Nulame bimpe ‘ditekemena dia lupandu’ luenu!

‘Tuluate ditekemena dia lupandu bu tshifulu ku mutu.’​—1 TESALONIKE 5:8.

1. Mmunyi mudi ‘ditekemena dia lupandu’ dituambuluisha bua kutantamana?

 DITEKEMENA dia lupandu didi mua kuambuluisha muntu bua kutantamana nansha mu ntatu mipite bukole. Muntu mupanduke ku njiwu ya mazuwa madine mu mâyi kadi muikale mu ka-buatu ka tshindundu udi mua kushala ne ditekemena muindile mutantshi mule bikalaye mumanye ne: diambuluisha dikadi pabuipi. Bia muomumue, kukadi bidimu binunu bivule, ditekemena dia ‘lupandu lua Yehowa’ ndiambuluishe balume ne bakaji ba ditabuja mu bikondo bia ndululu, ne ditekemena edi kaditu dianji kubafuisha bundu to. (Ekesode 14:13; Musambu 3:8; Lomo 5:5; 9:33) Mupostolo Paulo wakafuanyikija ‘ditekemena dia lupandu’ ne “tshifulu” tshia mu bia-mvita bia mu nyuma bia muena Kristo. (1 Tesalonike 5:8; Efeso 6:17) Nenku dikala bashindike ne: Nzambi neatupandishe, didi dikuba meji etu, dituambuluisha bua kulama biumvuilu bietu nansha kuoku kuikale ntatu, buluishi ne mateta.

2. Mmu mishindu kayi mudi ‘ditekemena dia lupandu’ dikale muanda wa mushinga mukole bua ntendelelu mulelela?

² Mukanda mukuabu (The International Standard Bible Encyclopedia) udi wamba ne: “Ditekemena dia malu a mu matuku atshilualua kadivua  tshimanyinu tshia bampangano,” anyi bantu bavuaku mu tshikondo tshia bena Kristo ba mu bidimu lukama bia kumpala nansha. (Efeso 2:12; 1 Tesalonike 4:13) Pabi ‘ditekemena dia lupandu’ mmuanda wa mushinga mukole bua ntendelelu mulelela. Mushindu kayi? Tshia kumpala, kudi diumvuangana pankatshi pa lupandu lua basadidi ba Yehowa ne dîna diende. Asafa mufundi wa misambu wakasambila ne: ‘Wewe Nzambi wa lupandu luetu, utukuatshishe bua butumbi bua dîna diebe! Utupandishe.’ (Musambu 79:9; Yehezekele 20:9) Kabidi, kutekemena ne dishindika mabenesha adi Yehowa mulaye kudi ne mushinga bua kumona mua kumvuangana nende. Paulo udi ubiamba mushindu’eu: ‘Bikalaku kakuyi ditabuja, muntu kêna mua kumusankisha; bualu bua muntu udi ulua kudi Nzambi budiye nabu mbua kuitabuja ne: Yeye udiku, ne udi mufutshi wa badi bamukeba.’ (Ebelu 11:6) Paulo wakumvuija kabidi ne: Yezu uvua mulue pa buloba apa nangananga bua lupandu lua bantu badi balekele malu mabi. Wakamba ne: “Miaku idi ilonda eyi idi milelela, kabidi nya kuitaba ne ditaba dijima: Kristo Yezu mmuvue panu pa buloba bua kupandisha benji ba bibi.” (1 Timote 1:15, MMM) Ne mupostolo Petelo wakamba ne: lupandu ‘nkipatshila ka [anyi tshipeta tshia ndekelu tshia] ditabuja dietu.’ (1 Petelo 1:9, MML) Nanku mbimpe tutekemene lupandu. Kadi lupandu ntshinyi menemene? Bidi bikengela tshinyi bua kulupeta?

 Lupandu ntshinyi?

