Bukole budi nabu disambila

Tukadi ku dilolo mu musoko wa Nahô ku Asia wa Moyen-Orient. Muena Sulia mukuabu diende Eliezê, udi ufika ku tshina tshia mâyi ne nyama ya tumelu dikumi, tshina etshi tshivua pambelu pa musoko. Nansha mudiye mupungile ne muikale ne nyota, kukumbaja majinga a bakuabu ke bualu budi butambe kutonda Eliezê. Mmufumine kule, udi uya kukebela muana wa mfumuende mukaji. Kabidi, udi ne bua kukeba mukaji eu anu mu balela ba mfumuende. Mmunyi muakumbajaye bualu ebu bunene nunku?

ELIEZÊ mmumanye ne: disambila ditu ne bukole. Bu mudiye ne ditabuja dia pa buadi, udi usambila ne budipuekeshi buonso ne: ‘Yehowa, Nzambi wa mukalenge wanyi Abalahama, ndi nkulomba ne: ungendeshe dikasa dimpe lelu, ufuile mukalenge wanyi Abalahama luse. Tangila, pantshidi muimane pepi ne mushimi wa mâyi, ne bana bakaji ba bena musoko bakadi balua bua kusunabu mâyi; witabuje ne: nsongakaji undi ngambila ne: Ndi nkutendekena ne: Utule mulondo webe wa mâyi, umpe mâyi a kunua, yeye angandamune dîyi ne: Nua biebe, nennuishe tumelo tuebe kabidi; nunku yeye mene ikale mukaji uwakusunguila muntu webe Isaka; nunku nemmanye ne: wewe wakufuila mukalenge wanyi luse.’​—Genese 24:12-14.

Dishindika didi nadi Eliezê bua se: disambila didi ne bukole ki ndia patupu to. Kayi muanji kutula dîyi, muntu mukaji wa kumpala udi ufika ku tshina tshia mâyi mmunkana wa muanabu ne Abalahama! Dîna diende Lebeka, mmujike, utshidi kamama ne udi mulengele mpala. Tangila bua se: nsongakaji eu kêna anu upesha Eliezê nkayende mâyi to, kadi udi kabidi umulomba bua kumunuishila tumelo tuonso mâyi bualu tuvua ne nyota. Pashishe, bamane kuyikila ne bena mu dîku diabu, Lebeka wakitaba ne muoyo umue bua kuya ne Eliezê mu buloba bua ku ba bende bua kuluaye mukaji wa Isaka muana wa Abalahama. Edi divua diandamuna dia dikema ne ditoke dia disambila dia Eliezê kale mu tshikondo tshivua Nzambi ku misangu wenza bishima bua kukumbaja malu kampanda!

Disambila dia Eliezê didi mua kutulongesha malu a bungi. Diakaleja muvuaye ne ditabuja ne budipuekeshi bua pa buabu, diakaleja kabidi muvuaye uditatshisha ne muoyo mujima bua majinga a bakuabu. Disambila dia Eliezê diakaleja kabidi muvuaye ulonda mushindu udi Yehowa ulombola bantu. Kakuyi mpata, uvua mumanye muvua Yehowa munange Abalahama bikole ne muvuaye mumulaye ne: ku butuangaji bua Abalahama bantu bonso bavua ne bua kupeta mabenesha mu matuku atshidi alua. (Genese 12:3) Ke bua tshinganyi Eliezê wakatuadija disambila diende ne miaku eyi: ‘Yehowa, Nzambi wa mukalenge wanyi Abalahama.’

Mu ndelanganyi ya Abalahama ke muakapatukila Yezu Kristo uvua ne bua kuikala njila uvua bantu bonso badi batumikila Nzambi mua kupetela mabenesha. (Genese 22:18) Tuetu basue bua Nzambi andamune masambila etu lelu, tudi ne bua kudipuekesha ne kulonda mushindu udi Nzambi ulombola bantu ku butuangaji bua Muanende. Yezu Kristo wakamba ne: ‘Binuikala [nanyi  mu buobumue], bikala mêyi anyi munda muenu, nulombe tshionso tshinuasua, nebanuenzeletshi.’​—Yone 15:7.

Paulo muyidi wa Kristo wakamona muvua mêyi a Yezu aa mikale malelela. Dijadika diende bua se: disambila didi ne bukole kadivua dia patupu to. Wakakankamija bena Kristo nende bua bakuatshile Nzambi malu onso avua mabatonde mu disambila pakambaye ne: ‘Ndi mumanye mua kuenza malu onso mu [bukole bua] Mukalenge udi unkolesha.’ (Filipoi 4:6, 7, 13) Mbuena kuamba ne: malu onso avua Paulo ulomba Nzambi ne muoyo mujima avua akumbana anyi? Tuanjibi kumona.

