Badi bapandisha bantu mu tshidiila tshia Robinson Crusoé

ROBINSON CRUSOÉ ntshimue tshia ku bidiila bisatu bia mu Mbu wa Pasifike bidi bienza tshisumbu tshia bidiila tshidibu babikila ne: Juan Fernández, tshidi mutantshi wa kilometre mitue ku 640 ne muelelu wa ditunga dia Chili. * Dîna dia tshidiila etshi (tshia bunene bua kilometre kare 93) ndifumine ku mukanda muende lumu wa mu lukama lua bidimu lua 18 uvua ne tshiena-bualu tshia: Robinson Crusoé, uvuabu bafunde kudi Daniel Defoe wa mu ditunga dia Angleterre. Mukanda eu uvua utamba kuakula bua malu akenza Alexander Selkirk wa mu ditunga dia Écosse, wakasomba nkayende mu tshidiila etshi munkatshi mua bidimu bitue ku binayi.

Mu tshidiila etshi mbafunde mêyi pa dibaya ne: “Muaba eu, dituku dionso munkatshi mua bidimu bipite pa binayi, Alexander Selkirk, muendeshi wa mazuwa a mâyi a bena Écosse, uvua ukeba ne muoyo mujima buatu bua dipandishangana nabu buvua mua kulua kumumbusha muaba eu uvuaye nkayende.” Ndekelu wa bionso, bakapandisha Selkirk ne kuyabu nende kuabu. Kadi kuabu kakuvua kumusankisha kabidi to kunyima kua yeye mumane kusomba muaba eu uvua bu mparadizu wende mukese. Badi bamba muakaluaye kuamba mêyi a se: “Eyi, tshidiila tshianyi tshindi munange! Nkadi ndijinga ne: tshivua mua kuikala mukushiye nansha!”

Kunyima kua matuku, tshidiila etshi tshiakalua muaba uvuabu balamina bena tshibawu. Bavua basombelamu kabidi kudi bamue bantu bavua “batontolole” Ekeleziya wa bena Katolike. Bushuwa, tshidiila etshi tshiakashilangana bikole ne mparadizu uvua Selkirk mumanye kumpala! Nansha nanku, bantu badi basombe mu tshidiila etshi lelu badi mu ditalala ne bupole bidi kabiyi mu matunga a bungi lelu. Lutulu lutu nalu bantu badi basombele mu bidiila  ebi ke ludi lufila njila wa kutuadija kuyukilaku nansha ne muntu umue.

Tshidiila tshia Robinson Crusoé tshidi ne bantu batue ku 500. Kadi anu bantu batue ku 400 ke badi basombamu ngondo ya bungi ku tshidimu. Tshia kumpala bidi nanku bualu bamue bamamu baledi ne bana babu batu baya kusombela mu Chili mu matuku a kalasa, bapingana mu tshidiila anu mu dikisha bua kumona bena dîku bavua bashale.

Nansha mudi Robinson Crusoé muikale bu budimi budi ne bintu bilengele, bamue bantu badimu badi badimona munda mutupu mu nyuma ne badi bakeba mandamuna a nkonko idibu badiela. Bakuabu mbumvue anu bu badi bakeba lupandu lua mu nyuma.

Lupandu lua mu nyuma

Mudimu eu wa dipandisha bantu mu nyuma wakabanga bu mu 1979. Muntu mukaji mukuabu uvua ulonga Bible ne Bantemu ba Yehowa mu tshimenga tshia Santiago (mu Chili), wakaya kusombela mu tshidiila etshi ne kutuadijaye kulongesha bantu bakuabu malu akavuaye mulonge. Kunyima, mukulu kampanda wa mu tshisumbu tshia Bantemu wakaya mu tshidiila etshi bua kuya kuenza mudimu  wende, wakakema pakasanganaye balongi ba Bible kasumbu kakese bavua benda baya kumpala mu nyuma, muntu mukaji eu ke uvua ubalongesha. Pakaya kabidi mukulu au mu tshidiila etshi kunyima kua ngondo isatu, mulongeshi eu wa Bible ne babidi ba ku balongi bende bakavua badilongolole bua kutambula, nanku mukulu eu wakabatambuisha. Kunyima, bakasela umue wa ku bena Kristo batambule aba, ne yeye ne bayende bakatungunuka ne kukeba bantu bakuabu bavua bajinga bua babapandishe mu nyuma. Bayende wakatuadija kuibaka Nzubu wa Bukalenge mukese udibu batungunuka ne kudisangishila kudi kasumbu kakese kadi mu tshidiila etshi. Matuku akalonda, bua dipangila dia makuta, bakumbuka mu Robinson Crusoé ne kuyabu mu tshimue tshisumbu mu Chili, mudibu batungunuke ne kuenzela Yehowa mudimu ne tshisumi.

