Peta busambi mu bukole bua Yehowa

“Mu ntatu mipite bungi idi imvuila, dinsamba diebe didi disankisha muoyo wanyi.”​—MUSAMBU 94:19, Mukanda wa Mvidi Mukulu.

BIBLE udi ne mêyi atu asamba bantu bonso badi bakeba disulakana. Nenku kabiena bikemesha mudi mukanda kampanda wamba ne: “bantu bungi kabuyi kubala mbanyemene mu Bible bua kupeta busambi, ditekemena ne mibelu mu bikondo bia ntatu ne dielakana.” Bua tshinyi?​—The World Book Encyclopedia.

Bualu Bible mmufundisha kudi Mufuki wetu muena dinanga, “Nzambi wa busambi buonso,” Yeye ke “utu watusamba mu makenga etu onso.” (2 Kolinto 1:3, 4) Udi ‘Nzambi [udi ufila] busambi.’ (Lomo 15:5) Yehowa mmufile tshilejilu mu dilongolola malu adi atupesha tuetu bonso disulakana. Wakatuma Yezu Kristo Muanende umuepele mulela pa buloba bua kutupesha ditekemena ne busambi. Yezu wakalongesha ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Bible udi wamba bua Yehowa ne: ‘udi ututuadila bujitu buetu ku dituku ku dituku; Nzambi mene udi lupandu luetu.’ (Musambu 68:19) Bantu badi batshina Nzambi badi mua kuamba ne dishindika ne: ‘Ngakuteka Yehowa kumpala kuanyi misangu yonso; bualu bua yeye udi ku tshianza tshianyi tshia balume, tshiena nyungishibua.’​—Musambu 16:8.

Mvese bu eyi idi ileja mushindu udi Yehowa Nzambi mutunange bikole tuetu bantu. Bidi bimueneka patoke ne: udi ne dijinga dikole ne udi kabidi ne bukole bua kutusamba bimpe ne kutuyisha kanyinganyinga ketu mu bikondo bia dibungama. “Udi upesha badi bapungile bukole, badi kabayi ne dikanda udi ubapeshadio.” (Yeshaya 40:29, MMM) Kadi mmunyi mutudi mua kupeta busambi mu bukole bua Yehowa?

Bulami bua Yehowa budi bupolesha

Mufundi wa Misambu wakamba ne: ‘Teka bujitu buebe pambidi pa Yehowa, ne yeye neakukoleshe; kêna witabuja tshiendelele bua bantu bakane banyungishibue.’ (Musambu 55:22) Yehowa Nzambi udi ujingila bantu disanka. Mupostolo Petelo wakajadikila bena Kristo ba mu bidimu lukama bia kumpala ne: “Yeye [Nzambi] ke udi unulama.” (1 Petelo 5:7, MMM) Yezu Kristo wakaleja mushindu udi Nzambi wangata bantu ne mushinga pakambaye ne: ‘Kabatu bapana mishamisha itanu ku makuta makese abidi anyi? Mushamusha umue kawena mupua muoyo ku mêsu kua Nzambi. Nsuki ya ku mitu yenu menemene idi mibala yonso. Kanutshinyi, mushinga wenu udi mutambe wa mishamisha ya bungi.’ (Luka 12:6, 7) Tudi ne mushinga wa bungi ku mêsu kua Nzambi, ke bualu kayi udi umona nansha bualu bukese menemene butudi nabu. Mmumanye malu atudi tuetu bine katuyi bamanye to, bualu udi ujingila yonso wa kutudi disanka.

Svetlana, nsongakaji ndumba utudi batele mu tshiena-bualu tshia kumpala wakapeta busambi buvule pakadimuenaye muvua Yehowa musue bua ikale ne disanka. Kumpala kua kumonanganaye ne Bantemu ba Yehowa ukavua ukeba kudishipa. Pashishe wakitaba bua kulonga Bible, ne dilonga edi diakamuambuluisha bua kumanya ne: Yehowa mmuntu mulelela udi musue bua apete diakalengele. Bualu ebu buakamulenga ku muoyo, kumusakabi bua kulekela bundumba ne bikadilu bibi ne pashishe kudilambulaye kudi Nzambi. Dilonga edi diakafikisha kabidi Svetlana ku didimona ne mushinga, ne nansha muvuaye ne ntatu, uvua ne bua kusuminyina ne kuikala ne mmuenenu muimpe mu nsombelu wende. Udi wamba mpindieu ne: “Ndi mujadike ne: Yehowa kakundekela to. Ndi mufike ku dimona ne: malu adi mu 1 Petelo 5:7 (MMM) mmalelela. Mvese eu udi wamba ne: ‘Upuilayi [Yehowa] ntatu yenu yonso bualu yeye ke udi unulama.’”

