Mmunyi mudi nyuma wa Nzambi ukuata mudimu lelu?

UVUA mulema kubangila mu difu dia mamuende. Dituku dionso uvua usomba ku tshiibi tshia ntempelo tshivuabu babikila ne: Tshimpe, bua kulomba ka-pa-luse kudi bantu bavua babuela mu ntempelo. Kadi, dimue dîba mulema eu wakapeta tshintu tshivua tshipite tukuta tukese tua bijanja kule ne kule. Bakamuondapa!​—Bienzedi 3:2-8.

Petelo ne Yone ke ‘bakamujula,’ ne ‘makasa ende kukolawu.’ Nansha nanku, kabakadikuma mu tshiadi bamba muvuabu bamuondape to. Bua tshinganyi? Petelo muine wakumvuija ne: “Bena Israele, nudi nukema bua tshinyi? Bua tshinyi nudi batutangile nanku, tuetu kuenza bu badi bendeshe muntu ewu ku bukole buetu nansha ku bulenga buetu?” Bushuwa, Petelo ne Yone bavua bamanye ne: bualu ebu kabuvua mua kuenzeka ku bukole buabu buobu to, kadi nku spiritu munsantu wa Nzambi.​—Bienzedi 3:7-16, MMM; 4:29-31.

Tshikondo atshi, “bienzedi bia bukole” bia mushindu’eu bivua bileja ne: Nzambi uvua ukuatshisha tshisumbu tshia bena Kristo tshitshivua tshituadijilaku. (Ebelu 2:4) Kadi mupostolo Paulo wakamba ne: bivua ne bua ‘kushikila,’ kunyima kua biobi bimane kukumbaja kipatshila kabi. * (1 Kolinto 13:8) Nunku, lelu mu tshisumbu tshilelela tshia bena Kristo katuena tumona buondapanganamu ne nyuma wa Nzambi peshi baprofete bamanyishamu mikenji anyi bipatamu ba-demon to.

Nanku bidi bisua kumvuija ne: spiritu munsantu wa Nzambi katshiena ukuata mudimu anyi? Kabiena nanku to. Tumonayi mishindu mikuabu ivua nyuma wa Nzambi ukuata mudimu mu bidimu lukama bia kumpala, ne mudiye uukuata lelu’eu.

“Nyuma wa bulelela”

Umue mudimu wa spiritu munsantu wa Nzambi ng’wa kumanyisha, kutokesha ne kusokolola malu malelela. Katupa kîpi kumpala kua lufu luende, Yezu wakambila bayidi bende ne: ‘Ntshidi ne malu makuabu a bungi a kunuambila, kadi nuenu kanuena bamanye mua kuatuala katataka. Kadi palua nyuma wa bulelela, yeye neanulombole mu malu malelela onso.’​—Yone 16:12, 13.

“Nyuma wa bulelela” uvua muitshikija mu dia Pentekoste wa mu 33 B.B. pavua bayidi batue ku 120 badisangishe mu nzubu wa kuulu mu Yelushalema batambuishibue ne spiritu munsantu. (Bienzedi 2:1-4) Mupostolo Petelo uvua munkatshi mua bavua mu tshibilu atshi tshivua tshienzeka ku tshidimu tshionso. Petelo mûle tente ne spiritu munsantu, “wakimana” kuulu ne kumvuijaye malu mu bule ne mu butshiama, kutokesha imue mianda milelela idi itangila Yezu. Tshilejilu, wakalonda muvua ‘Yezu wa ku Nazaleta’ mumane “kubandishibua ku tshianza tshia balume tshia Nzambi.” (Bienzedi 2:14, 22, 33) Nyuma wa Nzambi wakasaka kabidi Petelo bua kuakula ne dikima kumpala kua bena Yuda bavua bamuteleja ne kubambila ne: ‘Bena Isalele bonso bamanye bushuwa ne: Nzambi wakuvuija Yezu eu unuakushipa ku mutshi Mukalenge ne Kristo kabidi.’ (Bienzedi 2:36) Bua mêyi a Petelo aa mamba ku diambuluisha dia nyuma, bantu batue ku binunu bisatu ‘bakitabuja dîyi diende’ ne kutambulabu. Mushindu au ke uvua spiritu munsantu wa Nzambi mubafikishe ku bulelela.​—Bienzedi 2:37-41.

