Ditekemena dia dibika dia bafue didi ne bukole

‘Ngakajimija bintu bionso bua meme kumanya [Yezu Kristo], ne bukole bua dibika diende ku lufu.’​—FILIPOI 3:8-10.

1, 2. (a) Kukadi bidimu bia bungi, mmunyi muvua mfumu kampanda wa tshitendelelu mumvuije dibika dia bafue? (b) Mmunyi muenzeka dibika dia bafue?

 KUNTUADIJILU kua bidimu bia 1890, bikandakanda binene biakakula bua muyuki wa pa buawu wakenza mfumu mukuabu wa tshitendelelu wa mu Brooklyn, ku New York (États-Unis). Mfumu eu wakamba ne: dibika dia bafue nedikale disangisha tshiakabidi ne difululula dia mifuba ne minyinyi yonso ivua yenza mubidi wa muntu, nne uvua muoshike mu mudilu anyi mu njiwu kampanda, nne bavua baudie kudi nyama anyi bafukishe nawu buloba. Muyishi eu uvua wamba ne: mu dimue dituku dia mêba 24, muulu nemufike fitutuu ne bianza, maboko, makasa, minu, mifuba, mifungu ne makoba a miliyare mivule ya bantu bakadi bafue. Bitupa ebi nebiye bienda bikeba bitupa bikuabu bia mubidi wabi. Pashishe anyima neyifume mu diulu ne mu inferno bua kusombela mu mibidi eyi idi mibike ku lufu.

² Kuamba ne: dibika dia bafue nedienzeke ku dilamakajilula dia atome ya ku ntuadijilu ki mbualu bulelela nansha, ne bantu kabena ne anyima utu kayi ufua to. (Muambi 9:5, 10; Yehezekele 18:4) Yehowa Nzambi (udi mulongolole dibika dia bafue) kêna dijinga ne kusangishilula atome ivua yenza mubidi wa muntu kumpala nansha. Udi mua kuenzela bantu babishaye mibidi mipiamipia. Yehowa mmupeshe Muanende Yezu Kristo bukole bua kubisha bafue ne mushindu wa kuikalabu ne muoyo wa tshiendelele. (Yone 5:26) Ke bualu kayi Yezu wakamba ne: ‘Ndi bianyi dibisha, ndi bianyi muoyo: udi ungitabuja, nansha biafuaye, neikale ne muoyo kabidi.’ (Yone 11:25, 26) Edi ndilaya didi ditukolesha ku muoyo bulelela! Didi ditukankamija bua kutantamena ntatu nansha bua kukola muoyo bu lufu mua kutuvuila bualu tudi Bantemu ba Yehowa ba lulamatu.

3. Bua tshinyi Paulo uvua ne bua kubingisha dilongesha dia dibika dia bafue?

³ Ditekemena dia dibika dia bafue kadiena dipetangana  ne lungenyi lua se: bantu badi ne anyima utu kayi ufua, luvuabu balongeshe kudi Platon muena nkindi wa bena Greke. Kadi ntshinyi tshiakenzeka pavua mupostolo Paulo muyishe bena Greke bende lumu mu Aleopago ku Atena, pakakulaye bua Yezu, kuambaye ne: Nzambi uvua mumubishe ku lufu? Bible udi wamba ne: ‘Pakumvuabu bua dibika dia bafue, bakuabu bakaseka.’ (Bienzedi 17:29-34) Nansha muakasekabu, bantu ba bungi bavua bamone Yezu Kristo mubike ku lufu batshivua ne muoyo ne bakajadika ne: uvua mubike ku lufu bia bushuwa. Kadi balongeshi ba dishima bavua babuele mu tshisumbu tshia mu Kolinto bavua babenga dilongesha dia dibika dia bafue. Ke bua tshinyi mu 1 Kolinto nshapita wa 15 Paulo wakafila bijadiki bikole bua kubingisha dilongesha dia bena Kristo edi. Dilonga ne lubatshi bijadiki bivuaye mufile didi dishindika bimpe ne: ditekemena dia dibika dia bafue mbualu bulelela ne didi kabidi ne bukole.

