Yehowa udi munene kupita mitshima yetu

“YEHOWA udi usanka bua badi bamutshina,” ke muakamba mufundi wa Misambu. Kakuyi mpata, Mufuki udi usanka padiye umona basadidi bende bonso badi pa buloba badienzeja bua kulonda mêyi ende makane. Nzambi udi ubenesha bantu badi bamulamate, udi ubakankamija ne ubakolesha mu bikondo bidibu bashikile. Mmumanye ne: batendeledi bende ki mbapuangane to, ke bua tshinyi kêna ubalomba bipitshidile nansha.​—Musambu 147:11.

Ki mbikole bua tuetu kuitaba ne: Yehowa mmunange menemene basadidi bende bonso. Kadi, bamue badi bamueneka bikale balubakana bikole bua bilema biabu, badi bafika too ne ku diamba ne: Yehowa kakubananga kabidi to. Muntu udi mua kuamba ne: “Ndi mupange bupuangane bikole be, ne Yehowa kêna mua kunnanga to.” Bushuwa, tuetu bonso tutu tudiangata bibi imue misangu. Kadi bamue badi bamueneka bikale baluangana mvita ya munanunanu ne batu bafika ku dibenga kudimona ne mushinga.

Dibungama dikole

Mu bikondo bia kale, bamue bantu ba lulamatu bavua baluangana ne dibungama dikole. Yobo wakakina muoyo ne kuela meji ne: Nzambi uvua mumulekele. Umue musangu, Hana (mamuende wa Samuele) wakanyingalala ne kudila bikole bua muvuaye  kayi ulela. Davidi uvua ‘mupuekeshibue bikole,’ ne Epafodito wakabungama bualu bana babu bavua bumvue bibi pakamanyabu ne: uvua usama.​—Musambu 38:6; 1 Samuele 1:7, 10; Yobo 29:2, 4, 5; Filipoi 2:25, 26.

Bidi munyi bua bena Kristo lelu? Pamu’apa disama, bukulakaje anyi malu makuabu adi mua kupangisha bamue bua kuenza malu a bungi mu mudimu wa tshijila mushindu udibu basue. Bidi mua kubafikisha ku diamba ne: kabena benzela Yehowa ne bena kuitabuja nabu malu mimpe adibu basue to. Muoyo wa bamue udi mua kuikala utungunuka ne kubasama bua bilema bivuabu benze kale, bibafikisha too ne ku dibenga kuitaba ne: Yehowa ukadi mubabuikidilebi. Pamu’apa bakuabu badi bakolele mu mêku muvua ntatu badi bamba mudiku kakuyi muntu udi mua kubananga. Mmunyi mudibi mua kuenzeka?

Bamue bantu mbakolele mu mêku muvua kamuyi dinanga, muvua muntu ne muntu utangila anu ende malu, muvua buôwa ne dielangana nsenda. Badi mua kuikala kabayi banjiku kumona pabu tatu udi mubanange bikole, udi ukeba pa kubelela kalumbandi ne kubakankamija, utu kayi ulondakaja tulemalema tuonso tudibu benze ne utu ubabuikidila nansha bilema binene, tatu wa musangelu udi ufikisha dîku dijima ku diumvua bimpe. Bu mudibu katshia kabayi banji kupeta tatu wa dinanga dia mushindu’eu, bidi mua kubakolela bua kumvua bua tshinyi bidi bikengela kuikala ne Tatu wa mu diulu udi ne dinanga.

Tshilejilu, Fritz udi ufunda ne: “Bu muvua tatu wenza malu kaayi a dinanga, ngikadilu yanyi ya ku buana ne ku bunsonga yakatamba kulonda bikadilu biende. * Kavuaku welangana kalumbandi, ne tshivuaku muanji kudiumvua bu muanende to. Kadi misangu ya bungi mvua mmutshina.” Ke bua tshinyi Fritz (udi mpindieu ne bidimu 50 ne bia mu njila) utshidi anu udimona kayi ne ngikadilu mimpe idi ikengedibua. Margarette pende udi umvuija ne: “Baledi banyi kabavua ne musangelu ne dinanga nansha. Pangakatuadija kulonga Bible, bivua binkolele bua kumanya mushindu utu tatu mua kuikala ne dinanga.”

