Dikengesha bayidi didi difila njila wa didiunda mu Antiokia

PAKATUADIJABU kutamba kukengesha bayidi ba Yezu kunyima kua lufu lua Stefano, ba bungi bakanyema mu Yelushalema. Umue wa ku miaba yakanyemenabu uvua Antiokia wa Sulia, mutantshi wa kilometre mitue ku 550 ku Nord kua Yelushalema. (Bienzedi 11:19) Mianda yakalua kuenzeka mu Antiokia ivua ne bua kushintulula luendu lujima lua malu a bena Kristo. Bua kumvua tshiakenzeka, mbimpe tuanji kumanya ndambu wa malu adi atangila Antiokia.

Ku bimenga bionso bia mu Bukalenge bua bena Lomo, anu tshia Lomo ne tshia Alesandelia ke bivua bipite Antiokia ku bunene, ku bubanji ne ku mushinga. Tshimenga etshi tshinene tshia mu Sulia tshivua tshikuate muaba ku luseke lua ku Nord-Est kua tshibatabata tshia Mâyi a Mediterane. Tshimenga tshia Antiokia (Antakya lelu, mu ditunga dia Turquie) tshivua kumpenga kua Musulu wa Oronte utu mazuwa a mâyi apitshila, ne musulu eu uvua utshituangaja ne tshitudilu tshiatshi tshia Seleukia Pieria, tshivua mutantshi wa kilometre 32. Umue wa ku njila minene ivua yambuluisha mu bungenda-mushinga pankatshi pa Lomo ne misoko ya mu Tshibandabanda tshia musulu wa Tigre ne wa Euphrate uvua ku bukokeshi buatshi. Bu muvua Antiokia nsangilu wa bangenda-mushinga, benamu bavua benda mushinga ne bantu bonso ba mu bukalenge bua bena Lomo, ne bakamona muvua bantu ba mishindu yonso bashintulukanganamu, bavua balua ne ngumu ya malu a bisumbu bia nzambi bivua bitangalake miaba yonso ivua Lomo ukokesha.

Ntendelelu ne nkindi ya bena Greke bivua bimene bu buowa mu Antiokia. Kadi mufundi wa miyuki ya kale Glanville Downey udi wamba ne: “mu tshikondo tshia Kristo, bisumbu bia kale bia nzambi ne bia bena nkindi bivua bienda bilua malu avua muntu yonso uditabujila, bualu bantu bavua ne budikadidi bua kukeba malu a nzambi avua abasankisha bua kujikija ntatu yabu ne kupeta bivuabu bipatshila.” (A History of Antioch in Syria) Ntendelelu wa Nzambi umue, mikandu ne mêyi avua bantu balonda mu Buena-Yuda biakasankisha bantu ba bungi.

Bena Yuda ba bungi bavua basombele mu Antiokia katshia basa tshimenga etshi mu 300 K.B.B. Badi batshinka ne: bena Yuda bavua mua kuikalamu kubangila ku bantu 20 000 too ne ku 60 000, bapite pa bantu 10 pa lukama ba ku bantu bonso bavuamu. Mufundi wa miyuki ya kale Josèphe udi wamba ne: bakalenge ba mu mulongo wa bakalenge bena Greke bakakankamija bena Yuda bua kuasabu mu tshimenga etshi, bakabapesha manême onso a bumuena-muabu. Bu muvuabi ne: mu tshikondo atshi Mifundu ya tshiena-Ebelu ikavua mikudimuna mu tshiena-Greke, bantu bavua bitaba malu avua bena Yuda bindile pa bidi bitangila Masiya. Mifundu eyi ya mu tshiena-Greke ke yakenzeja bua bena Greke ba bungi kuluabu bena kuitabuja benyi anyi ba-prozelite. Malu onso aa akavuija Antiokia budimi bua bufuke bua mudimu wa divuija bantu bayidi ba Kristo.

Badi bayisha bantu ba bisamba bia bende

Bayidi ba Yezu bavule bavuabu bakengesha bakanyema mu Yelushalema bavua bayisha malu a ditabuja diabu anu kudi bena Yuda. Nansha nanku, mu Antiokia bamue bayidi bafumine mu Kupulio ne mu Kulene bavua  bayisha “bena Gelika.” (Bienzedi 11:20) Nansha muvuabu babange kuyisha bena Yuda bavua bakula tshiena-Greke ne ba-prozelite katshia ku Pentekoste wa mu 33 B.B., diyisha mu Antiokia divua dimueneka dikale bualu bupiabupia. Kabavua bayisha anu bena Yuda nkayabu to. Bulelela, Kônelio (muntu wa tshisamba tshia bende) ne dîku diende bakavua balue bayidi. Kadi biakalomba bua Yehowa kulejaye mupostolo Petelo tshikena-kumona bua kumutuisha bua se: kabivua bibi bua kuyisha bantu ba bisamba bia bende nansha.​—Bienzedi 10:1-48.