Tshijadiki tshikole tshia dibika dia Yezu ku lufu

4. Ntshijadiki kayi tshia bantu bavua bamone Yezu mubike ku lufu tshiakafila Paulo?

⁴ Tangila mushindu wakatuadija Paulo kubingisha dibika dia bafue. (1 Kolinto 15:1-11) Anu bikala bena Kolinto kabavua bitabuje patupu, bavua ne bua kulamata bikole ku lumu luimpe lua lupandu. Kristo wakafua bua mpekatu yetu, bakamujika, ne pashishe Nzambi wakamubisha ku lufu. Bushuwa, Yezu eu mubisha ku lufu wakamueneka kudi Kefa (Petelo), ‘kunyima, kudi bapostolo dikumi ne babidi.’ (Yone 20:19-23) Bakamumona kudi bantu batue ku 500; pamu’apa ndîba diakambaye ne: ‘Yayi bienu, nuvuije bantu bayidi.’ (Matayo 28:19, 20) Yakobo wakamumona anu muakamumona bapostolo bakuabu ba lulamatu. (Bienzedi 1:6-11) Pabuipi ne Damaseke, Yezu wakamueneka kudi Shaula, “[bu kudi] muana wa kabishi,” muenze bu muntu ukavuabu babishe bua kuikala ne muoyo wa mu nyuma. (Bienzedi 9:1-9) Bena Kolinto bakalua bena kuitabuja bualu Paulo wakabayisha, ne bakitaba lumu luimpe.

5. Nngelelu wa meji kayi uvua nende Paulo udiye mufunde mu 1 Kolinto 15:12-19?

⁵ Tangila ngelelu wa meji uvua nende Paulo. (1 Kolinto 15:12-19) Bu mudi bantu bavua bamone Kristo bayisha ne: uvua mubike ku lufu, mmunyi mudibu mua kuamba ne: kakuena dibika dia bafue? Bikala Yezu kavua mubike ku lufu, diyisha ne ditabuja dietu mbia patupu, ne tudi bena mashimi badi bashiminyina Nzambi ne: wakabisha Kristo ku lufu. Bikala bafue kabayi babika, ‘tutshidi mu malu mabi etu,’ ne bantu badi bafue mu buobumue ne Kristo mbajimine. Kabidi, ‘bituikala batekemene Kristo anu mu muoyo eu nkayawu, tudi tutamba bantu bonso kukengela luse.’

6. (a) Ntshinyi tshiakamba Paulo bua kujadika ne: Yezu uvua mubike ku lufu? (b) ‘Muena lukuna wa ku nshikidilu’ ntshinyi, ne mmunyi muamujimijabu?

⁶ Paulo udi ujadika dibika dia Yezu ku lufu. (1 Kolinto 15:20-28) Bu mudi Kristo muikale “mamuma a kukuama diambedi” a bantu badi bafue, nebabishe bantu bakuabu kabidi. Bu muakalua lufu bua bupidia bua muntu: Adama, dibika dia bafue didi dilua bua muntu: Yezu. Bantu bende yeye uvua ne bua kubajula mu tshikondo tshia dikalaku diende [mu bumfumu]. Kristo udi ‘ujimija makalenge onso makuabu ne bukokeshi buonso ne bukole’ bidi bibengangana ne bumfumu bua Nzambi, ne udi ukokesha too ne padi Yehowa uteka bena lukuna bende muinshi mua makasa ende. Nansha ‘muena lukuna wa ku nshikidilu’ anyi lufu lutudi bapiane kudi Adama, nebamujimije ku diambuluisha dia mushinga wa mulambu wa Yezu. Pashishe Kristo neapeshe Tatuende Nzambi Bukalenge, neaditeke yeye muine muinshi mua ‘[Eu] wakateka bintu bionso muinshi muende, bua Nzambi kuikala ku mutu kua bionso ne mu bintu bionso.’

Badi batambula bua bafue anyi?

7. Mbanganyi badi “batambula ne tshipatshila tshia kuikala bafue,” ne ntshinyi tshidibi biumvuija bua bantu aba?

⁷ Paulo wakebeja baluishi ba dilongesha dia dibika dia bafue ne: “Ntshinyi tshienza aba badi benda batambula ne tshipatshila tshia kuikala bafue?” (1 Kolinto 15:29, NW) Paulo kavua usua kuamba ne: bantu ba muoyo badi ne bua kutambuila bantu bafue nansha, bualu muyidi yonso wa Yezu udi ne bua kulonga, kuitabuja ne kutambula buende yeye nkayende. (Matayo 28:19, 20; Bienzedi 2:41) Bena Kristo bela manyi badi “batambula ne tshipatshila tshia kuikala bafue” padibu batuadija nsombelu udi ubafikisha ku lufu ne ku dibika. Batismo eu udi utuadija padi nyuma wa Nzambi ujula ditekemena dia mu diulu munda muabu, ne udi ujika padibu babajula ku lufu bua kuikalabu ne muoyo mu diulu ne bashala kabayi mua kufua tshiendelele.​—Lomo 6:3-5; 8:16, 17; 1 Kolinto 6:14.

