Yehowa udi ukina “ludimi ludi lushima”

KUSHIMA nkubenga kuamba bulelela. Misangu ya bungi muntu udi ushima utu udinga muntu mukuabu udi ne bukenji bua kumanya bulelela ne tshipatshila tshia kumuitabijija bualu bua mafi anyi tshia kumuenzela bibi peshi kuenzela munga muntu bibi. Dishima kaditu anu dia ku mishiku patupu to. Didi kabidi mua kumuenekela mu bienzedi, mbuena kuamba ne: muntu udi mua kuikala muena dishima.

Tatu anyi mubangishi wa mashimi n’Satana Diabolo. (Yone 8:44) Dishima diende diakashimaye Eva mukaji wa kumpala ku butuanganji bua nyoka diakakebela Eva ne bayende Adama lufu. (Genese 3:1-5, 16-19) Dishima dia kumpala adi divua difumine ku budisui ne ku dijinga dibi. Divua ne tshipatshila tshia kusaka bena dibaka babidi ba kumpala ku dinanga ne ditumikila muena mashimi, uvua mudileje bu muanjelo wa butoke anyi bu muena muoyo muimpe. (Tangila 2 Kolinto 11:14.) Mashimi makuabu onso a meji mabi atubu bashime katshia ku tshikondo atshi avua aleja kabidi budisui ne dijinga dibi. Bantu batu bashime bua kuepela dinyoka dibafundila, bua kudiila pambidi pa bakuabu ne bua kupeta anyi kushala ne bimue bintu bu mudi difutu kampanda anyi kalumbandi ka kudi bantu.

Mashimi adi bitendelelu bishima mmabi menemene bualu mu matuku atshilualua adi mua kushipesha bantu badibu bashime. Yezu wakamba ne: ‘Nuenu bafundi ne Bafalese, nudi bena lubombo, mulawu ulualua kunudi, bualu bua nuenu nudi nunyunguluka mâyi manene ne buloba bua kuitabijija nansha muntu umue bualu buenu; kadi pitabujaye, nudi numuvuija muana wa mu Ngena munutambe nuenu bubi misangu ibidi.’ (Matayo 23:15) Kushintakaja bulelela bua Nzambi ku ‘mashimi,’ ditendelela mpingu, didi mua kufikisha muntu ku dienza malu mabi menemene.​—Lomo 1:24-32.

Muanda wakenza bamfumu ba bitendelelu balondi ba Buena-Yuda ba mu tshikondo tshivua Yezu pa buloba udi uleja tshidi mua kuenzeka padi muntu ulekela bulelela. Bakelela Yezu tshifufu bua kumushipa. Pashishe, pakabikaye ku lufu, bakabuejila basalayi bavua balame ku lukita bua kabambi bulelela, kubambila bua kuendesha lumu lua dishima ne: tshitalu tshia Yezu tshivua tshijimine.​—Matayo 12:14; 27:1, 2, 62-65; 28:11-15; Mâko 14:1; Luka 20:19.

Yehowa Nzambi katu mua kushima to (Nomba 23:19; Ebelu 6:13-18), ne udi ukina “ludimi ludi lushima.” (Nsumuinu 6:16-19) Mikenji ivuaye muelele bena Isalele ivua ilomba bua kufuta muntu uvuabu badinge anyi bashime ne meji mabi. (Lewitiki 6:2-7; 19:11, 12) Ne muntu uvua ujadika bualu bua dishima ku tshilumbu uvua ne bua kupeta dinyoka divuaye ujinga bua mukuabu apete ku mashimi ende. (Dutelonome 19:15-21) Mmuenenu wa Nzambi pa bidi bitangila dishima ki mmushintuluke to, anu mudi Mikenji ya Mose ileja. Bantu badi basue bua Nzambi abanyishe kabena ne bua kuikala ne tshilele tshia kushimangana to. (Musambu 5:6; Nsumuinu 20:19; Kolosai 3:9, 10; 1 Timote 3:11; Buakabuluibua 21:8, 27; 22:15) Kabena ne bua kuikala bena mashimi, bamba mudibu banange Nzambi eku bakine muanabu. (1 Yone 4:20, 21) Anania ne mukajende bakafua bualu bakashima nyuma wa Nzambi.​—Bienzedi 5:1-11.

Kadi, bantu badi bapapukila bakadi bamba bualu bua dishima kabena balua musangu umue bena mpekatu udibu kabayi mua kubabuikidila to. Tshilejilu tshia Petelo wakavila Yezu misangu isatu tshidi dileja ne: muntu yeye mulekele bualu ebu ne muoyo mujima, Nzambi udi umufuila luse.​—Matayo 26:69-75.

Nansha mudi Bible ubenga kashidi mashimi, kabiena biumvuija ne: muntu mmuenzejibue bua kupatula malu malelela ne kuambila bantu badi kabayi ne bukenji bua kuamanya to. Yezu Kristo wakafila mubelu wa se: “Kanupi mbua tshintu tshia tshijila; kanuedi mabue enu a busanga padi ngulube, bualu idi mua kuadiatakaja, pashishe itangila kunudi bua kunusunsula.” (Matayo 7:6, MMM) Ke bua tshinyi imue misangu Yezu uvua ubenga kuamba malu onso anyi kufila mandamuna musangu umue pavuaye umona ne: bivua mua kumukebela lutatu lua tshianana. (Matayo 15:1-6; 21:23-27; Yone 7:3-10) Bushuwa, tudi mua kuamba ne: ke mudibi kabidi bua tshiakenza Abalahama, Isaka, Lahaba ne Elisha pakambabu malu a tshianana anyi pakabengabu bua kuambila bantu bavua kabayi batendelela Yehowa malu onso mushindu uvuawu.​—Genese 12:10-19; nshapita wa 20; 26:1-10; Yoshua 2:1-6; Yakobo 2:25; 2 Bakelenge 6:11-23.