3. Ndupandu lua mushindu kayi luakapeta basadidi ba Yehowa ba kale?

³ Mu Mifundu ya tshiena-Ebelu, pa tshibidilu muaku “lupandu” utu umvuija kusungila muntu anyi kumupikula ku dikenga anyi ku lufu lua tshikoso. Tshilejilu, pakabikila Davidi Yehowa ne: “Musungidi,” wakamba ne: ‘Nzambi, dibue dianyi, tshinyemenu tshianyi, musungidi wanyi, udi unsungila ku malu makole onso. Nembikile dîna dia Yehowa, udi ne bua kutumbishibua, nunku nensungidibue kudi badi nanyi lukuna.’ (2 Samuele 22:2-4) Davidi uvua mumanye ne: Yehowa utu uteleja padi basadidi Bende ba lulamatu bamulomba diambuluisha.​—Musambu 31:22, 23; 145:19.

4. Nditekemena kayi dia muoyo utshidi ulua divua nadi basadidi ba Yehowa ba kumpala kua Yezu kuledibuaye?

⁴ Basadidi ba Yehowa ba kumpala kua Kristo kuledibuaye bavua pabu ne ditekemena dia muoyo utshilualua. (Yobo 14:13-15; Yeshaya 25:8; Danyele 12:13) Bushuwa, milayi ya bungi idi yakula bua dipikula itudi tusangana mu Mifundu ya tshiena-Ebelu ivua imanyisha lupandu lunene, ludi lufikisha ku muoyo wa tshiendelele. (Yeshaya 49:6, 8; Bienzedi 13:47; 2 Kolinto 6:2) Mu tshikondo tshia Yezu, bena Yuda ba bungi bavua batekemene muoyo wa tshiendelele, kadi bakabenga bua kuitaba Yezu uvua ne bua kubapeshawu. Yezu wakambila bamfumu ba bitendelelu ba mu tshikondo atshi ne: ‘Nudi nukeba kujingulula malu adi mafunda mu Mukanda wa Nzambi, bua nudi nuelangana meji ne: mu malu aa tudi ne muoyo wa tshiendelele; malu au kabidi adi angamba.’​—Yone 5:39.

5. Ntshinyi tshidi lupandu lumvuija menemene?

⁵ Ku butuangaji bua Yezu, Nzambi wakaleja tshidi lupandu lumvuija menemene. Ludi lumvuija dipikula bantu ku bukokeshi bua mpekatu, ku nkanu ya bitendelelu bia dishima, ku bukua-panu bulombola kudi Satana, ku ditshina bantu nansha lufu. (Yone 17:16; Lomo 8:2; Kolosai 1:13; Buakabuluibua 18:2, 4) Bua basadidi ba Nzambi ba lulamatu, lupandu ludi lufumina kudi Nzambi ludi lumvuija kubapikula ku makenga ne ku dibungama, ne kubapesha kabidi mushindu wa kupeta muoyo wa kashidi. (Yone 6:40; 17:3) Yezu wakalongesha ne: bua bena mu “kasumbu kakese,” lupandu ludi lumvuija kubabisha ku lufu bua kupetabu muoyo mu diulu ne kukokesha pamue ne Kristo mu Bukalenge buende. (Luka 12:32, MML) Bua bantu bakuabu bonso, lupandu ludi lumvuija kupetulula muoyo mupuangane ne kumvuangana bimpe ne Nzambi mushindu uvua Adama ne Eva bumvuangana nende mu budimi bua Edene kumpala kua kuenzabu mpekatu. (Bienzedi 3:21; Efeso 1:10) Muoyo wa kashidi mu masanka aa a mu mparadizu ke tshintu tshivua Nzambi mulongoluele bantu ku ntuadijilu. (Genese 1:28; Mâko 10:30) Kadi mmunyi mudi bantu mua kupetulula masanka aa?

Tshia-bupikudi ke tshidi tshifikisha ku lupandu

6, 7. Mmudimu kayi udi nawu Yezu mu lupandu luetu?