Meji a mushindu’eu, nansha wowu afumina ku bualu kayi, adi mua kumvuija ne: imue misangu tutu tukuatshila Nzambi mudimu nangananga bua didipisha anyi buôwa, pabi tudi ne bua kumuenzelawu bualu tudi bamunange. Tudi mua kumona malu matambe buimpe atudi tuenza bu adi kaayi makumbane. Dijinga dia kusankisha Yehowa ne bena kuitabuja netu didi mua kutufikisha ku diela meji ne: katuena mua kuenza bionso bitudi basue kuenza to. Ke bualu kayi tudi mua kupangila bua kukumbaja bipatshila bietu, tudi mua kudidiula ne kuteketa bikole ku muoyo.

Kadi ntshinyi tshitudi mua kuenza? Pamu’apa tudi mua kuanji kuvuluka ne: Yehowa mmuena malu malenga. Muntu wakajingulula ne: Nzambi mmuena malu malenga uvua mupostolo Yone.

‘Nzambi udi upita mitshima yetu bunene’

Ku ndekelu kua bidimu lukama bia kumpala B.B., Yone wakafundila bena kuitabuja nende ne: ‘Mu muanda eu netumanye ne: tudi ba bulelela, netupoleshe mitshima yetu ku mêsu kuende; bua bikala mitshima yetu itupisha, Nzambi udi upita mitshima yetu bunene, ne udi mumanye malu onso.’ Ntshinyi tshiakafikisha Yone ku difunda mêyi aa?​—1 Yone 3:19, 20.

Yone uvua mumanye bimpe ne: musadidi wa Yehowa uvua mua kumvua mutshima wende umupisha. Pamu’apa Yone muine ukavua mumvue mutshima wende umupisha. Patshivua Yone nsongalume ne mutshikale uvumakana, umue musangu Yezu Kristo wakakaja mmuenenu wende bualu uvua utamba kupisha bakuabu. Bushuwa, Yezu wakinyika Yone ne muanabu Yakobo dîna ne: ‘Boanêge, kukudimuna kua muaku ne: Bana ba mukungulu wa mvula.’​—Mâko 3:17; Luka 9:49-56.

Pakaluaye kusakidila bidimu bipite pa 60, Yone wakatukija ne kuluaye muena Kristo wa lutulu, wa luse ne dinanga. Bu muvuaye mupostolo wa ndekelu utshivua ne muoyo, mu tshikondo tshiakafundaye mukanda wende wa kumpala, uvua mumanye ne: Yehowa katu ubadila musadidi wende yonso kalu kabi konso nansha. Kadi udi Tatu wa musangelu, muena malu malenga, muena kalolo ne luse, udi munange bikole bantu bonso badi bamunange ne badi bamutendelela mu bulelela. Yone wakafunda ne: “Nzambi udi dinanga.”​—1 Yone 4:8.

Yehowa udi usanka bua mudimu utudi tumuenzela

Nzambi mmumanye bilema ne matekete etu a ku tshilelelu, ne katu upua bualu ebu muoyo nansha. Davidi wakafunda ne: ‘Udi mumanye tshidibu batufumbe natshi, udi muvuluke ne: tudi lupuishi.’ Yehowa mmumanye ne: malu a muaba utudi  bakolele mmatuvuije tshitudi lelu etshi. Bulelela, mmutumanye bimpe menemene kupita mutudi badimanye.​—Musambu 103:14, MMM.

Mmumanye ne: munkatshi muetu tudi bavule badi basue kushintuluka, kadi katuena ne bukole bua kutshimuna bilema bualu tudi bapangile bupuangane. Tudi mua kufuanyikija nsombelu wetu ne wa mupostolo Paulo. Wakafunda ne: ‘Muanda muimpe undi musue kuenza, tshiena ngenza, kadi muanda mubi undi tshiyi musue kuenza, eu ngundi ngenza.’ Tuetu bonso tudi mu mvita ya muomumue. Imue misangu bidi mua kufikisha mutshima wetu ku ditupisha.​—Lomo 7:19.