Spiritu munsantu wa Nzambi uvua kabidi bu muyishi ne mubavuluiji wa malu. Yezu wakamba ne: ‘Musambi, nyuma muimpe mene, watumabu kudi Tatu mu dîna dianyi, yeye neanuyishe malu onso, neanuvuluije mêyi onso angakanuambila.’​—Yone 14:26.

Mmushindu kayi uvua spiritu munsantu muikale muyishi? Nyuma wa Nzambi wakunzulula lungenyi lua bayidi bua kushindikabu malu akavuabu bamane kumvua kudi Yezu avuabu kabayi banji kujingulula bimpe menemene to. Tshilejilu, bapostolo  bavua bamanye ne: dîba divuabu bamulumbuluisha, Yezu wakambila Ponto Pilato (muena Lomo uvua ngovena wa Yudaya) ne: ‘Bukalenge buanyi kabuena bua pa buloba ebu.’ Kadi, kunyima kua matuku mapite pa 40 pakavua Yezu pa kubanda mu diulu, bapostolo batshivua anu batupakana bela meji ne: Bukalenge [bua Nzambi] buvua ne bua kujadikibua pa buloba apa. (Yone 18:36; Bienzedi 1:6) Bidi bimueneke ne: bapostolo bakajingulula tshivua mêyi a Yezu aa umvuija amu pakabapuekeshila Nzambi spiritu wende munsantu dia Pentekoste wa mu 33 B.B.

Nyuma wa Nzambi wakambuluisha kabidi bua kuvuluija balongi malongesha a Yezu. Tshilejilu, milayi ivua yakula bua lufu lua Kristo ne dibika diende ku lufu yakapeta diumvuija dipiadipia ku diambuluisha dia spiritu munsantu. (Matayo 16:21; Yone 12:16) Divuluka malongesha a Yezu diakambuluisha bapostolo bua kuleja ne dikima luseke luvuabu balamate pavuabu kumpala kua bakalenge, kua banzuji ne balombodi ba bitendelelu.​—Mâko 13:9-11; Bienzedi 4:5-20.

Kabidi, spiritu munsantu wa Nzambi wakambuluisha bua kulombola bena Kristo ba kumpala miaba ivuabu mua kupeta bantu bavua mua kulua bayidi. (Bienzedi 16:6-10) Nyuma wa Nzambi wakasaka kabidi bena Kristo ba kumpala bua kufundabu Bible bua diakalenga dia bantu bonso. (2 Timote 3:16) Nenku bidi bimueneka ne: spiritu munsantu uvua ne midimu kabukabu mu bidimu lukama bia kumpala ne kavua wambuluisha anu bua kuenza bishima nkayabi nansha.

 Spiritu munsantu mu matuku etu aa

Spiritu munsantu utshidi wambuluisha kabidi bena Kristo balelela lelu’eu mu mushindu wa muomumue. Ke tshiakamona kasumbu ka balongi ba Bible mu tshimenga tshia Allegheny, mu Pennsylvanie (États-Unis), ku ndekelu kua bidimu bia 1800. Balongi ba Bible aba ba muoyo umue bavua bajinga bua kumanya “bulelela.”​—Yone 8:32; 16:13.

Charles Taze Russell, umue wa mu kasumbu aka, wakamba bua dikeba diende dia bulelela bua mu Bible ne: “Ngakasambila [Nzambi] . . . bua ngikale ne bukole bua kumbusha mu mutshima ne mu meji anyi ngenyi yonso ivua mua kuikala bu tshipumbishi, ne bua nyuma wende kumfikishayi ku bujinguludi bukumbane.” Nzambi wakateleja disambila edi dia budipuekeshi.

Bu muvua Russell ne binende bakebulula ne tshisumi mu Bible, bakafika ku dijingulula malu a bungi. Russell wakumvuija ne: “Tuakamona ne: mu nkama ya bidimu, tusumbu ne bisumbu bishilangane bivua biabulule malongesha a mu Bible munkatshi muabi, biasambakaje ne meji a patupu a bantu bena ntupakanyi.” Muanda eu wakafikisha ku tshiakabikilaye ne: “dikonyangaja dia bulelela.” Bavua bajiike bulelela bua mu Bible muinshi mua mushiki wa malongesha a bampangano avua mabuele mu Bukua-buena-Kristo munkatshi mua bidimu bipite bungi. Kadi Russell yeye uvu’anu mudisuike bua kumanya bulelela ne kubumanyisha bakuabu.

