Utuku witabuja malu audi kuyi mua kumona anyi?

PADI muntu wamba ne: ‘Ntu ngitabuja anu malu andi mua kumona,’ kêna wambilamu nansha. Buonso buetu tutu tuitabuja malu atudi katuyi mua kumona.

Tshilejilu, pautshivua mu kalasa uvua pamu’apa muidikije bua kuleja mudi tshiamu tshia nzembu tshikale ne bukole. Udi mua kuenza nunku: Udi wela tupese bua biamu pa dibeji. Pashishe udi uteka tshiamu tshia nzembu muinshi mua dibeji edi. Padi dibeji edi dinyunga, bienze bu ku dijimbu, tupese bua biamu tudi tudikunguija muaba  umue tulondesha mudi tshiamu tshia nzembu tshiya. Biwikala uvua muenze nanku, uvuaku mumone nzembu ya tshiamu etshi anyi? Tòo, uvua mumone muvua bukole buatshi bunyungisha tupese tua biamu, kukujadikilabi ne: nzembu ituku.

Tutu tuitabuja amue malu atudi katuyi mua kumona katuyi tuela mpata to. Patudi tutangila tshimfuanyi tshilenga tshidibu bazole anyi patudi tuanyisha tshintu kampanda tshisonga bimpe, katuena tuela mpata tuamba ne: kakuena muntu uvua mutshizole anyi mutshisonge nansha. Nunku patudi tumona tshibila tshia mayi anyi tumona mudi dîba dibuela, kabienaku ne bua kutusaka ku diela meji ne: bintu ebi mbienza kudi Muzodi anyi Musongi Munene wa bintu anyi?

Tshitu tshifikisha bamue bantu ku dibenga kuitabuja

Bamue bantu kabatshiena bitabuja kabidi Nzambi bua malu avuabu babalongeshe mu tshitendelelu tshiabu. Ke tshivua tshifikile muntu mukuabu wa mu ditunga dia Norvège uvuabu balongeshe ne: Nzambi utu wosha bantu babi mu inferno wa kapia. Muntu eu kavuaku mua kuitaba ne: kuvua Nzambi wa nanku ukengesha bantu mushindu’au to, ke kubangaye kuamba ne: Nzambi katuku to.

Kadi kunyima, muntu eu wakitaba bua kulonga Bible ne Ntemu wa Yehowa. Wakakema pakalongaye ne: Bible kêna ulongesha ne: batu bakengesha bantu babi mu inferno wa kapia nansha. Kadi Bible yeye udi ufuanyikija lufu ne tulu. Mu lukita, katuena tumvua tshintu nansha tshimue tshitukengesha to; katuena bamanye bualu nansha bumue to. (Muambi 9:5, 10) Muntu eu wakalonga kabidi ne: bantu badi Nzambi umona se: mbena malu mabi badi kabayi mua kushintuluka, nebashale mu lukita kashidi. (Matayo 12:31, 32) Nzambi neabishe bafue bakuabu bonso mu tshikondo tshidiye mulongolole ne pashishe nebapete muoyo wa tshiendelele ne masanka mu Mparadizu. (Yone 5:28, 29; 17:3) Diumvuija edi ke divua dimpe. Divua dipetangana ne tshiambilu tshia mu Bible tshia se: “Nzambi udi dinanga.” (1 Yone 4:8) Muntu eu uvua munange bulelela wakatungunuka ne kulonga Dîyi dia Nzambi, ne mu bungi bua matuku wakafika ku dinanga Nzambi udi Bible uleja.

Bantu bakuabu batu bamba ne: kakuena Nzambi wa dinanga bualu badi bamona makenga ne kansungasunga bitangalake. Badi bamba bualu bufuanangane ne buvua muntu mukuabu wa mu ditunga dia Suède wakatangila mu diulu ne kuambaye ne: “Mmunyi mudi Nzambi wa-bukole-buonso ne muena kalolo mua kuikala muulu muamua padi dikosa mishiku ne malu mabi bitule bipuwe pa buloba apa?” Bu muvua muntu nansha umue kayi mua kuandamuna lukonko luende, yeye pende wakabanga kuamba mudi Nzambi kayiku to. Pashishe wakatuadija kulonga Bible ne Bantemu ba Yehowa. Wakalonga ne: Dîyi dia Nzambi didi diandamuna bimpe lukonko elu lua  kale: Bua tshinyi Nzambi mmulekele malu mabi? *

