Tutelejayi tshidi nyuma wamba

“Matshi ebe mene neumvue dîyi munyima muebe diamba ne: ‘Ke njila eu. Endelayimu,’ binuikala ne bua kuya ku dia balume anyi binuikala ne bua kuya ku dia bakaji.”​—YESHAYA 30:21, NW.

1, 2. Mmunyi mudi Yehowa muyukile ne bantu munkatshi mua bikondo bia bungi?

 MU TSHIDIILA tshia Porto Rico mudi tshintu tshienze bu dilongo dipite onso adi pa buloba ku bunene ditu dikuata mêyi a bisanji adi endela mu lupepele. Kukadi bidimu bia bungi, bena meji mbatekemene bua kupeta ngumu idi ifumina miaba idi kule ne buloba ku diambuluisha dia dilongo edi dinene. Kadi kabatu banji kupeta ngumu eyi nansha. Pabi, kudi ngumu misunguluke idi ifumina muaba udi kule ne buloba ne idi yonso wa kutudi mua kupeta dîba dionso kabiyi bimulomba biamu binene. Ngumu anyi mikenji eyi idi ifumina mutantshi mule menemene ne buloba. Idi ifumina kudi nganyi, ne mbanganyi badi bayipeta? Ntshinyi tshidiyi yamba?

² Mu Bible mudi miyuki mivule ya bikondo bivua bantu bumvue mikenji ivua ifumina kudi Nzambi. Imue misangu bifukibua bia mubidi wa nyuma (bakenji ba Nzambi) ke bivua bilua ne mikenji eyi. (Genese 22:11, 15; Zekâya 4:4, 5; Luka 1:26-28) Bantu bakumvua dîyi dia Yehowa nkayende misangu isatu mijima. (Matayo 3:17; 17:5; Yone 12:28, 29) Nzambi wakakuila kabidi mukana mua baprofete, ne ba bungi ba kudibu bakafunda malu akabapeshaye bua kuamba. Lelu, tudi ne Bible, udi muikale ne malu a  bungi adi atangila mikenji ayi ne malongesha a Yezu ne bayidi bende. (Ebelu 1:1, 2) Bushuwa, Yehowa mmutumine bantu bende mikenji.

3. Mikenji idi ifumina kudi Nzambi idi ne tshipatshila kayi, ne ntshinyi tshitudi ne bua kuenza?

³ Mikenji yonso eyi idi mifumine kudi Nzambi idi yakula malu makese bua bintu bidi bimueneka. Idi yakula nangananga bua malu a mushinga wa bungi adi atangila muoyo utudi nawu mpindieu ne wa matuku atshilualua. (Musambu 19:7-11; 1 Timote 4:8) Mu mikenji eyi Yehowa udi umanyisha disua diende ne utupesha mibelu. Mikenji eyi ke mushindu umue udi mêyi a Yeshaya akumbana lelu: “Matshi ebe mene neumvue dîyi munyima muebe diamba ne: ‘Ke njila eu. Endelayimu,’ binuikala ne bua kuya ku dia balume anyi binuikala ne bua kuya ku dia bakaji.” (Yeshaya 30:21, NW) Yehowa kêna utuenzeja ku bukole bua kuteleja “dîyi” diende nansha. Tuetu ke badi ne bua kulonda buludiki bua Nzambi ne kuendela mu njila wende. Ke bua tshinyi Bible udi utubela bua kuteleja mikenji idi ifuma kudi Yehowa. Mu mukanda wa Buakabuluibua, badi batukankamija misangu muanda-mutekete bua kuteleja bualu ‘budi nyuma wamba.’​—Buakabuluibua 2:7, 11, 17, 29; 3:6, 13, 22.

4. Mbia meji bua tuetu kuindila ne: Nzambi akule mêyi adi afumina buludi mu diulu anyi?

⁴ Lelu katutu tumvua dîyi dia Yehowa difuma diakamue mu diulu to. Nansha mu bikondo bia kale, mikenji eyi ya Nzambi ivua ilua mu mpukapuka, pamu’apa kuvua kupita bidimu nkama mivule. Munkatshi mua bikondo bia bungi, Yehowa utu mutambe kuyikila ne bantu bende mu mishindu kabukabu. Ke mudibi kabidi lelu’eu. Tumonayi mpindieu mishindu isatu idi Yehowa uyukila netu mu matuku etu aa.

