Tudi ba ku badi ne ditabuja

Bena Kristo badi bayisha lumu luimpe mu madimi a losa mu Taïwan

TAIWAN nditunga ditu misangu mivule ne mvula ya bungi; mvula eyi itu yambuluisha bua kupeta losa luimpe misangu ibidi ku tshidimu. Kadi ku misangu mvula itu ibenga kuloka tshikondo tshiayi ne bikunyibua bitu binyanguka. Patubi bienzeka nunku, tshidime utu upingana tshianyima anyi? Tòo, mmumanye ne: bitu bikengela kunanukila. Utu ukuna bintu bikuabu mu budimi. Pashishe, bikala mvula yoyi miloke bimpe, tshidime udi unowa bintu bimpe. Dikuna ne dinowa dia bintu bia mu nyuma bitu pamu’apa bifuanangane bikole ne muanda eu.

Badi bananukila mu dinowa bintu bia mu nyuma

Munkatshi mua bidimu bia bungi, Bantemu ba Yehowa ba mu Taïwan mbenze mudimu mukole wa kukuna ne kunowa ntete ya bulelela bua mu Bible mu imue miaba ivua imueneka bu kayivua ya bufuke. Angata tshilejilu tshia Tshitupa tshia Miao-li. Bantu kabavua batamba kuitaba lumu luimpe luvuabu babayisha imue misangu nansha. Nunku mu tshidimu tshia 1973, bakatumamu mulume ne mukajende bavua bampanda-njila bua kuikalabu bamanyishi ba Bukalenge ba ku dîba ne ku dîba. Ku ntuadijilu, bamue bantu bavua bateleja lumu luimpe. Kadi kunyima kua matuku makese, kabatshivua bateleja kabidi to. Nunku bakatuma bampanda-njila aba muaba mukuabu.

Mu tshidimu tshia 1991, bakatuma bampanda-njila bakuabu ba pa buabu babidi mu tshitupa atshi. Kadi malu akenzeka kabidi akaleja ne: nsombelu kavua muakane bua didiunda dia mu nyuma kumuenekamu nansha. Kunyima kua bidimu bikese, bakatuma bampanda-njila aba mu madimi avuabu bele meji ne: avua a bufuke bua bungi. Pabi, buloba ebu buvua bushale tshilala munkatshi mua lupolo kampanda.

Dienzulula mudimu ne bukole didi difila bipeta bimpe

Mu Kabitende 1998, bakapangadija bua kuenza muonso mua kuenza bua kukeba miaba ya bungi ya bufuke mu tshitupa tshinene muvua kamuyi bamanyishi ba lumu luimpe mu Taïwan. Mmunyi muvuabu mua kukumbaja muanda eu? Bakatuma bampanda-njila ba pa buabu ba matuku makese batue ku 40 bua kuyishabu miaba ivua ne bantu ba bungi kadi kayiyi ne bamanyishi ba lumu luimpe.

Bimenga bibidi bidiangane mutumba ne Tshitupa tshia Miao-li bivua pabi munkatshi mua miaba ivuabu basungule bua kuenzela mudimu. Bana betu ba bakaji banayi bajike bavua ne bua kuenzamu mudimu ngondo isatu bua kumona muvua teritware eu. Matuku makese kunyima kua bamane kufikamu, bakafunda ngumu ya disanka bua bungi bua bantu bavua basankidila bulelela bavuabu benda bapeta. Pakajikijabu ngondo yabu isatu ya bumpanda-njila muaba eu, bavua balonga Bible ne bantu ba bungi ku nzubu yabu. Bakenza kabidi kasumbu ka dilonga dia mukanda kavuabu balombola kudi mukulu kampanda wa mu tshisumbu tshivua pabuipi apu.

