Muyuki wa nsombelu

Ndi mulame nsombelu mupepele bua kusadila Yehowa

MULONDA KUDI CLARA GERBER MOYER

Ndi ne bidimu 92 ne ndi ngenda ne lutatu lua bungi, kadi lungenyi luanyi lutshidi luimpe, lukuata malu bimpe. Bushuwa ndi ne dianyisha bua mundi mupete diakalenga dia kusadila Yehowa katshia ku buana! Nsombelu mupepele, kayi ne malu a bungi mmungambuluishe bikole bua kupeta diakalenga edi.

MVUA muledibue mu dia 18 Tshimungu 1907, mu tshimenga tshia Alliance, provense wa Ohio, mu États-Unis; ne mvua muanabute wa mu bana batanu. Pamvua ne bidimu muanda-mukulu, musadidi kampanda wa ku dîba ne ku dîba wa Balongi ba Bible (ke muvuabu babikila Bantemu ba Yehowa tshikondo atshi) wakalua ne dikalu ku ferme wetu kuvuabu benzela mabele. Wakasangana mamu, Laura Gerber ku tshiibi ne kumukonkaye né uvua mumanye bua tshinganyi malu mabi avua enzeka. Mamu uvua anu pende udiela lukonko elu.

Kunyima kua diyikila ne Tatu (uvua mupatuke muye ku depo), Mamu wakalombesha mikanda isambombo ya Études des Écritures. Wakayibala kayi wikisha ne mumvuija malelela a mu Bible avuaye ulongamu akamulenga bikole. Wakalonga Mukanda muisambombo (La nouvelle création), e kumvuaye bimpe ne: bivua bikengela kuangata batismo pa kuinyibua mu mâyi. Bu muvuaye kayi ne mushindu wa kupetangana ne Balongi ba Bible, wakalomba Tatu bua amutambuishe mu kasulu kakese ka ku ferme nansha mutuvua mu ngondo wa mashika, wa Luabanya mu 1916.

Kunyima kua matuku makese, mamuanyi wakabala mu tshibejibeji kampanda ne: kuvua muyuki uvua ne bua kuenzekela mu Alliance, ku Nzubu wa Bana ba Basalayi ba kale. Tshiena-bualu tshia muyuki tshivua ne: “Bikondo bilongolola kudi Nzambi.” Anu pin’apu, Mamu wakanyisha bua kuyaku bualu Mukanda wa kumpala wa Études des Écritures uvua ne tshiena-bualu tshia muomumue. Bakasuika ditempu ku kabalu ne tuakaya dîku dijima bua musangu wa kumpala mu tshisangilu pa kabalu ne mu ditempu. Kubangila anu apu tukavua tubuela mu bisangilu bivua  bienzekela mu nzubu ya bana betu mu mêba a dilolo mu Dia lumingu ne mu Disatu. Pakapita matuku makese, muleji-mpala wa tshisumbu tshia bena Kristo wakatambuisha Mamu tshiakabidi. Tatu uvua misangu yonso ne midimu ya bungi ya kuenza ku ferme; kadi wakalua kuanyisha bua kulonga Bible ne wakatambula kunyima kua bidimu bikese.

Tudi tupetangana ne bantu bavua balombola

Mu dia 10 Kabalashipu 1917, Joseph Rutherford (uvua mulombodi wa Société Watch Tower tshikondo atshi), wakalua mu Alliance bua kuenza muyuki uvua ne tshiena-bualu ne: “Bua tshinyi matunga adi aluangana mvita?” Mvua ne bidimu tshitema patuakabuela mu tshisangilu atshi ne baledi banyi ne bakunyi banyi babidi ba balume, Willie ne Charles. Bantu, bapite pa lukama bakabuelamu. Kunyima kua muyuki wa Muanetu Rutherford, ba bungi bavua babuele mu tshisangilu atshi bakadikuatshisha foto pambelu pa nzubu wa Columbia Theater, muvuaye muenzele muyuki wende. Lumingu luakalonda, Alexander Macmillan wakenza muyuki muaba umue-umue au uvua ne tshiena-bualu ne: “Bukalenge bua Nzambi budi bulua.” Bivua disanka dia bungi bua muvua bana betu aba balue mu tshimenga tshietu tshikese.