‘Dîyi dionso dia mu Mukanda wa Nzambi ndifume kudi Nzambi’

5. Mmushindu kayi munene udi Yehowa uyukila ne bantu lelu’eu, ne mmunyi mudiwu mua kutuambuluisha?

⁵ Bible ke mushindu munene udi Nzambi uyukila ne bantu. Nzambi ke udi mumufundishe, ne malu onso adimu adi mua kutuambuluisha. (2 Timote 3:16) Mu Bible mudi bilejilu bivule bia bantu balelela bakadisuila bua kuteleja anyi kubenga dîyi dia Yehowa. Bilejilu ebi bidi bituvuluija mushinga wa kuteleja tshidi nyuma wa Nzambi wamba. (1 Kolinto 10:11) Mu Bible mudi kabidi malu a meji adi ambuluisha bantu; udi utupesha mibelu bua kumanya tshia kuenza dîba ditudi basue kuangata mapangadika. Mbienze anu bu se: Nzambi udi munyima muetu, utuambila ku ditshi ne: “Ke njila eu. Endalayimu.”

6. Bua tshinyi Bible mmupite mikanda mikuabu yonso?

⁶ Bua tuetu kumvua tshidi nyuma wamba mu Bible, tudi ne bua kuikala tumubala pa tshibidilu. Bible kêna anu mukanda muende lumu udibu bafunde bimpe, umue wa ku mikanda ya bungi idi nayi bantu lelu nansha. Bible mmufundisha kudi Nzambi, ngenyi idimu nyende yeye. Ebelu 4:12 udi wamba ne: ‘Dîyi dia Nzambi didi ne muoyo ne bukole, didi dipita muele wonso musakisha nseke ibidi kutua, didi ditubula too ne ku dipandulula dia muoyo ne nyuma, ne dia manungu ne buongo bua mifuba, didi dijingulula lukasa meji ne malu adi mutshima musue kuenza.’ Patudi tubala Bible, malu adimu adi abuela mu meji ne ngenyi yetu bu muele, aleja bituikala tutu tutumikila disua dia Nzambi.

7. Bua tshinyi kubala Bible kudi ne mushinga wa bungi? Tudi ne bua kuikala tumubala misangu bungi kayi?

⁷ ‘Meji ne malu adi mutshima musue kuenza’ bidi mua kushintuluka mu bungi bua matuku, nansha padi malu (mimpe ta mabi) atutulukila mu nsombelu. Bituikala katuyi tulonga Dîyi dia Nzambi misangu yonso, ngenyi yetu, mmuenenu  wetu wa malu ne meji etu kabiakumvuangana kabidi ne mêyi a Nzambi to. Ke bua tshinyi Bible udi utubela ne: “Tungunukayi ne kuditeta nne nudi mu ditabuja, tungunukayi ne kujadika tshinudi.” (2 Kolinto 13:5, NW) Tuetu basue kutungunuka ne kuteleja tshidi nyuma wamba, mbimpe tutumikile mubelu wa kubala Dîyi dia Nzambi dituku dionso.​—Musambu 1:2.

8. Mmêyi kayi a mupostolo Paulo adi atuambuluisha bua kudikonkonona pa bidi bitangila dibala dia Bible?

⁸ Bualu bua mushinga butudi tuvuluija babadi ba Bible mbua se: Nudilamine dîba dikumbane dia kumvua bimpe malu anudi nubala! Mubelu wa kubala Bible dituku dionso kawena utulomba bua kubala lubilu lubilu nshapita mivule kadi katuyi tumvua bine bitudi tubala. Nansha mudibi ne mushinga wa bungi bua kubala Bible dituku dionso, tshipatshila tshietu katshiena anu ne bua kuikala tshia kulonda ndongamu to; tudi ne bua kuikala ne dijinga dilelela dia kulonga malu adi atangila Yehowa ne bidiye mulongolole. Bua muanda eu, tudi mua kudikonkonona ne mêyi aa akamba mupostolo Paulo. Wakafundila bena Kristo nende wamba ne: ‘Ndi ntua binu kumpala kua Tatu bua yeye anupe [mushindu] bua Kristo ikale mu mitshima yenu bua ditabuja; bua muanda eu, ne nuenu, bamane kuela miji ne bashibue mu dinanga, nuikale ne bukole bua kumanya nabu, pamue ne bansantu bonso, mudi butshia ne bule ne bule bua muulu ne ndondo, ne bua kumanya mudi dinanga dia Kristo didi ditamba lungenyi lua bantu ku dimanya, bua nuenu nuule tente ne tshiuwidi tshionso tshia Nzambi.’​—Efeso 3:14, 16-19.

