutudikawu, bampulushi bakakandika ba-kamona-kamba bua kabayi muaba eu to. Nansha nanku, bantu 43 bakafua dilolo adi bavua muaba wa njiwu.

Bua tshinyi bantu ba bungi nunku bakadiela mu njiwu, ne bua tshinyi bavua bashale muaba eu? Bamue babidime bakavua banyeme bakatua ntshinta e kupingana bua kutangila bintu ne madimi abu. Bashikuluji basatu ba malu a mikuna itu iluka kapia bakasemena pabuipi menemene ne mukuna eu bua kujadika bimpe malu avuabu balonge. Ba-kamona-kamba ne bakuatshi ba foto ba bungi bakasambuka mikalu ivuabu bele bualu bavua basue kudimuena mutu mukuna uluka kapia. Bendeshi ba taksi basatu bavuabu bangate kudi ba-kamona-kamba bavua pabu muaba au. Bampulushi ne bena budisuile bajimi ba tupia bavua bambule bia-mudimu biabu. Muntu yonso uvua ne tshiende tshivuaye muyile muaba au wa njiwu, kadi bakafua bonso.

Udi muaba wa njiwu anyi?

Pamu’apa tuetu bonso katuena pabuipi ne mukuna kampanda udi uluka kadilu to. Kadi ntshinyi tshitudi mua kuenza bituikala kumpala kua tshipupu tshiakuata buloba bujima, tshiavuija muaba wonso utudi bu wa njiwu? Mukanda utu muikale mpokolo wa milayi ya kueyemena udi utudimuija bua dilua dia tshipupu tshia buloba bujima ne udi umvuija muenzekatshi ne: ‘Dîba nedifikuluke, ngondo kêna ukenka, mitoto neituke muulu, neyipone, nebanyukule bukole buakadi buendesha  bintu ebi mu diulu; bisamba bionso bia pa buloba nebidile.’ (Matayo 24:29, 30) Apa badi bumvuija mianda ya muulu yenzeka miaba yonso ne yakuata ‘bisamba bionso bia pa buloba.’ Mmumue ne: mulayi eu udi wakula bua tshipupu tshialenga muntu yonso.

Mukanda eu udi ne milayi ya kueyemena m’Bible. Tumanye ne: malu adi mu mvese idi pabuipi ne utukadi bamane kutela eu adi atusulakajila mianda yafikisha ku kabutu kenzeka pa buloba bujima. Anu muvua lusongo lua bitotshitotshi bivua bisambakane ne mabue pamue ne bimanyinu bikuabu bia mukuna eu bipeshe balombodi ba mu tshimenga tshia Shimabara bijadiki bia se: bavua mu muaba wa njiwu, Bible udi utupesha pende bijadiki bidi bitulomba bua kushala batabale ne badilongolole bua kupanda. Muanda wa dibungama wakenzeka ku mukuna wa Fugen udi mua kutulongesha ne kutuambuluisha bua kujingulula bukole bua malu enzeka kumpala eku.

 [Mêyi a dianyisha bua tshimfuanyi mu dibeji 2]

TSHIZUBU: Yomiuri/​Orion Press/​Sipa Press

[Mêyi a dianyisha bua tshimfuanyi mu dibeji 3]

Yomiuri/​Orion Press/​Sipa Press