Mbakankamije balongi ba mu kalasa ka 108 ka Gilada bua kuenzabu mudimu wa tshijila

MISANGU mivule Bible utu ubikila ditendelela Nzambi ne: “mudimu wa tshijila.” Tshiambilu etshi ntshifumine ku muaku wa tshiena-Greke udi uleja dienzela Nzambi mudimu. (Lomo 9:4, NW) Bantu 5 562 bavua balonde ndongamu wa difila mapolome kudi balongi ba kalasa ka 108 ka Gilada, Tshilongelu tshia Bible tshia Watchtower, bakumvua bangamba-malu bafila mibelu mimpe ivua ne bua kuambuluisha balongi abu bua kuenzela Yehowa Nzambi mudimu wa tshijila udiye wanyisha. *

Theodore Jaracz, wa mu Kasumbu Kaludiki ka Bantemu ba Yehowa, ke uvua mulombodi wa ndongamu eu wakatuadija ne musambu nimero wa 52, “Dîna dia Tatu wetu.” Mulongo muibidi wa musambu eu udi ubanga ne: “Tudi basue kutumbisha dîna diebe dinene.” Bulelela mêyi aa akaleja dijinga dikole divua nadi balongi aba bakavua pa kupeta mapolome (bavua bafumine mu matunga 10) dia kuya kutumikila malu avuabu balonge mu matunga 17 muvuabu ne bua kuya kuenzela mudimu wabu wa bu-misionere.

Mu mêyi ende a mbangilu, Muanetu Jaracz wakakoka ntema ku muanda wa se: balongi aba bavua benze ngondo itanu mu dilonga malu a bungi a mu Bible akabalongolola bua kumanya mua kuenzela mudimu ku ba bende. Dilonga edi diakabambuluisha bua ‘kuteta malu onso,’ mmumue ne: kukonkonona malu akavuabu balonge ku diambuluisha dia Dîyi dia Nzambi, ne ‘kulama adi mimpe.’ (1 Tesalonike 5:21, MML) Wakabakankamija bua kulamata bikole Yehowa, Dîyi diende ne midimu ivuabu babalongeshile. Ntshinyi tshiabambuluisha bua kuenza bionso ebi?

Mibelu milenga bua kuenza mudimu wa tshijila

Lon Schilling, wa mu Komite wa Midimu ya ku Betele, wakenza muyuki wa tshiena-bualu tshia: “Neukokeshe mua kutshintshikila malu anyi?” Wakakula bua mushinga wa kuikala ne butshintshikidi, budi buikale buleja meji a kudi Nzambi. (Yakobo 3:17) Butshintshikidi budi bumvuija ditaba bualu bua bakuabu, dibenga kuikala ne kansungasunga, dikala ne malu matukije, diditeka pa muaba wa bakuabu, ne didikanda. Muanetu Schilling wakamba ne: “Bena butshintshikidi batu ne nkatshinkatshi mu malanda abu ne bakuabu. Kabatu banekesha nansha.” Ntshinyi tshidi mua kuambuluisha misionere bua kumanyaye mua kuikala utshintshikila malu? Udi ne bua kuikala ne bupuekele, kupeta mushindu wa kuteleja ne kulongela amue malu kudi bakuabu ne kuitaba bidi bakuabu bamba padibi kabiyi bitupa ku mêyi a Nzambi.​—1 Kolinto 9:19-23.