⁶ Anu mu mulambu wa tshia-bupikudi wa Kristo ke mudi bantu mua kupetela lupandu lua kashidi. Bua tshinyi? Bible udi umvuija ne: pakenza Adama mpekatu, ‘wakadipanyisha’ ku mpekatu, yeye ne bana bende bonso bavuaye ne bua kulela (ne tuetu petu); nanku bivua bilomba tshia-bupikudi bua bantu kupetabu ditekemena dia bushuwa. (Lomo 5:14, 15; 7:14) Milambu ya nyama ivuabu bafila mu Mikenji ya Mose ivua ileja ne: Nzambi uvua ne bua kufila tshia-bupikudi bua kupikula bantu bonso. (Ebelu 10:1-10; 1 Yone 2:2) Mulambu wa Yezu ke wakakumbaja malu onso au avua mamanyisha mu milayi. Kumpala kua Yezu kuledibua, muanjelu wa Yehowa wakamanyisha ne: ‘Yeye neasungile bantu bende ku mibi yabu.’​—Matayo 1:21; Ebelu 2:10.

⁷ Yezu uvua mulela mu tshishima kudi Mariya patshivuaye kamama, ne bu muvuaye Muana wa Nzambi, kavua mupiane lufu kudi Adama to. Muanda eu ne lulamatu lupuangane luvuaye nalu mu nsombelu wende biakapetesha muoyo wende mushinga uvua ukengedibua bua kupikula bantu ku mpekatu ne ku lufu. (Yone 8:36; 1 Kolinto 15:22) Yezu kavua mufundila tshibawu tshia lufu bua mpekatu mushindu udibi bua bantu bakuabu bonso to. Wakalua pa buloba bua ‘kufila muoyo wende bua kupikula nawu bantu ba bungi.’ (Matayo 20:28) Yeye mumane kufila muoyo nunku, Yezu (ukadi mubike ku lufu ne musombe mu nkuasa wa bumfumu) udi mpindieu ne mushindu wa  kupandisha bantu bonso badi bakumbaja malu adi Nzambi ubalomba.​—Buakabuluibua 12:10.

Tshidi tshikengela bua kupeta lupandu

8, 9. (a) Ndiandamuna kayi divua Yezu mupeshe mfumu nsonga mubanji bua lupandu? (b) Mmunyi muvua Yezu mupete mushindu wa kulongesha bayidi bende musangu au?

⁸ Umue musangu, mfumu nsonga mubanji muena Isalele wakebeja Yezu ne: ‘Nengenze tshinyi bua kupiana muoyo wa tshiendelele?’ (Mâko 10:17) Lukonko luende luvua mua kuikala luleje meji avua bena Yuda ba mu tshikondo atshi batamba kuela a se: Nzambi udi ulomba bantu amue malu mimpe ne padi muntu ukumbaja a bungi a kudiwu, Nzambi udi mua kubapandisha. Kadi kulamata Nzambi kua tshidingishilu mushindu’au kuvua kufumina ku meji mabi. Bienzedi bia mushindu’eu kabiakabapesha ditekemena dishindame dia lupandu to, bualu muntu mupange bupuangane kêna mua kukumbaja mêyi a Nzambi bimpe menemene nansha.

⁹ Bua kuandamuna lukonko lua muntu au, Yezu wakamuvuluija anu bua yeye kutumikila mikenji ya Nzambi. Mfumu eu nsonga wakajadikila Yezu ne lukasa ne: uvua uyitumikila katshia ku buana buende. Diandamuna diende diakasaka Yezu bua kumunanga. Yezu wakamuambila ne: ‘Bualu bumue mbukushale; ya biebe, upane biudi nabi bionso, ubipe bantu bapele, newikale ne bintu mu tshibutshilu mu diulu, ulue kundonda meme.’ Kadi nsongalume eu wakaya wenda unyingalala, “bualu bua yeye wakadi ne bintu bia bungi.” Pashishe Yezu wakaleja bayidi bende ne: kutamba kulamata bintu bia panu kudi kupangisha bantu bua kubuela mu njila wa lupandu. Wakamba kabidi ne: kakuena muntu udi mua kudipetela lupandu ku bukole buende nkayende to. Yezu wakatungunuka ubajadikila ne: “Bantu kabena bamanye mua kuenza bualu ebu, kadi Nzambi udi mumanye mua kuenza malu onso.” (Mâko 10:18-27; Luka 18:18-23) Mmunyi mutudi mua kupeta lupandu?

