Udi muvuluke anyi?

Nimero ya Tshibumba tshia Nsentedi ya matuku mashale aa mmikusankishe anyi? Nanku anji teta bua kuandamuna nkonko idi ilonda eyi:

• Ntshinyi tshiakenza bua bantu kuitababu Nowele bipepele mu ditunga dia Corée?

Kale bantu ba mu Corée ne ba mu matunga makuabu bavua bamba ne: kuvua nzambi wa tshikuku uvuabu bamba muvuaye uvuila mu mumbunda wa tshikuku ne utuadila bantu mapa mu ngondo wa dikumi ne muibidi. Kabidi, kunyima kua Mvita Mibidi ya Buloba bujima, basalayi ba mu États-Unis bavua babanyina bantu bintu bia kubambuluisha nabi mu ekeleziya ya mu ditunga adi.​—15/12, mabeji 4, 5.

• Bua kukumbaja Yeshaya 21:8, ‘mmutentekedi’ kayi udi Nzambi mupete mu tshikondo tshietu etshi?

Bena Kristo bela manyi a spiritu, badi benza kasumbu ka mutentekedi, mbadimuije bantu bua diumvuija dia malu adi enzeka pa buloba adi akumbaja milayi ya mu Bible. Mbambuluishe kabidi balongi ba Bible bua kumanya ne kuepuka malongesha ne bilele bidi kabiyi bia mu Mifundu.​—1/1, mabeji 8, 9.

• “Bena muntu ba mu Pologne” bavua banganyi?

Bavua bena tshitendelelu tshikese tshia mu bidimu bia 1500 ne bia 1600 mu ditunga dia Pologne, bavua bakankamija bantu bua kulamata Bible, ne kubengabu malongesha avua matangalake mu ekeleziya bu mudi dia Busatu Bunsantu, ntambu ya bana batekete ne dia inferno wa kapia. Ndekelu wa bionso bakabakengesha ne tshikisu ne bakabatangalaja ku bukole mu matunga makuabu.​—1/1, mabeji 21-23.

• Bua tshinyi tudi ne bua kueyemena milayi ya mu Bible pamutu pa malu adibu bamanyisha kudi balongi ba malu atshilualua anyi bena lubuku lua mitoto?

Bantu badi badiamba mudibu baprofete mbamueneke kabayi kutekela muoyo nansha, bualu kabena bangata Yehowa ne Bible ne mushinga to. Anu milayi ya mu Bible ke idi mua kukuambuluisha bua kumanya mudi malu akumbana mushindu udi Nzambi mulongolole, bua disanka diebe dia kashidi ne dia dîku diebe.​—15/1, dibeji 3.

• Mbimue bijadiki kayi bidi bileja ne: tudi mu matuku a ku nshikidilu?

Tudi tumona malu adi enzeka katshia bipata Satana mu diulu. (Buakabuluibua 12:9) Tudi mu tshikondo tshia ‘mukalenge’ wa ndekelu mutela mu Buakabuluibua 17:9-11. Bungi bua bena Kristo bela manyi balelela budi buenda bukepela, pabi bidi bimueneka ne: bamue ba kudibu nebikale pa buloba apa patuadija dikenga dinene.​—15/1, mabeji 12, 13.

• Ndîba kayi diakafundabu mukanda wa Habakuka ne bua tshinyi tudi ne bua kuubala?

Mukanda eu wa mu Bible uvua mufunda bu mu 628 K.B.B. Udi uleja dinyoka diakalua Yehowa kupesha Yuda wa kale ne Babulona. Udi kabidi wakula bua dinyoka dikadi Nzambi pa kupesha ndongoluelu eu mubi wa malu.​—1/2, dibeji 8.

• Mmuaba kayi mu Bible utudi mua kupeta mibelu milenga ya kudi mamu kampanda bua bakaji ba tshitembu?

Mibelu eyi milenga idi mu nshapita wa ndekelu, wa 31, wa mukanda wa Nsumuinu.​—1/2, mabeji 30, 31.

• Bua tshinyi tudi mua kuikala ne dianyisha bua mudi Yehowa mutuleje ‘meji a Kristo’? (1 Kolinto 2:16)

Ku diambuluisha dia malu adi mu Evanjeliyo, Yehowa mmutupeshe mushindu wa kumanya ngenyi ya Yezu, malu avuaye umvua, midimu ne malu avuaye uteka pa muaba wa kumpala. Bidi mua kutuambuluisha bua kufuanangana bikole ne Yezu, nangananga pa bidi bitangila mushinga utudi tupesha mudimu wa diyisha udi upandisha bantu.​—15/2, dibeji 25.

• Nzambi utu wandamuna masambila lelu anyi?

Eyowa. Nansha mudi Bible uleja ne: Nzambi katu wandamuna masambila onso, malu mamona mu tshikondo tshietu etshi adi ajadika ne: misangu ya bungi utu muandamune bantu bavua bamulombe busambi ne diambuluisha mu mianda bu mudi dijikija ntatu ya mu dibaka.​—1/3, mabeji 3-7.

• Ntshinyi tshitudi mua kuenza bua kupeta bukole bua Nzambi?

Tudi mua kumulombabu mu disambila, tudi mua kupetela bukole bua mu nyuma mu Bible ne pa kudisangisha ne bena Kristo netu.​—1/3, mabeji 15, 16.

• Mmunyi mudi baledi mua kuenza bua bisangilu bia tshisumbu kuambuluishabi bana bikole?

Badi mua kuambuluisha bana bua kushala batabale, pamu’apa pa kuenza bua balale kakese munda munya kumpala kua kuya mu bisangilu. Badi mua kukankamija bana bua “kufunda” bidibu bambamu, bu mudi kuenza kamanyinu pa dibeji misangu yonso idibu batela miaku anyi mêna adibu bamanye.​—15/3, mabeji 17, 18.

• Ng’amue malu kayi atudi mua kulongela ku tshilejilu tshia Yobo?

Yobo wakateka malanda ende ne Nzambi kumpala kua bionso, kavua ne kansungasunga mu malu avuaye wenzela bantu nende, uvua udienzeja bua kushala mulamate mukajende, uvua uditatshisha bua makanda a mu nyuma a bena mu dîku diende ne wakashala ne lulamatu mu mateta.​—15/3, mabeji 25-27.

• Bible udi ne maleta a malu masokoka adi ambuluisha bua kumvua mikenji misokome anyi?

Tòo. Badi mua kuamba bia muomumue bua mikanda mikuabu ya malu a patupu ne: idi ne maleta a malu masokoka. Mashintuluka a mfundilu ya miaku mu mifundu ya ku tshianza ya mu tshiena-Ebelu adi avuija patupu tshidibu babikila ne: maleta a malu masokoka a mu Bible.​—1/4, mabeji 30, 31.