Ku kakese ku kakese, kasumbu aka kakese ka mu tshidiila etshi kakatungunuka ne kudiunda pavuabu benda bapandisha bantu bakuabu babapatula mu bitendelelu bia dishima. Kadi bu muvua balongi ne bua kuya mu Chili bua kutungunuka ne tulasa tubandile, mu kasumbu aka muakashala anu bana betu ba bakaji babidi batambule ne nsongakaji umue. Kasumbu aka kadi kadiunda mu dikisha padi bamue bamamu bapingana mu tshidiila. Dipingana diabu edi didi disanguluja bana betu basatu aba batu bashala nkayabu mu tshidiila emu tshidimu tshijima. Bua mudimu mukole udi bana betu ba bakaji aba benza, Bantemu ba Yehowa mbamanyike bimpe mu Robinson Crusoé. Kadi, bamue bena mu tshidiila etshi ki mbasue mudimu wabu to, ne batu basaka bantu bakuabu bua kabitabi mukenji wa Bukalenge. Nansha nanku, ntete ya bulelela bua mu Bible idibu bakune mu mitshima ya bantu badi basue malu malelela idi itungunuka ne kutoloka.

Badi bakolesha bantu badibu bapandishe

Musangu umue ku tshidimu, mutangidi muena ngendu utu uya mu tshidiila etshi. Mmunyi mutuye ukumbula Bantemu bakese aba badi mu tshidiila etshi tshidi mutantshi mule? Mutangidi wa tshijengu umue udi umvuija muakakumbulaye Robinson Crusoé bua musangu wa kumpala. Udi wamba ne:

“Luendu elu luvua luimpe lua dikema. Luakabanga pa dîba 7 jajaja mu dinda patuakumbuka mu Valparaiso bua kuya ku Tshipalu tshia ndeke tshia Cerrillos, mu tshimenga tshia Santiago. Tuakenza luendu ne ndeke mukese wa bantu muanda-mutekete. Kunyima kua  mêba 2 ne minite 45, tuakamuenena pa bule lusongo lua mukuna luvua lule lutue ne mu matutu. Patuakasemena pabuipi, tuakamuenena tshidiila etshi pabuipi: lubuebue lunenanenayi munkatshi mua mbuu. Tshivua tshimueneka bu tshilelame pa mâyi manene bu mazuwa majimije wawu njila pa mâyi.

“Pakikila ndeke, buatu buakatuambula too ne mu musoko. Miaba ya bungi idi mbuebue mipatuke pa mutu pa mâyi idi mikale tu-bidiila tukese tutu nyama ya mu mâyi ya otaries ya mu Juan Fernández ilua kuikishila. Batu bakandike bua kushipa nyama eyi bualu bungi buayi mbukepele bikole. Musangu umue tuetu kumona tshintu tshinyema tshienda tshibuka lua ku mpenga kua buatu ne mutantshi eu kujiminatshi mu mâyi. Tshivua mushipa utu ubuka udi ne bintu bienza bu mapuapua. Bivua bimueneka ne: utu utumpika bua kukuata tuishi. Kadi imue misangu mushipa eu utu udiangana batu baukuata pawu; imue misangu nyama mikuabu itu iwalamina patuyi iwumona ubuka, bua kuukuata padiwu ulua bua kuditua mu mâyi.

“Ndekelu wa bionso tuakafika mu musoko wa San Juan Bautista (Munsantu Yone Mubatiji). Kuvua bantu ba bungi ba mu tshidiila etshi ku tshitudilu, bakuabu bindile benyi babu ne banga pabu balue bua kumona tshianana bantu bavua batuluka dîba adi. Bintu bilenga bituakamona biakatukemesha: mukuna mule udibu babikila ne: El Yunque (Nyindu wa panshi), muenze bu mubuikila ne tshilamba tshia mubidi wa mâyi a matamba matuile, ne dia muamua diawu, muulu muvua mutoke ne muikale mavuba matoke too.

“Tuakamona musangu umue bana betu ba bakaji batuindile ne bana babu ku tshitudilu. Tshivua tshikondo tshia dikisha, ke bua tshinyi bavua ba bungi musangu eu. Tuetu bamane kuelangana mioyo ya disanka, bakaya netu mu ka-mutanda kimpe mutuakasomba lumingu alu lujima.

