Mmuaba kayi uudi mua kupeta mibelu mimpe?

“Difila mibelu” ndilue mudimu udi utudisha bantu dolare miliyare ne miliyare ku tshidimu tshionso. Bantu badi dijinga ne diambuluisha. Munganga wa masama a mpala, Heinz Lehmann, udi wamba ne: “[Lelu] kakuena dimanya dia mukanda ne dia malu a mu nsombelu wa bantu nansha. Malu adi mu bitendelelu [lelu] ki ngavuaku kumpala to. Mêku kaena majalame bimpe to . . . , ke bua tshinyi bantu badi mu ntatu.” Mufundi Eric Maisel udi wamba ne: “Kumpala bantu bavua baya kudi nganga-buka wa tshiota, kudi mpasata anyi munganga wa dîku bua kupeta diambuluisha bua ntatu ya mu nyuma ne ya ku mubidi; kadi mpindieu mbadifile mu dibala mikanda idi yambuluisha bua kudipetela mandamuna a nkonko idibu nayi.”

TSHISUMBU tshia balongi ba malu a lungenyi ne bikadilu bia bantu mu Amerike tshiakaditua mu dikonkonona malu adi atangila mudimu eu wa difila mibelu udi wenda uvula. Bena mu tshisumbu etshi bakamba ne: nansha mudiku “mushindu wa kuambuluisha bantu bua kudimanyabu ne kumanyabu bantu bakuabu . . . , malu adibu bamba ne biena-bualu bia ndongamu eyi bidi bienda bivula binekesha ne bitondesha bantu.” Munga mufundi wa tshikandakanda tshikuabu udi wamba ne: “Nudimukile mashimi a bitendelelu bia nyuma. . . . Nutambe kudimukila mikanda yonso ya didilongela nayi malu, bande anyi bisangilu bidi bifila malu mapite bungi mu dîba dikese menemene, mu mudimu ne didielela mikenji bikese menemene.” (Toronto Star) Bushuwa, kudi bantu bapite bungi badi bakeba ne muoyo mujima bua kuambuluisha badi mu dikenga. Kadi bualu bubi budiku lelu mbua se: bantu bavule ba muoyo mubi badi bamona dibungama ne makenga a bantu bu mpunga wa kupetela biuma, babapesha diambuluisha nansha mibelu idi kayiyi ya bushuwa.

Pa kumona malu onso aa, tudi mua kudiebeja ne: ntshintu kayi tshinene tshidi mua kutupesha diambuluisha ditudi mua kueyemena? Mmuaba kayi utudi mua kupeta mibelu milenga ikala ne mushinga dîba dionso?

Mpokolo wa mibelu idi kayiyi ishintuluka

Henry Ward Beecher, muyishi wa mu Amerike wa mu lukama lua bidimu lua 19 wakamba ne: “Bible nkarte kadi kakuleja njila udi mazuwa ebe mua kulonda, bua kukuambuluisha bua kubenga kudina mu mâyi, ne bua kukuleja muaba udi tshitudilu, ne mushindu uudi mua kufikaku mazuwa kaayi adikuma ku mabue, ku lusenga anyi ku bibungubungu bia muinshi mua mâyi.” Muyishi mukuabu wakamba bua Bible ne: “Kakuena muntu udi mupite Bible to; mukanda eu udi wenda udiunda ne wondoka patudi tuenda tukola.” Kadi bua tshinyi udi ne bua kuangata Bible ne mushinga wa bungi?

Bible udi wamba bua buimpe buende nkayende ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi; bua muntu wa Nzambi ikale mukumbajibue, mulongolola tshishiki bua midimu yonso mimpe.’  (2 Timote 3:16, 17) Malu adi mu Bible mmafumine kudi Yehowa Nzambi, Mufidi mulelela wa muoyo wetu. (Musambu 36:9) Bu mudiye Mufidi wa muoyo, mmumanye bimpe mushindu utudi benza. Musambu wa 103:14 udi utuvuluija ne: ‘Yeye udi mumanye buntu buetu, udi uvuluka ne: tudi dimfuenkenya.’ Nunku tuikale bajadike bimpe ne: Bible udi ne mushinga.

