Evanjeliyo mmiyuki ya malu malelela anyi mmianu?

PA BULOBA bujima, muyuki wa Yezu wa mu Nazaleta (nsongalume wakashintulula luendu lua malu a panu) mmulue kutangalaka bikole mu bantu. Utu mu malu adibu balongesha bantu. Bantu bavule batu bamba mudi Evanjeliyo muikale tshilaminu tshia malu malelela mapite bungi ne tusumu bu mudi: “Diyi dienu pikaladio dia ne: ‘Eyo’, dikale anu ‘eyo’; diodio dikale ne: ‘To’, dikale anu ‘to’.” (Matayo 5:37, Mukanda wa Mvidi Mukulu, disendamija miaku ndietu.) Bushuwa, mu miyuki ya mu Evanjeliyo ke mudi mua kuikala malu avua baledi bebe bakulongeshe nansha buobu bikale bena Kristo anyi kabayi bena Kristo.

Evanjeliyo mmiumvuije balongi balelela ba Kristo miliyo mivule malu adi atangila muntu udibu bitabe bua kukenga anyi kufua bua bualu buende. Evanjeliyo mmileje kabidi malu adi apesha bantu dikima, abambuluisha bua kutantamana, abapesha ditabuja ne ditekemena. Nunku kuenaku umona ne: bidi bikengela bua muntu ikale ne bijadiki bishindame bua kuleja mudi miyuki eyi mikale malu mafuikakaja patupu anyi? Paudi utangila mushindu udi miyuki ya mu Evanjeliyo mitambe kulengeja meji ne bienzedi bia bantu, kuakulombaku muntu bijadiki bikole menemene biasuaye kuamba mudi Evanjeliyo kayiyi milelela anyi?

Tudi tukulomba bua kukonkonona ndambu wa nkonko idi yelesha meji idi itangila Evanjeliyo. Udiumvuile nkayebe malu adi bamue balongi ba Evanjeliyo bamba bua nkonko eyi nansha mudi bamue ba kudibu bamba mudibu kabayi bena Kristo. Pashishe wewe nkayebe neumanye tshiudi mua kuamba bilondeshile biumvua.

NKONKO

◆ Evanjeliyo idiku mua kuikala malu adi bantu ba dimanya ditue bafuikakaje anyi?

Robert Funk, eu wakatuadija Tshisangilu tshia malu a Yezu, udi wamba ne: “Matayo, Mâko, Luka ne Yone ‘bakamba malu a Masiya’ bua apetangane ne malongesha a bena Kristo akalua kupatuka kunyima kua lufu lua Yezu.” Pabi patshivuabu bafunda Evanjeliyo, bantu ba bungi bavua baditelejile mêyi a Yezu, bamone malu avuaye muenze ne bamumone kunyima kua dibika diende ku lufu batshivua ne muoyo tshikondo atshi. Kabakamba ne: bafundi ba Evanjeliyo bavua bafunde bualu nansha bumue bua dishima.

Tuakulabi mpindieu bua lufu ne dibika dia Kristo. Miyuki milelela ya lufu ne dibika dia Yezu kayena anu mu Evanjeliyo nkayamu, kadi idi kabidi mu mukanda wa kumpala uvua Paulo mufundile bena Kristo ba mu Kolinto wa kale. Wakafunda ne: ‘Ngakafila kunudi kumpala kua malu onso bualu bungakangata kabidi ne: Kristo wakafua bua malu mabi etu, bu mudi Mukanda wa Nzambi wamba; wakajikibua, wakabishibua ku lufu pakapita matuku asatu, bu mudi Mukanda wamba; wakamueneka kudi Kefa, ne kunyima kudi bapostolo dikumi ne babidi; pashishe, wakamueneka kudi bantu batambe nkama itanu tshikondo tshimue; bakuabu babu ba bungi batshidi ne muoyo too ne katataka, kadi bakuabu babu bakalala tulu mu lufu; pashishe, wakamueneka kudi Yakobo, pashishe, kudi bapostolo bonso; ne ku nshikidilu kua bonso wakamueneka kundi, meme muana wa kabishi.’ (1 Kolinto 15:3-8) Bantemu ba mushindu’eu bavua ne bua kuikala balame miyuki milelela ya malu a muoyo wa Yezu.

