Tuitabujayi dîyi dia mulayi dia Nzambi!

“Tudi ne dîyi dia mulayi dishindika bikole.”​—2 PETELO 1:19, NW.

1, 2. Mmulayi kayi wa kumpalampala wakamanyishabu, ne ndumue lua ku nkonko kayi ivuawu mujudije?

 YEHOWA ke wakamanyisha mulayi wa kumpalampala. Kunyima kua Adama ne Eva bamane kuenza mpekatu, Nzambi wakambila nyoka ne: “Nenteke lukuna pankatshi pebe ne mukaji, ne pankatshi pa dimiinu diebe ne dimiinu diende. Yeye neakuboze ku mutu ne wewe neumuboze ku tshikankanyi.” (Genese 3:1-7, 14, 15, NW) Bidimu nkama mivule bivua ne bua kuanji kupita kumpala kua bantu kumvuabu bimpe menemene mêyi aa a mulayi.

² Mulayi eu wa kumpala wakafila ditekemena dilelela bua bantu bena mpekatu. Pashishe Bible wakalua kuamba ne: Satana Diabolo ki “nyoka au wa kale.” (Buakabuluibua 12:9) Kadi nnganyi uvua ne bua kuikala Dimiinu divua Nzambi mulaye?

Tukebayi bua kumanya Dimiinu

3. Mmunyi muakaleja Abele ne: uvua witabuja mulayi eu wa kumpala?

³ Abele mutshinyi wa Nzambi uvua mushilangane ne tatuende, bualu wakitabuja mulayi eu wa kumpala. Bidi bimueneka ne: Abele wakajingulula bua se: bua kubuikila mpekatu bivua bikengela mashi apueke panshi. Nanku ditabuja diakamusaka bua kufila mulambu wa nyama wakanyishabu bikole kudi Nzambi. (Genese 4:2-4) Kadi Dimiinu adi divuabu balaye diakanji kushala kadiyi dimanyike.

4. Mmulayi kayi uvua Nzambi mumanyishe Abalahama, ne ntshinyi tshivuawu uleja bua Dimiinu divuabu balaye?

⁴ Bidimu bitue ku 2 000 kunyima kua Abele, Yehowa wakamanyisha nkambua Abalahama mulayi eu: “Nenkubeneshe, nemvudije ndelanganyi yebe bu mitoto ya kulu . . . Bisamba bionso bia pa buloba nebipetele diakalenga kudi ndelanganyi yebe.” (Genese 22:17, 18, MMM) Mêyi aa akaleja ne: Abalahama uvua ne mudimu mu mushindu uvua mulayi eu wa kumpala ne bua kukumbana. Akaleja kabidi ne: Dimiinu divua ne bua kubutula midimu ya Satana divua ne bua kupatukila mu ndelanganyi ya Abalahama. (1 Yone 3:8) “[Abalahama] kakajimija ditabuja diende ne kakela mpata bua mulayi wa [Nzambi] kudiye,” nansha bantemu bakuabu ba Yehowa ba kumpala kua Buena-Kristo bavua ‘kabayi bapete tshivuabu babalaye’ kabakela pabu mpata to. (Lomo 4:20, 21; Ebelu 11:39, MML) Kadi bakatungunuka ne kuitabuja dîyi dia mulayi dia Nzambi.

5. Mulayi wa Nzambi wa Dimiinu wakakumbanyina mu nganyi, ne bua tshinyi udi wamba nanku?

⁵ Mupostolo Paulo wakaleja patoke Dimiinu divua Nzambi mulaye pakafundaye ne: “Milayi ivua miambila Abalahama ne dimiinu diende. Kabena bamba ne: ‘Ne mamiinu,’ bienze bu bua a bungi, kadi bua dimue: ‘Ne dimiinu diebe,’ udi Kristo.” (Galatia 3:16, NW) Dimiinu divua bisamba ne bua kupetela dibenesha ku butuangaji buadi kadivua ndelanganyi yonso ya Abalahama to. Kabavua  ne bua kuangata ndelanganyi ya muanende Yishemaele anyi ya bana bende bakalelaye ne Ketula bua kubenesha nayi bantu nansha. Dimiinu dia dibenesha diakaluila mu muanende Isaka ne mu munkanende Yakoba. (Genese 21:12; 25:23, 31-34; 27:18-29, 37; 28:14) Yakoba wakaleja ne: “bantu bonso” bavua ne bua kutumikila Shilo wa mu tshisa tshia Yuda, kadi bakalua kuleja ne: Dimiinu divua ne bua kupatukila anu mu ndelanganyi ya Davidi. (Genese 49:10; 2 Samuele 7:12-16) Bena Yuda ba mu bidimu lukama bia kumpala bavua bindile dilua dia Masiya anyi Kristo. (Yone 7:41, 42) Mulayi wa Nzambi wa Dimiinu wakakumbanyina mu Muanende Yezu Kristo.

