Tudi ba ku badi ne ditabuja

Dilonga dia Bible didi dipesha bantu ditabuja mu ditunga dia Inde

KUTUADIJILA ku Mikuna mitumbuke ya Himalaya idi neje mibuikile lua ku Nord too ne ku Sud ku bisense bia Mbuu wa mu Inde, ditunga edi didi ne bitendelelu ne bitupa bia maloba bia mishindu ne mishindu. Ku bantu bapite pa muliyare mujima badi mu ditunga edi, bantu batue ku 83 pa lukama mbena Hindu, 11 pa lukama mba Mizilman, ne munkatshi mua bakuabu bashadi aba mudi batu badibikila ne: mbena Kristo, ba-Sikh, bena Bouddha, ne ba-Jaïn. Bonso badi ne budikadidi bua ntendelelu. Tshibungu kampanda tshidi tshiamba ne: “Bena mu ditunga dia Inde badi bangata bitendelelu ne mushinga wa bungi mu nsombelu wabu.”​—The World Book Encyclopedia.

Bantemu ba Yehowa (badi buobu bapite pa bantu 21 200 mu Inde) badi bamanyika bipepele ku nsombelu wabu udi ulonda ditabuja dia bena Kristo. Anu bu bana babu ba mu nyuma ba mu matunga makuabu pa buloba bujima, Bantemu ba mu Inde badi basanka padibu bambuluisha bantu nabu bua kuitabujabu pabu Bible menemene ne kumuangatabu bu Dîyi dia Nzambi. (2 Timote 3:16, 17) Tangila muvua dimue dîku dia mu tshimenga tshia Chennai ku Sud kua Inde difike ku dimanya bulelela bua mu Bible.

Kumpala kua kupetanganabu ne Bantemu ba Yehowa, bena mu dîku edi bavua badifile ne tshisumi mu bisumbu bia nyuma bia bena Katolike, bamba muvuabu bamona bikena-kumona, bakula mu miakulu, buondapa ne babedi. Bavua bantu banene mu ekeleziya wabu ne mu muaba uvuabu basombele, bantu bavua mene babikila bamue bena mu dîku edi ne: “swami,” mmumue ne: “mukalenge.” Kadi dimue dituku Ntemu kampanda wakayikila ne bena mu dîku edi. Kubalejaye ku diambuluisha dia Bible ne: Yezu m’Muana wa Nzambi kadi ki n’Nzambi Wa-Bukole-Buonso mudi bantu bavule bamba nansha. Ntemu au wakabaleja kabidi ne: Yehowa ke dîna dia Nzambi, kabidi ne: Yehowa mmulongolole bua buloba kuluabu mparadizu mulengele.​—Misambu 83:18; Luka 23:43; Yone 3:16.

Bu muvuabu banemeka Dîyi dia Nzambi ne banange malu avuabu babambila, bena mu dîku edi bakanyisha bua kuikala kulonga Bible ne Bantemu ba Yehowa. Bantu ba mu tshitendelelu tshiabu bakatuadija kubaseka. Nansha nanku, bena mu dîku edi bakashala anu badisuike bua kutungunuka ne dilonga diabu dia Bible. Pakamanyabu malu a bungi a mu Bible ne pakakola kabidi ditabuja diabu, bakalekela bilele bivuabu nabi patshivuabu mu tshitendelelu tshia dishima. Lelu’eu, bantu basatu ba mu dîku edi bakadi batambule ne balue Bantemu ba tshisumi, ne mamu wa dîku edi utu wenza mudimu wa bumpanda-njila buambuluishi dîba dionso dituye upeta mushindu.

Bidi bikengela ditabuja bua kutantamena bulema

Sunder Lal, nsongalume wa mu musoko wa mu Punjab, bivua bimukengela ditabuja ne dikima dia bungi bua kuyisha bantu bakuabu lumu luimpe lua Bukalenge bua Nzambi. (Matayo 24:14) Tshia kumpala: bua kumonaye mua kutendelela Yehowa Nzambi mulelela, ukavua mulekele malu avuabu babalongeshe mu dîku diabu ne mu musoko wabu a ditendelela nzambi ya bungi. Tshibidi: Sunder Lal kavua ne mikolo to.