Nzambi katu wenza malu onso atubu bamulomba to

Mu mudimu uvuaye wenza kabiyi bua disanka diende nkayende, Paulo uvua ne disama diakabikilaye ne: “dieba mu mubidi.” (2 Kolinto 12:7) Pamu’apa dieba adi divua mua kuikala kanyinganyinga kakebesha kudi baluishi ne “bana betu ba mafi.” (2 Kolinto 11:26, Mukanda wa Mvidi Mukulu; Galatia 2:4) Peshi divua mua kuikala disama dia mêsu divua kadiyi dimushila muaba. (Galatia 4:15) Nansha bu biobi bikale bukuabu bualu, “dieba [edi] mu mubidi” divua ditekeshe Paulo mu mushindu kampanda. Wakafunda ne: “Pa bualu ebu meme kulomba kudi Mfumu misangu isatu bua dikenga edi dinshile muaba.” Kadi, Nzambi kakakumbajila Paulo tshivuaye ulomba to. Wakamuambila ne: bintu bikavuaye mumupeshe, bu mudi bukole bua kutantamena mateta, bivua bimukumbane. Nzambi wakamba kabidi ne: “Bukole buanyi budi bumueneka padi butekete.”​—2 Kolinto 12:8, 9, MMM.

Tshilejilu tshia Eliezê ne tshia Paulo bidi bitulongesha tshinganyi? Bushuwa, Yehowa Nzambi utu uteleja masambila a bantu badi bakeba bua kumusadila ne budipuekeshi buonso. Kadi kabiena bisua kumvuija ne: misangu yonso utu ukumbaja bidibu bamulomba, bualu Nzambi udi umona malu mu buondoke buawu. Mmumanye bimpe menemene malu adi mua kutuambuluisha kutupita. Ne tshidi tshitambe buimpe ntshia se: utu wenza bionso bilondeshile malu adiye mulongolole adi maleja mu Bible.

Tshikondo tshia luondapu lua mu nyuma

Nzambi mmulaye bua kuondapa bantu masama adi atatshisha mibidi ne ngenyi yabu mu Bukokeshi bua Bidimu Tshinunu bua Muanende pa buloba. (Buakabuluibua 20:1-3; 21:3-5) Bena Kristo balelela mbindile ne mioyo kulukulu mbulamatadi eu udi ulua kumpala, ne mbamanye bimpe se: Nzambi udi ne bukole bua kukumbaja malu aa. Nansha mudibu kabayi batekemene bua bishima ebi (bia diondapangana) kuenzekabi mpindieu, badi balomba bua Nzambi abasambe ne abape bukole bua kutantamena ntatu eyi. (Musambu 55:22) Padibu basama, badi mua kusambila bua Nzambi abambuluishe bapete baminganga badi mua kubuondapa bimpe.

Bamue bena mu bitendelelu badi bakankamija babedi bua kulomba Nzambi bua ajikije masama abu diakamue, bakula bua bishima biakenza Yezu ne bapostolo bende bua kuondapa bantu. Pabu bakenza bishima ebi ne tshipatshila tshia pa buatshi. Bivua bua kujadika ne: Yezu Kristo uvua Masiya mulelela ne bua kuleja ne: Nzambi katshivua wanyisha kabidi tshisamba tshia bena Yuda to, ne mpindieu tshisumbu tshia bena Kristo (tshitshivua ne matuku makese) ke tshikavuaye wanyisha. Nenku mu tshikondo atshi bivua bikengela bishima bua kukolesha ditabuja dia bena mu tshisumbu tshia bena Kristo tshitshivua ku ntuadijilu watshi. Pakakolatshi ne kushindama, bishima ‘biakajika.’​—1 Kolinto 13:8, 11, MMM.

Mu tshikondo tshikole etshi, Yehowa Nzambi udi ulombola bantu badi bamutendelela mu mudimu wabu wa mushinga mukole udi wambuluisha bantu mu nyuma. Edi ke dîba didi bantu ne bua kuitaba ne lukasa dibikila edi dia se: ‘Keba Yehowa paudi mumanye mua kumusangana; umubikidile patshidiye pabuipi. Muntu mubi alekele kuenda mu njila wende mubi, udi kayi muakane alekele meji ende mabi; apingane biende kudi Yehowa, yeye neamufuile luse; ne kudi Nzambi wetu, bualu bua yeye neatambe kumubuikidila mibi yende.’​—Yeshaya 55:6, 7.

Diambuluisha edi dia mu nyuma bua benji ba mpekatu badi balekela mibi yabu didi dienzeka ku diambuluisha dia lumu luimpe lua Bukalenge bua Nzambi lutudi tuyisha. (Matayo 24:14) Bangabanga ne nshikidilu wa ndongoluelu eu kuluaye, Yehowa Nzambi udi upesha basadidi bende bukole bua kuenza mudimu eu udi upandisha ne wambuluisha miliyo mivule ya bantu ba mu bisamba bionso bua kulekelabu mpekatu ne kudiabu nende malanda mimpe. Yehowa udi wandamuna masambila a bantu bonso badi balomba ne muoyo mujima bua kubambuluishabu mu nyuma ne bakuabu badi bamulomba bua abambuluishe bua kuenza mudimu eu.

[Mêyi a dianyisha bua tshimfuanyi mu dibeji 3]

Eliezê ne Lebeka/​The Doré Bible Illustrations/​Dover Publications