Tukebayi Yehowa ne mutshima mulongolola

EZELA uvua muakuidi muena Isalele uvua mukebuludi, mukonkononyi, mutentudi ne mulongeshi wa Mikenji muende lumu. Lelu, Ezela udi kabidi upesha bena Kristo tshilejilu tshimpe tshia mushindu wa kuenza mudimu ne anyima mujima. Mmu mushindu kayi? Mu mushindu wa se: wakalamata Nzambi nansha pavuaye mu Babulona, tshimenga tshivua tshiûle tente ne nzambi ya dishima, ne bavua batendelelamu kabidi ba-demon.

Ezela kavua mufike ku dilamata Nzambi mu mpukapuka to. Wakenza madikolela. Udi utuambila ne: “uvua mulongolole mutshima wende bua kulonga mikenji ya Yehowa ne bua kuyitumikila.”​—Ezela 7:10, NW.

Anu bu Ezela, lelu bantu ba Yehowa mbasue kuenza malu onso adiye ubalomba nansha mudibu basombele mu bukua-panu ebu mudi bantu babenga ntendelelu mulelela. Nunku tumonayi mishindu itudi petu mua kulongolola mutshima anyi muntu wetu wa munda, mmumue ne: ngenyi yetu, mmuenenu, majinga ne bipatshila bietu bua “kulonga mikenji ya Yehowa ne bua kuyitumikila.”

Tulongololayi mutshima wetu

“Kulongolola” kudi kumvuija “kudianjila kuteka pabuipi bua tshipatshila kampanda: kuenza bua tshintu tshikale tshikumbane bua kuenza anyi kukumbaja natshi bualu kansanga busunguluke.” Bulelela, biwikala ukadi mupete dimanya dijalame dia mu Dîyi dia Nzambi ne biwikala mudilambule kudi Yehowa, nanku mutshima webe mmulongolola ne tudi mua kuufuanyikija ne: “buloba buimpe” buakamba Yezu mu mufuanu wende wa mumiaminyi.​—Matayo 13:18-23.

Nansha nanku, bidi bikengela kukenketa ne kulengeja mutshima wetu ku musangu ne ku musangu. Bua tshinganyi? Kudi bintu bibidi. Tshia kumpala, bualu meji mabi (adi bu lupele mu budimi), adi mua kuela miji lukasa, nangananga mu ‘matuku aa a ku nshikidilu’ mudi ‘lupepele’ lua bukua-panu ebu bua Satana lûle tente ne ntete mibi ya meji a malu a mubidi. (2 Timote 3:1-5; Efeso 2:2) Tshibidi tshidi tshitangila buloba buine. Buobu kabayi babulame bimpe, buloba budi mua kushila anyi kuma ne ku ndekelu budi buatuka. Anyi bantu bapite bungi badi mua kuendela mu budimi ne kudiatakaja buloba kubushidisha. Ke mudibi kabidi bua buloba bua mu tshimfuanyi budi buikale mutshima wetu. Budi mua kuatuka tuetu babulengulule anyi bantu (badi kabayi basue kutumona tusanka mu nyuma) buobu babudiatakaje ne bendelamu.

Nunku bidi ne mushinga wa bungi bua tuetu bonso kutumikila mubelu wa mu Bible wa se: ‘Ulame mutshima webe ne dilama dionso, bualu bua munda muawu mudi mupatuka mishimi yonso ya muoyo.’​—Nsumuinu 4:23.

Bintu bidi bifukisha “buloba” bua mutshima wetu

Tukonkononayi bimue bintu anyi ngikadilu idi mua kufukisha “buloba” bua mutshima wetu bua tuetu kupeta mushindu wa kukola bimpe. Kudi bintu bia bungi bidi mua kulengeja mutshima wetu, kadi tukonkononayi anu bisambombo tshianana: kumanya majinga etu a mu nyuma, kuikala ne budipuekeshi, kuikala bena malu malelela, ditshina Nzambi, ditabuja ne dinanga.

Yezu wakamba ne: “Ba disanka ng’aba badi bamanye majinga abu a mu nyuma.” (Matayo 5:3, NW) Anu mutu nzala ituvuluija ne: tudi dijinga ne biakudia, kumanya majinga etu a mu nyuma kudi kutupesha nzala ya kudia biakudia bia mu nyuma. Bantu batu baledibua ne dijinga dikole  dia biakudia ebi bualu bitu bibumvuija bua tshinyi badi ne muoyo ne tshipatshila tshiawu. Ntatu idi ifuma ku bukua-panu ebu bua Satana peshi lulèngù ludi mua kutekesha dijinga dietu dia kulonga. Nansha nanku, Yezu wakamba ne: ‘Muntu kikadi biende ne muoyo bualu bua bidia nkayabi, ikale biende nawu bualu bua mêyi onso adi alopoka mukana mua Nzambi.’​—Matayo 4:4.