“Kanupu muoyo bua kudia to!” ke tshivua tshiena-bualu tshilenga tshia muyuki wakalua kuenza Samuel Herd, udi pende mu Kasumbu Kaludiki. Wakaleja mushinga wa kuikala ne ndilu  muimpe wa mu nyuma bua kumona mua kushala ne bukole bua kuenza mudimu wa tshijila. Muanetu Herd wakamba ne: “Mu katupa kîpi emu nenuikale ne malu a mu nyuma a bungi a kuenza panuaditua mu mudimu wenu wa kuyisha ne kulongesha. Nunku nebikengele bua nuikale nudia biakudia bia mu nyuma bia bungi bua kumona mua kuikala ne makanda makumbane a mu nyuma.” Misionere yeye utungunuka ne kudia biakudia bia mu nyuma kakubungama mu nyuma ne kujinga bua kupingana kuabu to. Ndilu muimpe udi wambuluisha muntu bua kusanka ne bidiye nabi ne kushala mu mudimu wende wa tshijila.​—Filipoi 4:13.

Mulongeshi mukuabu wa mu Gilada, Lawrence Bowen, wakakankamija balongi wamba ne: “Pinganayi ku tshibangidilu.” Ntshinyi tshivuaye usua kuamba? Wakalomba bateleji bonso bua kubulula mu Nsumuinu 1:7, udi wamba ne: “Ditshina dia Yehowa ntshibangidilu tshia lungenyi.” Wakumvuija ne: “Lungenyi luonso ludi lupepeja muanda munene wa se: Yehowa udi kuoku, bushuwa katuena mua kuluangata bu dimanya dilelela anyi kaluena mua kufikisha bantu ku ngumvuilu muakane nansha.” Muanetu Bowen wakafuanyikija malu mashilangane adi mu Bible ne tutupa tua tshimfuanyi kampanda. Padibu balamakaja tutupa etu, tshimfuanyi tshijima tshidi tshipatuka.  Padibu benda batulamakaja, tshimfuanyi tshidi tshienda tshidiunda ne tshimueneka bimpe ne muntu udi wenda utshianyisha bikole. Bualu ebu budi mua kuambuluisha bonso bua kuenzela Nzambi mudimu wa tshijila.

Wallace Liverance, sekretere wa Tshilongelu tshia Gilada, wakenza muyuki wa kujikija nawu tshitupa etshi tshia miyuki. Tshiena-bualu tshiende tshivua ne: “Tuasakidila uudi wela Nzambi ki webe mulambu uudi ufila.” Wakakoka ntema yabu ku muyuki udi wakula muvua Yezu muondape bena nsudi dikumi. (Luka 17:11-19) Muntu umuepele ke wakapingana bua kutumbisha Nzambi ne kuela Yezu tuasakidila. Muanetu Liverance wakumvuija ne: “Kakuyi mpata, bakuabu abu bakasanka bua muvuabu babuondape. Bakumvua disanka muakapinganabu muabu mua kale, kadi bidi bimueneka ne: bavua basue anu bua muakuidi kubambaye ne: mbakezuke.” Bukezuke bua mu nyuma budi muntu upeta kunyima kua yeye mumane kulonga bulelela, pamue ne dianyisha, bidi ne bua kumusaka ku diela Nzambi tuasakidila bua buimpe buende. Bakakankamija balongi ba mu kalasa ka 108 ka Gilada bua kuela meji bua malu onso adi Nzambi muenze ne bua buimpe buende, ne abi nebibambuluishe bua kulejila ku mudimu wabu ne ku milambu yabu ne: badi bela Nzambi tuasakidila.​—Musambu 50:14, 23; 116:12, 17.

Malu mamona ne dielangana nkonko bua mushindu wa kuenza mudimu eu

Mark Noumair, mukuabu mulongeshi wa mu Gilada, wakalombola tshitupa tshia ndongamu tshivua tshilonda. Tshivua tshiakula bua malu avua balongi bamone mu buambi tshikondo tshivuabu mu kalasa. Balongi bakavua benze muayene wa bidimu bitue ku 12 mu mudimu wa ku dîba ne ku dîba kumpala kua kuluabu ku Gilada. Dîba divuabu mu kalasa adi, bakatuadija kulonga Bible ne bantu ba bungi ba mishindu ne mishindu, bileja ne: balongi aba bavua bamanye mua ‘kulua bena malu onso kudi bonso.’​—1 Kolinto 9:22.