8. Ntshinyi tshidi bena Kristo ne bua kuikala bajadike nansha Satana ne bena mudimu bende buobu babashipe?

 ⁸ Anu mudi mêyi a Paulo aleja, ditekemena dia dibika dia bafue didi dipesha bena Kristo bukole bua kuimana ne dikima kumpala kua njiwu ne lufu dituku dionso bua mudimu wa diyisha Bukalenge udibu benza. (1 Kolinto 15:30, 31) Mbamanye ne: Yehowa udi mua kubabisha bu yeye mua kulekela Satana ne bena mudimu bende babashipa. Anu Nzambi ke udi mua kubutula kashidi anyima anyi muoyo wabu mu Ngena, udi muikale tshimfuanyi tshia kabutu ka tshiendelele.​—Luka 12:5.

Bidi bikengela kuikala badimuke

9. Bua ditekemena dia dibika dia bafue kuikaladi ne bukole mu nsombelu wetu, ntshinyi tshitudi ne bua kuepuka?

⁹ Ditekemena dia dibika dia bafue diakakolesha Paulo. Pavuaye mu Efeso, pamu’apa baluishi bende bavua bamuele mu tshipalu bua kuluanganaye ne nyama ya luonji. (1 Kolinto 15:32) Bikala bualu abu buvua buenzeke, Nzambi uvua mumusungile anu muvuaye musungile Danyele ku nyama ya ntambue. (Danyele 6:16-22; Ebelu 11:32, 33) Bu muvuaye ne ditekemena dia bidika dia bafue, Paulo kavua ne meji a buena a batontolodi ba mu Yuda ba mu tshikondo tshia Yeshaya to. Bavua bamba ne: “Tudie bietu, tunue bietu, bua makelela tufuafua.” (Yeshaya 22:13) Bua ditekemena dia dibika dia bafue kuikaladi ne bukole mu nsombelu wetu anu muvuadi nabu mu nsombelu wa Paulo, tudi ne bua kuepuka bantu badi ne lungenyi elu lubi. Paulo wakadimuija ne: “Kanudingibu; malunda mabi adi anyanga malu makane a bantu.” (1 Kolinto 15:33) Bushuwa, dîyi edi ndia kutumikila mu malu mashilangane a mu nsombelu wetu.

10. Mmunyi mutudi mua kulama bimpe ditekemena dietu dia dibika dia bafue?

¹⁰ Paulo wakambila bantu bavua bela mpata bua dibika dia bafue ne: “Nutabale biakane, nulekele kuenza malu mabi; bualu bua bakuabo kabena bamanye Nzambi. Ndi ngamba nunku bua kunufuisha bundu.” (1 Kolinto 15:34) Mu ‘tshikondo [etshi] tshia ku nshikidilu,’ tudi ne bua kuenza malu adi apetangana ne dimanya dijalame dia Nzambi ne Kristo. (Danyele 12:4; Yone 17:3) Kuenza malu aa nekutuambuluishe bua kulama bimpe ditekemena dietu dia dibika dia bafue.

Nebabike ne mubidi kayi?

11. Paulo wakafuanyikija dibika dia bena Kristo bela manyi ne tshinyi?

¹¹ Pashishe Paulo wakela imue nkonko. (1 Kolinto 15:35-41) Pamu’apa ne tshipatshila tshia kuela mpata bua dibika dia bafue, muntu udi mua kuela lukonko ne: ‘Bantu bafue nebabike ku lufu munyi? Nebalue ne mibidi kayi?’ Anu muakaleja Paulo, lutete ludibu bakuna mu buloba ludi lufua padilu lushintuluka bua kulua mutshi. Bia muomumue, muntu mulela ku nyuma udi ne bua kuanji kufua. Anu mutu mutshi ufumina ku lutete muikale ne mubidi mupiamupia, ke mudi mubidi udibu babisha ku lufu wa muena Kristo muela manyi mushilangane ne mubidi wa bantu. Nansha mudiye ne ngikadilu yoyi imue ivuaye nayi kumpala kua kufuaye, badi bamubisha muikale tshifukibua tshipiatshipia ne mubidi wa mu nyuma udi mua kusomba mu diulu. Kadi aba babishabu pa buloba nebabajule ne mibidi ya bantu.