Masiya udi umueneka!

6. (a) Mbingu 70 idi yumvuija tshinyi? (b) Ndîba kayi ne mmunyi muvua Yezu ‘mujikije mpekatu’?

⁶ Muprofete Danyele wakafunda mulayi wa mushinga mukole udi utangila Masiya. Mu tshidimu tshia kumpala tshia mukalenge Dayawesha muena Madai, Danyele wakajingulula ne: bidimu 70 bia kabutu ka Yelushalema bikavua bitangile ku ndekelu kuabi. (Yelemiya 29:10; Danyele 9:1-4) Pavua Danyele usambila, muanjelu Gabaliele wakalua kumuleja ne: ‘bakakosa mbingu makumi muanda-mutekete bua [kujikija mpekatu].’ Bavua ne bua kushipa Masiya munkatshi mua lubingu lua 70. ‘Mbingu makumi muanda-mutekete ya bidimu’ yakatuadija mu 455 K.B.B., pavua Atashasete I Mukalenge wa bena Pelasa ‘mupatule mukenji bua kuasa Yelushalema tshiakabidi.’ (Danyele 9:20-27; Nehemiya 2:1-8) Masiya uvua ne bua kulua kunyima kua mbingu 7 kusangisha ne mbingu 62. Bidimu ebi 483 biakatuadija mu 455 K.B.B. too ne mu 29 B.B., pakatambula Yezu ne Nzambi kumuelaye manyi bua kuluaye Masiya anyi Kristo. (Luka 3:21, 22) Yezu ‘wakajikija mpekatu’ pakafilaye muoyo wende bu tshia-bupikudi mu tshidimu tshia 33 B.B. (Mâko 10:45) Ebi mbijadiki bikole bidi bitusaka bua kuitabuja dîyi dia mulayi dia Nzambi! *

7. Ku diambuluisha dia Bible, leja mushindu uvua Yezu mukumbaje milayi ivua yakula bua Masiya.

⁷ Kuitabuja dîyi dia mulayi dia Nzambi kudi kutupetesha mushindu wa kujingulula Masiya. Ku milayi mivule idi itangila Masiya idi mu Mifundu ya tshiena-Ebelu, bafundi ba Mifundu ya tshiena-Greke ya bena Kristo bakaleja muvua ya bungi itangila Yezu buludiludi. Tshilejilu, bakalela Yezu mu Beteleheme kudi mukaji utshivua kamama. (Yeshaya 7:14; Mika 5:2; Matayo 1:18-23; Luka 2:4-11) Bakamubikila bua kumbuka mu Ejipitu, ne bakashipa bana batoke kunyima kua diledibua diende. (Yelemiya 31:15; Hoshea 11:1; Matayo 2:13-18) Yezu wakambula makenga etu. (Yeshaya 53:4; Matayo 8:16, 17) Anu mukavuabi bimanyisha, wakabuela mu Yelushalema musombe pa muana wa nyama wa mpunda. (Zekâya 9:9; Yone 12:12-15) Mêyi a mufundi wa misambu akakumbana kunyima kua bamane kushipela Yezu ku mutshi, pakabanyangana basalayi tshilamba tshiende ne kuelelabu tshilamba tshiende tshia muinshi nshobo. (Musambu 22:18; Yone 19:23, 24) Dibenga kutshibuka dia mifuba ya Yezu ne dimutua difuma mu mbadi biakakumbaja kabidi milayi. (Musambu 34:20; Zekâya 12:10; Yone 19:33-37) Ebi mbilejilu bikese patupu bia milayi ivua itangila Masiya ivua bafundi ba Bible benzeja ku nyuma wa Nzambi baleje muvuayi itangila Yezu. *

Sekelelayi Mukalenge Masiya!