Kadi wikale anu muvuluke ne: Mushindu udi Yehowa utumona udi ne mushinga wa bungi kupita mutudi tudimona. Dîba dionso didiye utumona tudienzeja bua kumusankisha, kêna anu umvua bimpe patupu, kadi udi kabidi usanka. (Nsumuinu 27:11) Nansha mudi malu atudi tuenza mua kumueneka bu adi ne mushinga mukese ku mêsu kuetu, ditaba bua kuenza, ne meji etu mimpe bidi bimusankisha. Udi umona tshidi tshitusaka bua kuenza bitudi tuenza; mmumanye malu atudi tusua kuenza, ne mmujadike bitudi basue ne bitudi tujinga. Yehowa udi mua kubala malu adi mu mutshima wetu.​—Yelemiya 12:3; 17:10.

Tshilejilu, Bantemu ba Yehowa ba bungi batu bena bumama ne badilaminyine, bantu badi kabayi basue bua babamone babambe. Bua bantu ba mushindu’eu, kuyisha lumu luimpe ku nzubu ne ku nzubu kudi mua kuikala lutatu lua bungi bualu badi ne buôwa. Kadi, bu mudibu ne dijinga dia kusadila Nzambi ne kuambuluisha bantu nabu, nansha bena bumama aba batu baya kudi bantu ne bayikila nabu malu a mu Bible. Badi mua kuela meji ne: kabena ne tshia nsongo tshidibu benza to, ne meji aa adi mua kubajimijila disanka. Mutshima wabu udi mua kubambila ne: mudimu udibu benza bua kuambuluisha bantu kawena ne mushinga to. Kadi Yehowa udi usanka bikole bua madikolela adibu benza mu mudimu wabu. Kabidi, kabena mua kuikala bajadike dîba ne muaba wikala ntete ya bulelela idibu bakune mua kutoloka, kukola ne kukuama mamuma nansha.​—Muambi 11:6; Mâko 12:41-44; 2 Kolinto 8:12.

Bantemu bakuabu badi ne masama adi kaayi ajika anyi badi benda bakulakaja. Buabu buobu, kuikala kubuela mu bisangilu ku Nzubu wa Bukalenge kudi mua kuikala anu kubakebela ntatu ne tunyinganyinga. Kuteleja muyuki udi wakula bua mudimu wa buambi kudi mua kubavuluija mushindu uvuabu benza mudimu kale ne utshidibu basue kuenza, nansha mudi butekete bua mubidi bubakuate. Bantu aba badi mua kuikala badipisha bua mudibu kabayi mua kulonda bimpe mibelu mushindu udibu basue. Nansha nanku, Yehowa udi wanyisha bikole lulamatu ne ditantamana diabu. Biashalabu anu bamulamate, yeye kakupua bualu abu muoyo nansha.​—Musambu 18:25; 37:28.

‘Tupoleshe mitshima yetu’

Pakavua Yone mukulakaje, uvua ne bua kuikala mujingulule bimpe malu a bungi adi aleja mushindu udi Nzambi muikale muena malu malenga. Vuluka muakafundaye ne: ‘Nzambi udi upita mitshima yetu bunene, ne udi mumanye malu onso.’ Yone wakatukankamija kabidi bua ‘tupoleshe mitshima yetu.’ Ntshinyi tshivua Yone usua kuamba muaba eu?

Nkonga-miaku kampanda udi uleja ne: muaku wa pa muanda wa mu tshiena-Greke mukudimuna ne: ‘kupolesha’ udi umvuija “kuitabijija, kutamba anyi kukokesha, kutuisha.” Mbuena kuamba ne: bua kupolesha mutshima wetu, tudi ne bua kuutuisha ne kuwitabijija ne: Yehowa mmutunange. Mu mushindu kayi?​—Vine’s Expository Dictionary of Old and New Testament Words.

Fritz, utudi batele ku ntuadijilu kua tshiena-bualu etshi, udi mukulu mu tshimue tshia ku bisumbu bia Bantemu ba Yehowa kukadi mpindieu bidimu bipite pa 25, ne mmufike ku dimona se: padi muntu udilongela Bible udi mua kutuisha mutshima wende ne: Yehowa mmumunange. “Ntu ndonga Bible ne mikanda yetu ne ntema yonso. Dilonga edi didi dingambuluisha bua kubenga kushala mulamate malu a kale, ne bua kuikala ne lungenyi lusunguluke bua malu malenga atudi bindile mu matuku atshilualua. Imue misangu, malu amvua muenze kale atu antonda mu lungenyi, ne ntu ngela meji ne: Nzambi kenaku mua kunnanga to.  Kadi misangu mivule ntu mmona ne: kuikala ne tshibidilu tshia kudilongela kutu kunkolesha ku muoyo, kutu kukolesha kabidi ditabuja dianyi ne kungambuluisha bua kulama disanka ne lutulu.”

