Bamanyishi ba Bukalenge badi balonda

Wakafika ku dimanya Nzambi wa dinanga

PATSHIVUA Antônio (nsongalume wa mu ditunga dia Brésil) ne bidimu 16, wakumvua malu a panu mamutonde. Bu muvuaye kayi udimona ne mushinga, biakamufikisha ku dinua dia diamba ne dikuatshika dia maluvu makole. Misangu ne misangu meji avua amuluila bua kudishipa. Dîba divua meji aa amuvuila, uvua uvuluka mêyi avua mamuende mumuambile ne: “Nzambi udi dinanga.” (1 Yone 4:8) Kadi Nzambi wa dinanga eu uvua penyi?

Bua kumonaye mua kulekela diamba ne maluvu makole, Antônio wakaya kudi nsaserdose wa mu parwase wa muaba uvuaye bua amuambuluishe. Nansha muakalua Antônio kushala muena Katolike wa tshisumi, utshivua anu ne nkonko ya bungi. Tshilejilu, mêyi a Yezu a se: “Nenumanye bulelela ne bulelela nebunupe budikadidi” avua mamukolele bua kuumvua. (Yone 8:32, MML) Mbudikadidi bua mushindu kayi buakalaya Yezu? Tshitendelelu tshiende katshiakamupetesha mandamuna mimpe a nkonko yende nansha. Ndekelu wa bionso, Antônio wakatuadijilula bikadilu bivuaye nabi kale. Musangu eu wakapitshisha ne dinua dia diamba ne maluvu makole.

Dine dîba adi, Maria (mukaji wa Antônio) wakabanga kulonga Bible ne Bantemu ba Yehowa. Antônio kavua ubakandika bua kulongabu to, kadi uvua upepeja Bantemu wamba muvuabu “tshitendelelu tshia bena Amerike tshivua tshienzela mbulamatadi wa bena Amerike mudimu.”

Maria kakateketa to, uvua ushiya patoke bibejibeji bia Tshibumba tshia Nsentedi ne bia Réveillez-vous! bivua ne biena-bualu bivuaye mumanye ne: bivua mua kusankisha Antônio. Bu muvua Antônio munange kubala, uvua ku misangu wela dîsu mu bibejibeji tshikondo tshivua mukajende kayiku to. Bua musangu wende wa kumpala katshia bamulela, wakapeta mandamuna a nkonko ya malu a mu Bible ivuaye udiela. Udi uleja ne: “Ngakatuadija kabidi kumona dinanga ne malu malenga avua mukajanyi ne Bantemu bangenzela.”

Munkatshi mua tshidimu tshia 1992, Antônio wakapangadija bua kutuadijaye pende kulonga Bible ne Bantemu ba Yehowa. Kadi, wakatungunuka anu ne kunua diamba ne maluvu makole. Bumue butuku pavuaye upingana kumbelu ne mulunda wende dîba dimane kupita, bafumina mu musoko mukuabu, bampulushi bakabakuata. Pakasanganabu Antônio ne diamba kudi bampulushi, bakatuadija kumututa. Mpulushi umue wakamuela tshibula mu bitotshi ne kumutangijaye lusongo lua tshingoma mu mpala. Mpindieu mpulushi mukuabu kuelaye dîyi ne: “Jikija tshiende tshilumbu anu muaba au!”

Pavua Antônio mulale mu bitotshi apu, wakavuluka malu avuaye wenzenza. Malu mimpe akavulukaye avua anu: dîku diende ne Yehowa. Kuenzaye disambila dia tshikoso, ulomba diambuluisha kudi Yehowa. Bampulushi bakamulekela, ne tshivuabu bamulekele tshine ki ntshimanyike to. Yeye kuya kuende, mutuishibue ne: Yehowa uvua mumusungile.

Antônio wakatuadija kulonga Bible ne muoyo mujima. Uvua wenda udilengeja ku kakese ku kakese bua kumona mua kusankisha Yehowa. (Efeso 4:22-24) Pavuaye wenda umanya mua kuikala udikanda, wakabanga kulekela kunua diamba ne maluvu makole. Nansha nanku, bivua bikengela bua banji bamuondape. Ngondo ibidi yakenzaye mu lupitadi yakamupetesha mushindu wa kubala mikanda mishilangane ya kulonga nayi Bible; wakabala kabidi mukanda wa Dimanya didi difikisha ku muoyo wa kashidi. Pashishe Antônio kubanga kuambila babedi bakuabu bivuaye mulonge mu mikanda eyi.

Pakapatuka Antônio mu lupitadi, wakatungunuka ne kulonga Bible ne Bantemu. Lelu, Antônio, Maria, bana babu babidi ba bakaji, ne mamuende wa Antônio badi benzela Yehowa mudimu pamue mu dîku dia buobumue ne dia disanka. Antônio udi wamba ne: “Mpindieu ndi mumvue bimpe menemene tshidi mêyi aa umvuija: ‘Nzambi udi dinanga.’”

[Tshimfuanyi mu dibeji 8]

Badi bayisha mu tshimenga tshia Rio de Janeiro