Badi baloba bantu mu Mbuu wa Égée

MBUU wa Égée mmualabale ku Est kua Mbuu wa Méditerranée. Tshitupa tshinene tshia ditunga dia Grèce tshidi ku Nord ne ku Ouest kua mbuu eu. Tshidiila tshia Crète tshidi tshiotshi ku Sud, ne ku Est kuende kudi ditunga dia Turquie. Imue nshidimukilu minene ya kale yakatuadijila muaba eu. Mu Mbuu wa Égée mudi bidiila bia bungi binene ne bikese. Pa bibungubungu bidi ku mielelu ya bidiila ebi padi nzubu ya mikese-mikese mitoke miasa pale-pale idi ikenka mu munya. Bionso ebi biakafikisha munga mufundi wa tusala ku difuanyikija bidiila ebi ne “tubalu tua mabue tudi tuimanyike misalala.”

Kabiena bikemesha mudi bantu ba bungi baya kuendakana mu bidiila ebi to! Ngikadilu milenga ya balume ne bakaji badi basombelemu ne benzelamu mudimu mmivuije bidiila ebi muaba mulenga mutambe wa kuendela buenyi. Bu mudibu bantu badi basue malu malelela ne kabidi bamanye mua kuakidilangana eku basue kuikala badikadile, bantu aba mbavuije muaba eu wa pa buawu.

Bantu ba bungi ba mu bidiila ebi badi badiila ku mudimu wa diloba udibu benza mu Mbuu wa Égée. Kadi kudi “diloba” dikuabu dia mushinga didi dipetesha bintu bia bungi muaba eu. “Balobi ba bantu” anyi bambi ba lumu luimpe lua Bukalenge bua Nzambi badi batambakana mu bidiila bia Égée, benda bambuluisha bantu bua kulua bayidi ba Kristo.​—Matayo 4:18, 19; Luka 5:10, Muanda Mulenga Lelu.

Kukadi bidimu bitue ku 1900, bena Kristo bambi ba lumu luimpe bakaya mu bidiila bia mu Mbuu wa Égée. Bu mu 56 B.B., pavua mupostolo Paulo ufumina ku luendu luende luisatu lua bu-misionere, wakatudila mu tshidiila tshia Lesbos, tshia Chios, tshia Samos, tshia Kos ne tshia Rhodes. Bu muvuaye muyishi wa lukunukunu, mbimueneke se: Paulo uvua muyishe bamue bantu mu bidiila ebi. (Bienzedi 20:14, 15, 24; 21:1, 2) Kunyima kua bidimu bibidi biakenzaye mu buloko ku Lomo, bidi bimueneka ne: wakapitshila mu tshidiila tshia Crète muakayishaye. Patukavua ku ndekelu kua bidimu lukama bia kumpala, bakela mupostolo Yone mu buloko mu tshidiila tshia Patmos ‘bualu bua dîyi dia Nzambi ne bua dimanyisha dia Yezu.’ (Buakabuluibua 1:9) Mmunyi mudi bamanyishi ba lumu luimpe lelu bakumbaja mudimu wabu mu bidiila ebi?

Midimu ya diyisha idi ifila disanka

Kuyisha mu bidiila ebi nkukole ne kudi kulomba malu a bungi. Kudi kulomba madikolela ne didifila bia bungi. Bimue bidiila bidi kule. Mazuwa a mâyi anyi ndeke itu iya ku mpukapuka mu bimue bidiila ne bitu bikole bua kufika mu bikuabu, nangananga mu muvu wa mashika. Mavuala a bungi atu ajuka mu mbuu eu nangananga patu mpepele mikole idi ne dîna ne: meltemia ituta ifumina lua ku Nord. Misoko idi mu bidiila bia bungi ebi mmiasa pale-pale ne mbikole bua kufikamu bualu njila ya kuyamu mmibi be, ne ki mmiela tubudimbu to. Bantu batu bayila ku matu makese bua kushisha kufika mu imue misoko.

