Bantu batshidi anu belangana mpata bua Evanjeliyo

Miyuki ya diledibua dia Yezu Kristo idi mu Evanjeliyo mmilelela anyi?

Yezu wakenza Muyuki pa Mukuna anyi?

Wakajuka ku lufu anyi?

Uvuaku muambe ne: ‘Meme ndi njila ne bulelela ne muoyo’ anyi?​—Yone 14:6.

BAKONKONONYI ba Bible batue ku 80 mbakonkonone nkonko eyi mu Tshisangilu tshia malu a Yezu tshitubu benza misangu ibidi ku tshidimu katshia mu 1985. Bedi ba Bible mpata aba bakandamuna nkonko eyi mu mushindu udi ukemesha. Bantu bavua mu tshisangilu etshi bakela tukanda bua mêyi onso adibu baleje mu Evanjeliyo ne: nga Yezu. Kakanda kakunze kadi kaleja ne: Yezu ke wakamba bushuwa mêyi au. Kakanda kakunzubile kadi kaleja  ne: mêyi au mmafuanangane ne avua Yezu mua kuikala muambe. Kakanda katokoloke kadi kaleja ne: ngenyi idi mua kuikala isua kupetangana ne ya Yezu, kadi mêyi ki ngende to. Kakanda kafike kuoku kadi kabenga bionso, kadi kaleja ne: mêyi au avua mangatshila mu malongesha adi malue kupatuka panyima.

Pakuenza nunku, bantu bavua mu Tshisangilu etshi tshia malu a Yezu bakabenga kuangata ne mushinga nkonko inayi idi ku ntuadijilu kua tshiena-bualu etshi. Bavua bele tukanda tufike tua mêyi 82 pa lukama adibu bamba mu Evanjeliyo ne: nga Yezu. Buabu bobu, anu miyuki 16 pa lukama idibu balonde bua Yezu mu Evanjeliyo ne mu mikanda mikuabu ke idi imueneka ya malu malelela.

Mpata ya mushindu’eu bua malu adi mu Evanjeliyo ki mmibange lelu to. Bakabanga kuela malu a mu Evanjeliyo mpata mu 1774 pavua Hermann Reimarus (mulongeshi wa miakulu ya ku Orient mu tshimenga tshia Hamburg, mu ditunga dia Allemagne) mufunde mukanda wa mabeji 1 400 wakaluabu kupatula kunyima kua lufu luende. Mu mukanda au, Reimarus uvua wela mpata ya bungi wamba mudi malu adi mu Evanjeliyo kaayi malelela. Mpata yende ivua mimanyine pa malu a miakulu ne makuabu adi amueneka bu adi kaayi apetangana avuabu basangane mu miyuki inayi ya Evanjeliyo idi yakula bua muoyo wa Yezu. Katshia ku tshikondo atshi, bedi ba Bible mpata batu bamba mudi Evanjeliyo kayiyi ya kueyemena ne mbafikishe too ne bantu bakuabu ku dibenga kueyemena mifundu eyi.

Bualu bua muomumue budi bumueneka munkatshi mua bedi ba Bible mpata aba mbua se: buonso buabu badi bangata miyuki ya mu Evanjeliyo bu malu a Nzambi mafuikakaja akafundabu kudi bantu bashilangane. Pa tshibidilu, nkonko itu bedi ba mpata aba bajula nyoyi eyi: Mayisha a bafundi ba Evanjeliyo inayi ke avua mua kuikala mabafikishe ku dilengeja malu adibu bafundamu anyi? Malu a mbulamatadi uvuaku mu tshikondo tshia bena Kristo ba kumpala ki ngavuaku mua kuikala mabasake bua kushintulula anyi kusakidila minga mianda ku muyuki wa Yezu anyi? Mbitupa kayi bia Evanjeliyo bitudi mua kuangata bu malu malelela adibu balonde pamutu pa kubiangata bu mianu?

Bantu badi bakolele muaba udibu bamba ne: Nzambi katuku anyi badi kabayi mu tshitendelelu kampanda badi bitabuja ne: Bible (ne Evanjeliyo yonso idimu) mmukanda mûle ne nsumuinu ne mianu. Bantu badibu bamone bashipe, dikengeshangana, matapuluka ne bienzedi bibi bidi mu Bukua-buena-Kristo mbitekeshe bakuabu mu mikolo. Bantu ba mushindu’eu kabatu bamona mushinga wa kuteya ntema ku malu a mu mikanda idibu bangata bu ya tshijila mu Bukua-buena-Kristo nansha. Badi bela meji ne: malu adi mu mikanda eyi idi mipatule ntendelelu wa bena mpala ibidi mmianu ya patupu.

Udi wela meji kayi? Udiku ne bua kulekela bamue bedi ba mpata badi babenga bua kuitaba malu a mu Evanjeliyo bua bakufikishe ku diela mpata ya muomumue anyi? Paudi umvua bamba mudi bafundi ba Evanjeliyo bafuikakaje malu adimu, udiku ne bua kulekela malu aa akusaka bua kubenga kueyemena malu akafundabu anyi? Malu a dishima adi bena mu Bukua-buena-Kristo bafunde adiku ne bua kukusaka pebe bua kuamba mudi Evanjeliyo kayiyi ya kueyemena anyi? Tudi tukulomba bua ukonkonone amue a ku malu aa mu tshiena-bualu tshidi tshilonda.

[Tshimfuanyi mu dibeji 4]

Malu adi mu Evanjeliyo mmianu anyi peshi mmiyuki milelela?

[Mêyi a dianyisha]

Yezu wenda pa mâyi/​The Doré Bible Illustrations/​Dover Publications

[Mêyi a dianyisha bua tshimfuanyi mu dibeji 3]

Bimfuanyi bidi munyima mu mabeji 3-5 ne 8: Ne dianyisha dia Freer Gallery of Art, Smithsonian Institution, Washington, D.C.