Mpungilu ya kumpala kayiyi kupua muoyo

Mpungilu wa kumpala ungakabuela wakenzeka mu 1918 mu tshimenga tshia Atwater, mu Ohio, tshivua mutantshi wa kilometre mikese ne Alliance. Mamu wakakonka muleji-mpala wa Société kuine aku né mvua ne bidimu bikumbane bua kutambula. Ngakumvua ne: didilambula dimvua muenze kudi Nzambi divua dikumbane bua meme kuenza disua diende, nenku bakanganyishila bua kutambula dituku adi mu kasulu kavua pabuipi ne budimi bunene bua mitshi ya bimuma. Ngakashintuluila bilamba mu ntenta uvua bana betu bâse bua kushintuluilamu bilamba ne bakantambuisha meme muvuale nkanzu wa mupimbu wa kale wa kulala nende.

Mu ngondo wa tshitema mu 1919, tuakabuela mu kawulu ne baledi banyi batangile ku tshimenga tshia Sandusky, mu Ohio, ku muelelu kua Dijiba dia Erie. Kuine aku, tuakabuela mu bake bua kusabuka mâyi, katupa kîpi pashishe, tuetu kufika ku Cedar Point kuvua mpungilu wetu munene uvua kayi kupua muoyo ne bua kuenzekela. Patuakatuluka, tuakamona nzubu mukese wa kudiila ku tshitudilu aku. Bakampesha diampa diela munyinyi, divua tshiakudia tshia mushinga mukole mu matuku au buanyi meme. Divua muenya be! Bantu bonso bakabuela mu mpungilu wa matuku muanda-mukulu au bavua 7 000. Kakuvua biamu bia kudiundisha nabi mêyi to, nunku mvua ne bua kuteleja bimpe menemene.

Mu mpungilu au, bakapatula tshibejibeji tshia L’Âge d’or (lelu Réveillez-vous!) tshitu tshienda pamue ne Tshibumba tshia Nsentedi. Bua meme kubuela mu mpungilu au, ngakapumbisha kalasa lumingu lua kumpala, kadi bivua bikengela amu kuenza nanku. Cedar Point uvua muaba uvua bantu baya kupitshishila diikisha diabu ne kuvua balambi ba biakudia ba mu nzubu wa tshidiilu bavua bipikila bantu bavua balua ku mpuilu. Kadi dituku adi ni mbua bualu kayi, balambi abu ne bakaji bateki ba biakudia ku mesa bakabenga kuenza mudimu, nenku bana betu bena Kristo bavua bamanye kulamba biakudia bakaditua mu mudimu eu ne bakalambila bantu bavua balue mu mpungilu biakudia. Munkatshi mua bidimu bia bungi biakalonda, bantu ba Yehowa bavua badilambila biakudia biabu mu mpuilu ne mu mpungilu.

Tuvua kabidi ne diakalenga dia kupingana ku Cedar Point mu ngondo wa Kabitende mu 1922 bua mpungilu wa matuku tshitema muakabuela bantu bapite pa 18 000. Ke dîba diakatukankamija Muanetu Rutherford ne: “Manyishayi, manyishayi, manyishayi Mukalenge ne bukalenge buende.” Kadi nkavua mutuadije kuenza buambi bidimu bia bungi kumpala pamvua ngenda ngabanya trakte ne L’Âge d’or.

Tudi ne dianyisha bua mudimu wetu

Ku ntuadijilu kua 1918, ngakabanya panyi trakte wa Dikuluka dia Babulona (Angl.) mu ferme ivua ku mutumba. Bu mutuvua tshikondo tshia mashika, tuvua tuela dibue mu ditshuwa dia nkunyi kumbelu bua dikuate kapia ne kunyima tuya nadi mu ditempu bua kunanga makasa. Tuvua tuvuala tuzaku ne bifulu bia bujitu bualu ditempu divua dibuikila anu ku mutu ne kumpenga, kadi kadivua ne tshivua mua kufila luya to. Nansha nanku abi bivua bikondo bimpe be!

Mu 1920, bakapatula mukanda wa pa buawu wa Le mystère accompli, mubikila ne: ZG, uvua bunene bua tshibejibeji. * Meme ne baledi banyi tuakapatuka mu buambi ne mukanda eu mu Alliance. Mu matuku au, muntu yonso uvua udiyila ku tshiibi nkayende, nenku ne ka buôwa ne ka dikima, meme kubanda mu  lutanda muvua bantu ba bungi basombe. Kunyima kua meme mumane kudimanyisha, muntu mukaji kampanda wakamba ne: “Udi wakula pende bimpe,” ne yeye kuangata mukanda. Dituku adi, ngakabanya mikanda 13 ya ZG, bua musangu wa kumpala ungakenza dîba dia bungi mu buambi bua ku nzubu ne ku nzubu.

