Ditekemena dia dibika dia bafue mbualu bulelela!
Ditekemena dia dibika dia bafue mbualu bulelela!
“Ndi ne ditekemena kudi Nzambi . . . ne, dibika dia bafue nedikaleku.”—BIENZEDI 24:15.
1. Bua tshinyi tudi mua kutekemena dibika dia bafue?
YEHOWA mmutupeshe bijadiki bikole bidi bitusaka bua kutekemena se: bafue nebabike ku lufu. Dîyi diende didi dituambila ne: bafue nebajuke, nebalue ne muoyo tshiakabidi. Ne bualu ebu budiye mulongolole bua bantu bafue nebukumbane kakuyi mpata. (Yeshaya 55:11; Luka 18:27) Bushuwa, Nzambi ukadi muleje mudiye ne bukole bua kujula bafue.
2. Mmunyi mudi ditekemena dia dibika dia bafue mua kutuambuluisha?
2 Ditabuja dia se: Nzambi mmulongolole bua kutuma Muanende Yezu Kristo bua abishe bafue didi mua kutukolesha mu bikondo bia dibungama. Dishindika dia se: ditekemena dia dibika dia bafue mbualu bulelela didi kabidi mua kutuambuluisha bua kushala balamate Tatu wetu wa mu diulu nansha patudi pabuipi ne lufu. Pamu’apa ditekemena dietu dia dibika dia bafue nedikole patudi tukonkonona miyuki ya mu Bible idi yakula bua bantu bavuabu babishe ku lufu. Bishima bionso ebi bivua bienzeke ku bukole bua Mukalenge Munene Yehowa.
Bakangata bafue babu ku dibisha dia ku lufu
3. Eliya wakapeta bukole bua kuenza tshinyi pakafua muana wa mukamba wa mu Salefata?
3 Pavua mupostolo Paulo ulonda muyuki udi usankisha wa lulamatu luakaleja bantemu ba Yehowa ba kumpala kua bena Kristo, wakafunda ne: ‘Bakaji bakangata bafue babu ku dibisha dia ku lufu.’ (Ebelu 11:35; 12:1) Umue wa ku bakaji aba uvua mukamba mupele wa mu tshimenga tshia bena Foinike tshia Salefata. Bualu mukamba eu wakakidila Eliya muprofete wa Nzambi, Nzambi wakenza tshishima bua bukula ne mafuta ende kabijiki mu tshikondo tshia nzala ivua mifuanyike kumushipa yeye ne muanende wa balume. Kadi pakalua muana eu kufua, Eliya wakamuladika pa bulalu, kusambilaye ne kudiolola pambidi pa muana eu misangu isatu, ne wakadidila Nzambi wamba ne: ‘Yehowa, Nzambi wanyi, ndi nkusengelela ne: pingaja muoyo wa muana eu munda muende kabidi.’ Nzambi wakapingaja muoyo munda mua muana eu. (1 Bakelenge 17:8-24) Elabi meji disanka divua nadi mukamba eu! Bua ditabuja diende, bakamubishila muanende munanga—ke dibika ku lufu dia kumpala didibu bafunde mu Bible!
4. Ntshishima kayi tshiakenza Elisha mu Shunema?
4 Mukaji mukuabu wakangata mufue wende ku dibisha dia ku lufu uvua musombele mu tshimenga tshia Shunema. Uvua mukaji wa muntu mukulakaje mukuabu, ne wakenzela muprofete Elisha ne musadidi wende malu mimpe. Bua muanda eu, wakalela muana wa balume. Kadi kunyima kua bidimu bia bungi, mukaji eu wakabikidisha muprofete eu ne pakaluaye wakasangana muana eu mufue mu nzubu. Kunyima kua Elisha mumane kusambila ne muenze amue malu, “mubidi wa muana wakakuata luya.” Muana ‘wakela nyashi misangu muanda-mutekete, wakabulula mêsu ende.’ Kakuyi mpata, dibika edi diakasankisha bikole mamu eu ne muanende. (2 Bakelenge 4:8-37; 8:1-6) Kadi nebikale ne disanka dia bungi pababishabu pa buloba mu “dibisha dia ku lufu didi ditamba buimpe,” diabapesha mushindu wa kushala ne muoyo kabayi bafua kabidi! Nebuikale bualu bua kuelela Yehowa tuasakidila, Nzambi wa dinanga udi mulongolole dibika dia bafue!—Ebelu 11:35.