Too ne mu 1992, Sunder Lal uvua anu bimpe. Uvua wambuluisha munganga kampanda, pashishe kutuadijaye kutendelela nzambi ya bungi ya mu tshitendelelu muvua bena dîku diabu, muvuabu babalongesha kudi guru anyi mulongeshi uvuabu basungule. Kadi wakadishinda dimue dituku butuku pavuaye usambuka njanja. Kawulu kakamudiata ne kumukosela mikolo yonso mu bibelu. Nansha muakashalaye  ne muoyo, yende midimu yonso yakanyanguka. Sunder Lal wakashala ne tunyinganyinga tukole, kujingaye mene bua kudishipa. Bena mu dîku diabu bakamuambuluisha, kadi uvua umueneka ne: katshivua kabidi ne bua nsongo buvuaye mua kutekemena nansha.

Pashishe Ntemu wa Yehowa kampanda wakayikila ne Sunder Lal, kumulejaye ku diambuluisha dia Bible ne: Nzambi mmulaye bua kuvuija buloba buetu ebu mparadizu wa masanka ne bua kupesha bonso badi bamunange ne badi bamutshina makanda a mubidi mapuangane. Sunder Lal wakitaba bua kulonga Bible, kulongaye ne tshisumi tshikole munda mua tshidimu tshimuepele. Bakamubikila bua kubuela mu bisangilu bia tshisumbu, wakalua kuyamu bamuambule pa dikalu dia mulunda wende. Nansha muvua luendu lua ku dikalu alu lumutatshisha, wakapeta masanka a bungi. Wakajadika ne: malu avuaye mumone pavuabu bamulongesha Bible kumbelu avua malelela pakapetanganaye ne bakuabu bavua pabu bitabuja ne muoyo umue malu adi Nzambi mulaye ne batumikila malongesha adi mu Bible.

Sunder Lal wakatuadija kuambila bena mutumba nende lumu luimpe, ne mu 1995 wakatambula. Tshia kumpala, wakabanga buambi wenda udikoka panshi bua kuya ku nzubu ne ku nzubu mu musoko wabu. Ewu ke mushindu uvuaye pende wendakana. Kadi mpindieu bana babu ba mu nyuma mbamupeshe dikalu dia balema dia “kunyenga” ne bianza. Ku diambuluisha dia dikalu edi, mpindieu udi ne mushindu wa kudienzela luendu lua kilometre 12 bua kuya kubuela mu bisangilu bia tshisumbu. Imue misangu utu udiendeshila dikalu edi nkayende mu mvula ya bipupu; mikuabu misangu mu munya mukole menemene.

Pa kumbusha dibuela mu bisangilu, Sunder Lal udi ulonga Bible ne bantu bavule badi bajinga bua kubambuluishabu bua bafike ku ditabuja Yehowa, Nzambi mulelela. Bantu muanda-mutekete bavuaye mulonge nabu Bible bakadi batambule. Bakuabu basatu bakayishaye ne pashishe kubafilaye mu bianza bia Bantemu bakuabu bua balonge nabu Bible bakadi pabu batambule.

Bible udi wamba ne: bantu ‘bonso kabena ne ditabuja.’ (2 Tesalonike 3:2) Kadi bua badi “[badilongolole bimpe bua] muoyo wa tshiendelele,” dilonga dia Dîyi dia Nzambi pa tshibidilu didi mua kubapesha ditabuja dikole. (Bienzedi 13:48) Dilonga dia mushindu’eu didi dibambuluisha bua kushala batekemene malu malenga atshilualua adi bantu ba bungi benda bitabuja mu Inde.

[Karte mu dibeji 30]

(Bua kumona malu bimpe, tangila mu mukanda)

AFGHANISTAN

PAKISTAN

NÉPAL

BHOUTAN

CHINE

BANGLADESH

MYANMAR

LAOS

THAÏLANDE

VIÊT-NAM

CAMBODGE

SRI LANKA

INDE

[Mêyi a dianyisha]

Mountain High Maps® Copyright © 1997 Digital Wisdom, Inc.