Mu Mifundu ya tshiena-Greke ya bena Kristo kamuena malu mafuikakaja bu adibu bamba kudi bedi ba Bible mpata ba mu tshikondo tshietu etshi nansha. Kadi malu aa adi mu mikanda yakafundabu mu lukama lua bidimu luibidi B.B. Nanku dîba  adi ke diakapatuka imue miyuki ivua kayiyi ya mu Bible ivua yakula bua Kristo tshikondo tshiakatuadija butontolodi buvua bufumine mu Buena-Kristo bulelela kutangalaka mu bantu bavua kule ne tshisumbu tshia bapostolo.​—Bienzedi 20:28-30.

◆ Malu adi mu Evanjeliyo nnsumuinu anyi?

Clive Lewis, mufundi ne muntu utu wela malu a mu Bible mpata, wakamona bimukolele bua kuitaba ne: malu adi mu Evanjeliyo nnsumuinu ya patupu. Wakafunda ne: “Bu mundi mufundi wa miyuki ya kale, ndi mumanye bimpe menemene se: malu adi mu Evanjeliyo ki nnsumuinu to. Ki mmalu adi bantu bakuatakaja bua kuikalawu nsumuinu to. . . . Katuena bamanye malu a bungi akenza Yezu, ne bantu batu bafunda nsumuinu kabavua mua kuitaba bua malu au onso kupangikawu nansha.” Bushuwa, nansha muvua Herbert Wells, mufundi wa miyuki ya kale kayi muambe ne: uvua muena Kristo, tshidiku wakitaba ne: “[bafundi ba Evanjeliyo] bonso banayi badi bamba tshintu tshimue pa kutupesha tshimfuanyi tshia muntu musunguluke; badi batuambila . . . malu malelela adi atutuisha.”

Angata tshilejilu tshia muanda wakenzeka pavua Yezu mumuenekele balongi bende pakabikaye ku lufu. Mufumbi muimpe wa mianu uvua pamu’apa mua kuakula bua Yezu bu muntu mufue-mualuke, wenza muyuki wa mikukuku, anyi muikale utua nsese ne wengelela. Kadi bafundi ba Evanjeliyo buobu badi bamba ne: Yezu uvua muimane kumpala kua bayidi bende. Pashishe wakabebeja ne: “Bana, nudi ne tshia kudia, anyi?” (Yone 21:5) Muena meji Gregg Easterbrook udi wamba ne: “Malu aa adi ajadika ne: muyuki eu ng’wa bushuwa ne ki mmuanu mufuikakaja to.”

Kuamba ne: malu adi mu Evanjeliyo nnsumuinu patupu kudi kabidi kubengangana bikole ne ndongeshilu wa ba-rabbi uvua mutangalake mu tshikondo tshitshivuabu bafunda Evanjeliyo. Bavua batamba kulongesha bantu bua bakuate malu ku muoyo pa kubambila bua kuambulula njila ne njila. Ngenzelu eu wakambuluisha bua kufunda mêyi ne malu majalame akenza Yezu, mashilangane ne miyuki milengeja idi bantu badifuikakajile.

◆ Bu Evanjeliyo mikale nsumuinu, mmunyi muvuabu mua kufika ku diyisangisha diakamue kunyima kua lufu lua Yezu?

Bilondeshile bijadiki bitudi nabi, bakafunda Evanjeliyo pankatshi pa tshidimu tshia 41 ne tshia 98 B.B. ne Yezu yeye wakafua mu tshidimu tshia 33 B.B. Malu aa adi aleja ne: bakasangisha miyuki yonso ya malu a muoyo wende mutantshi mukese kunyima kua yeye mumane kujikija mudimu wende. Muanda eu udi uleja ne: kakuena muntu udi mua kuamba ne: malu adibu balonde mu Evanjeliyo nnsumuinu ya patupu nansha. Bua bantu kuenza nsumuinu bitu bilomba dîba dia bungi. Angata tshilejilu tshia lusumuinu lua Iliade ne lua Odyssée milonda kudi muena Greke Homère, uvua ufunda tusala kale. Bamue bantu batu bamba ne: bakenda basangisha mêyi a nsumuinu ibidi eyi mile akalua kukumbana bimpe kunyima kua bidimu nkama ya bungi. Kadi bidi munyi bua Evanjeliyo?