Mu tshimenga tshivua bena Yuda ba bungi basombela kamuyi dikokangana dikole pankatshi pa bena Yuda ne bantu ba bisamba bia bende, bavua bambila bantu bavua kabayi bena Yuda lumu luimpe ne bavua baluitaba. Bidi bimueneka ne: mu Antiokia muvua nsombelu muimpe uvua wambuluisha bua didiunda edi kuenzekadi, ne ‘bantu ba bungi bakitabuja.’ (Bienzedi 11:21) Ne pavuabu balua bena Kristo, ba-prozelite bavua batendelela kumpala nzambi ya bampangano, bavua bapeta mushindu wa pa buawu wa kuyisha bakuabu bantu ba bisamba bia bende batshivua batendelela nzambi ayi.

Pakumvuabu lumu lua didiunda divua mu Antiokia, bana betu ba mu tshisumbu tshia mu Yelushalema bakatuma Bânaba bua kudijadikila bualu ebu. Disungula Bânaba divua bualu buimpe buvua buleja dinanga. Bânaba uvua wa mu Kupulio anu muvua bamue bakavua batuadije kuyisha bantu bavua kabayi bena Yuda. Uvua ne bua kuikala mumvue bimpe pavuaye munkatshi mua bantu ba bisamba bia bende ba mu Antiokia. Buobu pabu bavua ne bua kuikala bamuangate bu muntu wa munkatshi mua bantu ba pabuipi apu bavuabu bamanye bimpe. * Kavua mua kubenga kusanka bua mudimu ukavuabu benze to. Ke bua tshinyi ‘pakafikaye, pakamonaye [“bulenga bukena buakanyina,” NW] bua Nzambi, wakasanka; wakakolesha mitshima ya buonso buabu ne: nunanukile kushala pepi ne Mukalenge ne disuminyina mu mitshima,’ ne ‘ba bungi bakasangishibua kudi Mukalenge.’​—Bienzedi 11:22-24.

Mufundi wa miyuki ya kale Downey udi wamba ne: “Malu adi mambuluishe bua mudimu wakatuadijabu kuenza mu Antiokia kuendawu bimpe adi mua kuikala se: mu tshimenga etshi ba-misionere kabavua ne bua kutshina banangi banekeshi ba Buena-Yuda bu bavuabu bapeta mu Yelushalema to. Kabidi, bu muvua Antiokia muikale tshimenga tshikulu tshia Sulia, bavua batshilombola kudi komanda wa basalayi, nanku muvua bulongame bua bungi, ne kuvua mpukapuka mikese bua bantu kuenzabu tshimvundu bu tshiakenzeka mu Yelushalema. Tshikondo atshi, balombodi ba Yudaya bavuamu bavua bamueneka kabayi ne bukole bua kukanda banangi aba banekeshi ba Buena-Yuda.”

Bu muvuaku nsombelu eyi mimpe ne muvuaku mudimu wa bungi wa kuenza, bumue Bânaba wakamona ne: uvua dijinga ne diambuluisha, ke yeye kuela meji bua mulunda wende Shaula. Bua tshinyi wakavuluka Shaula (anyi Paulo)? Bidi bimueneka ne: mbualu Paulo uvua mupete bupostolo bua kuya kudi bisamba bia bende, nansha muvuaye kayi wa mu bapostolo 12. (Bienzedi 9:15, 27; Lomo 1:5; Buakabuluibua 21:14) Ke bualu kayi Paulo uvua mukumbane bimpe bua kuyishaye nende lumu luimpe mu tshimenga etshi tshia Antiokia tshia bantu ba bisamba bia bende. (Galatia 1:16) Nanku Bânaba wakaya ku Tâso, kupetaye Shaula e kuluabu nende ku Antiokia.​—Bienzedi 11:25, 26; bala malu adi mu  kazubu mu dibeji 26-27.

Ku buludiki bua Nzambi bakababikila ne: bena Kristo

Tshidimu tshijima, Bânaba ne Shaula ‘bakayisha bantu ba bungi; mu Antiokia [ke] muakabangabu kubikila bayidi [ku buludiki bua Nzambi] ne: bena Kristo.’ Bidi bimueneka ne: ki mbena Yuda bavua bantu ba kumpala ku dibikila bayidi ba Yezu ne: bena Kristo (mu tshiena-Greke) anyi bena Masiya (mu tshiena-Ebelu) to, bualu buobu kabavua bitaba ne: Yezu uvua Masiya anyi Kristo, ne pa nanku kabavua mua kusua kumvuija bu bavua bamupesha muanzu eu pa kubikila bayidi bende ne: bena Kristo nansha. Bamue badi bela meji ne: bantu ba bisamba bia bende ke bavua mua kuikala babapeshe dîna dia bena Kristo bua kubaseka anyi kubapepeja. Kadi Bible udi uleja ne: Nzambi ke uvua mufile dîna dia bena Kristo.​—Bienzedi 11:26.