12. Biambilu ebi “mibidi ya bintu bia mu diulu” ne ‘mibidi ya bintu bia pa buloba’ bidi biumvuija tshinyi?

¹² Anu muakamba Paulo, munyinyi wa muntu mmushilangane ne wa nyama. Nansha nyama itu ne munyinyi mushilangane bilondeshile mushindu wayi. (Genese 1:20-25) “Mibidi ya bintu bia mu diulu” ya bifukibua bia mu nyuma mmishilangane ku butumbi ne ‘mibidi ya bintu bia pa buloba’ ya munyinyi. Dîba, ngondo ne mitoto mbishilangane kabidi ku butumbi buabi. Kadi bela manyi badibu babisha badi ne butumbi bua bungi menemene.

13. Bilondeshile 1 Kolinto 15:42-44, ntshinyi tshidibu bakuna ne ntshinyi tshidibu babisha?

¹³ Paulo mumane kuleja dishilangana dionso edi, wakamba kabidi ne: “Dibika dia bantu bafue didi nunku kabidi.” (1 Kolinto 15:42-44) Wakamba ne: ‘Udi ukunyibua [“mu dinyanguka,” NW], udi ubishibua [“mu dibenga kunyanguka,” NW].’ Muaba eu Paulo udi mua kuikala wakula bua bela manyi benze bu kasumbu. Badi bakuna kasumbu aka mu dinyanguka padiku kafua, badi bakajula mu dibenga kunyanguka, kakatshiyi ne mpekatu. Nansha muvua bena panu bapepeja kasumbu aka, badi bakajula bua kuikalaku ne muoyo mu diulu ne bakamuenesha ne Kristo mu butumbi buende. (Bienzedi 5:41; Kolosai 3:4) Padi kasumbu aka kafua badi bakajika kikale “mubidi wa bantu” ne kadi kabishibua “mubidi wa nyuma.” Bu muikala muanda eu mua kuenzekela bena Kristo balela ku nyuma, tudi mua  kuikala bajadike ne: bantu bakuabu badi mua kubika bua kuikala ne muoyo pa buloba.

14. Mmunyi muvua Paulo muleje dishilangana pankatshi pa Kristo ne Adama?

¹⁴ Pashishe Paulo wakaleja dishilangana pankatshi pa Kristo ne Adama. (1 Kolinto 15:45-49, NW) Adama, muntu wa kumpala, “wakalua anyima wa muoyo.” (Genese 2:7, NW) “Adama wa ndekelu,” mmumue ne: Yezu, “wakalua nyuma udi ufila muoyo.” Wakafila muoyo wende bu mulambu bua kupikula bantu, tshia kumpala bua bayidi bende bela manyi. (Mâko 10:45) Bu mudibu bantu, badi ‘bangata tshimfuanyi tshia eu uvuabu benze ne lupuishi,’ kadi padibu bababisha badi balua bu Adama wa ndekelu. Bushuwa, mulambu wa Yezu newambuluishe bantu bonso badi ne butumike ne aba babishabu pa buloba.​—1 Yone 2:1, 2.

15. Bua tshinyi kabena babisha bena Kristo bela manyi ne mubidi wa munyinyi, ne mmunyi mudibu bababisha mu tshikondo tshia dikalaku dia Yezu mu bumfumu?

¹⁵ Padi bena Kristo bela manyi bafua, kabena bababisha ne mubidi wetu wa munyinyi eu to. (1 Kolinto 15:50-53) Mubidi wa munyinyi utu unyanguka kawena mua kupiana dibenga kunyanguka ne Bukalenge bua mu diulu to. Bamue bela manyi kabavua ne bua kushala bafue mutantshi mule to. Pavuabu bajikija luendu luabu lua pa buloba ne lulamatu mu tshikondo tshia dikalaku dia Yezu [mu bumfumu], bavua ne bua ‘kuandamuka, mu dîba dikese, mu kuvinya kua dîsu.’ Bavua ne bua kubajula mu mupodi wa dîsu bua kuikalabu ne muoyo wa mu nyuma kabayi banyanguka ne bikale ne butumbi. Ku ndekelu, ‘mukaji’ wa mu diulu wa Kristo uvua ne bua kuikala ne bantu 144 000.​—Buakabuluibua 14:1; 19:7-9; 21:9; 1 Tesalonike 4:15-17.

Nebatshimune lufu!

