Bamanyishi ba Bukalenge badi balonda

“Nudi bamanye malu a bungi a mu Bible”

PAVUA Yezu ne bidimu 12, wakakula ne dikima kumpala kua bamfumu ba ntendelelu ba mu Yelushalema, ‘bantu bonso bakadi bumvua mêyi ende bakakema bualu bua lungenyi luende ne bualu bua mêyi akabandamunaye.’ (Luka 2:47) Bia muomumue lelu’eu, bansonga ba bungi badi basadila Yehowa badi bapeta dikima dia kuambila balongeshi babu ne balongi nabu malu a Nzambi adi mu Bible, ne misangu mivule bipeta bitubu bapeta bitu bibapesha disanka.

Tiffany, nsongakaji wa bidimu 14, bakalonga dituku dikuabu mu kalasa malu adi mu mulayi wa mu Bible udi wakula bua mbingu 70 ya bidimu udi mu Danyele 9:24-27. Mulongeshi wabu wakumvuija anu malu makese adi atangila mvese eyi ne kupitaye dilongesha edi anu pa mutu pa mutu.

Kumpala, Tiffany uvua welakana bua kuela munu kuulu. Udi wamba ne: “Biakantonda bikole bua muvuabu kabayi bumvuije mvese eyi bimpe menemene. Diakamue ngakela munu kuulu.” Mulongeshi wakakema pakamonaye ne: kuvua mulongi uvua menemene ne bualu bua kuamba mu dilongesha edi, bualu balongi bavule kabavua bumvue dilongesha edi bimpe to.

Pakanyishilabu Tiffany bua kumvuija mulayi eu, wakimana kuulu, e kubangishaye kuakula. Pakajikijaye, mu kalasa muakashala anu vii. Lukanku luakanji kukuata Tiffany kakese. Kunyima balongi babu e kumukumina bikashi bivua kabiyi bikoseka.

Mulongeshi wabu wakamba wambulula ne: “Ebu mbualu bua dikema, Tiffany, ebu mbualu bua dikema.” Mulongeshi eu wakamba ne: kuvua malu a bungi mu mvese ayi avuaye kayi mumanye, kadi anu Tiffany ke uvua muntu wa kumpala wakamumvuijawu bimpe menemene. Ku ndekelu kua kalasa, wakebeja Tiffany bua amuambile kuvuaye mupetele dimanya dia mu Bible bungi nanku.

Tiffany kumuandamuna ne: “Ndi mumanye malu aa bualu ndi Ntemu wa Yehowa. Baledi banyi bavua bangumvuije mulayi eu misangu ya bungi kumpala kua meme kuumvua.”

Bana ba mu kalasa kabu bakakema pabu bua dimanya diende dia Bible. Mulongi mukuabu wakambila Tiffany ne: “Mpindieu ngakumanya bua tshinyi nuenu Bantemu ba Yehowa nutu nuya ku nzubu ne ku nzubu; mbualu nudi bamanye malu a bungi a mu Bible.” Bakuabu bakamulaya ne: kabakumuyobola kabidi bua mitabuja ende nansha.

Pakambila Tiffany baledi bende bualu ebu, bakamuambila bua kupesha mulongeshi wabu mukanda wa Dimanya didi difikisha ku muoyo wa kashidi. Pakapeshaye mulongeshi mukanda eu ne kumuleja muaba udibu bumvuije mulayi wa Danyele au, wakawangata musangu umue, kumuelaye tuasakidila.

Bushuwa, padi bansonga bena Kristo bambila bantu ne dikima malu a Nzambi adi mu Bible adi baledi babu babalongeshe, badi batumbisha Yehowa ne bamupesha lumu, ne badi bapeta buobu bine mabenesha mavule.​—Matayo 21:15, 16.