5. Ntshishima kayi tshiakenzeka nansha pakavua Elisha mufue?
5 Nansha kunyima kua Elisha mumane kufua ne bamujike, Nzambi wakavuija mifuba yende ne bukole ku spiritu munsantu. Tudi tubala ne: ‘Pakadi [bena Isalele] bajika muntu mukuabu, bakatangila tshisumbu tshia bena Moaba; bakimansha tshitalu tshiende mu lukita lua Elisha; pakalengangana tshitalu tshiende ne mifuba ya Elisha, wakafululuka, wakimana ku makasa ende.’ (2 Bakelenge 13:20, 21) Muntu au uvua ne bua kuikala mukeme ne musanke bikole! Ela meji disanka dituikala nadi pikala Yehowa Nzambi mua kujula bananga betu bilondeshile dilongolola diende ditu kadiyi mua kupangila!
Muana wa Nzambi wakajula bafue
6. Ntshishima kayi tshiakenza Yezu pabuipi ne musoko wa Naina, ne mmunyi muditshi mua kutuambuluisha?
6 Yezu Kristo Muana wa Nzambi mmutupeshe bijadiki bikole bidi bitusaka bua kuitaba ne: bafue badi mua kubika ne ditekemena dia kupeta muoyo wa tshiendelele. Bualu buakenzeka pabuipi ne musoko wa Naina budi mua kutuambuluisha bua kujingulula ne: bukole bua Nzambi budi mua kuenzeja tshishima tshia mushindu’eu. Umue musangu, Yezu wakasambakena ne bantu benda badila bambule tshitalu tshia nsongalume mukuabu, batangile ku nkita. Uvua muana umuepele wa munga mukaji mukamba. Yezu wakambila mukamba eu ne: “Kudidi.” Pashishe wakalenga tshituadilu tshia tshitalu ne kuambaye ne: ‘Nsongalume, ndi nkuambila ne: Bika!’ Uvua mufue e kusomba ne kubangaye kuakula. (Luka 7:11-15) Bushuwa, tshishima etshi tshidi tshikolesha dishindika dietu dia se: ditekemena dia dibika dia bafue mbualu bulelela.
7. Ntshinyi tshiakafikila muana wa bakaji wa Yailo?
7 Tangila kabidi muanda wakafikila Yailo, mulombodi wa nsunagoga wa mu Kapenuma. Wakalomba Yezu bua kuyaye kuambuluisha muanende munanga wa bakaji wa bidimu 12 ukavua upunga ne lufu. Mutantshi eu kuluabu kuambila Yailo ne: muana wafu. Yezu wakambila Yailo bua ikale ne ditabuja nansha muvuaye ne kanyinganyinga kakole. Wakaya nende ku nzubu kuende, kuvua bantu bunguile badila miadi. Bantu aba bakaseka Yezu pakabambilaye ne: “Muana kena mufue to, udi mulale.” Uvua mufue tshia bushuwa, kadi Yezu ukavua pa kuleja ne: badi mua kujula bantu ku lufu anu mudibu mua kubajula ku tulu tukole. Kukuataye muana wa bakaji eu ku tshianza, kuambaye ne: “Muana, juka!’ Wakajuka diakamue, “baledi bende kukemabo” ne disanka kadiyi kuamba. (Mâko 5:35-43; Luka 8:49-56, MMM) Kakuyi mpata, bena mu mêku a bungi ‘nebakeme’ pabishabu bananga babu bakadi bafue bua kuikalabu ne muoyo mu mparadizu pa buloba.
8. Ntshinyi tshiakenza Yezu ku lukita lua Lazalo?
8 Lazalo uvua mufue kukavua matuku anayi pakalua Yezu ku lukita luende ne kuambaye bua bumbushe dibue divua ku mushiku walu. Yezu mumane kuenza disambila patoke bua bantu bamanye ne: uvua wenza malu ne bukole bua kudi Nzambi, wakamba ne dîyi dikole ne: ‘Lazalo, lopoka.’ Ne wakalopoka! Bianza ne makasa ende bitshivua bijingila bilamba bivuabu bamujike nabi, ne mpala wende uvua mujingila tshitambala. Ke Yezu kuambaye ne: ‘Numujingulule, aye biende.’ Pakamonabu tshishima etshi, bantu ba bungi bavua balue kusamba bana babu ne Lazalo, Mariya ne Mâta, bakitabuja Yezu. (Yone 11:1-45) Muyuki eu kawenaku ukupesha ditekemena dia se: Nzambi udi mua kujula bananga bebe ku lufu bua kuikalabu ne muoyo mu bukua-panu buende bupiabupia anyi?