Tuangatayi tshilejilu tshia tshidiila tshia Ikaria. Bamanyishi 11 ba lumu luimpe lua Bukalenge badi mu tshisumbu tshikese tshia muaba eu kabena mua kuyisha kujikija misoko yonso ya mu tshidiila atshi ne mikuabu ya mu bidiila bikese bidi pabuipi to. Ke bua tshinyi bana betu bena Kristo ba ku Samos batu balua kubambuluisha bua kuyisha bantu ba mu Ikaria, ne ba mu tshidiila tshia Fournoi, tshia Patmos ne tshia Lipsos. Matuku mashale aa, pavuabu balongolole bua kuyisha matuku abidi malondangane, Bantemu bakabanya bibejibeji 650, broshire 99 ne mikanda 25 idi  yumvuija malu a mu Bible! Bakakema pakasanganabu bantu bavua kabayiku nansha bamanye ne: Yehowa nnganyi to. Bantu abu bakasengelela bamanyishi bua kushalabu mu misoko yabu bua babalongeshe malu makuabu a mu Bible. Muntu mukaji mukuabu wakambila munga Ntemu ne: “Mpindieu nukadi nuamba bua kuya, panyi se ntshidi ne nkonko ya bungi ya kunuela ya malu a mu Bible. Nnganyi mukuabu wayingandamuina?” Muanetu wa bakaji wakamulaya bua kutungunukilabu ku nshinga; ke mushindu wakatuadijaye kulonga nende Bible.

Pakaya mutangidi muena ngendu mu Ikaria, wakalongolola bua kuyisha mu tshidiila atshi tshijima mu matuku abidi patupu a ku ndekelu kua lumingu. Wakalomba bua bamanyishi ba Bukalenge ba mu Samos batue ku 30 balue kubambuluisha. Bana betu bavua bayamu bavua ne bua kufutshila nzubu wa tshilala benyi ne mashinyi bua matuku abidi. Mvula wa bungi uvua muloke matuku abidi ne bavua bamanyishe ne: kuulu kuvua ne bua kufua ku ndekelu kua lumingu alu. Kadi nansha nanku, bana betu kabakalekela malu aa abapumbisha bua kupatuka mu buambi, bakavuluka mêyi a Muambi 11:4 a ne: ‘Udi utangila bu mudi lupepele luenza kêna ukuna bintu; udi utangila bu mudi matutu enda kêna upuola.’ Ndekelu wa bionso, kuulu kuakanjiku kutoka kakese, ne kunyima kua buobu bamane kuyisha mukenji wabu wa mushinga mu tshidiila tshijima, bana betu bakapingana ku-mabu bûle tente ne disanka.

Bamanyishi 16 badi basombele mu tshidiila tshia Andros badi benza madikolela a bungi bua kuyisha mu tshidiila atshi tshijima. Pakafika bana betu babidi mu musoko kampanda muditole, bakapangadija bua kuyisha bena mu musoko au bonso. Bakayikila ne bantu ku nzubu yabu, mu njila ne ku madimi. Bakafika too ne ku biro bia bampulushi ne kubashilabu imue mikanda. Mpindieu bakavua pa kupingana, bela meji ne: bavua bayikile ne bena musoko bonso. Pakavuabu bumbuka munkatshi mua musoko, bakamona kumpala kuabu nsaserdose wa Ortodokse wa bena Greke wenda ulua. Pakajingululabu ne: kabavua bamuyishe, bakamupesha kakanda kamue ne kukangataye ne disanka. Mpindieu bavua bajadike ne: kakuvua muntu nansha umue uvuabu bashiye kabayi bamuyishe!