Mu Tshibumba tshia Nsentedi tshia Siona ne Mumanyishi wa dikalaku dia Kristo (Angl.), Russell ne binende bakela patoke kabayi batshina muntu malongesha a bitendelelu bia dishima avua makonyangaje tshidi Nzambi muikale. Kabiyi bu mutu bitendelelu bivule bilongesha, bakajingulula ne: anyima utu ufua, patudi tufua batu batuela mu lukita, ne: Yehowa udi Nzambi umuepele mulelela, katu mu Busatu Bunsantu nansha.

Ee, anu bu muudi mua kubimona, ditandula malongesha aa a dishima diakafiikisha bamfumu ba mu Bukua-buena-Kristo munda bibi bia dikema. Bu muvuabu bajinga anu bua kulama mianzu yabu minene, bamfumu ba bena Katolike ne ba bena Mishonyi ba bungi bakakeba bua kunyangila Russell lumu. Kadi yeye ne binende kabakateketa nansha. Bakakakeba ne kushala beyemene anu nyuma wa Nzambi bua abaludike. Russell wakamba ne: “Mukalenge wetu mmushindike se: . . . spiritu munsantu wa Tatu, mutuma mu dîna dia Yezu Mupikudi wetu, Mutuangaji ne Mfumuetu, ne ku dilomba diende, neikale mulongeshi wetu.” Spiritu eu wakabalongesha bushuwa. Balongi aba balelela ba Bible bakatungunuka ne kuangata mâyi makezuke a bulelela mu Bible ne kuamuangalaja pa buloba bujima.​—Buakabuluibua 22:17.

Kukadi bidimu bipite pa lukama, bulongolodi bua Bantemu ba Yehowa budiku lelu budi butungunuka ne kulonda buludiki bua spiritu munsantu wa Nzambi. Bu mudi spiritu wa Yehowa utokeshila Bantemu malu a mu nyuma ku kakese ku kakese, kabena bajingakana bua kushintulula ngumvuilu wabu wa malu adi akengedibua to.​—Nsumuinu 4:18.

“Nenuikale [bantemu] banyi”

Yezu wakaleja diambuluisha dikuabu didi nadi spiritu munsantu wa Nzambi pakambilaye bayidi  bende ne: ‘Nuenu nenuangate bukole, panupuekela nyuma muimpe pambidi penu; nenuikale [bantemu, NW] banyi [too] ne ku mfudilu kua buloba.’ (Bienzedi 1:8) Dilaya dia Yezu dia kupesha balongi bende “bukole” ne “nyuma muimpe” bua kumonabu mua kukumbaja mudimu udi Nzambi mubapeshe ditshidi anu ditungunuka too ne lelu’eu.

Bantemu ba Yehowa mbamanyike bimpe bua mudimu wabu wa diyisha. (Tangila kazubu.) Bantemu ba Yehowa badi bayisha mukenji wa bulelela mu matunga ne bidiila bipite pa 230. Nansha mu nsombelu kayi, nansha mu miaba idi mvita itua ipela, miaba idibu mua kujimija nansha mioyo yabu, kabena batshina bua kubandisha mêyi abu bua kutua Bukalenge bua Nzambi nyama ku mikolo. Lukunukunu ludibu nalu mu mudimu wabu wa bena Kristo ntshijadiki tshinene tshidi tshileja se: spiritu munsantu udi wenza mudimu lelu’eu. Mbimueneke kabidi patoke ne: Yehowa Nzambi udi ubenesha madikolela abu.

Tshilejilu, tshidimu tshishale bavua benze mêba mapite pa muliyare mujima bua kuyisha lumu luimpe lua Bukalenge bua Nzambi. Ntshinganyi tshiakapetabu? Bantu batue ku 323 439 bakatambula bua kuleja muvuabu badilambule kudi Nzambi. Kabidi ku lumingu luonso bavua balonge Bible ne bantu 4 433 884. Bakabanya mikanda 24 607 741, bibejibeji 631 162 309, tukanda tukese ne broshire 63 495 728. Etshi ntshijadiki menemene tshia mudimu udi nyuma wa Nzambi ukuata!

Tshidi nyuma wa Nzambi mua kukuenzela

Padi muntu witaba lumu luimpe ne muoyo umue, utuadija kutumikila mêyi a Nzambi, ne uleja dianyisha bua tshia-bupikudi, udi upeta mushindu wa kudia bulunda ne Nzambi. Mupostolo Paulo wakambila bantu ba mushindu’eu ne: ‘Nzambi udi unupa nyuma muimpe wende.’​—1 Tesalonike 4:7, 8; 1 Kolinto 6:9-11.