Bushuwa, mu Bible mudi mêyi ne mikandu mivule iudi mua kutumikila mu nsombelu yonso uudi mua kuikala. Nzambi udi utuambilamu ne: “Njila wa nuenu kuyila nyeye ewu.” (Yeshaya 30:21, MMM) Bible udiku mua kupesha bantu bidibu nabi dijinga lelu anyi? Tuanji kumonabi.

Bible udi utupesha bitudi nabi dijinga . . .

Bua kutantamena tunyinganyinga. Bible udi utuambila ne: ‘Lekelayi kuditatshisha ku bualu [nansha] bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu, nedilame mitshima yenu ne meji enu mu Kristo Yezu.’ (Filipoi 4:6, 7) Masambila atuku mambuluishe bantu bua kutantamena tunyinganyinga tukeba kudi dipangila makuta, dibakuata ku bukole bua kuenda nabu masandi, mêyi adi atapangana ku muoyo peshi lufu lua munanga kampanda anyi? Tangila bualu budi bulonda ebu.

Jackie: pakamanyaye se: bavua bende masandi ne muanende wa bakaji ku bukole, wakamba ne: “Tshiena mumanye mua kumvuija dipila dindi ngumvua bua mundi tshiyi ne bukole bua kukuba muananyi. Mvua ne bua kuluisha luonji ne njiya ne tshiji bimvua ngumvua. Bikavua bituadije kunyanga nsombelu wanyi. Ngakalomba bikole bua Yehowa alame mutshima wanyi.” Pakabalaye Filipoi 4:6, 7 njila ne njila, wakadienzeja bua kutumikila mibelu idimu. Jackie udi wamba ne: “Ntu nsambila dituku dionso, misangu ne misangu ndomba bua meji mabi kaampitshi makanda to; ne Yehowa mmungambuluishe bua kuikala ne mutshima mupole ne wa disanka. Ndi bushuwa ne ditalala munda muanyi.”

Wewe pebe udi mua kudimona mu nsombelu mukupite makanda ne ukulelela tunyinganyinga. Wewe mulonde mubelu wa mu Bible udi wamba bua kuikala kusambila, udi mua kufika ku ditantamena tunyinganyinga. Mufundi wa misambu udi utukankamija ne mêyi aa: ‘Uteke njila webe mu bianza bia Yehowa; umueyemene yeye kabidi, ne yeye neenze malu ende.’​—Musambu 37:5.

Bua kutukankamija. Mufundi wa misambu wakamba ne dianyisha ne: ‘Yehowa, ndi nnanga muaba uudi mushikame mu nzubu muebe, ne muaba udi butumbi buebe bushikame. Dikasa dianyi didi dimana mu muaba mupunga; nemvudijile Yehowa disanka mu masangisha a bantu bende.’ (Musambu 26:8, 12) Bible udi utukankamija bua kuikala kudisangisha bua kutendelela Yehowa. Mmunyi mudi bisangilu ebi mua kutupesha bitudi nabi dijinga? Ntshinyi tshidi bantu bakuabu bamone?

Becky udi ulonda ne: “Baledi banyi ki mbasadidi ba Yehowa to, ke bua tshinyi badi bantatshisha pandi nkeba kuenza bualu buonso budi butangila mudimu wende. Bidi bindomba bua bukole bua bungi bua meme kubuela mu bisangilu.” Becky udi umona ne: mmupete mabenesha a bungi bualu mmuenze muende muonso bua kuikala ubuela mu bisangilu bia Bantemu ba Yehowa. Udi wamba ne: “Bisangilu bidi bikolesha ditabuja dianyi, ke bua tshinyi ndi nkandamena ntatu ya ku dituku ne ku dituku itu imvuila bualu ndi mulongi, nsongakaji ne musadidi wa Yehowa. Bantu batu balua ku Nzubu wa Bukalenge mbashilangane bikole ne balongi ba mu kalasa ketu! Mbantu balenga batu bambuluishangana, ne malu atutu tuyikila nabu atu anu adi akankamija. Mbalunda balelela.”