Will Durant, mufundi wa miyuki ya kale, udi wamba mu mukanda wende wa Kayisa ne Kristo (Angl.) ne: “[Kuamba bua] se: bantu bakese . . . mbafuikakaje muyuki wa muntu wa bukole ne udi usankisha, muena bikadilu bitambe buimpe ne utamba kusaka bantu ku dimanya mua kusomba ne bakuabu, ntshishima tshia dikema kupita bishima bionso bidibu balonde mu Evanjeliyo. Kunyima kua bidimu nkama ibidi bia dikonkonona Bible, malu a pa buawu a mu nsombelu, ngikadilu ne ndongeshilu wa Kristo, mbishale anu biumvuike bimpe menemene, ne bionso ebi ke bidi bienza muyuki udi bantu ba bungi batambe kunanga mu matunga a ku Mputu.”

◆ Bakalua kushintulula Evanjeliyo bua kukumbaja malu avua bena Kristo ba kumpala basue anyi?

Bamue bedi ba Bible mpata badi bamba ne: malu a mbulamatadi ya mu tshikondo tshia bena Kristo ba kumpala akasaka bafundi ba Evanjeliyo bua kushintulula muyuki wa Yezu anyi bua kusakidilaku manga malu. Kadi dikonkonona malu adi mu Evanjeliyo ne ntema didi dituleja ne: kabavua bashintulule bualu nansha bumue to. Bikala bena Kristo ba mu bidimu lukama bia kumpala bavua bashintulule miyuki ya mu Evanjeliyo idi itangila Yezu, bua tshinyi tudi tusanganamu bakule malu mabi a bena Yuda ne a Bampangano?

Tshilejilu, mu Matayo 6:5-7 badi batela mêyi a Yezu a se: ‘Panuatendelela Nzambi, kanuikadi bu bena lubombo; bobu badi basue kutendelela Nzambi bimane mu nsunagoga ne mu masanga a njila bua bantu babamone. Bulelela, ndi nnuambila ne: bobu bakumana kuangata difutu diabu.’ Bushuwa,  mêyi aa avua apisha bamfumu ba bitendelelu bena Yuda. Yezu wakamba kabidi ne: ‘Panuatendelela Nzambi, kanuakudi biakulakula bu mutu bantu ba bende [anyi bampangano] benza; bobu batu belangana meji ne: nebatumvuile bua mêyi etu adi a bungi.’ Pakatela bafundi ba Evanjeliyo mêyi a Yezu aa, kabavua bakeba kukudimuisha bantu mitshima to. Bavua patupu bafunda mêyi avua Yezu Kristo muambe.

Tangila kabidi miyuki ya mu Evanjeliyo idi yakula bua bakaji bakaya ku lukita lua Yezu ne buobu kulusangana munda mutupu. (Mâko 16:1-8) Gregg Easterbrook udi wamba ne: “bantu ba ku Moyen-Orient bavua ne tshilele tshia kubenga malu avua bantu bakaji bajadika. Tshilejilu, bamonyi bantu balume babidi bavua bakumbane bua kupisha muntu mukaji ne: mmuende masandi. Kadi muntu mukaji yeye kavuaku ne bualu buvuaye mua kuamba bua kupisha muntu mulume nansha.” Bushuwa, balongi ba Yezu kabakitaba tshivua bakaji abu babambile to! (Luka 24:11) Nunku muanda eu udi uleja bimpe menemene ne: muyuki au ki mbualu buvuabu bafuikakaje ku bukole nansha.