Kuikala ne nyuma wa Nzambi kudi kupetesha mabenesha a bungi. Mmabenesha kayi au? Tshia kumpala, Dîyi dia Nzambi difundisha ku nyuma didi diamba ne: ‘Mamuma a nyuma adi dinanga, disanka, ditalala, lutulu, luse, buimpe, bunanukidi bua lulamatu, kudipuekesha, [ne] kudikanda.’ (Galatia 5:22, 23) Nunku, spiritu munsantu wa Nzambi mbukole budi bupetesha muntu masanka, bumusaka bua kuikala ne ngikadilu milenga.

Bualu bukuabu, wewe muikale ubala Bible ne utumikila malu awudi ulongamu, nyuma wa Nzambi udi mua kukuambuluisha bua kukolesha meji, dimanya, bujinguludi, busunguluji ne lungenyi luebe. Mukalenge Solomo wakapeta “ngenyi ya bungi be ne dijingulula ditambe ne bunene bua mutshima” bualu wakakeba bua kusankisha Nzambi pamutu pa bantu. (1 Bakelenge 4:29) Bu muvua Yehowa mupeshe Solomo spiritu munsantu, kakuyi mpata, kakubenga bua kumupesha bantu badi bajinga kumusankisha lelu’eu nansha.

Spiritu munsantu wa Nzambi udi kabidi wambuluisha bena Kristo bua kuluisha Satana ne ba-demon, ndongoluelu eu mubi wa malu ne majinga mabi a mubidi wabu wa butekete. Mmunyi mudibi mua kuenzeka? Mupostolo Paulo udi wandamuna ne: ‘Ndi mumanye mua kuenza malu onso mu Mukalenge udi unkolesha.’ (Filipoi 4:13) Spiritu munsantu udi mua kubenga kukuepula ku mateta anyi ku mateyi; kadi, udi mua kukuambuluisha bua wewe kuatantamena. Tuetu beyemene nyuma wa Nzambi, tudi mua kupeta “bukole budi bupite bua pa tshibidilu” budi mua kukuambuluisha bua kutantamena ntatu anyi makenga onso atudi mua kupeta.​—2 Kolinto 4:7, NW; 1 Kolinto 10:13.

Wewe mukonkonone bijadiki ebi bionso, neumone se: spiritu munsantu wa Nzambi udi ukuata mudimu lelu’eu. Nyuma wa Yehowa udi upesha basadidi bende bukole bua kumanyisha malu manene adiye mulongolole. Udi utungunuka ne kusokolola nsese ya bukenke bua mu nyuma, ukolesha ditabuja dietu ne utuambuluisha bua kushala balamate Mufuki wetu. Tuikalayi ne dianyisha bua mudi Nzambi mukumbaje dilaya diende pa kupesha basadidi bende ba lulamatu spiritu munsantu lelu’eu!

[Mêyi adi kuinshi]

[Kazubu mu dibeji 10]

Tshidi bantu bakuabu bamba bua Bantemu ba Yehowa

“Patshidi bitendelelu bikuabu bifuta bafidi ba mibelu bua babalobeshile bantu mu bitanda peshi bua kuluishabu bilele bia buena-lelu bu mudi dilala dia mulume ne mulume nende ne ditula dia mafu, Bantemu buobu kabena badisanga ne banga bantu bua kumona mua kushintulula malu a panu to. Badi bayisha lumu luimpe pa buloba bujima.”​—The Orange County Register, tshikandakanda tshia mu États-Unis (Orange, Californie).

“Bua malu adi atangila ditabuja, anu bitendelelu bikese ke bidi biayisha ne musangelu . . . bu mudi Bantemu ba Yehowa.”​—The Republic, mu États-Unis (Columbus, Indiana).

“Anu buobu nkayabu ke batu bayisha ‘lumu luimpe’ ku nzubu ne ku nzubu, bua kutumikila mêyi a mu Bible.”​—Życie Literackie, Pologne.

“Mudimu mutambe bunene wa diyisha mmuambuluishe Bantemu ba Yehowa bua kufikisha mukenji wa Yehowa pa buloba bujima.”​—News-Observer, États-Unis (Tamaqua, Pennsylvanie).

[Bimfuanyi mu dibeji 9]

Spiritu munsantu wa Nzambi udi ututokesha mu nyuma,

. . . utuambuluisha bua kupeta ngikadilu milenga ya bena Kristo,

. . . ne utukuatshisha mu mudimu utudi tuenza bua kuyisha pa buloba bujima