Pamvua mu kalasa kisatu ka tshikadilu, Mamu wakapia disama dia mbadi ne wakashala mu bulalu ngondo mujima ne matuku. Bu muvua Hazel, muakunyanyi wa bakaji mutshikale muana mukese, ngakalekela kalasa bua kuenza mudimu ku madimi ne kulama bana. Kadi dîku dietu divua diangata bulelela bua mu Bible ne mushinga ne tuvua pa tshibidilu tubuela mu bisangilu bionso bia tshisumbu.

Mu 1928 mu Tshivulukilu tshia lufu lua Kristo, bakapesha bantu bonso trakte wa: “Bakuabu tshitema badi penyi?” (Angl.) Kabeji aka kavua kakonkonona Luka 17:11-19, mudi Bible wamba ne: ku bantu dikumi bavuabu buondape disama dia nsudi, anu muntu umue patupu ke wakela Yezu tuasakidila ne budipuekeshi bua muvuaye mumuondape mu tshishima. Bualu ebu buakantua ku mutshima. Ngakadiebeja ne: ‘Mmunyi mundi ndileja panyi muena dianyisha?’

Bu mukavua mpindieu malu enda bimpe kumbelu ne mumvua ne makanda a mubidi ne tshiyi ne majitu, ngakapangadija bua kumbuka kumbelu ne kuangata mudimu wa bumpanda-njila (mutubu babikila mudimu wa ku dîba ne ku dîba). Baledi banyi bakankankamija bua kuenza mudimu eu. Nenku, meme ne Agnes Aleta, muenzejanganyi nanyi wa mudimu, bakatutuma muaba mukuabu wa kuenzela mudimu; mu dia 28 Tshimungu 1928, tuakabuela mu kawulu pa dîba 9 wa butuku. Muntu ne muntu uvua anu ne mushete umue ne tshibuta tshia kuambuila mikanda idi yumvuija Bible. Patuvua ku ngala ne bakunyi banyi ba bakaji ne baledi banyi, tuakabanga kudila. Mvua ngela meji ne: tshivua mua kubamona kabidi to, bualu tuvua tumona ne: Armagedone ukavua pabuipi. Butshia mu dinda, tuetu kufika ku muaba uvuabu batutume bua kuenzela mudimu mu tshimenga tshia Brooksville, mu provense wa Kentucky.

Tuakafutshila mushiku umue wa nzubu wa tshilala benyi, tuetu kusumba makopo a makolonyi ne kuenza kabidi tu-mampa. Dituku dionso tuvua tushintulula luseke lua kuenzela mudimu, tuvua tuya muntu ne muntu pa nkayende ne tupesha bantu bavua ku nzubu yabu mikanda itanu ku dipa dia dolare mitue ku ibidi. Ku kakese ku kakese, tuakayisha mu nseke yonso ya tshimenga, tuetu kupeta bantu ba bungi bavua basankidila mukenji wa mu Bible bikole.

Bu mu ngondo isatu nanku, tukavua bayishe bantu bonso ba mu Brooksville ne ba pabuipi apu, pamue ne ba mu tshimenga tshia Augusta. Pashishe tuakumbuka, tuetu kuya kuenzela mudimu mu bimenga bia Maysville, Paris ne Richmond. Mu bidimu bisatu biakalonda, tuakayisha mu bitupa bia bungi bia mu Kentucky muvua kamuyi tshisumbu nansha tshimue. Misangu mivule bavua balua kutuambuluisha kudi balunda ne bamue bena mu mêku etu ba ku Ohio bavua balua ku mashinyi ne batuenzeja mudimu lumingu lumue anyi kupita apu.

Mpungilu mikuabu kayiyi kupua muoyo

Bushuwa, mpungilu wakenzeka mu tshimenga tshia Columbus, mu Ohio, mu dia 24 too ne dia 30 Kashipu 1931, kavua wa kupua muoyo to. Mu mpungilu au ke muakamanyishabu ne: tuvua ne bua kubikidibua ku dîna diangata mu Bible dia Bantemu ba Yehowa. (Yeshaya 43:12) Kumpala, pavua bantu batukonka né tuvua mu tshitendelelu kayi, tuvua tuamba ne: tudi “Balongi ba Bible ba Buloba bujima.” Kadi dîna adi kadivua ditusunguluja bimpe menemene to, bualu kuvua bantu ba bungi bavua balonga Bible mu bisumbu bikuabu bia malu a nzambi.