Muntu eu uvua munange bulelela wakalonga ne: malu mabi kaena ajadika mudi Nzambi kayiku nansha. Tshilejilu: Muntu udi mua kuenza kele bua kukosa naku munyinyi. Muntu mukuabu udi mua kusumba kele aka kabiyi bua kukosa naku munyinyi to, kadi ukasumba bua kushipangana naku. Dienza bualu bubi ne kele aka kadiena dijadika nansha kakese ne: muntu uvua mukenze kenaku to. Bia muomumue, malu mabi adi bantu benze ne buloba kaayi apetangana ne tshivua Nzambi mubufukile kaena aleja ne: kakuena Muntu uvua mubufuke nansha.

Bible udi ulongesha ne: midimu ya Nzambi mmimpe kayiyi kalema. Katu “ne bubi, udi ne malu makane a bushuwa.” (Dutelonome 32:4) Nzambi utu upesha bantu bintu bimpe, kadi bantu mbanyange bimue bintu bidiye mubapeshe, ke tshidi tshikebeshe makenga bungi kabuyi kubala. (Yakobo 1:17) Kadi Nzambi neajikije makenga. Pashishe, ‘badi ne mitshima mipuekele nebapiane buloba, nebashikamemu tshiendelele.’​—Musambu 37:11, 29.

Muntu wa mu Suède utudi batele eu wakumvua muoyo umusama munda pakamonaye bantu nende bakenga. Bulelela, luse elu luvuaye mumvuile bantu bakuabu ludi lujadika ne: Nzambi udiku. Mushindu kayi?

Bua bantu bavule, padibu kabayi bitabuja Nzambi badi bitabuja dilongesha dia bidimenene. Bena dilongesha dia bidimenene badi balongesha “dipanduka dia udi mutambe kuakanyina,” mbuena kuamba ne: bantu ne nyama badi mu lubilu bua kumona mua kupanduka. Badi batambe kuakanyina badi bapanduka; badi kabayi ne bukole badi bafua. Badi bamba ne: eu ke mushindu udi malu malongolola katshia ku tshifukilu. Kadi bikalabi bilongolola katshia “ku tshifukilu” bua se: badi kabayi ne bukole badi bafua bua kushila badi ne bukole muaba, bua tshinyi bamue bantu badi ne bukole (bu mudi muntu wa mu Suède au) batu bumvua luse padibu bamona muntu nabu ukenga?

Tukebayi bua kufika ku dimanya Nzambi

Katuena mua kumona Nzambi bualu kêna ne mubidi wa buena wa muntu to. Kadi Nzambi mmusue bua tufike ku dimumanya. Umue mushindu utudi mua kumumanya mpatudi tutangila ne lubatshi bintu bilenga bidiye mufuke bidi bu “bimfuanyi bizola” ne “bintu bisonga.” Bible udi wamba mu Lomo 1:20 ne: ‘Bua malu [a Nzambi] akadi kaayi mua kumueneka katshia buloba buafukibua, bukole buende bua tshiendelele mene ne Bunzambi buende, adi amueneka bimpe, bualu bua adi ajinguluka ku bintu biakafukibua.’ Bushuwa, anu mudi dibandila tshimfuanyi tshizola anyi tshintu tshisonga mua kukuambuluisha bua kumanya bumuntu bua udi mutshienze, kuela meji bua bintu bilenga bidi Nzambi muenze kudi mua kukuambuluisha bua kumanya bumuntu buende bimpe.

Kadi katuena mua kuandamuna nkonko mikole yonso idi itangila muoyo anu patudi tutangila bintu bidi Nzambi mufuke nansha. Tudi mua kupeta mandamuna a nkonko eyi tuetu baakebe mu Bible. Bantu babidi batudi batele aba bakafika ku ditaba ne: Nzambi utu kuoku ne utu utuambuluisha bualu bakabala Bible ne lungenyi lunzuluke.

[Mêyi adi kuinshi]

[Mêyi a dianyisha bua tshimfuanyi mu dibeji 28]

J. Hester ne P. Scowen (AZ State Univ.), NASA