9. Mmunyi mutudi mua kupeta ne kukolesha dijinga dia kulonga malu a Yehowa?

⁹ Bushuwa, bamue ba kutudi kabatu basue kubala to, kadi bakuabu pabu mbabadi ba dilambu. Kadi nansha tuetu bikale ne tshibidilu kayi ku bibidi ebi, tudi mua kupeta ne kukolesha dijinga dia kulonga malu a Yehowa. Mupostolo Petelo wakumvuija ne: tudi ne bua kujinga dimanya dia mu Bible, ne mêyi ende akaleja ne: bantu badi mua kupeta dijinga edi. Wakafunda ne: “Bu bana batekete, jinganyi mabele a [dîyi], kaayi masambakaja ne tshintu, bua anukoleshe, nupete lupandu.” (1 Petelo 2:2, MMM, disendamija miaku ndietu.) Tudi ne bua kudienzeja bituasua ‘kujinga’ bua kulonga Bible. Anu mututu tulua kunanga biakudia bituvua katuyi tudia panyima pa dibidia misangu ne misangu, mushindu utudi tubala ne tulonga udi mua kulengela bituadienzeja bua kutungunuka ne tshibidilu atshi.

“Biakudia mu tshikondo tshiakanyine”

10. Mbanganyi badi benza “mupika wa lulamatu ne wa budimu,” ne ntshinyi tshidi Yehowa wenza nabu lelu’eu?

¹⁰ Yezu udi uleja mushindu mukuabu udi Yehowa uyukila netu mu Matayo 24:45-47 (NW). Mu mvese eu udi wakula bua tshisumbu tshia bena Kristo bela manyi a nyuma, badi benza “mupika wa lulamatu ne wa budimu” muteka bua kufila “biakudia [bia mu nyuma] mu tshikondo tshiakanyine.” Patudi tubangata muntu ku muntu, bena mu kasumbu aka “mbena mudimu” ba Yezu. Bantu aba, pamue ne “musumba munene” wa “mikoko mikuabo,” badi bapeta makankamija ne mibelu. (Buakabuluibua 7:9, MMM; Yone 10:16) Tshitupa tshinene tshia biakudia ebi bia mu tshikondo tshiakanyine tshitu tshivuila mu mikanda bu mudi tshibejibeji tshia Tshibumba tshia Nsentedi ne tshia Réveillez-vous!, ne mu mikanda mikuabu. Tutu tupetela biakudia bikuabu bia mu nyuma mu miyuki  ne manaya a bilejilu mu mpungilu, mu mpuilu ne mu bisangilu bia tshisumbu.

11. Mmunyi mutudi tuleja ne: tudi tumvua bidi nyuma wamba ku butuangaji bua “mupika wa lulamatu ne wa budimu”?

¹¹ Malu adi “mupika wa lulamatu ne wa budimu” utumanyisha adi ne tshipatshila tshia kukolesha ditabuja dietu ne kulongesha biumvuilu bietu. (Ebelu 5:14) Mibelu eyi idi mua kuikala yakula malu a bungi bua kupesha muntu yonso mushindu wa kumona malu adiye mua kutumikila pa nkayende. Ku misangu batu batupesha kabidi mibelu mu malu masunguluke adi atangila tshikadilu tshietu. Ntshinyi tshitudi ne bua kuenza bua kuleja ne: tudi tuteleja menemene tshidi nyuma wamba ku butuangaji bua kasumbu ka mupika? Mupostolo Paulo udi wandamuna ne: “Nutumikile badi [banulombola], nubakokele.” (Ebelu 13:17) Bushuwa, bantu bonso badi mu kasumbu aka mbapange bupuangane. Kadi Yehowa udi ne disanka dia kuenza mudimu ne basadidi bende nansha mudibu bapange bupuangane, bua kutulombolabu mu matuku aa a ku nshikidilu.

Kuondo ketu ka muoyo kadi katulombola

12, 13. (a) Ntshintu kayi tshikuabu tshitu tshitulombola tshidi Yehowa mutupeshe? (b) Mmunyi mudi kuondo ka muoyo mua kuambuluisha nansha bantu badi kabayi ne dimanya dijalame dia Dîyi dia Nzambi?