8. Nnganyi udi Wa Kale wa Matuku a Bungi, ne mmunyi muakakumbana mulayi udi mu Danyele 7:9-14?

⁸ Mu tshidimu tshia kumpala tshia Beleshasâ Mukalenge wa bena Babulona, Yehowa wakalotesha Danyele muprofete wende tshilota ne kumuleja bikena-kumona bia dikema. Kumpala muprofete wakamona nyama minene inayi. Muanjelu wa Nzambi wakamuambila ne: nyama ayi ivua ‘bamfumu banayi,’ nanku uvua umuleja ne: ivua tshimfuanyi tshia makalenge a bukole a buloba bujima avua ne bua kulondangana. (Danyele 7:1-8, 17) Pashishe Danyele wakamona Yehowa, “Wa Kale wa Matuku a Bungi,” musombe pa nkuasa wa butumbi. Kunyima kua Yehowa mumane kupisha nyama eyi, wakayinyenga bukokeshi ne kushipaye nyama muinayi. Wakapesha “mukuabo mufuane muana wa muntu” bukalenge bua kashidi bua kukokeshaye “bantu bonso, ba  bisamba bionso ne ba miaku yonso.” (Danyele 7:9-14) Eu mmulayi mulenga udi utangila dishikika dia “Muana wa muntu” Yezu Kristo mu nkuasa wa bumfumu mu diulu mu tshidimu tshia 1914!​—Matayo 16:13.

9, 10. (a) Bitupa bishilangane bia lupingu lua mu tshilota bivua tshimfuanyi tshia binganyi? (b) Mmunyi muudi mua kumvuija mushindu wakumbana Danyele 2:44?

⁹ Danyele uvua mumanye ne: Nzambi ‘udi umusha bakalenge [ne] udi ujadika bakalenge.’ (Danyele 2:21) Bu muvuaye witabuja Yehowa ‘Musokolodi wa malu masokoka,’ muprofete eu wakafila diumvuija dia tshilota tshia lupingu lunene luvua Nebukadenesâ Mukalenge wa bena Babulona mulote. Bitupa bialu bishilangane bivua bileja dijuka ne dikuluka dia makalenge a bukole a buloba bujima bu mudi Babulona, Madai ne Pelasa, Grèce ne Lomo. Nzambi wakasaka kabidi Danyele bua kuleja mushindu uvua malu ne bua kulondangana pa buloba too ne mu tshikondo tshietu etshi ne panyima patshi.​—Danyele 2:24-30.

¹⁰ Muprofete wakamba ne: ‘Mu matuku a bakalenge aba Nzambi wa mu diulu neajadike bukalenge bukuabu budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makalenge aa onso bitupa bitupa, nebuabutule, ne buobu nebujalame tshiendelele.’ (Danyele 2:44) Pakajika “tshikondo [tshijadika] tshia bantu ba bisamba bia bende” mu 1914, Nzambi wakajadika Bukalenge bua mu diulu budi Kristo ulombola. (Luka 21:24; Buakabuluibua 12:1-5) Ku bukole bua Nzambi, “dibue” dia Bukalenge bua Masiya diakalamuka dîba adi ku “mukuna” wa bumfumu butambe bunene bua Nzambi. Ku Armagedone, dibue edi nedidikume ku lupingu elu ne nediluvingutule bua kulushiya anu lupuishi. Bu mudibu buikale mukuna anyi mbulamatadi walombola “buloba bujima,” Bukalenge bua Masiya nebushale kashidi.​—Danyele 2:35, 45; Buakabuluibua 16:14, 16. *

11. Dikudimuka mpala dia Yezu divua ka-diosha ka muanda kayi, ne mmunyi muvua tshikena-kumona atshi tshishale mu lungenyi lua Petelo?

