Nkonko ya babadi

Evanjeliyo isatu idi ilonda muakanyingalala bayidi ba Yezu dîba divua mukaji mukuabu mumuele manananshi a mushinga mukole. Mbapostolo ba bungi bakanyingalala anyi peshi anu Yudasa ke wakatamba kunyingalala?

Mbaleje bualu ebu mu Evanjeliyo wa Matayo, Mâko ne Yone. Mbimueneke ne: Yudasa ke wakabanga kunyingalala, pashishe bamue bapostolo e kutua ku tshiende musangu au. Bualu ebu budi buleja bua tshinyi tudi ne bua kuikala ne dianyisha bua miyuki eyi inayi ya mu Evanjeliyo. Malu adi mufundi yonso wa Evanjeliyo mufunde mmalelela, kadi bonso ki mbumvuije mushindu wa muomumue to. Patudi tufuanyikija miyuki idi ilonda bualu bumuebumue, tudi tumvua bimpe menemene malu a bungi avua menzeke.

Muyuki udi mu Matayo 26:6-13 udi uleja muaba uvuabu (mu nzubu wa Simona muena nsudi, mu Betania), kadi kawena utela dîna dia mukaji wakela Yezu manananshi pa mutu to. Matayo mmufunde ne: ‘Pakamona bayidi bualu ebu, bakadi ne tshiji’ ne bakanyingalala bamba ne: bavua mua kuikala nansha bapane manananshi au ne bapeshe bapele makuta.​—Disendamija miaku ndietu.

Muyuki wa Mâko wowu udi ufila mumvuija au mavule. Kadi udi usakidila ne: mukaji au wakakangula kalondo aku. Kavua ne manananshi a “nadô mulelela,” avua mua kuikala mafumine ku ditunga dia Inde. Bua dinyingalala adi, Mâko udi ulonda ne: ‘bakuabu bakadi ne tshiji,’ ne ‘bakajana [mukaji au].’ (Mâko 14:3-9) Nenku miyuki ibidi eyi idi ileja ne: bapostolo ba bungi bakanyingalala. Kadi mmunyi muakabangabi?

Yone uvuapu tshikondo tshivua bualu ebu buenzeke wakasakidila amue malu a mushinga. Yeye udi utela dîna dia mukaji au: Mariya, muanabu ne Mâta ne Lazalo. Yone wakafila kabidi diumvuija edi ditudi mua kuangata bu didi dilua kukumbaja bualu budi bumvuangana ne budiye ulonda ne: ‘Wakela manananshi ku makasa a Yezu, wakaakupula ne nsuki yende.’ Patudi tusangisha miyuki eyi, tudi tumona ne: Mariya uvua mua kuikala muele Yezu manyi mu mutu ne ku makasa, manyi adi Yone utujadikila ne: avua menza ne “nadô mulelela.” Bu muvua Yone mutambe kulamatangana ne Yezu, uvua ufiika munda nansha bua tu-malu tukese tuvuabu benzela Yezu. Tudi tubala ne: ‘Muyidi wende mukuabu, Yudasa Isakaliote, wakadi pa kumutungila tshitungu, wakakonka ne: Mmunyi kabakapana manananshi aa ku ndenalio nkama isatu, bua kupa bantu bapele?’​—Yone 12:2-8.

Bushuwa, Yudasa uvua ‘muyidi wende mukuabu,’ kadi udi mua kumvua bua tshinyi Yone wakumvua bibi pa kumona muntu bu Yudasa utungila Yezu. Mulongeshi ne mukudimunyi Howard Matheny wakamba bua mêyi adi mu Yone 12:4 ne: “Tshiambilu tshia se: ‘kuikala pa’ [peshi, “wakadi pa”] ne tshia se: ‘kuikala pa kutungila’ [peshi, ‘wakadi pa kutungila’] bubidi buabi bidi biumvuija bualu budi butungunuka. Bidi bileja ne: ki ng’anu dîba adi diakatuadija Yudasa kutungila Yezu to. Kadi mbimueneke se: ukavua muelele bualu ebu meji ne mubulongolole matuku a bungi kumpala.” Yone wakasakidila ne: Yudasa kakanyingalala “bua pavuaye uvuluka bapele nansha, kadi mbua pavuaye muivi, bualu uvua mulami wa tshibutshilu, wiba bivuabo belamu.”​—MMM.

Nenku mbia meji bua kuamba ne: muivi eu Yudasa ke wakabangisha kunyingalala bualu uvua mua kupeta makuta a bungi a kuiba bu buobu bapane manananshi au a mushinga mukole ne bele makuta mu tshibutshilu tshivuaye ulama. Diakamue pakatuadija Yudasa kudiabakena, pamu’apa bapostolo bakuabu bakatuadija pabu kudiabakena, bualu bakanyisha lungenyi alu luvua lumueneka bu luimpe. Kadi Yudasa ke wakajudija didiabakena edi.