Ditekemena didi Bible ufila didi disamba bantu

Mushindu wa pa buawu udi Nzambi ufila busambi nku diambuluisha dia Dîyi diende difunda, didi ne ditekemena dilenga bua matuku atshilualua. Mupostolo Paulo wakafunda ne: ‘Malu onso akafundabu diambedi akafundibua bua kutuyisha, bua tuetu tuikale ne ditekemena bua ditantamana dietu ne bua busambi bua mu Mukanda wa Nzambi.’ (Lomo 15:4) Paulo wakaleja patoke diumvuangana didi pankatshi pa ditekemena dilelela ne busambi pakambaye ne: ‘Nzambi Tatu wetu, wakatunanga ne wakatupa busambi bua tshiendelele ne ditekemena dimpe bua [bulenga bukena buakanyina], asambe mitshima yenu, aijadike mu mudimu muimpe wonso ne mu dîyi dimpe dionso.’ (2 Tesalonike 2:16, 17) “Ditekemena dimpe” edi didi kabidi ne dilaya dia muoyo mupuangane wa kashidi ne wa disanka wikala bantu  mua kupeta mu mparadizu pa buloba.​—2 Petelo 3:13.

Ditekemena edi dishindika ne dilenga diakakolesha Laimonis, mukuatshiki wa maluvu uvua mutshibukile panshi utudi batele mu tshiena-bualu tshia kumpala. Bu muvuaye ubala mikanda ya Bantemu ba Yehowa idi yumvuija Bible, wakasanka pakalongaye malu adi atangila bukua-panu bupiabupia mu Bukalenge bua Nzambi, muapetululaye bukole buende buonso bua mubidi. Pakabalaye Bible, wakumvua bakula bua dilaya edi dilenga dia luondapu lua tshishima: ‘Mu dituku adi mêsu a mufofo neatabale, matshi a badi ne mapapa neajikuke. Mu dîba adi muntu mulema neatupike bu ngulungu, ludimi lua kamama neluimbe misambu.’ (Yeshaya 35:5, 6) Bua kukumbaja malu malomba bua kupeta muoyo mu Mparadizu au, Laimonis wakashintulula malu a bungi mu nsombelu wende. Wakalekela maluvu makole; bena mutumba nende ne bantu bavua bamumanye bakamona muvuaye mushintuluke. Mpindieu udi ulombola malonga a Bible mavule, wenda uleja bantu bakuabu busambi budi bufumina ku ditekemena didi Bible ufila.

Mushinga wa disambila

Patudi ne kanyinganyinga bua bualu kampanda, tudi mua kupeta busambi pa kusambila Yehowa. Kusambila kudi mua kutusulakaja. Mu milombu yetu, tudi mua kukola ku muoyo patudi tuvuluka malu adi Dîyi dia Nzambi diamba. Musambu mule ku yonso mu Bible udi bu disambila dilenga. Muufundi wakimba ne: ‘Ngakavuluka mêyi ebe majalame a kale, Yehowa, ngakukolesha mutshima wanyi.’ (Musambu 119:52) Patudi mu ntatu mikole menemene (nangananga bu mudi masama makole), misangu mivule kakutu diambuluisha dia pa buadi didi disankisha to. Mu bukole buetu nkayetu katuena mua kumanya kua kuya to. Bantu ba bungi mbalue kumona ne: kunyima kua bamane kuenza bionso bivuabu mua kuenza, kunyemena kudi Nzambi mu disambila kuakabambuluisha bua kupeta busambi buvule ne pamu’apa diambuluisha divuabu kabayi belele meji.​—1 Kolinto 10:13.

Pat, uvuabu babueje ne lukasa mu lupitadi mu nzubu wa bantu badi mu njiwu, wakadiumvuila mutu disambila disamba bantu. Kunyima kua yeye mumane kumvua bimpe, wakamba ne: “Ngakasambila Yehowa, ne meme kujingulula bulelela ne: mvua ne bua kuteka muoyo wanyi mu bianza biende ne kumueyemena bua kuenza tshionso tshivuaye musue. Mu tshikondo tshionso atshi, mvua ne mutshima mupole; mvua ne ditalala dia Nzambi didibu bambe mu Filipoi 4:6, 7.” Mvese eyi idi mua kutukolesha tuetu bonso. Paulo udi utubelamu ne: ‘Lekelayi kuditatshisha ku bualu [nansha] bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu, nedilame mitshima yenu ne meji enu mu Kristo Yezu.’