Bu mudi mifuanu kayiyi mu mukanda wa Bienzedi ne mikuabu idi kunyima kuawu, nanku bidi bitujadikila menemene se: bena Kristo ba kumpala kabavua basakidile mifuanu idi mu Evanjeliyo nansha. Kadi malu onso aa ngavua Yezu nkayende muambe. Kabidi, patudi tufuanyikija bimpe Evanjeliyo ne mikanda mikuabu idi kunyima kua mukanda wa Bienzedi, tudi tumona ne: mêyi a Paulo peshi a bafundi bakuabu ba Mifundu ya tshiena-Greke kaavua mashintulula anyi malamika Yezu ku bukole to. Bikala bena Kristo ba kumpala bavua benze bualu bua mushindu’eu, nanku amue malu a mu mikanda idi kunyima kua mukanda wa Bienzedi tudi mua kuapeta mu miyuki ya mu Evanjeliyo. Kadi bu mutudi katuyi tuasanganamu, tudi tuamba tushindika ne: malu adi mu Evanjeliyo mmalelela ne ki mmashintuluke to.

◆ Netuambe tshinyi bua malu adi amueneka bu adi kaayi umvuangana mu Evanjeliyo?

Bedi ba Bible mpata mbambe kukadi mutantshi mule ne: Evanjeliyo mmiûle tente ne malu adi kaayi umvuangana. Durant, mufundi wa miyuki ya kale wakakeba bua kukonkonona malu adi mu Evanjeliyo, uvua muikale uyangata patupu bu mikanda ya miyuki ya kale. Nansha mudiye wamba ne: malu adi mu Evanjeliyo adi amueneka bu adi kaayi umvuangana, udi ujikija wamba ne: “Dibenga kumvuangana didi mu tu-malu tukese [tudi katuyi nansha ne mushinga], kadi ki mmu malu manene to; mu kabujima, Evanjeliyo isatu ya kumpala idi yumvuangana mu mushindu wa dikema, ne idi ileja tshidi Kristo mu mushindu wa muomumue.”

Misangu mivule bitu bitekete bua kumvua malu adi amueneka bu adi kaayi umvuangana mu miyuki ya mu Evanjeliyo. Tshilejilu, Matayo 8:5 udi wamba ne: ‘kapitene ka masalayi lukama wakalua kudi [Yezu], wakamutendekena’ bua kuondapa muena mudimu wende. Mu Luka 7:3, tudi tubala ne: kapitene eu ‘wakatuma bakulu ba bena Yuda kudiye, bua kumusengelela bua kulua kupandishaye muntu wende.’ Kapitene eu wakatuma bakulu aba bu baleji-mpala bende. Matayo udi wamba ne: kapitene ka masalayi yeye nkayende wakatendekena Yezu bualu wakalomba diambuluisha edi ku butuangaji bua  bakulu, bakakula pa muaba wende. Etshi ntshilejilu tshimue tshianana tshidi tshileja ne: tudi mua kumvua malu adi mu Evanjeliyo adi [bamue] bantu bamba ne: kaena apetangana.

Kadi netuambe tshinyi bua malu adi bedi ba Bible mpata bamba ne: Evanjeliyo kayena ikumbaja malu adi akengela bua kushishabu kuyangata bu miyiki ya malu malelela? Durant udi utungunuka wamba ne: “Bikale ne tshisumi bua malu adibu basokolole, bedi ba Bible mpata mbatete bikole Dipungila Dipiadipia bua kujadika bulelela bua malu adimu bafuanyike mene kuvuija bantu bavule bende lumu kale (bu mudi Hammourabi, Davidi ne Socrate) bu bantu ba mu mianu patupu. Nansha muvua bafundi ba Evanjeliyo bikale ne malu avuabu buobu basue ne malongesha a ntendelelu wabu, bakafunda malu a bungi adi bafundi ba miyuki ya tshianana aba kabayi mua kuleja patoke: bapostolo bavua bafuilakena mianzu minene mu Bukalenge, bakanyema pakakuatabu Yezu, Petelo wakamuvila . . . Muntu udi ubala malu aa kêna mua kuamba muvua bantu aba kabayi bantu balelela to.”

◆ Buena-Kristo bua lelu budi buleja Yezu wa mu Evanjeliyo anyi?