Bushuwa, tuetu batumikile mubelu wa mu Bible wa kudisangisha pa tshibidilu, Yehowa neatupeshe dikankamija ditudi nadi dijinga. Mu muanda eu ke mutuamona mêyi a mufundi wa misambu aa akumbana: ‘Nzambi udi tshinyemenu tshietu ne bukole buetu, udi dikuatshisha dietu mu makenga didi kadiyi dipanga tshiendelele.’​—Musambu 46:1.

Bua kuenza mudimu udi usankisha ne wa mushinga. Bible udi wamba ne: ‘Nuikale bakole, nutantamane, nukumbaje mudimu wa Mukalenge misangu yonso, bualu bua nudi bamanye ne: mudimu unudi nuenza mu Mukalenge kawena patupu.’ (1 Kolinto 15:58) ‘Mudimu wa Mukalenge’ utuku  usankisha bantu anyi? Kuyisha lumu luimpe kutuku kukumbaja bualu bua mushinga anyi?

Amelia udi utuambila mudiye umvua: “Ngakalonga Bible ne muntu mulume mukuabu ne mukajende bakavua pabuipi ne kushipa dibaka diabu. Ngakambuluisha kabidi muntu mukaji mukuabu muena muana wa bakaji uvuabu bashipe ne tshikisu. Muntu mukaji eu uvua ulubakana bikole bua kumanya tshidi tshifikila bafue. Mu mianda yonso ibidi eyi, bantu aba bakapeta ditalala ne ditekemena bua ditumikila mêyi a mu Bible. Ndi ngumvua disanka dia bungi bualu ndi mubambuluishe.” Scott udi wamba ne: “Wewe mumanye mudimu wa buambi bimpe, tuadija kulonga Bible ne muntu, anyi enza mushindu wa kuyisha mu mpukapuka, neushale ulondela bantu bualu ebu bidimu bia bungi kumpala eku. Newikale uvuluka disanka edi dîba dionso diwikala ulondela bantu bualu buonso buuvua mumone! Disanka divule didi difumina ku mudimu wa diyisha bakuabu.”

Bulelela, kutumikila mubelu wa mu Bible wa kuikala basadidi ba Nzambi ba tshisumi nkukumbaje dijinga divua nadi bantu aba dia kuenza mudimu udi usankisha ne wa mushinga. Tudi tukubikila wewe pebe bua kuenza mudimu eu wa kulongesha bantu bakuabu njila ne mêyi a Nzambi, eku wewe muine wenda upeta diebe diakalengele.​—Yeshaya 48:17; Matayo 28:19, 20.

Masanka adi afumina mu Dîyi dia Nzambi

Kakuyi mpata, Bible mmukanda wa kueyemena udi ne mibelu idi yambuluisha bantu lelu. Bua yeye kutuambuluisha, tudi ne bua kutungunuka ne kudienzeja bikole. Tudi ne bua kumubala pa tshibidilu, kumulonga ne kuelangana meji bua bitudi tubalamu. Paulo wakafila mubelu eu: ‘Unanukile kuikala mu malu aa, udifile ne mutshima webe wonso kudiwu, bua kudiunda kuebe kumueneke kudi bonso.’ (1 Timote 4:15; Dutelonome 11:18-21) Yehowa udi ukujadikila ne: wewe mutumikile mibelu yende idi mu Bible, neupete diakalenga. Udi ulaya ne: ‘Eyemena Yehowa. Umumanye yeye bimpe mu bienzedi biebe bionso, yeye neakululamijile njila yebe yonso.’​—Nsumuinu 3:5, 6.

[Bimfuanyi mu dibeji 31]

Kutumikila mibelu idi mu Bible kudi kutupetesha disanka