Tshikondo atshi bakavua basele Agnes, muenzejanganyi nanyi wa mudimu, ne nkavua mushale nkayanyi; nenku ngakasanka bikole pakamanyishabu ne: aba bavua bakeba mpanda-njila wa kuenzabu nende mudimu pamue bavua ne bua kuya ku muaba kampanda. Kuine aku tuakapetangana ne Bertha ne Elsie Garty ne Bessie Ensminger. Bavua ne vuatire ibidi ne bavua bakeba mpanda-njila mukaji muinayi bua yeye kuenza nabu mudimu pamue. Tuakumbuka mu mpungilu au pamue nansha mutuvua katuyi bamanyangane kuonso eku.

Mu muvu wa luya, tuvua tuenza mudimu mu provense wa Pennsylvanie. Pashishe, pavua muvu wa mashika ulua, tuvua tulomba bua kuenzela mudimu mu provense ya kuinshi ya luya ya Caroline du Nord, Virginie ne Maryland. Pavua mashika ajika, tuvua tupingana ku Nord. Ke tshibidilu tshivua natshi bampanda-njila tshikondo atshi. Mu 1934, John Booth ne Rudolph Abbuhl, bavua pabu ne tshibidilu etshi, bakaya ne Ralph Moyer ne muakunyende Willard mu tshimenga tshia Hazard, mu Kentucky.

Tukavua bamonangane ne Ralph misangu ya bungi kadi tuakalua kumanyangana bimpe mu mpungilu munene wakenzeka mu tshimenga tshia Washington, mu dia 30 ngondo muitanu too ne mu dia 3 ngondo muisambombo mu 1935. Meme ne Ralph tuvua basombe pamue mu lutanda kuulu pakenzabu muyuki uvua wakula bua “tshisumbu tshinene,”  peshi “musumba munene.” (Buakabuluibua 7:9-14) Too ne dîba adi, tuvua tuela meji ne: bena tshisumbu tshinene bavua bena mu kasumbu ka mu diulu kenza ne bantu bavua ne lulamatu lushadile ku lua bantu 144 000. (Buakabuluibua 14:1-3) Nenku tshivua meme musue bua kuikala umue wa kudibu nansha!

Pakumvuija Muanetu Rutherford ne: bantu ba mu tshisumbu tshinene aba bavua kasumbu ka pa buloba ka bena lulamatu bapanduka ku Armagedone, bantu ba bungi bakapapuka. Pashishe wakamba bua bonso bavua mu tshisumbu tshinene bimane kuulu. Meme tshiakimana to, kadi Ralph yeye wakimana. Panyima pa matuku, tuakalua kumvua malu bimpe, nenku tshidimu tshia 1935 tshivua tshianyi tshia ndekelu tshingakadia diampa ne tshingakanua mvinyo mu Tshivulukilu tshia lufu lua Kristo. Kadi Mamu wakatungunuka yeye ne kudia mampa ne kunua mvinyo too ne ku lufu luende mu ngondo wa 11 mu 1957.

Muena mudimu nanyi wa mutantshi mule

Tuakatungunuka ne kufundilangana mikanda ne Ralph. Mvua ngenzela mudimu mu tshimenga tshia Lake Placid, mu New York, ne yeye uvua mu Pennsylvanie. Mu 1936 wakenza dikadika dikese divuaye mua kukoka ne vuatire wende. Wakumbuka nadi mu tshimenga tshia Pottstown, mu Pennsylvanie, mutangile ku tshia Newark, mu New Jersey, bua kubuela mu mpungilu wakenzeka kuine aku mu matuku 16 too ne 18 a ngondo wa 10. Dimue dilolo kunyima kua ndongamu, bampanda-njila ba bungi ba kutudi tuakaya bua kumona dikadika dipiadipia dia Ralph. Tuvua bimane nende babidi munda mua dikadika adi pabuipi ne dilonga dikese divua dienza bua kuowela mâyi pakankonkaye ne: “Udi musue dikadika edi anyi?”

Pangakitaba ne mutu, wakankonka ne: “Udi musue kusombelamu anyi?”