Bena mu Tshisangilu tshia malu a Yezu bakamba ne: malu avuabu bakeba mu Evanjeliyo “kaena ashikidila pa mikalu idi bipangu bia bitendelelu biele nansha.” Kadi Wells, mufundi wa miyuki ya kale wakamona ne: kudi dishilangana dinene dia dikema pankatshi pa malongesha a Yezu adi mu Evanjeliyo ne a bena mu Bukua-buena-Kristo. Wakafunda ne: “Kakuena tshijadiki tshidi tshileja ne: bapostolo ba Yezu bavuaku bumvue Yezu wakula bua Busatu Bunsantu musangu nansha umue to. . . . Peshi [Yezu] kavua muambe musangu nansha umue bua bantu kutendelelabu mamuende Mariya mushindu uvua bantu batendelela Isis, Mukalenge-mukaji wa mu diulu nansha. Kavua mumanye malongesha onso adi aleja ntendelelu ne bienzedi bia bena mu Bukua-buena-Kristo to.” Nunku, malongesha a mu Bukua-buena-Kristo kaena mua kuambuluisha muntu bua kumanya mushinga wa Evanjeliyo nansha.

 MPINDIEU UDI UMONA BISHI?

Paudi mujikije kubala malu onso ashadi aa, mpindieu udi umona bishi? Kudiku bijadiki bilelela bidi bileja menemene ne: Evanjeliyo mmianu ya patupu anyi? Bantu ba bungi batu bamona ne: nkonko ne mpata idi bakuabu bele pa bidi bitangila bulelela bua malu adi mu Evanjeliyo kayena ne bua nsongo ne kayena nansha mene ibatuisha to. Bua wewe kumanya malu adi mu Evanjeliyo, udi ne bua kuabala ne ntema ya bungi. (Bienzedi 17:11) Biwamona mushindu udi Evanjeliyo yumvuija bumuntu bua Yezu mu mêyi mumvuangane, a bushuwa ne majalame, neujingulule ne: miyuki eyi ki mmukanda wa mianu nansha. *

Wewe mubale Bible ne ntema ne mutumikile mibelu idimu, neumone mudiye mua kulengeja nsombelu webe. (Yone 6:68) Ke tshidi Yezu muleje mu malongesha ende adi mu Evanjeliyo. Bualu budi ne mushinga wa bungi mbua se: Evanjeliyo eyi idi mua kukumanyisha malu malenga apeta bantu bena butumike mu matuku atshilualua.​—Yone 3:16; 17:3, 17.

[Mêyi adi kuinshi]

[Kazubu mu dibeji 7]

Bijadiki bia malu malelela adibu balonde

KUKADI bidimu ndambu, mufundi kampanda uvua wela Bible mpata kale (wa mu ditunga dia Australie) wakatonda ne: “Bua musangu wa kumpala katshia bandela, ngakenza tshidi kamona-kamba yonso ne bua kuanji kuenza: ngakakonkonona malu amvua mumanye. . . . Ne biakantonda, bualu malu amvua mbala [mu Evanjeliyo] kaavua mianu anyi malu mafuikakaja patupu to. Avua malu malelela avuabu balonde. Mmiyuki ya malu a dikema madiumvuila ne mumvuila kudi bantu bakuabu . . . Malu malonda adi ne tshimanyinu, ne tshimanyinu atshi tshidi mu Evanjeliyo.”

Bia muomumue kabidi, E. M. Blaiklock, mulongeshi wa malu a bena Greke ne bena Lomo mu Iniversite wa mu tshimenga tshia Auckland, wakamba ne: “Ndi ngamba ne: meme ndi mufundi wa miyuki ya kale. Ndi ngangata malu a bena Greke ne bena Lomo bu miyuki ya kale. Ne ndi nnuambila kabidi ne: malu adi ajadika ne: Kristo uvua ne muoyo, wakafua ne wakabika ku lufu mbaamanye bimpe menemene kupita malu makuabu a bungi a mu miyuki ya kale.”

[Karte/​Bimfuanyi mu mabeji 8, 9]

(Bua kumona malu bimpe, tangila mu mukanda)

FOINIKE

GALELE

Musulu wa Yadene

YUDAYA

[Bimfuanyi]

“Malu adi ajadika ne: Kristo uvua ne muoyo, wakafua ne kubika ku lufu, mbaamanye bimpe menemene kupita malu makuabu a bungi a mu miyuki ya kale.”​—MULONGESHI E. M. BLAIKLOCK

[Mêyi a dianyisha]

Tuarte: tuangatshila mu Pictorial Archive (Near Eastern History) Est. ne mu Survey of Israel.