Nkonko ya babadi

Pakamba mupostolo Paulo mu Lomo 12:19 (NW) ne: “Bananga, kanudisombuedi, kadi nushile tshiji muaba,” uvua uleja ne: bena Kristo kabena ne bua kufika munda anyi?

Kabiena nanku menemene to. Muaba eu mupostolo Paulo uvua wakula bua tshiji tshia Nzambi. Kadi kabiena bisua kumvuija ne: ki mbualu to nansha bena Kristo buobu bafike munda. Bible udi utubela bimpe bua kubenga kulua bena bumfika-munda. Tangila imue mibelu idi Nzambi ufilamu.

‘Lekela kufua tshiji, upidie kuikala ne njiya. Kunyingabadi; bualu ebu budi mua kukuenzeja anu bualu bubi.’ (Musambu 37:8) ‘Muntu yonso udi ne muanabu tshiji nebamubande ku tshilumbuluidi.’ (Matayo 5:22) ‘Malu mabi adi mubidi wenza adi amueneka ne: Tshiendenda tshia malunda mabi, meji mabi, masandi, ditendelela dia mpingu, kupaka kua manga, lukuna, kutandangana, mukawu, tshiji.’ (Galatia 5:19, 20) ‘Difika dia munda ne tshiji ne lukuna ne diyoyo ne dipendangana ne lukinu luonso biumushibue kunudi.’ (Efeso 4:31) ‘Muntu yonso umvue biende lubilu, atukije kayi muanji kuakula, kakuatshi tshiji lubilu.’ (Yakobo 1:19) Mukanda wa Nsumuinu udi utubela kabidi misangu ne misangu bua kubenga kuikala ne tshiji anyi kufika munda bua tualu tukese anyi bua tulemalema tudi bantu mua kutuenzela.​—Nsumuinu 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

Mêyi adi mu Lomo 12:19 (NW) adi umvuangana ne mibelu eyi. Paulo uvua utubela bua katuikadi ne dinanga dia lubombo, bua tusankishe badi batukengesha, bua tuikale tuelela bakuabu meji adi mimpe, bua katupingaji bubi ku bubi ne utulomba kabidi bua tuenze muetu muonso bua kuikala mu ditalala ne bantu bonso. Pashishe wakabela wamba ne: “Bananga, kanudisombuedi, kadi nushile tshiji muaba; bualu mbafunde ne: ‘Disombuela ndianyi; meme nemfute, ke mudi Yehowa wamba.’”​—Lomo 12:9, 14, 16-19, NW.

Bulelela, katuena ne bua kulekela tshiji tshitufikisha ku didisombuela nansha. Dimanya dia malu ditudi nadi ne mushindu utudi tuetu mua kukosa bilumbu ki mbipuangane to. Bituikala tulekela tshiji tshitufikisha ku didisombuela, nebitufikishe ku dienza malu mabi misangu mivule. Kulekelela tshiji nanku nkuenza malu adi Diabolo Muluishi wa Nzambi musue. Paulo wakafunda kabidi ne: ‘Nuikale ne tshiji kadi kanuenji bualu bubi; dîba kadibueledi tshiji tshienu; kanushidi Diabolo muaba mu mitshima yenu.’​—Efeso 4:26, 27.

Njila muimpe wa meji ng’wa kulekela Nzambi bujitu ebu bua yeye nkayende ajadike tshikondo ne muntu udi disombuela diende ne bua kukuata. Yeye udi mua kuenza nanku bualu mmumanye malu onso, ne difutu dionso diafilaye nedileje ne: nkoselu wende wa bilumbu utu mupuangane. Tudi mua kumvua ne: etshi ke tshidi Paulo wamba mu Lomo 12:19 bualu udi utelamu mêyi a mu Dutelonome 32:35, 41 a se: “Kusombuela kudi kuanyi, ne difutu kabidi.” (Tangila Ebelu 10:30.) Nansha mudi mêyi aa: “tshia Nzambi” kaayi mu mifundu ya tshiena-Greke, bakudimunyi ba bungi ba lelu mbaasakidile mu Lomo 12:19. Nenku imue nkudimuinu mmifike ku diamba ne: “[Nzambi] nkayende neanyoke” (Muanda Mulenga Lelu); ‘nushile tshiji tshia Nzambi muaba.’​—Mukanda wa Nzambi, tangila kabidi Mukanda wa Mvidi Mukulu ne Mukenji Mulenga.

Nansha padi baluishi ba bulelela batuenzela bibi anyi batukengesha, tuikalayi bamanye ne: mêyi akumvua Mose bua Yehowa Nzambi mmalelela. Bakamuambila ne: ‘Yehowa, Yehowa, Nzambi wa luse ne dinanga, kêna ukuata tshiji lubilu, udi mûle tente ne luse lujalame ne bushuwa, udi uleja binunu bia bantu luse lujalame, udi ubuikidila bantu mapanga abu ne kusambuka kuabu kua mikenji ne malu mabi abu; kadi kêna ubingisha muntu udi upila.’​—Ekesode 34:6, 7, disendamija miaku ndietu.