Meme kuandamuna ne: “Eyowa,” ne wakantua mishiku mu mushindu mulenga undi tshiyi mua kupua muoyo nansha. Matuku makese pashishe, tuetu kuenzeja mikanda ya dibaka. Mu dia 19 ngondo wa dikumi, dituku divua dilonda mpungilu au, tuakaya ku Brooklyn ne tuakabandila nzubu wa dipatuila mikanda wa Société Watch Tower. Pashishe tuakalomba bua batupeshe teritware utuvua ne bua kuenzela mudimu. Grant Suiter ke uvua utangila mudimu wa teritware, ne wakasua kumanya muntu uvua ne bua kuenza mudimu mu teritware au. Ralph wakamba ne: “Tudi mua kuyamu tuetu mua kuselangana.”

Muanetu Suiter wakandamuna ne: “Nuenu bapingane pa dîba 5 wa dilolo, tudi mua kutangila bualu abu.” Nenku dilolo adi tuakaselangana mu nzubu mua Ntemu mukuabu pabuipi ne Brooklyn. Tuakadia ne bamue balunda ku nzubu wa tshidiilu kampanda wa muaba au ne pashishe tuetu kuangata mashinyi batangile ku muaba uvua dikadika dia Ralph mu tshimenga tshia Newark, mu New Jersey.

Katupa aka, tuetu kuya batangile ku musoko wa Heathsville, mu Virginie, muaba wetu wa kumpala utuakenzela bumpanda-njila. Tuakenza mudimu mu Teritware wa Northumberland ne pashishe tuetu kuya mu wa Fulton ne wa Franklin mu Pennsylvanie. Mu 1939, bakalomba Ralph bua kuenza mudimu wa mutangidi wa zone, mutuvua ne bua kuya tuenda tutangila bisumbu bia bungi ku tshimue ku tshimue. Tuakakumbula bisumbu bia mu provense wa Tennessee. Tshidimu tshiakalonda, ngakalela muana wa balume: Allen, ne mu tshia 1941 tuakimanyika mudimu wa zone. Bakatutuma bampanda-njila ba pa buabu mu tshimenga tshia Marion, mu Virginie. Mu matuku au, bivua bikengela kuenza ku ngondo yonso mêba 200 mu buambi.

 Tudi tuakajilula amue malu

Mu 1943, ngakamona ne: bivua bikengela ngimanyike mudimu wa bumpanda-njila bua pa buabu. Kusombela mu dikadika dikese, kulama muana, kulamba biakudia, kusukula bilamba bietu ne kuenza mêba matue ku 60 mu buambi ku ngondo yonso, ke bionso bimvua mua kuenza. Kadi Ralph wakatungunuka yeye ne kuikala mpanda-njila wa pa buende.

Mu 1945 tuakapingana ku Alliance, mu Ohio, tuetu kupana dikadika divua dikale nzubu wetu munkatshi mua bidimu tshitema ne tuetu kuya kusombela ku ferme ne baledi banyi. Kuine aku, mu lutanda luvua kumpala kua nzubu ke muaba ungakalelela Rebekah, muananyi wa bakaji. Ralph wakapeta ka-mudimu ka mêba makese mu tshimenga eku utungunuka ne bumpanda-njila bua pa tshibidilu. Mvua ngenza mudimu ku madimi ne mvua ngenza muanyi muonso bua kumuambuluisha bua kutungunukaye ne bumpanda-njila. Nansha muakatupesha baledi banyi miaba ya kudima ne nzubu kabidi, Ralph wakabibenga. Kavua musue kuikala ne majitu a bungi to, bualu uvua musue bua tuetu kutungunuka bimpe menemene ne malu a Bukalenge.

Mu 1950 tuakapingana kabidi ku Pottstown, mu Pennsylvanie, ne tuetu kutuadija kufutshila nzubu wa dolare 25 ku ngondo. Mu bidimu 30 biakalonda, makuta a difutshila akabanda too ne ku dolare 75 patupu. Tuakamona ne: Yehowa uvua utuambuluisha bua kulama nsombelu mupepele. (Matayo 6:31-33) Ralph uvua wenza mudimu wa dikosa bantu nsuki matuku asatu ku lumingu. Lumingu luonso tuvua tulonga Bible ne bana betu babidi batuvua balele aba, tuvua tubuela mu bisangilu bia tshisumbu, ne tuyisha lumu luimpe lua Bukalenge pamue. Ralph uvua mutangidi-muludiki mu tshisumbu tshituvua atshi. Tuakenza bia bungi mu mudimu wa Yehowa bualu tuvua ne nsombelu mupepele.