Batu bangata tshidiila tshikese tshia Gavdos peshi Cauda (tshidiila tshikese tshidi ne bantu 38 patupu ne tshikale pabuipi ne tshia Crète) bu tshitupa tshidi ku Sud menemene kua Mputu. (Bienzedi 27:16) Munga mutangidi muena ngendu ne mukajende pamue ne muanetu mukuabu ne mukajende, bakayishamu matuku asatu majima. Bua kubenga kutula makuta a bungi, bavua balala mu ntenta. Bakamanyisha bantu bonso ba mu tshidiila etshi lumu luimpe, ne bana betu aba bakasanka bua muvua bantu ba muaba au kabayi batuelela meji mabi. Kabavua banji kumvua bamba Bantemu ba Yehowa bualu nansha bumue buimpe anyi bubi. Bantu ba mu tshidiila etshi ne nsaserdose bakangata mikanda 19 ne broshire 13. Pakavua Bantemu aba bapingana ku Crète mu buatu bukese, mavuala makole akabanga kututa ne mioyo yabu ivua mu njiwu. Bakamba ne: “Tuakela Yehowa tuasakidila mutuakafika kumbelu ne muoyo. Tuakamutumbisha kabidi bua muvuaye mutupe mushindu wa kutumbisha dîna diende mu tshitupa etshi tshidi lua ku Sud menemene kua Mputu.”

Mupostolo Yone wakafundila mukanda wa ndekelu wa mu Bible wa Buakabuluibua mu tshidiila tshia Patmos. Too ne matuku adi panshi aa kakuvua Ntemu wa Yehowa nansha umue mu Patmos to. Bana betu ba mu Samos bakalongolola bimpe mudimu wa buambi mu tshidiila etshi. Bavua bamanye ne: bavua mua kubaluisha bikole bualu Ekeleziya wa Ortodokse wa bena Greke mmuele miji mu tshidiila atshi. Muntu mukaji mukuabu wakabueja bana betu ba bakaji babidi bavua bayisha lumu luimpe mu nzubu muende. Bayende wa mukaji eu wakasuminyina ne dikonka bua kumanya uvua mutume bana betu ba bakaji aba ku nzubu kuende. Pakumvuijabu ne: bavua benda bayikila ne bantu ku nzubu yonso patupu, wakakonka kabidi ne: “Nudi bajadike ne: kakuena muena mutumba udi munutume muaba eu anyi?” Mukajende  uvua mufike ku dimanya Bantemu ba Yehowa pavuaye mu ditunga dia Zaïre (lelu République démocratique du Congo) wakalua kumvuija bana betu ba bakaji abu tshivua tshienzeke dinda dia dituku adi. Wakamba ne: “Mvua nsambila Yehowa, anu mumvua nsambila matuku makuabu onso, bua yeye kutuma bamue Bantemu mu tshidiila etshi. Bayanyi uvua unseka. Pangakanumona ku tshiibi, ngakakema ne bayanyi pende wakakema. Ke bua tshinyi uvua anu unukonka muntu uvua munutume kumbelu kuetu.” Bakatuadija kulonga Bible anu pinapu ne muntu mukaji au. Bakalonga ku nshinga munkatshi mua ngondo dikumi, nansha muakatudishabi muanetu wa bakaji eu ne muntu mukaji au makuta a bungi. Muntu mukaji au ukadi mutambule ne mpindieu amu yeye ke Ntemu umue udi mu tshidiila atshi muvuabu bele mupostolo Yone mu buloko kukadi bidimu 1 900.

Badi ‘baloba’ mu bitudilu bia mazuwa

Mazuwa a bena ngendu atu alua mu bitudilu bia bungi bia mu bidiila bia mu Égée mu tshikondo tshionso tshia muvu wa luya mambule bantu bapite bungi badi balua kuendakana muaba eu. Nunku, Bantemu ba Yehowa batu bapeta mushindu muimpe wa kuyikila ne bantu ba matunga ne miakulu mishilangane. Bisumbu bitu bilama mikanda idi yumvuija Bible mu miakulu kabukabu, ne bambi ba lumu luimpe batu bafila bibejibeji bia bungi kudi bena ngendu aba. Bu mutu amue mazuwa aluamu ku lumingu luonso, bana betu batu bapeta mushindu wa kumonangana tshiakabidi ne bantu bakavuabu bayikile nabu ne kutuadija mene kulonga Bible ne bamue bena mudimu wa mazuwa.