Spiritu munsantu udi musambi

Butuku bua kumpala kua lufu luende, Yezu wakambila bapostolo bende patoke ne: uvua ne bua kubashiya. Bualu ebu buakabalubakaja ne kubanyingalaja. (Yone 13:33, 36; 14:27-31) Bu muvua Yezu mumanye ne: bavua dijinga ne busambi buvua mua kushala mutantshi mule, wakabalaya ne: ‘Nendombe Tatu, yeye neanupe musambi mukuabu, ikale nenu tshiendelele.’ (Yone 14:16) Muaba eu Yezu uvua wakula bua spiritu munsantu wa Nzambi. Nyuma wa Nzambi wakasamba bapostolo pavuabu mu ntatu ne wakabakolesha bua kutungunukabu ne kuenza disua dia Nzambi.​—Bienzedi 4:31.

Angie, muena bayende uvua muambe kufua kunyima kua njiwu mikole, wakatantamena dibungama ne tunyinganyinga tuonso tuakapetaye. Ntshinganyi tshiakamuambuluisha? Udi wamba ne: “Bu spiritu munsantu wa Yehowa kayi mutukuatshishe, katuvua mua kuikala batantamene lutatu lutuvua bapete ne kushala ne bukole nansha. Bushuwa, bukole bua Yehowa mbumuenekele mu matekete etu, ne mmuleje mudiye lumbu lukole mu tshikondo tshia dibungama.”

Bana betu batu batusamba

Nansha muntu yeye ne nsombelu kayi, nansha yeye mua kupeta ntatu ya mushindu kayi, neapete busambi munkatshi mua bana betu ba mu tshisumbu tshia Bantemu ba Yehowa. Bana betu aba batu bakuatshishangana mu nyuma ne bambuluisha bantu badi badisangisha  nabu. Munkatshi muabu, tudi tusangana balunda ba dinanga, badi bakeba disanka dia bakuabu ne badi bakoleshangana, basue kuambuluisha ne kusamba bakuabu mu bikondo bia dibungama.​—2 Kolinto 7:5-7.

Mbalongeshe bantu badi mu tshisumbu tshia bena Kristo bua ‘kuenzela bantu bonso bimpe, kadi badi batamba kuenzela bena dîku dia bena kuitabuja nabu bimpe.’ (Galatia 6:10) Malu a mu Bible adibu balonga adi abasaka bua kunangangana bikole. (Lomo 12:10; 1 Petelo 3:8) Bana betu ba mu nyuma batudi nabu mu tshisumbu badi badienzeja bua kuikala bena malu malenga, basambianganyi ne bena dinanga.​—Efeso 4:32.

Joe ne Rebecca, mulume ne mukajende bakafuisha muanabu wa balume mu njiwu ya mashinyi, bakamona mutu bana betu bena Kristo bakoleshangana. Badi bamba ne: “Yehowa ne tshisumbu tshiende tshia bantu ba dinanga mbatuambuluishe mu ntatu yetu. Bana betu bakatutumina tuarte ne mikanda ya bungi be, ne bakatubikila ku nshinga misangu ne misangu. Biakatuambuluisha bua kujingulula ne: bana betu badi ne mushinga wa bungi. Patuvua mu dilubakana bua njiwu ayi, bawetu ba mu bisumbu bia bungi bakatuambuluisha, bakatutuadila biakudia ne kutusukuila mu nzubu.”

Peta busambi!

Padi ntatu ituadija kulua bu tshipepele tshikole tshituta ne padi dibungama ditungunuka bu mvula mukole wa mabue, Nzambi udi pabuipi bua kutusamba ne kutukuba. Umue musambu udi wamba mutuye tshisokomenu tshidi tshifila busambi: ‘Neakubuikile ne masala ende, neusangane tshinyemenu muinshi mua mapuapua ende.’ (Musambu 91:4) Mufuanu udibu bafile muaba eu udi mua kuikala wa nyunyi wa mukanku. Badi bakula bua nyunyi udi ubalula mapuapua bua kusokoka kana kende padiye umona njiwu ilua. Mu ngumvuilu mualabale, Yehowa udi Mukubi mulelela wa bonso badi basokomena kudiye.​—Musambu 7:1.

Wewe musue kumanya malu a bungi adi atangila Nzambi, bumuntu buende, malu adiye mulongolole ne mushindu udiye ne bukole bua kutusamba, tudi tukulomba bua ulonge Dîyi diende. Bantemu ba Yehowa nebikale ne disanka dia kukuambuluisha bua kulonga Dîyi dia Nzambi edi. Bushuwa, wewe pebe udi mua kupeta busambi mu bukole bua Yehowa!

[Bimfuanyi mu dibeji 7]

Ditekemena didi Bible ufila bua matuku atshilualua didi mua kutusamba