10. Mmalu kayi atudi ne bua kukumbaja bua kupeta lupandu?

¹⁰ Lupandu ndipa dia kudi Nzambi, ne kalutu ludiluila nkayalu to. (Lomo 6:23) Kudi amue malu manene adi muntu yonso ne bua kukumbaja bua kushisha kupeta dipa edi. Yezu wakamba ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ Mupostolo Yone wakamba pende ne: ‘Udi witabuja Muana udi ne muoyo wa tshiendelele; kadi udi upidia Muana kêna umona muoyo.’ (Yone 3:16, 36) Bushuwa, muntu yonso udi muindile bua kupeta lupandu lua tshiendelele Nzambi udi umulomba ditabuja ne butumike. Muntu yonso udi ne bua kuangata dipangadika dia kuitaba tshia-bupikudi ne kulonda mu makasa a Yezu.

11. Mmunyi mudi muntu mupange bupuangane mua kufika ku dianyishibua kudi Yehowa?

¹¹ Katshia ku tshilelelu bitu bitukolele bua kutumikila Nzambi, ne mbikole bua kutumikila bualu kampanda bimpe menemene. Ke bua tshinyi Yehowa wakafila tshia-bupikudi bua kutubuikidila mpekatu. Nansha nanku, tudi ne bua kutungunuka ne kudienzeja bua kulonda njila ya Nzambi mu nsombelu wetu. Anu muvua Yezu muambile mfumu nsonga mubanji au, tudi ne bua kutumikila mikenji ya Nzambi. Tuetu bayitumikile bimpe menemene, Nzambi neatuanyishe ne kabidi netupete disanka divule, bualu ‘mikenji yende kayena itunemena bujitu’ to; kadi idi ‘ikankamija.’ (1 Yone 5:3; Nsumuinu 3:1, 8) Nansha nanku, kabitu bitekete bua tuetu kushala balame bikole ditekemena dia lupandu nansha.

‘Nutshinte bikole bua ditabuja’

12. Mmunyi mudi ditekemena dia lupandu dikolesha muena Kristo bua kukandamena mateta a malu mabi?

¹² Muyidi Yuda uvua musue kufundila bena Kristo ba kumpala bua ‘lupandu luolumue [luvuabu] nalu.’ Kadi nsombelu mubi uvua mutangalake wakamusaka bua kupesha bana babu mibelu bua ‘batshinte bikole bua ditabuja.’ Bushuwa, bua kupeta lupandu kabiena bilomba kuikala anu ne ditabuja, kulamata ku malongesha malelela a bena Kristo ne kuatumikila padi malu onso enda bimpe nansha. Tudi ne bua kulamata Yehowa bikole menemene bua tuetu kumona mua kukandamena mateta ne bikadilu bibi. Pabi, tshiendenda ne malu mabi, dipepeja bukokeshi, matapuluka ne mpata bivua bienda binyanga lungenyi lua bantu bavua mu tshisumbu tshia mu bidimu lukama bia kumpala. Bua kubafikisha ku diluisha malu mabi  aa, Yuda wakabela bena Kristo nende bua bikale ne tshipatshila tshisunguluke mu lungenyi luabu. Wakamba ne: ‘Bananga, nudibake pa ditabuja dienu ditambe dia tshijila, nutendelele mu nyuma muimpe, nudilame mu dinanga dia Nzambi, nutekemene luse lua Mukalenge wetu Yezu Kristo too ne ku muoyo wa tshiendelele.’ (Yuda 3, 4, 8, 19-21) Ditekemena dia kupeta lupandu divua mua kubambuluisha mu mvita ivuabu baluangana bua kushala ne tshikadilu tshimpe.