¹² Yehowa mmutupeshe tshintu tshikuabu tshitu tshitulombola: kuondo ketu ka muoyo. Wakafuka muntu ne dimanya dia tshidi tshimpe ne tshidi tshibi. Mu mukanda uvuaye mufundile bena Lomo, mupostolo Paulo wakumvuija ne: ‘Bua penza bisamba bia bende bidi kabiyi ne mikenji bilele bidi mikenji miambe, bobu, kabayi ne mikenji, badi badielela mikenji. Badi baleja mudimu wa mikenji mufunda mu mitshima yabu, [kuondo kabu ka muoyo] kadi kamanyishangana nayi ne meji abu adi abapisha [anyi] ababingisha.’​—Lomo 2:14, 15.

¹³ Mu mushindu kampanda, bantu ba bungi badi kabayi bamanye Yehowa badi mua kuenza bua meji ne bienzedi biabu biumvuangane ne mêyi makane a tshidi tshimpe ne tshidi tshibi. Mbienze bu se: badi bumvua dîyi ditekete munda muabu dibalombola mu njila muimpe wa kulonda. Bikalabi nenku bua bantu badi kabayi ne dimanya dijalame dia Dîyi dia Nzambi, dîyi adi dia munda didi ne bua kutamba kuakula munda mua bena Kristo balelela. Bushuwa, kuondo ka muoyo ka muena Kristo kalengeja kudi dimanya dijalame dia Dîyi dia Nzambi ne kadi kenza malu mumvuangane ne spiritu munsantu wa Yehowa kadi mua kumulombola bimpe.​—Lomo 9:1.

14. Mmunyi mudi kuondo ka muoyo kalongesha kudi Bible mua kutuambuluisha bua kulonda bulombodi bua nyuma wa Yehowa?

¹⁴ Kuondo ka muoyo kimpe ne kalongesha kudi Bible kadi mua kutuvuluija njila udi nyuma musue bua tuetu kuendela. Kudi mua kuikala bikondo bidi Bible peshi mikanda yetu idi imumvuija kayiyi ifila diumvuija disunguluke dia bualu kampanda butudi mua kuikala nabu to. Nansha nanku, kuondo ketu ka muoyo kadi mua kutudimuija bua katulondi njila mubi to. Mu malu a mushindu’eu, kujika matshi ku bidi kuondo ketu ka muoyo kamba kudi mumue ne kujika matshi ku tshidi nyuma wa Yehowa wamba. Tumanye kabidi ne: tuetu balonge mua kueyemena kuondo ketu ka muoyo kalongesha kudi Bible, tudi mua kuangata mapangadika mimpe nansha padiku kakuyi mifundu misunguluke idi ileja tshia kuenza mu bualu ebu. Nunku mbimpe tumanye ne: padiku kakuyi dîyi, mukandu anyi mukenji kampanda wa Nzambi, kabiakuikala biakane bua kuenzeja bena Kristo netu bua bitabe bidi kuondo ketu ka muoyo kamba mu malu adi atangila muntu nkayende nansha.​—Lomo 14:1-4; Galatia 6:5.

15, 16. Ntshinyi tshidi mua kunyanga kuondo ketu ka muoyo, ne mmunyi mutudi mua kuepuka muanda eu?

¹⁵ Kuondo ka muoyo kimpe ne kalongesha kudi Bible ndipa dilenga didi Nzambi mutupeshe. (Yakobo 1:17) Kadi tudi ne bua kukuba dipa edi ku malu adi mua kudinyanga bituasua bua dikale ditudimuija ku malu adi mabi. Tuetu balonde bilele ne bibidilu bia muaba utudi bidi kabiyi bipetangana ne mikenji ya Nzambi, bidi mua kunyanga kuondo ketu ka muoyo, ne kadi mua kulua kupangila bua kutulombola mu njila muimpe. Tudi mua kupangila mua kuela meji bimpe,  ne tudi mene mua kudishima pa kuela meji ne: bualu kampanda mbuimpe pabu buikale bubi.​—Tangila Yone 16:2.

¹⁶ Tuetu batungunuke ne kujika matshi ku malu adi kuondo ketu ka muoyo katudimuija, dîyi diaku nediende diteketa too ne patudi tulua bapape. Mufundi wa misambu wakakula bua bantu aba pakafundaye ne: “Muoyo wabo mmuulakane bu tshitatutatu tshia manyi.” (Musambu 119:70, MMM) Bantu batu bajika matshi ku mibelu ya kuondo kabu ka muoyo kabatu bamanye kabidi mua kuela meji bimpe to. Kabatshiena babalombola kudi mêyi mimpe ne kabena mua kuangata mapangadika makane nansha. Bua tuetu kuepuka bionso ebi, tudi ne bua kutumikila mibelu idi kuondo ketu ka muoyo katupesha nansha mu tualu tukese.​—Luka 16:10.