“Luvua lumingu lua pa bualu menemene; luakalua luipi be. Bivua bitulomba bua tuetu kubenga kujimija dîba. Dituku dine adi, kunyima kua didia dia midi, tuakaya kumona mulongi wa Bible mukuabu uvua pabuipi ne kulua muanetu wa bakaji wa mu nyuma (ukavua pa kubuela pende mu mparadizu wa mu nyuma wa Nzambi). Uvua utua mimuemue bua disanka, kadi uvua kabidi ne ka-buôwa. Batismo uvuaye muindile mutantshi mule uvua pabuipi. Tuakakonkonona nende amue malu manene bua kuluaye muambi wa lumu luimpe. Dituku diakalonda, yeye kuya mu buambi bua musangu wende wa kumpala. Dituku disatu, tuakabanga kukonkonona nende malu malomba bua kutambula. Pakamba lumingu kujika, wakatambula.

“Bantu bavua balua mu bisangilu bituvua tuenza munkatshi mua lumingu; tuvua tufika too ne ku bantu 14. Dituku dionso tuvua tuya kuyisha, tupinganyina bantu, tulombola malonga a Bible ne tuvua tukumbula mikoko. Edi divua dikankamija dikole bua bana betu ba bakaji aba badi badienzela mudimu eu nkayabu tshidimu tshijima!”

Bitu bikole bua bantu balume ba mu tshidiila etshi kuitaba bulelela, pamu’apa mbua mudimu wabu wa bianza utu ubalomba dîba dia bungi. Mudimu wabu munene wa kukuata nshisha utu ulomba dîba dia bungi. Meji mabi adibu belela Bantemu ba Yehowa ke adi kabidi apangisha ba bungi bua kuitaba lumu luimpe. Kadi tudi batekemene se: kumpala kutuyaya eku, balume ne bakaji bavule ba mu tshidiila etshi nebitabe lumu luimpe.

Too ne mpindieu, bakadi bapandishe bantu dikumi mu tshidiila etshi (badi bafike ku dimanya bulelela ne malu adi Yehowa Nzambi mulongolole bua kuenza). Bamue ba kudibu bakadi bumbuke mu tshidiila bua malu kabukabu. Kadi nansha buobu bashale anyi bumbukamu, dibapandisha mu nyuma didibu babapandishe didi ne mushinga wa bungi kupita dia Alexandre Selkirk. Mpindieu nansha buobu mua kusombela muaba kayi wonso, badi mu mparadizu wa mu nyuma. Bana betu ba bakaji ne bana babu batshidi mu tshidiila etshi mbenze bu badi mu mparadizu, kadi tshidi tshipite bionso abi ntshia se: badi ne ditekemena dia kuikala ne muoyo dîba dikala buloba bujima bulue mparadizu wa tshia bushuwa.

Mudimu wa dipandisha bantu udi utungunuka

Bua pa kutangila muaba udibu, Bantemu ba Yehowa aba bakese ba mu Robinson Crusoé mbashilangane ntanta mule be ne bana babu bakuabu ba mu nyuma. Kadi kabena badimona bu bantu balekela nkayabu muakadimona Selkirk (wa mu Écosse) nansha. Mikanda ya bulongolodi, filme ya mpuilu ne mpungilu idibu babatumina misangu isatu ku tshidimu kudi Biro bia Bantemu bia mu Chili, ne dikumbula dia ku tshidimu dia mutangidi wa tshijengu, bidi bibambuluisha bua kuikala bapetangana ne bulongolodi bua Yehowa. Nunku badi batungunuka ne kuikala munkatshi mua ‘bana betu ba mu Kristo badi pa buloba ebu.’​—1 Petelo 5:9.

[Mêyi adi kuinshi]

[Tuarte/​Tshimfuanyi mu dibeji 9]

(Bua kumona malu bimpe, tangila mu mukanda)

CHILI

Santiago

TSHIDIILA TSHIA ROBINSON CRUSOÉ

San Juan Bautista

El Yunque

MBUU WA PASIFIKE

TSHIDIILA TSHIA SANTA CLARA

[Tshimfuanyi]

Padi bantu basemena pabuipi ne tshidiila, badi bamona lubuebue lunenanenayi munkatshi mua mbuu

[Mêyi a dianyisha]

Karte ka Chili: Mountain High Maps® Copyright © 1997 Digital Wisdom, Inc.

[Tshimfuanyi mu mabeji 8, 9]

Mukuna mule udibu babikila ne: El Yunque (Nyindu wa panshi)

[Tshimfuanyi mu dibeji 9]

Musoko wa San Juan Bautista (Munsantu Yone Mubatiji)

[Tshimfuanyi mu dibeji 9]

Tu-bidiila tukese tutu nyama ya mu mâyi ya “otaries” ya mu Juan ilua kuikishila

[Tshimfuanyi mu dibeji 10]

Tuakumbuka mu Santiago (mu Chili) ne ndeke mukese

[Tshimfuanyi mu dibeji 10]

Muelelu wa tshidiila tshia Robinson Crusoé

[Tshimfuanyi mu dibeji 10]

Nzubu mukese wa Bukalenge wa mu tshidiila