13. Mmunyi mutudi mua kuleja ne: katuena bapangile tshipatshila tshia bulenga bua Nzambi bukena buakanyina?

¹³ Yehowa Nzambi udi ulomba bantu baluaye kupandisha bua bikale ne tshikadilu tshia tshitembu. (1 Kolinto 6:9, 10) Kadi nansha mudi kulamata mêyi a Nzambi kutulomba bua kuikala ne bikadilu bimpe, kakuena kumvuija ne: tudi tulua mpindieu balumbuluishi ba bakuabu to. Ki ntuetu badi ne bua kufundila bantu netu difutu dia kashidi diapetabu nansha. Nzambi ke wabapeshadi, anu muvua Paulo muambile bena Greke ba mu tshimenga tshia Atena ne: ‘Yeye wakasungula dituku didiye ulumbuluisha ba pa buloba mu buakane kudi muntu wakasungulaye,’ Yezu Kristo. (Bienzedi 17:31; Yone 5:22) Bituikala tuitabuja mulambu wa tshia-bupikudi wa Yezu, katuakutshina dituku dia dilumbuluisha ditshilualua nansha. (Ebelu 10:38, 39) Bualu bua mushinga mbua se: katuena ne bua ‘kuitaba bulenga bua Nzambi bukena buakanyina [dilengejangana dietu nende ku diambuluisha dia tshia-bupikudi] ne kupangila tshipatshila tshiabu’ pa kuditua mu meji ne mu bikadilu bibi. (2 Kolinto 6:1, NW) Kabidi, patudi tuambuluisha bakuabu bua bapete lupandu, tudi tuleja ne: katuena bapangile tshipatshila tshia luse lua Nzambi to. Kadi mmunyi mutudi mua kubambuluisha?

Tumanyishayi ditekemena dia lupandu

14, 15. Mbanganyi bavua Yezu mupeshe mudimu wa kumanyisha lumu luimpe lua lupandu?

¹⁴ Paulo uvua utela mêyi a Yoele pakafundaye ne: “Yonso udi ubila dîna dia Yehowa neapandishibue.” Pashishe wakasakidila ne: “Kadi, mmunyi muabilabu eu udibu kabayi bitabuje? Ne mmunyi muitabujabu eu udibu kabayi bumvue bualu buende? Ne mmunyi mumvuabu padiku kakuyi muntu bua kuyisha?” Mu mvese mikuabu idi ilonda, Paulo udi uleja ne: ditabuja kaditu didiluila nkayadi to; kadi “didi difumina ku bualu budi muntu mumvue,” mmumue ne: “dîyi didi ditangila Kristo.”​—Lomo 10:13, 14, 17, NW; Yoele 2:32.

¹⁵ Nnganyi watuadila bisamba “dîyi didi ditangila Kristo”? Mudimu au Yezu wakaupesha bayidi bende, bakavuaye mulongeshe ‘dîyi’ adi. (Matayo 24:14; 28:19, 20; Yone 17:20) Patudi tuenza mudimu wa dimanyisha Bukalenge ne wa divuija bantu bayidi, tudi tuenza anu tshivua mupostolo Paulo mufunde, musangu eu uvua utela mêyi a Yeshaya aa: “Makasa malengele nga bantu badi balua ne lumu luimpe lua malu mimpe!” Nansha bantu ba bungi buobu babenge lumu luimpe lutudi tubatuadila, makasa etu adi anu “malengele” ku mêsu kua Yehowa.​—Lomo 10:15; Yeshaya 52:7.

16, 17. Mbipatshila bibidi kayi bidi mudimu wetu wa buambi ukumbaja?