Kunyima kua malu mamona aa a balongi, Charles Molohan ne William Samuelson bakela bamue bana betu ba ku Betele nkonko, pamue ne batangidi bena ngendu bavua balue ku Gilada. Umue wa ku bana betu bavuabu bele nkonko, Robert Pevy, uvua muenze bu-misionere mu ditunga dia Philippines pakajikijaye mu kalasa ka 51 ka Gilada. Wakavuluija balongi ne: “Dîba dionso didiku lutatu, muntu yonso utu ufila yende ngenyi bua kuleja mushindu wa kulujikija. Umanye ne: nekuikale mukuabu muntu wikala ne lungenyi mukupite, muntu walua kufila lungenyi lutambe buimpe. Kadi wewe mutangile mu Bible ne mukebe bua kumanya tshidi Nzambi wamba bua malu kampanda, kakuena muntu waleja tshidi tshiapite nansha. Adi ke dikala diandamuna didi diakane.”

Bua kujikija ndongamu eu mulenga wa mu nyuma, John Barr, wa mu Kasumbu Kaludiki, wakenza muyuki uvua ne tshiena-bualu tshia: “Enzela Yehowa mudimu wa tshijila udiye wanyisha.” Wakaleja mushindu udi mudimu wa tshijila mua kumuenekela ku buambi butudi tuenza bua kuambuluisha bantu badi ne mitshima misue malu makane bua batendelele Nzambi mu mushindu udiye wanyisha. Mumane kubala mêyi a Yezu adi mu Matayo 4:10, Muanetu Barr wakamba ne: “Tuetu basue kutendelela anu Yehowa nkayende, tudi ne bua kuepuka mishindu yonso ya ditendelela mpingu idi mikole bua kuyijingulula bu mudi: lukuka, dijinga dia kupeta bubanji buvule ne kuditambisha. Tudi ne disanka dia bungi patudi tuela meji ne: kubangila mu bidimu bia 1940 too ne mpindieu, ba-misionere betu mbende lumu luimpe lutambe mu muanda eu! Ne tudi bajadike ne: nuenu badi bajikije mu kalasa aka ka 108 ka Gilada nenulonde tshilejilu tshiabu tshimpe. Nudi nuya kuenzela Yehowa mudimu wa tshijila ne yeye nkayende ng’udi muwakanyine.”

Au uvua muyuki muimpe wa ndekelu mu ndongamu eu uvua ukolesha bantu mu nyuma. Pashishe dîba diakalua dia kuteleja mioyo ya kudi bawetu ba matunga mavule a pa buloba bavua bajingila balongi diakalengele, dîba dia kufila mapolome ne dia kubala mukanda wa balongi uvua uleja dianyisha diabu bua malu avuabu balonge. Bakakankamija balongi aba bavua bajikije bua kuikalabu ne lulamatu lukole mu midimu yabu ne mu disadila Yehowa. Bonso bavua mu ndongamu eu, pamue ne benyi ba mu matunga 25, bakajikija tshisangilu etshi ne musambu ne disambila.

[Mêyi adi kuinshi]

[Kazubu mu dibeji 23]

MALU ADI ATANGILA BALONGI

Bungi bua matunga adibu bafumine: 10

Bungi bua matunga adibu babatume: 17

Bungi bua balongi: 46

Muayene wa bidimu: 34

Muayene wa bidimu mu bulelela: 16

Muayene wa bidimu mu mudimu wa ku dîba ne ku dîba: 12

[Tshimfuanyi mu dibeji 24]

Balongi ba mu kalasa ka 108 ka Gilada, Tshilongelu tshia Bible tshia Watchtower

Mu liste udi kuinshi eku, mbabale milongo bituadijile kumpala baya panyima, ne mbafunde mêna bituadijile ku dia bakaji baya ku dia balume mu mulongo wonso.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.