Basatu ba ku bana betu ba bakaji aba bakaleja patoke ne: bavua basue kutungunuka ne kukuba “bikunyibua” ebi bitekete bivua bienda bikola bimpe. Nanku bakateka babidi ba kudibu bampanda-njila ba pa buabu ba kashidi, ne muisatu wakatungunuka ne kuenza bumpanda-njila bua pa tshibidilu. Mukulu mukuabu wa mu tshisumbu tshia pabuipi apu wakalua kusombela muaba eu bua kubambuluisha. Bantu bapite pa 60 bakateleja muyuki wa kumpala wakenzabu muaba eu. Mpindieu tshisumbu tshidi pabuipi apu tshidi tshiambuluisha kasumbu kakese aka bua kuenza bisangilu bia mu Dia lumingu, ne bua kuenza malonga mavule a mikanda. Matuku makese  kumpala eku badi mua kuenza tshisumbu tshipiatshipia muaba eu.

Dinanukila didi difila masanka mu bitupa bikuabu bia Taïwan

Bantu ba miaba mikuabu bakateleja mushindu wa muomumue. Mu Tshitupa tshia I-lan ku Nord-Est kua tshidiila tshia Taïwan etshi, bakasa kasumbu kapiakapia ka Dilonga dia Mukanda dia Tshisumbu muaba uvua bampanda-njila ba pa buabu ba matuku makese benzele mudimu.

Pavua mpanda-njila umue wa pa buende wa matuku makese uyisha ku nzubu ne ku nzubu dilolo kampanda, wakapeta nsongalume mukuabu ne kumulejaye kabeji ka matuku ne mêba a bisangilu bia tshisumbu. Nsongalume eu wakamukonka diakamue ne: “Nanku ndi mua kubuela panyi mu tshisangilu tshia makelela dilolo anyi? Ne mbilamba kayi bindi ne bua kuvuala?” Mpanda-njila eu uvua ulonga Bible lumingu luonso ne bantu muanda-mukulu bavua ne dijinga dikole dia kumanya bulelela. Kunyima kua matuku makese, ba bungi ba ku balongi ba Bible aba bakavua badilongolola bua kulua bamanyishi ba lumu luimpe ne bua kutambula.

Anu mu tshimenga etshi muvua muntu mukaji mukuabu uvua uya bikole mu nzambi kampanda kadi kayi mupete muntu uvua mua kumulongesha Bible to. Pakumvuaye bua dilonga dia Bible, wakitaba bua kutuadija kulonga. Bakamukankamija bua kuikala udianjila kulongolola dilonga. Pavua mpanda-njila eu wa pa buende wa matuku makese ufika bua kulonga nende, uvua usangana muntu mukaji eu mumane kudilongolola, musumbe kaye kavuaye ufundila nkonko ya tshitupa tshivuabu ne bua kulonga. Pashishe uvua ufundamu diandamuna dia lukonko luonso. Uvua kabidi ufundamu mvese yonso ivuabu batele mu dilonga. Dîba diakaya muanetu wa bakaji eu bua kulombola dilonga dituku dia kumpala, muntu mukaji eu ukavua mulongolole malonga asatu a ntuadijilu!

Bipeta bia muomumue biakamueneka mu tshimenga tshia Dongshih, munkatshi mua Taïwan. Bampanda-njila ba pa buabu ba matuku makese bakabanya broshire mipite pa 2 000 mu ngondo isatu yakenzabu mudimu muaba eu. Mu ngondo muisatu, bavua balombola malonga a Bible 16. Tshikumina tshiakenzeka munkatshi mua Taïwan mu dia 21 Kabitende 1999 tshiakanyanga tshimenga etshi bikole, nansha nanku bamue bantu badi banange bulelela badi batungunuka ne kuya kumpala mu nyuma nansha mudibu ne bua kuenda munkatshi mua dîba dijima bua kuya kubuela mu bisangilu mu Nzubu wa Bukalenge udi nabu pabuipi. Bushuwa, bidi bikengela kunanukila bua kunowa bintu bimpe, nansha biobi bikale bia pa madimi bilelela anyi bia mu nyuma.

[Karte mu dibeji 8]

(Bua kumona malu bimpe, tangila mu mukanda)

CHINE

Diboko dia mâyi dia Taïwan

TAÏWAN

[Mêyi a dianyisha]

Mountain High Maps® Copyright © 1997 Digital Wisdom, Inc.