Nenku tuetu tudia biakudia bimpe ne bikumbanyine misangu yonso tudi tukolesha mubidi wetu, ne biakudia ebi bitu kabidi bisaka muntu bua kupeta nzala ya kudia biakudia bikuabu padi dîba dikumbana. Ke mudibi kabidi mu nyuma. Pamu’apa udi mua kujingulula ne: kutu utamba kudilongela to; kadi wewe ne tshibidilu tshia kubala Dîyi dia Nzambi dituku dionso ne kulonga mikanda idi yumvuija Bible, neumone ne: udi ubanga kumvua muoyo wa kutamba kudia biakudia ebi. Bulelela, neushale anu ne muoyo mutuma ku dilonga dia Bible diwenza. Nanku kuteketshi mu maboko lukasa to; enza muebe muonso bua wikale umvua muoyo wa kudia biakudia bia mu nyuma.

Budipuekeshi budi butekesha mutshima

Budipuekeshi nngikadilu wa mushinga bua kuikala ne mutshima mulongolola, bualu budi butuvuija bantu ba kulongesha ne budi butuambuluisha bua kuitaba ne lukasa mibelu ya dinanga. Tangila tshilejilu tshilenga tshia Mukalenge Yoshiya. Mu tshikondo tshivuaye ukokesha, bakapeta mukanda uvua ne Mikenji ya Nzambi ivuaye mupeshe Mose. Pakumvua Yoshiya mêyi a mu Mikenji ne pakamanyaye muvua bankambua bende balekele ntendelelu mulelela, wakapanda bilamba biende ne kudilaye kumpala kua Yehowa. Bua tshinyi Dîyi dia Nzambi diakalenga mukalenge ku mutshima bikole nunku? Bible udi wamba ne: mutshima wende uvua ‘mutekete,’ ke bua tshinyi wakadipuekesha pakumvuaye mêyi a Yehowa. Yehowa wakamona mutshima wa budipuekeshi ne wa lumvu uvua nawu Yoshiya, ne wakamubenesha.​—2 Bakelenge 22:11, 18-20.

Budipuekeshi buakambuluisha balongi ba Yezu bavua ‘kabayi bamanye mukanda ne bikale bantu ba patupu’ bua kumvua ne kutumikila malu malelela a Nzambi avua bantu “bena meji ne bena ngenyi” kadi bikale anu bia ‘mu buntu buabu’ bapangile. (Bienzedi 4:13; Luka 10:21, MMM; 1 Kolinto 1:26) Bena meji ne ngenyi aba kabavua badilongolole bua kuitaba dîyi dia Yehowa to, bualu mitshima yabu ivua mipapisha kudi lutambishi. Nanku kabiena bitukemesha to mudi Yehowa mukine lutambishi.​—Nsumuinu 8:13; Danyele 5:20.

Kuikala muena malu malelela ne ditshina Nzambi

Muprofete Yelemiya wakafunda ne: ‘Mutshima udi upita bintu bionso kudinga muntu, ne udi utamba kunyanguka; mmuntu kayi udi mua kuumanya?’ (Yelemiya 17:9) Didinga edi didi dimuenekela ku malu a bungi, bu mudi dîba ditudi tudibingisha patudi benze tshilema. Didi kabidi dimueneka patudi tusokoka ngikadilu mibi itudi nayi. Kadi kuikala muena malu malelela nekutufikishe ku ditshimuna mutshima wa didinga pa kutuambuluisha bua kuitaba tshitudi bua tuetu kumona mua kudilengeja. Mufundi wa Misambu wakaleja ngikadilu eu pakasambilaye ne: “Yehowa, untete; untete mu mutshima wanyi ne mu meji anyi.” Bulelela, mufundi wa misambu uvua mulongolole mutshima wende bua kuitaba malu avua Yehowa mua kuulengeja ne kuuteta nawu, nansha muvuabi bimulomba bua kuitaba ne: uvua ne bikadilu bibi bua kumonaye mua kubilekela.​—Musambu 17:3; 26:2.

Ditshina Nzambi, didi diumvuija: ‘dikala ne malu mabi lukuna,’ didi diambuluisha bikole bua kulengeja mutshima. (Nsumuinu 8:13) Padi muntu udi utshina Yehowa menemene wanyisha muoyo mulenga ne buimpe buende, mmumanye bimpe ne: Yehowa udi ne bukole bua kufila dinyoka (nansha dia lufu) kudi bantu badi babenga kumutumikila. Yehowa wakaleja ne: bantu badi bamutshina badi kabidi bamutumikila pakambaye bua bena Isalele ne: ‘O, ngakadi kusua bua mutshima eu wikale munda muabu, bua kuntshina ne bua kuenza mikenji yanyi yonso matuku onso, ne buobu bikale ne dikasa dimpe, ne bana babu badi balonda kunyima tshiendelele!’​—Dutelonome 5:29.

Kadi, tudi tutshina Nzambi, ki mbua tuetu kuikala tufua ne buôwa patudi tumutumikila to, kadi mbua tuikale tutumikila Tatu wetu wa dinanga, utudi bamanye ne: mmusue bua tuikale ne diakalengele. Bushuwa, ditshina Nzambi dia mushindu’eu didi dikolesha ne difila disanka, ne Yezu Kristo wakadileja misangu ya bungi.​—Yeshaya 11:3; Luka 12:5.