¹¹ Yezu uvua mutume lungenyi ku Bukalenge buende pakambilaye bayidi bende ne: ‘Bakuabu badi bimana apa kabena bafua too ne pamonabu Muana wa muntu ulua mu bukalenge buende.’ (Matayo 16:28) Kunyima kua matuku asambombo, Yezu wakangata Petelo, Yakobo ne Yone, kuyaye nabu ku mukuna mule kuakakudimukaye mpala. Pavua ditutu diengelela dibuikile bapostolo, Nzambi wakamba ne: ‘Eu udi Muananyi munanga, yeye udi unsankisha bimpe, mumvuilayi.’ (Matayo 17:1-9; Mâko 9:1-9) Bushuwa, muanda eu uvua ka-diosha ka butumbi bua Bukalenge bua Kristo! Kabiena bitukemesha bua muvua Petelo muakule bua tshikena-kumona atshi tshia mpatshi pakambaye ne: “Nenku tudi ne dîyi dia mulayi dishindika bikole.”​—2 Petelo 1:16-19, NW. *

12. Bua tshinyi etshi ke nangananga tshikondo tshia tuetu kuitabuja dîyi dia mulayi dia Nzambi?

¹² Bidi bimueneka ne: “dîyi dia mulayi” didi dikonga milayi ya mu Mifundu ya tshiena-Ebelu idi itangila Masiya ne mêyi a Yezu a se: uvua ne bua kulua ‘ne bukole buende ne butumbi buende bunene.’ (Matayo 24:30) Dikudimuka mpala diakajadika dîyi dia mulayi divua ditangila dilua dia Kristo ne butumbi mu Bukalenge buende. Matuku makese kumpala eku, dimueneka diende mu butumbi nedikale kabutu bua bantu badi kabayi ne ditabuja ne mabenesha bua bantu badi ne ditabuja. (2 Tesalonike 1:6-10) Mushindu udi malu adi mu milayi ya mu Bible akumbana udi utujadikila ne: tukadi mu ‘matuku a ku nshikidilu.’ (2 Timote 3:1-5, 16, 17; Matayo 24:3-14) Bu mudi Mikaele (Yezu Kristo) muikale Mukumbaji Munene wa dîyi dia Yehowa, mmuimane mudilongolole bua kubutula ndongoluelu eu mubi wa malu mu tshikondo tshia “dikenga dinene.” (Matayo 24:21; Danyele 12:1) Nunku etshi ke tshikondo menemene tshitudi ne bua kuleja ne: tudi tuitabuja dîyi dia mulayi dia Nzambi.

Tushalayi ne ditabuja mu dîyi dia mulayi dia Nzambi

13. Mmalu kayi adi mua kutuambuluisha bua kushala banange Nzambi ne kutuambuluisha bua ditabuja dietu mu dîyi diende kushaladi dikole?

¹³ Bushuwa, tuvua ne disanka dia bungi menemene patuakumvua bua musangu wa kumpala mishindu idi dîyi dia mulayi dia Nzambi  dikumbana. Katshia anu ku tshine tshikondo atshi, ditabuja ne dinanga dietu mbikepele anyi? Katufuanyi bena Kristo ba mu Efeso ‘bakalekela dinanga diabu dia kumudilu.’ (Buakabuluibua 2:1-4) Nansha bituikala tukadi basadile Yehowa bidimu bungi kayi, tudi mua kujimija dinanga dietu tuetu katuyi ‘batungunuke ne kukeba diambedi Bukalenge bua Nzambi ne buakane buende’ bua kudibutshila biuma mu diulu. (Matayo 6:19-21, 31-33, NW) Kulonga Bible ne tshisumi, kuikala kubuela mu bisangilu bia tshisumbu ne kuenza mudimu wa diyisha Bukalenge ne lukunukunu nebituambuluishe bua tuetu kushala banange Yehowa, Muanende ne kabidi Bible. (Musambu 119:105; Mâko 13:10; Ebelu 10:24, 25) Pashishe, malu aa neenze bua ditabuja dietu mu dîyi dia Nzambi kushaladi ne muoyo.​—Musambu 106:12.