Mu muvu wa luya wa 1996, muanetu wa bakaji mukuabu mpanda-njila wa mu tshidiila tshia Rhodes wakayikila ne munga nsongalume wa mu ditunga dia Jamaïque uvua wenza mudimu mu mazuwa a bena ngendu avua alua ku tshitudilu atshi mu Ditanu dionso. Ditanu diakalonda wakabikila nsongalume au bua kubuelaye mu mpungilu wa distrike uvua ne bua kuenzeka mu tshidiila etshi. Ne Bible wende wa mu muakulu wa Anglais ku bianza, muanetu wa bakaji mpanda-njila wakambuluisha nsongalume au bua kumvuaye amue malu malelela a mu Bible akalongeshabu mu mpungilu au. Dinanga ne musangelu bivua nabi Bantemu mu mpungilu au biakamukemesha bikole. Ditanu divua dilonda, wakabikila bampanda-njila babidi mu mazuwa. Bampanda-njila aba bakaya ne mikanda ya mu Anglais ne ya mu tshiena-Espagne. Dîba dijima kadianji nansha kukumbana, bibuta biabu kushala munda mutupu! Nsongalume eu wa mu Jamaïque wakalonga Bible mu Ditanu dionso too ne ku ndekelu kua muvu wa luya au. Pashishe wakapingana  tshidimu tshiakalonda, mudilongolole bua kutungunuka ne dilonga diende. Kadi bua musangu eu, wakapangadija bua kushintulula mudimu uvuaye wenza bua kumonaye mua kuya kumpala mu nyuma. Pashishe yeye kuanji kumbuka kabidi muaba au. Bana betu ba mu Rhodes bakasanka bikole pakumvuabu ne: nsongalume eu uvua mutambule ku ntuadijilu kua 1998.

Badi bakuata “mishipa” itu imuangala

Mbuu wa Égée mmumanyike bualu utu ne mishipa ya bungi itu imuangala bu mudi misanyi ne espadon itu ipitshila mu mâyi a mbuu eu ne ikuatshika mu makondo a balobi ba dilambu. Bia muomumue, bambi ba lumu luimpe lua Bukalenge batu bapeta bantu ba bungi badi bitaba bulelela munkatshi mua bena mudimu bafumine mu matunga makuabu a bungi a ku Mputu wa ku Est balue kusombela mu Grèce.

Rezi uvua ne bidimu dikumi pakabalaye bua musangu wa kumpala Tshibumba tshia Nsentedi ne Réveillez-vous! ne kumvua bakulamu bua Yehowa ne malu adiye mulongolole bua kuenza. Bivua mu ditunga dia Albanie. Kunyima kua bidimu bisatu, dîku diabu dijima diakamuangala e kuya mu tshidiila tshia Rhodes. Dimue edi, Rezi wakalomba Yehowa bua amuambuluishe apete bantu Bende muaba au mupiamupia uvuabu balue kusombela. Dituku diakalonda tatuende wakalua kumbelu ne bibejibeji ebi bivuaye mumanye bimpe, Tshibumba tshia Nsentedi ne Réveillez-vous!, ne Rezi wakasanka bikole. Wakalua kupetangana ne muanetu wa bakaji uvua mupeshe tatuende bibejibeji ebi, ne katupa kakese kutuadijaye kulonga Bible ku diambuluisha dia mukanda wa Dimanya didi difikisha ku muoyo wa kashidi. Imue misangu uvua ulomba bua kulongabu misangu isatu ku dituku! Kunyima kua ngondo ibidi wakalua mumanyishi udi kayi mutambule, ne mu ngondo muisatu mu 1998, wakatambula ne bidimu 14. Anu dine dituku adi wakatuadija bumpanda-njila buambuluishi, ne ngondo isambombo pashishe, wakalua mpanda-njila wa pa tshibidilu peshi muyishi wa ku dîba ne ku dîba.