Mu Mifundu ya tshiena-Greke ya bena Kristo, muaku wa pa muanda udibu bafunde bua dîna  edi dipiadipia​—pa tshibidilu mukudimuna ne: “kubikila”—​bantu badi bautela misangu yonso bua tshintu tshidi katshiyi tshia panu, tshimanyisha kudi Nzambi anyi tshifumine kudiye. Ke bualu kayi bakonkononyi ba malu a mu Bible badi baukudimuna ne: “kuamba bualu bua kudi Nzambi,” “dimanyisha dia kudi Nzambi,” peshi “kufila dîyi anyi mubelu wa kudi Nzambi, kulongesha malu a mu diulu.” Bu muvuabu babikile bayidi ba Yezu ne: bena Kristo “ku buludiki bua Nzambi,” bidi mua kuikala se: Yehowa ke uvua mulombole Shaula ne Bânaba bua kufila dîna edi.

Dîna edi dipiadipia diakatungunuka. Bantu kabavua mua kutupakana kabidi bua kuangata bayidi ba Yezu bu kasumbu kaditapulule ku Buena-Yuda, bualu buobu bavua bashilangane ne Buena-Yuda ebu bikole. Mu tshidimu bu tshia 58 B.B., bakokeshi ba mu Lomo bakavua bamanye bena Kristo bimpe bitambe. (Bienzedi 26:28) Mufundi wa miyuki ya kale Tacite udi uleja ne: pabuipi ne mu tshidimu tshia 64 B.B., dîna edi dikavua ditangalake too ne munkatshi mua bena Lomo kabidi.

Yehowa udi ukuata mudimu ne bena lulamatu

Lumu luimpe luakenda bimpe menemene mu Antiokia. Bu muvua Yehowa wambuluisha ne muvua bayidi ba Yezu bikale ne dipangadika dia kutungunuka ne kuyisha, Antiokia wakalua muaba munene wa Buena-Kristo bua mu bidimu lukama bia kumpala. Ku diambuluisha dia tshisumbu etshi, Nzambi wakunzulula njila bua kutangalaja lumu luimpe mu matunga a kule. Tshilejilu, mu Antiokia ke muvua mupostolo Paulo muashile ngendu yende yonso ya mudimu wa bu-misionere.

Mu bikondo bietu ebi, lukunukunu ne tshisumi mu bikondo bia buluishi mbiambuluishe kabidi bua kutangalaja Buena-Kristo bulelela, ke tshidi tshipeshe bantu ba bungi mushindu wa kumvua lumu luimpe ne kuleja mudibu baluanyisha. * Nenku bikalabu bakuluisha bualu udi ulonda ntendelelu mulelela, vuluka ne: Yehowa mmumanye tshidiye mulekele malu au. Anu muakenzekabi mu bidimu lukama bia kumpala, lelu tudi ne bua kupesha bantu mushindu bua bateleje malu a Bukalenge bua Nzambi ne babulamate. Dipangadika diebe dia kutungunuka ne kuenzela Yehowa mudimu ne lulamatu ke bualu budi mua kuikala bukengedibua bua kuambuluisha muntu bua afike ku dimanya dijalame dia bulelela.

[Mêyi adi kuinshi]

[Kazubu/​Bimfuanyi mu mabeji 26, 27]

 “Bidimu [bia Shaula] bidibu kabayi batele”

Musangu wa ndekelu udibu batele Shaula mu mukanda wa Bienzedi kumpala kua kuyaye mu Antiokia bu mu tshidimu tshia 45 B.B. ndîba diakapangila tshifufu tshivuabu bele bua kumushipa mu Yelushalema ne diakamutuma bana babu ku Tâso. (Bienzedi 9:28-30; 11:25) Kadi bivua bu mu tshidimu tshia 36 B.B., bidimu tshitema kumpala. Ntshinyi tshivuaye wenza munkatshi mua tshikondo tshionso etshi tshidibu babikila ne: bidimu bia Shaula bidibu kabayi batele?