14. Ndifutu kayi didi bena Kristo bela manyi bapeta bua mudibu bitabuja dîyi dia mulayi dia Yehowa?

¹⁴ Anu muvua dîyi dia mulayi dia Nzambi dikumbane kale, tudi ne bua kuitabuja malu adidi dimanyisha bua matuku atshilualua. Tshilejilu, mpindieu Kristo ukadi mu butumbi bua Bukalenge, ne bena Kristo bela manyi bavua ne lulamatu too ne ku lufu mbamone mudi mulayi eu mukumbane: ‘Udi upita bukole, nemmupe bua kudiaye mutshi wa muoyo udi mu Mparadizu wa Nzambi.’ (Buakabuluibua 2:7, 10; 1 Tesalonike 4:14-17) Yezu udi upesha batshimunyi aba diakalenga dia ‘kudia mutshi wa muoyo’ mu ‘mparadizu wa Nzambi’ mu diulu. Padibu bababisha ku lufu, ku butuangaji bua Yezu Kristo badi babapesha dibenga kufua ne dibenga kunyanguka kudi Yehowa, ‘Mukalenge wa kashidi, udi kayi mua kufua, udi kayi mua kumuenebua ku mêsu, Nzambi umue.’ (1 Timote 1:17; 1 Kolinto 15:50-54; 2 Timote 1:10) Edi ndifutu dinene didibu bapeta bua dinanga diabu dia kashidi kudi Nzambi ne bua ditabuja diabu didi kadiyi ditenkakana mu dîyi diende dia mulayi!

15. Mbanganyi badi tshishimikidi tshia ‘buloba bupiabupia,’ ne mbanganyi badi badisangishe nabu?

¹⁵ Katupa kakese kunyima kua bamane kubisha bela manyi ba lulamatu bavua bafue ne kunyima kua bamane kuya mu ‘mparadizu wa Nzambi’ wa mu diulu, bashadile ba Isalele wa mu nyuma badi pa buloba bakapatuka mu bupika bua mu “Babulona Munene,” nsangilu wa bitendelelu bia dishima bia buloba bujima. (Buakabuluibua 14:8; Galatia 6:16) Buobu ke tshishimikidi tshia ‘buloba bupiabupia.’ (Buakabuluibua 21:1) Nenku “buloba” buakaledibua, ne bakabuvuija mparadizu wa mu nyuma udi wenda walabala pa buloba bujima lelu’eu. (Yeshaya 66:8) Bisumbu bia bantu badi bu mikoko (badi badisangishe ne Isalele wa mu nyuma) bidi bitshimukilamu too ne lelu, “mu tshitupa tshia ndekelu tshia matuku.”​—Yeshaya 2:2-4, NW; Zekâya 8:23; Yone 10:16; Buakabuluibua 7:9.

 Dîyi dia mulayi dia Nzambi ndimanyishe masanka apeta bantu mu matuku atshilualua

16. Mmasanka kayi adibu bindile kudi bena lulamatu badi bambuluisha bela manyi?

¹⁶ Mmasanka kayi adibu bindile kudi bena lulamatu badi bambuluisha bela manyi? Buobu pabu badi bitabuja dîyi dia mulayi dia Nzambi ne mbatekemene bua kubuela mu Mparadizu pa buloba. (Luka 23:39-43) Mu mparadizu au nebanue mâyi a mu ‘musulu wa mâyi a muoyo’ adi apandisha bantu ne nebabuondape kudi ‘mabeji a mitshi’ idi ku muelelu kuawu. (Buakabuluibua 22:1, 2) Biwikala ne ditekemena edi dilenga, tungunuka ne kunanga Yehowa ne muoyo mujima ne witabuje dîyi diende dia mulayi. Enza bua wikale munkatshi mua bantu badi ne disanka kadiyi kuamba bua muoyo wa tshiendelele wapetabu mu Mparadizu pa buloba.