 Mutshima mulongolola udi ne ditabuja dikole

Muntu udi ne mutshima wa ditabuja dikole mmumanye ne: tshintu tshionso tshidi Yehowa umulomba peshi umuleja mu Dîyi diende tshidi anu tshiakane ne tshidi bua diakalenga dietu. (Yeshaya 48:17, 18) Muntu udi ne mutshima wa mushindu’eu udi ne dianyisha ne disanka didi difumina ku ditumikila mubelu udi mu Nsumuinu 3:5, 6, udi wamba ne: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’ Kadi mutshima udi kauyi ne ditabuja kawena mua kuitaba bua kueyemena Yehowa nansha, nangananga padi kumueyemena eku kulomba madikolela, bu mudi kumbusha malu adi atunemena bujitu bua kumona mua kushindamena pa midimu ya Bukalenge. (Matayo 6:33) Ke bua tshinyi Yehowa utu wangata mutshima udi kauyi ne ditabuja ne: udi “mubi.”​—Ebelu 3:12.

Ditabuja ditudi bitabuje Yehowa didi dimuenekela mu malu a bungi, nansha mu malu atudi tuenza pa nkayetu munda mua nzubu. Tshilejilu, tangila dîyi didi mu Galatia 6:7: ‘Kanudidingi; Nzambi kêna usekibua; bualu bua tshintu tshionso tshidi muntu ukuna, ntshiotshi tshiapuolaye.’ Netuleje ne: tudi bitabe dîyi edi ku malu bu mudi filme itudi tumona, mikanda itudi tubala, bungi bua misangu itudi tulonga Bible ne bua masambila atudi tuenza. Bulelela, ditabuja dikole didi ditusaka bua kukunyina “nyuma bintu” ntshintu tshinene tshiatuambuluisha bua kuikala ne mutshima mulongolola bua kuitaba Dîyi dia Yehowa ne bua kuditumikila.​—Galatia 6:8.

Dinanga nngikadilu udi mupite mikuabu

Dinanga didi difikisha buloba bua mutshima wetu ku ditaba Dîyi dia Yehowa bipepele bualu diodi ke ngikadilu udi mupite mikuabu yonso. Nunku, pakafuanyikija mupostolo Paulo dinanga ne ditabuja ne ditekemena, wakamba ne: dinanga nngikadilu ‘mupite yonso.’ (1 Kolinto 13:13, MMM) Mutshima wa muntu udi munange Nzambi udi ne dianyisha ne disanka dikole bua dimutumikila; kawena umvua mikenji ya Nzambi iutonda nansha. Mupostolo Yone wakamba ne: ‘Bua edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’ (1 Yone 5:3) Yezu wakamba pende ne: ‘Bikala muntu munnange, neatumikile dîyi dianyi kabidi. Tatu wanyi neamunange.’ (Yone 14:23, MML) Tangila ne: dinanga edi didi nseke yonso ibidi. Yehowa udi unanga bikole bantu badi basemene kudiye.

Yehowa mmumanye ne: katuena bapuangane to ne tutu tumuenzela mpekatu njila ne njila. Nansha nanku, kêna kule netu to. Udi ukeba bua tuetu basadidi bende tuikale ne “mutshima umue” udi utusaka bua kumuenzela mudimu ku budisuile “ne anyima wa musangelu.” (1 Kulondolola 28:9, NW) Bushuwa, Yehowa mmumanye ne: bidi bitukengela matuku ne madikolela mavule bua kupeta ngikadilu mimpe mu mutshima wetu ne pashishe kukuama mamuma a nyuma. (Galatia 5:22, 23) Ke bua tshinyi udi netu lutulu, ‘bua yeye udi mumanye buntu buetu, udi uvuluka ne: tudi dimfuenkenya.’ (Musambu 103:14) Bia muomumue, Yezu kavuaku muanji kupetula balongi bende bua bilema biabu to, kadi wakabambuluisha ne wakabakankamija ne lutulu. Dinanga, luse ne lutulu bidi nabi Yehowa ne Yezu kabienaku bikusaka bua kubananga bikole anyi?​—Luka 7:47; 2 Petelo 3:9.

Imue misangu biwikala umona bikukolele bua kulekela bibidilu bidi bifuane lupele ne bikadi biele miji bikole peshi umona bikole bua kumbusha ngikadilu idi ikuvuija muena malu makole, kuteketshi mu mikolo to. Tungunuka ne kudienzeja bua kudilengeja, ‘nanukila mu disambila,’ lomba Yehowa nyuma wende misangu ne misangu. (Lomo 12:12, MMM) Nzambi yeye mukuambuluishe, anu bu Ezela neupete diakalenga bualu newikale ne mutshima mulongolola bimpe “bua kulonga mikenji ya Yehowa ne bua kuyitumikila.”

[Tshimfuanyi mu dibeji 31]

Ezela wakashala mulamate Nzambi nansha pavuaye mu Babulona

[Mêyi a dianyisha bua tshimfuanyi mu dibeji 29]

Garo Nalbandian