16. Bilondeshile Paulo ne baprofete ba kale, ntshinyi tshiafikila lufu lutudi bapiane kudi Adama muena mpekatu?

¹⁶ Paulo wakamba ne disanka bu dia muntu mutshimune ne: Nzambi uvua ne bua kumina lufu tshiendelele. (1 Kolinto 15:54-57) Pikala tshidi tshinyanguka ne tshifua mua kuvuala dibenga kunyanguka ne dibenga kufua, mêyi aa neakumbane: ‘Lufu luakuminyibua [kashidi].’ ‘Lufu, kutamba kuebe kudi penyi? Lufu, kalonda kebe kadi penyi?’ (Yeshaya 25:8; Hoshea 13:14) Kalonda kadi kakeba lufu mmpekatu, ne bukole bua mpekatu buvua Mikenji, ivua mikale ifundila benji ba mpekatu tshibawu tshia lufu. Kadi bua mulambu wa Yezu ne dibika diende, lufu lutudi bapiane kudi Adama kaluakutshimuna kabidi to.​—Lomo 5:12; 6:23.

17. Mmunyi mudi mêyi a 1 Kolinto 15:58 akumbana lelu?

¹⁷ Paulo wakamba ne: “Nenku, bana betu basuibue, nulue bashindame, kanuyi kutenkakaja, bikale misangu yonso ne bivule bia kuenza mu mudimu wa Mukalenge, bamanye se: mudimu wenu mukole unudi nuenzela Mukalenge kawena wa patupu.” (1 Kolinto 15:58, NW) Mêyi aa adi atangila bashadile bela manyi badiku lelu’eu ne “mikoko mikuabo” ya Yezu nansha buobu bafua mu matuku a ku nshikidilu aa. (Yone 10:16) Mudimu mukole udibu benza wa dimanyisha Bukalenge kawena wa patupu to, bualu dibika dia bafue ndibindile. Nenku mutudi basadidi ba Yehowa, tudituayi ne kasuki mu mudimu wa Mukalenge eku bindile dituku dituikala mua kuela lubila lua disanka ne: ‘Lufu, kutamba kuebe kudi penyi?’

Ditekemena dia dibika dia bafue nedikumbane!

18. Ntshinyi tshidi tshileja ne: ditekemena dia Paulo bua dibika dia bafue divua dikole?

¹⁸ Mêyi a Paulo adi mu 1 Kolinto nshapita wa 15 adi aleja patoke ne: dibika dia bafue divua ne bukole mu nsombelu wende. Uvua mujadike bimpe menemene se: Nzambi uvua mujule Yezu ku lufu, ne uvua ne bua kupatula bantu bakuabu mu nkita. Udiku ne dishindika dikole dia mushindu’eu anyi? Paulo uvua wangata masanka ende bu “bintu bia kuela ku diala” ne ‘wakajimija bintu bionso’ bua yeye kumona mua ‘kumanya Kristo ne bukole bua dibika diende ku lufu.’ Mupostolo eu uvua mudilongolole  bua kufua lufu lua buena lua Kristo, muikale ne ditekemena dia kubika mu “dibika dia bafue dia ntuadijilu.” (NW) Dibika edi ndidibu babikila kabidi ne: “dibika dia ku lufu dia kumudilu,” ne anu bayidi ba Yezu bela manyi 144 000 ke babikamu. Badi bababisha bua kuikalabu ne muoyo wa mu nyuma mu diulu, kadi nebabishe “bafue bakuabo” pa buloba.​—Filipoi 3:8-11; Buakabuluibua 7:4; 20:5, 6.

19, 20. (a) Mbantu kayi badi Bible utela babika bua kuikala ne muoyo pa buloba? (b) Ndibika dia nganyi diudi wewe muindile ne muoyo mujima?

¹⁹ Ditekemena dia dibika dia bafue ndilue bualu bulelela buimpe menemene bua bela manyi bavua ne lulamatu too ne ku lufu. (Lomo 8:18; 1 Tesalonike 4:15-18; Buakabuluibua 2:10) Bantu bapanduka ku “dikenga dinene” nebamone muakumbana ditekemena dia dibika dia bafue pa buloba pikala ‘mâyi manene mua kupatula bafue badimu, ne lufu ne [Hades] bipatula bafue badimu.’ (Buakabuluibua 7:9, 13, 14; 20:13) Munkatshi mua bantu babishabu bua kuikala ne muoyo pa buloba nemuikale Yobo, muntu wakafuisha bana ba balume muanda-mutekete ne ba bakaji basatu. Ela meji disanka dikalaye nadi pikalaye mua kubakidila, ne nditshionkomoka kayipu dikalabu nadi bua kupeta bana babu bakuabu ba balume muanda-mutekete ne ba bakaji bakuabu basatu balengele!​—Yobo 1:1, 2, 18, 19; 42:12-15.