17. Mmasanka kayi ikala mu Mparadizu pa buloba?

¹⁷ Bantu bapange bupuangane kabena mua kumvuija mushindu wikala muoyo mu Mparadizu pa buloba nansha, kadi dîyi dia mulayi dia Nzambi didi ditumvuija masanka apeta bantu bena butumike. Pikala Bukalenge bua Nzambi bukokesha kakutshiyi baluishi ne pikala disua diende dienzeka pa buloba bu mudidi dienzeka mu diulu, kakuakuikala bantu babi peshi nyama ya luonji ‘yenzela bikuabu bintu bibi, kayakushipa bikuabu’ bintu nansha. (Yeshaya 11:9; Matayo 6:9, 10) Bena bupuekele nebasombe pa buloba, ‘nebasanke mu ditalala dikumbane.’ (Musambu 37:11) Bantu kabakufiototoka kabidi ne nzala to, bualu nekuikale “biakudia bivulangane pa buloba ne pa nsongo ya mikuna.” (Musambu 72:16, MMM) Kakuakuikala kabidi binsonji bia kanyinganyinga nansha. Masama kaakuikalaku kabidi to, nansha lufu luine kaluakuikalaku kabidi to. (Yeshaya 33:24; Buakabuluibua 21:4) Anji kuelabi meji: kakuakuikala kabidi baminganga, manga a kuondapangana nawu, mpitadi peshi biondapelu bia bena masama a mpala ne kakuakuikala nansha madilu. Mmasanka kayipu a dikema adibu batekemene!

18. (a) Mbualu kayi buakajadikilabu Danyele? (b) Ntshinyi tshikala “difutu” dia Danyele?

¹⁸ Nansha nkita neyishale munda mutupu bualu bafue nebabike ku lufu. Ditekemena edi ke divua nadi muakane Yobo. (Yobo 14:14, 15) Nansha muprofete Danyele uvua pende nadi, bualu muanjelu wa Yehowa wakamukolesha ne mêyi aa: “Wewe Danyele, ndaku wikishe. Pakumbana dituku dia nshikidilu, neubike bua kupeta difutu diebe.” (Danyele 12:13, MMM) Danyele wakasadila Nzambi ne lulamatu too ne ku ndekelu kua muoyo wende. Mpindieu mmuikishe mu lukita, kadi ‘neabike’ ‘palua dibika dia bantu bakane’ mu Bukokeshi bua Kristo bua Bidimu Tshinunu. (Luka 14:14) Ntshinyi tshikala “difutu” dia Danyele? Pakumbana mulayi wa Yehezekele mu Mparadizu, bantu bonso ba Yehowa nebikale ne muaba peshi tshitupa tshia buloba bubakosela mu bulongame kakuyi kansungasunga. (Yehezekele 47:13–48:35) Nenku Danyele neapete wende muaba mu Mparadizu, kadi difutu diende kadiakuikala anu buloba abu nansha. Nedikale kabidi muaba udiye nawu mu dilongolola dia Yehowa.

19. Ntshinyi tshitudi ne bua kuenza bua kupeta muoyo mu Mparadizu?

¹⁹ Netuambe tshinyi buebe wewe ne bua difutu diebe? Biwikala muitabuje Bible Dîyi dia Nzambi, bumue dijinga diebe ndia kupeta muoyo mu Mparadizu pa buloba. Pamu’apa mu lungenyi luebe udi mua kudimona ukadimu, muikale usanka utshionkomoka, ulongolola buloba ne wakidila bafue ne disanka. Umanya ne: Mparadizu ke muaba udibu bafundile bantu bua kusomba. Nzambi wakafuka bantu babidi ba kumpala bua kusombabu muaba wa mushindu’eu. (Genese 2:7-9) Ne mmusue bua bantu bena butumike basombe kashidi mu Mparadizu. Newenze malu adi Bible ukulomba bua wewe kuikala munkatshi mua bantu miliyare mivule basomba mu Mparadizu pa buloba anyi? Udi mua kusombamu biwikala munange bushuwa Yehowa Tatu wetu wa mu diulu, ne biwikala ne ditabuja dikole mu dîyi dia mulayi dia Nzambi.

[Mêyi adi kuinshi]

Newandamune munyi?

• Mmulayi kayi wa kumpalampala wakamanyishabu, ne nnganyi uvua Dimiinu dilaya?

• Ng’imue milayi kayi ivua itangila Masiya yakakumbanyina mu Yezu?

• Mmushindu kayi wakumbana Danyele 2:44, 45?

• Mmasanka kayi adi dîyi dia mulayi dia Nzambi dileja apeta bena butumike mu matuku atshilualua?

[Nkonko ya dilonga]

[Tshimfuanyi mu dibeji 18]

Udi mutekemene bua kupeta muoyo mu Mparadizu pa buloba anyi?