Ba disanka mbadi bateleja ne batumikila

17. Ntshinyi tshiatupesha Nzambi bituateleja ‘dîyi munyima muetu’ ne bituatumikila kuondo ketu ka muoyo kalongesha kudi Bible?

¹⁷ Tuetu bapete tshibidilu tshia kuteleja ‘dîyi munyima muetu’ ditudi tumvuila mu Bible ne kudi mupika wa lulamatu ne wa budimu, ne tuetu bateleje malu adi kuondo ketu kalongesha kudi Bible katuvuluija, Yehowa neatupeshe nyuma wende. Pashishe nyuma eu neatuambuluishe bua kulonga ne kumvua malu adi Yehowa utuambila.

18, 19. Mmunyi mudi mibelu idi Yehowa utupesha mua kutuambuluisha mu buambi ne kumbelu?

¹⁸ Nyuma wa Yehowa neatupeshe kabidi dikima dia kutantamena ntatu mikole ne meji ne muoyo mukole. Anu muakenzelaye bapostolo, nyuma wa Nzambi udi mua kukolesha lungenyi luetu ne kutuambuluisha bua kuakula ne kuenza anu malu mumvuangane ne mêyi a mu Bible. (Matayo 10:18-20; Yone 14:26; Bienzedi 4:5-8, 13, 31; 15:28) Nyuma wa Yehowa ne madikolela atudi tuenza nebitututshishe diakalenga patudi tuangata mapangadika manene, neatupeshe dikima dia kukumbaja malu atudi bapangadije au. Tshilejilu, udi mua kuikala ukeba kulongolola malu ebe bua kupeta dîba dia bungi dia kuenza malu a mu nyuma. Peshi udi mua kuikala ujinga kuenza malu manene adi ashintulula bumuntu buebe bu mudi kusungula muntu wa kuselangana nende, kukonkonona mudimu udibu bakulaye anyi kusumba lupangu. Pamutu pa wewe kulekela anu meji a buntu akulombola mu mapangadika aa, udi ne bua kuteleja tshidi nyuma wa Nzambi wamba ne kulonda mibelu yende.

¹⁹ Tudi tuanyisha bikole mibelu idi bakulu ne bena Kristo netu batupesha ne malu adibu batuvuluija. Kadi katuena anu ne bua kuindila bua bakuabu batuvuluije bualu bonso to. Bituikala bamanye njila muimpe wa kulonda ne malu atudi ne bua kushintulula mu mmuenenu ne tshikadilu tshietu bua kusankisha Nzambi, tulondayi njila au. Yezu wakamba ne: ‘Binuamanya malu aa, nenuikale ne disanka binuaenza.’​—Yone 13:17.

20. Ndibenesha kayi diapeta bantu badi bateleja ‘dîyi munyima muabu’?

²⁰ Bushuwa, bena Kristo kabena ne bua kumvua dîyi difumina mu diulu bua kushishabu kumanya mua kusankisha Nzambi, peshi kabena bakeba bua babatumine muanjelu nansha. Nzambi mmubapeshe Dîyi diende difunda ne mibelu milenga ku butuangaji bua kasumbu kende ka bela manyi batshidi pa buloba. Buobu bateleje bimpe ‘dîyi [edi didi] munyima muabu’ ne balonde tshidi kuondo kabu ka muoyo kalongesha kudi Bible kabambila, nebenze disua dia Nzambi kakuyi lutatu. Nanku nebamone muakumbana mulayi wa mupostolo Yone wa se: “Yeye udi wenza mudi disua dia Nzambi udi ushalaku tshiendelele.”​—1 Yone 2:17.

Diambulula

• Bua tshinyi Yehowa utu uyukila ne bantu?

• Mmunyi mudi dibala dia Bible pa tshibidilu mua kutuambuluisha?

• Ntshinyi tshitudi ne bua kuenza ne mibelu idi kasumbu ka mupika katupesha?

• Bua tshinyi katuena ne bua kujika matshi ku malu adibu batuambila kudi kuondo ketu ka muoyo kalongesha kudi Bible?

[Nkonko ya dilonga]

[Tshimfuanyi mu dibeji 13]

Bantu kabena dijinga ne biamu binene bua kupeta mikenji idi ifumina kudi Nzambi to

[Mêyi a dianyisha]

Ne dianyisha dia Arecibo Observatory/​David Parker/​Science Photo Library

[Tshimfuanyi mu dibeji 15]

Yehowa udi wakula netu ku butuangaji bua Bible ne “mupika wa lulamatu ne wa budimu”