¹⁶ Mudimu eu udi ne bipatshila bibidi binene. Tshia kumpala: tudi ne bua kuyisha lumu luimpe bua dîna dia Nzambi ditumbe ne bua bantu badi basue kupeta lupandu bamanye muaba wa kulupetela. Paulo uvua mujingulule muanda eu pakambaye ne: “Bualu Mfumu mmutuambile ne: Ndi mukuteke butoke bua bukua bisamba, bua kufikisha lupandu luanyi too ne ku ntengu ya buloba.” Nenku mutudi bayidi ba Kristo, yonso wa kutudi udi ne bua kutuadila bantu mukenji wa lupandu.​—Bienzedi 13:47, MMM; Yeshaya 49:6.

¹⁷ Tshibidi: diyisha lumu luimpe didi diashila dilumbuluisha diakane dia Nzambi tshishimikidi. Yezu wakamba bua dilumbuluisha adi ne: ‘Palua Muana wa muntu mu butumbi buende ne banjelu bonso, neashikame mu nkuasa wa butumbi buende; bisamba bionso nebisangakane kumpala  kuende, yeye neabatapulule bu mudi mulami utapulula mikoko ne mbuji.’ Nansha muikala dilumbuluisha ne ditapulula bantu mua kuenzeka ‘palua Muana wa muntu mu butumbi buende,’ mudimu wa diyisha udi upesha bantu lelu mushindu wa kumanya bana babu ne Kristo ba mu nyuma ne bua kuenza nabu mudimu pamue bua kupetabu pabu lupandu.​—Matayo 25:31-46.

Tulamayi “tshiuwidi tshia ditekemena”

18. Mmunyi mutudi mua kulama bimpe ‘ditekemena dia lupandu’ luetu?

¹⁸ Buambi butudi tuenza ne tshisumi budi kabidi butuambuluisha bua kulama ditekemena dietu bimpe. Paulo wakafunda ne: ‘Tudi basue muntu ne muntu wa munkatshi muenu aleje disuminyina diodimue bua kupeta tshiuwidi tshia ditekemena too ne ku nshikidilu.’ (Ebelu 6:11) Nenku yonso wa kutudi avuale ‘ditekemena dia lupandu bu tshifulu ku mutu,’ ne avuluke ne: ‘Nzambi kakatusungula bua kututekela tshiji, kadi bua tuetu kupeta lupandu bualu bua Mukalenge wetu Yezu Kristo.’ (1 Tesalonike 5:8, 9) Tushalayi kabidi balame mubelu wa Petelo eu: “Tekayi meji enu ku mudimu, nushale batabale ne nuikale batekemene ne ditekemena dionso kupa kua luse kuanupeshabo.” (1 Petelo 1:13, MML) Bantu bonso badi benza nenku nebamone muakumbana menemene ‘ditekemena dia lupandu’ luabu!

19. Mmalu kayi atuamona mu tshiena-bualu tshidi tshilonda?

¹⁹ Mu dindila tshikondo atshi, mmunyi mutudi ne bua kuangata dîba didi dishadile bukua-panu ebu? Mmalu kayi atudi mua kuenza mu dîba didi dishale edi bua tuetu ne bantu bakuabu kumona mua kupeta lupandu? Netuandamune nkonko eyi mu tshiena-bualu tshidi tshilonda.

Udi mua kumvuija anyi?

• Bua tshinyi tudi ne bua kulama bimpe ‘ditekemena dia lupandu’ luetu?

• Lupandu ludi lumvuija tshinyi?

• Ntshinyi tshitudi ne bua kuenza bua kupeta dipa dia lupandu?

• Mmalu kayi adi mudimu wetu wa buambi ukumbaja mu diumvuangana ne dilongolola dia Nzambi?

[Nkonko ya dilonga]

[Bimfuanyi mu dibeji 10]

Lupandu kaluena lumvuija anu dipikula muntu ku kabutu to