Muanetu mukuabu wa mu tshidiila tshia Kos uvua ulonga ne bamue bantu bavua bafumine mu ditunga dia Russie. Pakabebejaye ni bavua ne balunda bakuabu bavua bajinga kulonga Bible, bakaya nende kudi muntu mulume mukuabu ne mukajende (Leonidas ne Ophelia) ba mu ditunga dia Arménie, bavua basombele mu musoko uvua mutantshi wa kilometre 30. Kuvua bualu bua dikema buvua buindile bana betu. Mulume eu ne mukajende bakapatula tshibuta tshiûle tente ne mikanda idi yumvuija Bible ya mu tshiena-Arménie ne mu tshiena-Russie mipatula kudi Bantemu ba Yehowa! Bakumvuija ne: bakavua balonge Bible ne Bantemu ba Yehowa ne bakavua pabuipi ne kulua bamanyishi badi kabayi banji kutambula. Bua tshimvundu tshia bena tshididi ne bua ntatu ya malu a mfranga, bakumbuka mu ditunga diabu. Pakafikabu mu Kos, bakatuadija kulonga ne mamuende wa Leonidas ne muakunyende wa bakaji, bakavua pabu mu musoko au. Diakamue, Ntemu eu wakatuadija kulombola malonga asatu a Bible: dimue ne Ophelia, dikuabu ne Leonidas, dinga ne mamuende wa Leonidas pamue ne muakunyende wa bakaji. Uvua wenza kilometre 30 ku ntukutuku bua kuya ne kupingana misangu isatu ku lumingu. Leonidas ne mukajende bakatambula kunyima kua ngondo mikese. Ndifutu kayipu bua lungenyi lua didifila ludi nalu bana betu ba mu tshidiila etshi!

Yehowa udi udiundisha

Yehowa mmubeneshe madikolela a muoyo mujima a bamanyishi ba Bukalenge 2 000 badi mu bidiila ebi bia mu Mbuu wa Égée. Mpindieu mudi bisumbu binene 44 bia Bantemu ba Yehowa ne bisumbu bikuabu bikese 25. Munkatshi mua bisumbu bikese ebi, bisumbu 17 mbia miakulu ya ku ba bende, bualu Yehowa mmusue bua se: “bantu ba mishindu yonso basungidibue ne bafike ku dimanya dijalame dia bulelela.” (1 Timote 2:4, NW) Kabidi, bampanda-njila ba pa buabu 13 badi benza muabu muonso bua kupeta bantu bakuabu ba bungi ba mu bitupa ebi biditole.

Bidiila bidi mu Mbuu wa Égée mmiaba idi nshidimukilu mishilangane ne bungenda-mushinga buende bimpe menemene kukadi bidimu nkama mivule. Mu bidimu bishale ebi, bantu binunu nkama mivule batu balua kuendakana muaba eu. Kadi tshidi ne mushinga ntshia se: bu mudibu “balobi ba bantu,” bamanyishi ba Bukalenge mbapete bantu ba bungi ba mitshima mimpe badi bajinga kusamuna Yehowa mu bidiila ebi. Bonso pamue, badi bitaba mêyi a muprofete aa: ‘Batumbishe Yehowa, bambile ba mu maloba a ku muelelu wa mâyi manene butumbi buende.’​—Yeshaya 42:12.

[Karte mu dibeji 22]

(Bua kumona malu bimpe, tangila mu mukanda)

Mbuu wa Égée

GRÈCE

Lesbos

Chios

Samos

Ikaria

Fournoi

Patmos

Kos

Rhodes

Crète

TURQUIE

[Tshimfuanyi mu dibeji 23]

Tshidiila tshia Lesbos

[Tshimfuanyi mu dibeji 24]

Tshidiila tshia Patmos

[Tshimfuanyi mu dibeji 24]

Tshidiila tshia Crète