Lufu lua bayanyi munanga

Mu dia 17 Lumungulu 1981, tuvua basombe mu Nzubu wa Bukalenge tuteleja muyuki wa patoke. Ralph wakadiumvua bu uvua usama e kuyaye kunyima kua Nzubu wa Bukalenge, pashishe kuntuminaye mukenji mufunda pa kabeji kudi munga muanetu musadidi wa mudimu ungambila ne: uvua uya kumbelu. Etshi katshivua tshibidilu tshia Ralph to, nenku ngakalomba bua muntu mukuabu angambule ku mashinyi bua kumfikisha kumbelu pa lukasa. Dîba dijima kadianji kukumbana, Ralph wakafua dipaluka dikole. Ku ndekelu kua dilonga dia Tshibumba tshia Nsentedi dinda adi, bakamanyisha tshisumbu lufu luende.

Ngondo au, Ralph ukavua mumane kuenza mêba mapite pa 50 mu buambi. Uvua muenze mudimu wa ku dîba ne ku dîba bu mpanda-njila bidimu bipite pa 46. Bantu bapite pa 100 bavuaye mulonge nabu Bible bakalua pabu Bantemu ba Yehowa. Mabenesha a mu nyuma atuakapeta avua makanyine malu onso atuvua badipangishe munkatshi mua bidimu bia bungi.

Ndi ne dianyisha bua diakalenga dindi mupete

Mu bidimu 18 biashadi ebi ndi mudisombele nkayanyi ne ndi mbuela mu bisangilu, nyisha bakuabu bilondeshile dianyi dikanda ne ndi ndonga Dîyi dia Nzambi. Mpindieu ndi musombele mu nzubu wa bantu banunu. Ndi amu ne bintu bikese bia mu nzubu ne tshiena musue kuikala ne televizion to. Kadi ndi ne bia bungi bia kuenza ne ndi mubanji mu nyuma. Baledi banyi ne bakunyi banyi ba balume babidi bakashala ne lulamatu too ne ku lufu; bakunyi banyi ba bakaji babidi badi batungunuka ne kuendela mu njila wa bulelela ne lulamatu.

Ndi ne disanka bua mudi Allen, muananyi wa balume muikale mukulu muena Kristo. Mmuenze bidimu bia bungi mu mudimu wa dilongolola biamu bia mêyi mu Nzubu ya Bukalenge ne mu Nzubu ya Mpuilu, ne mmuenze mudimu eu mu mpungilu itutu tuenza ku tshidimu. Mukajende mmusadidi wa lulamatu wa Nzambi; bana babu babidi badi bakulu mu tshisumbu. Muananyi wa bakaji, Rebekah Karres mmuenze bidimu bipite pa 35 mu mudimu wa ku dîba ne ku dîba kusangishamu ne binayi biakenzaye ku tshilombuelu tshia buloba bujima tshia Bantemu ba Yehowa ku Brooklyn. Yeye ne bayende mbapitshishe bidimu 25 biashadi ebi mu mudimu wa ngendu mu bitupa bia bungi bia États-Unis.

Yezu wakamba ne: Bukalenge mbufuanangane ne tshiuma tshisokoka tshidi muntu mua kupeta. (Matayo 13:44) Ndi ne dianyisha bua muvua dîku dietu dipete tshiuma etshi kukadi bidimu bia bungi. Ndiakalengapu kayi pa kutangila bidimu bipite pa 80 bia mudimu undi mukuatshile Nzambi, tshiyi ne bundi mua kunyingalela! Bu meme mua kutuadijilula matuku anyi a muoyo, bushuwa mvua ne bua kuapitshisha mushindu wa muomumue bualu ‘luse lujalame lua Nzambi ludi lupita muoyo bulengele.’​—Musambu 63:3.

[Mêyi adi kuinshi]

[Tshimfuanyi mu dibeji 23]

Tuakateleja muyuki wa Muanetu Rutherford mu 1917 mu Alliance, Ohio

[Tshimfuanyi mu dibeji 23]

Meme ne Ralph kumpala kua dikadika diakenzaye

[Tshimfuanyi mu dibeji 24]

Meme ne bana banyi babidi lelu’eu