²⁰ Ndibenesha kayipu pabishabu Abalahama ne Sala, Isaka ne Lebeka, ne bantu bakuabu ba bungi, pamue ne “baprofete bonso,” bua kuikalabu ne muoyo pa buloba! (Luka 13:28) Umue wa ku baprofete abu uvua Danyele, uvuabu balaye bua kumubisha mu bukokeshi bua Masiya. Danyele mmuikishe mu lukita kukadi bidimu bitue ku 2 500, kadi ku diambuluisha dia dibika dia bafue, mu katupa kîpi emu ‘neabike bua kupeta difutu diende’ dia kuikala munkatshi mua ‘bakokeshi mu miaba yonso ya pa buloba.’ (Danyele 12:13, MMM; Musambu 45:16) Ndisanka kayipu diwikala nadi bua kuakidila ki ng’anu bena lulamatu ba kale, kadi ne tatuebe, mamuebe, muanebe wa balume, muanebe wa bakaji, anyi bananga bebe bakuabu bavua muluishi wetu lufu mukunyenge!

21. Bua tshinyi katuena ne bua kujingakana bua kuenzela bantu bakuabu malu mimpe?

²¹ Bamue balunda ne bananga betu badi mua kuikala benzele Nzambi mudimu bidimu bia bungi ne bakadi bakulakaje bikole. Bukulakaje budi mua kuikala bubapangisha bua kutantamena ntatu ya panu. Mbimpe menemene bua tuetu kubambuluisha ne muetu mutudi namu kubangila anu ku mpindieu! Bu lufu mua kubangata, katuakunyingalala mutudi bapangile bua kukumbaja majitu etu kumpala kuabu mu mushindu kampanda to. (Muambi 9:11; 12:1-7; 1 Timote 5:3, 8) Tuikale bashindike ne: Yehowa kakupua muoyo malu mimpe atudi tuenzela bantu bakuabu, nansha buobu bakadi bukole kayi peshi bikale ne nsombelu kayi. Paulo wakafunda ne: ‘Nunku patudi bamanye mua kuenza, tuenzelayi bantu bonso bimpe, kadi tutambe kuenzela bena dîku dia bena kuitabuja bimpe.’​—Galatia 6:10; Ebelu 6:10.

22. Too ne pakumbana ditekemena dia dibika dia bafue, ntshinyi tshitudi ne bua kuikala bapangadike bua kuenza?

²² Yehowa udi “Tatu wa luse ne Nzambi wa busambi buonso.” (2 Kolinto 1:3, 4) Dîyi diende didi ditusamba ne dituambuluisha bua kusamba bakuabu ne ditekemena dikole dia dibika dia bafue. Too ne patuamona mushindu wakumbana ditekemena adi pabika bafue bua kuikala ne muoyo pa buloba apa, tuikalayi ne ditabuja dia se: bafue nebabike anu muvua Paulo nadi. Tuidikijayi nangananga Yezu, uvua Nzambi mukumbajile ditekemena divuaye nadi dia se: uvua ne bua kumubisha ku lufu ku bukole buende. Mu katupa kîpi emu bantu badi mu nkita ya tshivulukidi nebumvue dîyi dia Kristo ne nebapatukemu. Bualu ebu budi ne bua kutukolesha ne kutupesha disanka. Tuikale nangananga ne dianyisha kudi Yehowa, udi muambuluishe bua kutshimuna lufu ku butuangaji bua Mukalenge wetu Yezu Kristo!

Newandamune munyi?

• Ntshijadiki kayi tshia bantu bavua bamone Yezu mubike ku lufu tshiakafila Paulo?

• ‘Muena lukuna wa ku nshikidilu’ ntshinyi, ne mmunyi muamujimijabu?

• Pa bidi bitangila bena Kristo bela manyi, ntshinyi tshidibu bakuna ne ntshinyi tshidibu babisha?

• Mbantu kayi badi Bible utela baudi musue kumona pabikabu bua kuikala ne muoyo pa buloba?

[Nkonko ya dilonga]

[Tshimfuanyi mu dibeji 16]

Mupostolo Paulo wakafila bijadiki bikole bua kuleja ne: dibika dia bafue nedienzeke

[Bimfuanyi mu dibeji 20]

Dibika dia Yobo, dîku diende, ne bantu bakuabu ba bungi neditupeshe disanka kadiyi kuamba!