Shaula wakumbuka mu Yelushalema, kuyaye mu bitupa bia Sulia ne Kilikia, ne bisumbu bia mu Yudaya biakumvua ne: ‘Yey’au wakadi utukengesha diambedi udi wambila bantu mpindieu bua ditabuja diakakebaye kubutula.’ (Galatia 1:21-23) Lumu alu luvua mua kuikala lua mudimu wakenzabu ne Bânaba mu Antiokia, kadi nansha kumpala kua mudimu au Shaula kavua mushale mushinge anu ibidi to. Mu 49 B.B., kukavua ndambu wa bisumbu mu Sulia ne mu Kilikia. Tshimue tshivua mu Antiokia; kadi bamue bantu badi bela meji ne: bikuabu bivua mua kuikala bifumine ku mudimu wa Shaula mu bidimu biende bidibu bamba ne: ki mbabitele to.​—Bienzedi 11:26; 15:23, 41.

Bamue bakonkononyi ba malu a mu Bible badi bamba ne: ntatu yakapeta Shaula ivua ne bua kuikala mimufikile mu tshine tshikondo atshi. Katuena mua kuamba tshikondo tshijalame tshiakamufikila makenga mavule akapetaye bualu uvua misionere ‘muena mudimu wa Kristo’ nansha. (2 Kolinto 11:23-27) Ndîba kayi divua bena Yuda bakume Shaula mikumu 39 misangu itanu? Mmuaba kayi uvuabu bamukume misangu isatu ne milangala? Mmuaba kayi uvuabu bamuele mu nkanu ‘misangu mitambe’? Mu Lomo bavua balue kumukuata kunyima. Muyuki umue ke udi wakula bua musangu umue uvuabu bamukume ne bamuele mu buloko ku Filipoi. Kadi misangu mikuabu eyi nya kuepi? (Bienzedi 16:22, 23) Mufundi mukuabu udi ufila lungenyi lua se: mu tshikondo etshi Shaula  uvua “umanyisha malu a Kristo mu nsunagoga ya bena Tshimuangi mu mushindu uvua usaka bamfumu ba bitendelelu ne ba mbulamatadi bua kumukengesha.”

Misangu inayi mazuwa akanyangukila Shaula mu mâyi, kadi Bible udi wakula anu bua njiwu ya musangu umue, yakenzeka panyima pa yeye mumane kutela mulongolongo wa ntatu yakapetaye, pavuaye ufundila bena Kolinto. (Bienzedi 27:27-44) Njiwu ya misangu mikuabu isatu eyi ivua mua kuikala mimufikile pavuaye mu ngendu itudi katuyi bamanye bualu buayi. Bualu bumue anyi malu onso aa avua mamuenzekele mu “bidimu bidibu kabayi batele.”

Muanda mukuabu udi umueneka muenzeke mu tshikondo atshi ng’udibu bumvuije mu 2 Kolinto 12:2-5. Shaula wakamba ne: ‘Ndi mumanye muntu mu Kristo bidimu dikumi ne binayi bimane kupita; wakabandishibua too ne mu diulu disatu, mu Mparadizu, wakumvua mêyi adi bantu kabayi bamanye mua kuamba, adi mikenji ikanda muntu bua kuambaye.’ Bidi bimueneka ne: Shaula uvua wakula buende yeye muine. Muvuaye mufunde mukanda eu bu mu 55 B.B., bidimu 14 kumpala bidi ne bua kutufikisha mu 41 B.B., munkatshi mua “bidimu bidibu kabayi batele.”

Kakuyi mpata, tshikena-kumona atshi tshiakaleja Shaula bualu bua pa buabu. Tshivua ne tshipatshila tshia kumulongolola bua ikale “mupostolo kudi bisamba bia bende” anyi? (Lomo 11:13) Tshiakashintulula mushindu wakaluaye kubanga kuela meji, kufunda ne kuakula anyi? Bidimu bidi pankatshi pa dikudimuna mutshima dia Shaula ne dimubikila mu Antiokia bivuaku bifile mushindu wa kumulongesha ne kumuvuija mukumbane bua kuenza midimu ivua mimuindile anyi? Nansha mandamuna a nkonko eyi mikale a mushindu kayi, tuikale bajadike ne: pakamubikila Bânaba bua kuambuluisha bua kulombola mudimu wa buambi mu Antiokia, Shaula, muntu eu wa lukunukunu, uvua mukumbane tshishiki bua kukumbaja mudimu uvuabu bamupeshe.​—Bienzedi 11:19-26.

[Karte mu dibeji 25]

(Bua kumona malu bimpe, tangila mu mukanda)

SULIA

Oronte

Antiokia

Seleukia

KUPULIO

MBUU WA MEDITERANE

Yelushalema

[Mêyi a dianyisha]

Mountain High Maps® Copyright © 1997 Digital Wisdom, Inc.

[Bimfuanyi mu dibeji 24]

Kuulu: Antiokia lelu’eu

Pankatshi: Luseke lua ku Sud lua Seleukia

Kuinshi: Tshitudilu tshia mu Seleukia