Bulelela, kubala Bible ne kuelanganapu meji kakuena pamu’apa mua kushintulula nsombelu utudi nende to. Kadi kudi mua kushintulula mushindu utudi tumona nsombelu wetu. Kubueja ngenyi ya mu Dîyi dia Nzambi mu mitshima yetu kudi kutuambuluisha bua kuikala ne ngelelu wa meji wa buena wa Nzambi. Kulonga kudi kabidi kutuambuluisha bua kutuishibua bikole ne: Nzambi mmuena malu malenga. Ku kakese ku kakese tudi mua kufika ku ditaba ne: Yehowa kêna utupisha bua malu atuvua bapete ku buana ne bua matekete etu a mubidi nansha. Mmumanye ne: majitu adi bavule ba kutudi bambule (a mu lungenyi anyi a ku mubidi) misangu mivule ki ntuetu badi badikebelawu to, ne kêna upua bualu ebu muoyo nansha.

Netuambe tshinyi bua Margarette utudi batele ku ntuadijilu? Pakafikaye ku dimanya Yehowa, dilonga Bible diakamuambuluisha bikole. Amu bu Fritz, yeye pende uvua ne bua kushintulula mushindu uvuaye umona tatu yonso. Masambila akambuluisha Margarette bua kumvua bimpe malu avuaye ulonga. Margarette udi wamba ne: “Tshia kumpala, ngakangata Yehowa bu mulunda wa pa muoyo, bualu mvua mutambe kusomba ne balunda ba dinanga bu muvua tatu kayi muntu wa dinanga. Ku kakese ku kakese, ngakalonga mua kuleja Yehowa mushindu umvua ngumvua, kumukuatshila malu avua angelesha meji, tunyinganyinga ne ntatu yanyi. Misangu ne misangu mvua nyikila nende mu masambila, eku ngenda nsangisha malu mapiamapia onso amvua ndonga pa bidi bimutangila yeye, bienze anu bu dinaya dia disangisha tutupa tua tshimfuanyi tshizola bua kutshipatula tshijima. Kunyima kua matuku, meji amvua ngela bua Yehowa akashintuluka bikole, mpindieu tshitshiena ne lutatu lua bungi bua kumumona bu Tatu wa dinanga to.”

Dipikula bantu ku kanyinganyinga konso

Bu mutshidi anu bukua-panu ebu bubi buikaleku, kakuena muntu udi mua kutekemena bua kuikala kayi ne tunyinganyinga to. Bua bamue bena Kristo bidi biumvuija ne: kanyinganyinga anyi dielakana bidi mua kubanga kubavuila mu lungenyi ne kubabungamija. Kadi tudi mua kujadika ne: Yehowa mmumanye meji mimpe atudi nawu ne madikolela mavule atudi tuenza mu mudimu wende. Kakupua muoyo dinanga ditudi tuleja bua dîna diende nansha.​—Ebelu 6:10.

Mu bukua-panu bupiabupia bukadi pabuipi bualua mu Bukalenge bua Masiya, bantu bonso ba lulamatu badi mua kutekemena dibapikula ku majitu a mu bukua-panu ebu bua Satana. Ndisulakana kayipu! Dîba adi netumone bijadiki bia bungi bidi bileja mudi Yehowa muikale muena malu malenga. Kadi too ne pakumbana dîba adi, tuetu bonso tuikale bajadike ne: ‘Nzambi udi upita mitshima yetu bunene, ne udi mumanye malu onso.’​—1 Yone 3:20.

[Mêyi adi kuinshi]

[Lungenyi lunene lua mu dibeji 30]

Yehowa ki mmuntu wa tshikisu ne muena malu makole to, kadi udi Tatu wa musangelu, muena malu malenga ne muena luse

[Tshimfuanyi mu dibeji 31]

Kulonga Dîyi dia Nzambi kudi kutuambuluisha bua kuikala ne ngelelu wa meji wa buena wende