9. Bua tshinyi tudi mua kuikala bajadike ne: mpindieu Yezu udi mua kubisha bafue?
9 Pavua Yone Mubatiji mu buloko, Yezu wakamutumina mukenji eu udi ukolesha ku muoyo ne: “Bafofo badi batabala, . . . bafue badi babishibua ku lufu.” (Matayo 11:4-6) Bu muvua Yezu mubishe bafue pavuaye pa buloba, bushuwa mpindieu udi mua kubabisha bualu udi muntu wa mu nyuma udi Nzambi mupeshe bukole. Yezu udi ‘dibika ne muoyo,’ ne bidi bitukolesha bua kumanya se: mu matuku makese kumpala eku ‘bonso badi mu nkita [ya tshivulukidi, NW] nebumvue dîyi diende, nebajuke’!—Yone 5:28, 29; 11:25.
Miyuki mikuabu ya bantu bakabika ku lufu idi ikolesha ditabuja dietu
10. Mmunyi muudi mua kumvuija dibika dia kumpala dia muntu uvua mupostolo mubishe?
10 Pakatuma Yezu bapostolo bende bua kuyisha lumu lua Bukalenge, wakabambila ne: “Nubishe bafue.” (Matayo 10:5-8) Kadi bua kuenza mudimu eu bavua ne bua kueyemena bukole bua kudi Nzambi. Mu Yopa mu 36 B.B., muntu mukaji mukuabu uvua utshina Nzambi, diende Dôka (Tabita), wakafua. Ku malu mimpe avuaye muenze tudi tutela kabidi bilamba bivuaye utelela bakaji bakamba bavua mu dikenga, ne bakaji aba bakadila bikole pakafuaye. Bayidi bakalongolola tshitalu tshiende bua kutshijika, ne bakatuma bantu bua kubikila mupostolo Petelo, pamu’apa bua kuluaye kubasamba. (Bienzedi 9:32-38) Petelo wakapatula bantu bonso bavua mu nzubu wa kuulu, kusambilaye, ne pashishe kuambaye ne: “Tabita, bika.” Tabita wakabulula mêsu ende, wakasomba ne kukuataye ku tshianza tshia Petelo, ne yeye kumujula. Dibika edi dia kumpala dia muntu uvua mupostolo mubishe diakasaka bantu ba bungi bua kulua bena kuitabuja. (Bienzedi 9:39-42) Didi ditupesha tshijadiki tshikuabu tshidi tshitusaka bua kutekemena dibika dia bafue.
11. Mmuntu kayi wa ndekelu wakabishabu udi Bible mulonde bualu buende?
11 Dibika ku lufu dia ndekelu didibu bafunde mu Bible ndia mu Toa. Pakapitshilamu Paulo mu luendu luende luisatu lua bu-misionere, wakalepesha muyuki wende too ne mundankulu. Bua dipungi ne pamu’apa bua luya lua miendu mivule ne tshipuidiji tshia bungi bua bantu bavua mu nzubu muvuabu basangile, nsongalume mukuabu, diende Eutuko, wakalala tulu ne kukulukaye panshi mumbukile ku dididishi dia tshisasa tshisatu tshia nzubu. “Bakamuambula mufue,” kayiku nansha mufue tshipuka to. Paulo wakadiela pambidi pa Eutuko, kumupukilaye, ne pashishe kuambilaye bantu bavuapu ne: “Kanuteki diyoyo, udi ne muoyo munda.” Paulo uvua usua kuamba ne: nsongalume eu uvua mupetulule muoyo. ‘Mitshima ya [bantu bavuapu] yakatamba kusanka.’ (Bienzedi 20:7-12) Lelu, basadidi ba Nzambi batu bakankamana bikole bua kumanya ne: bantu bavuabu nabu kale mu mudimu wa Nzambi nebamone muakumbana ditekemena dia dibika dia bafue.
Dibika dia bafue nditekemena divua nadi bantu katshia ku kale
12. Nditabuja kayi diakajikula Paulo pavuaye kumpala kua Felika Ngovena wa bena Lomo?
12 Pavuabu balumbuluisha Paulo kumpala kua Felika ngovena wa bena Lomo, wakajadika ne: ‘Ndi ngitabuja malu onso adi mu Mikenji ya Nzambi ne akafunda baprofete; ndi ne ditekemena kudi Nzambi ne: dibika dia bafue nedikaleku, ne dia bakane ne dia babi.’ (Bienzedi 24:14, 15) Mmushindu kayi udi bimue bitupa bia Dîyi dia Nzambi, bu mudi ‘Mikenji,’ biakula bua dibika dia bafue?
13. Bua tshinyi tudi mua kuamba ne: Nzambi uvua wakula bua dibika dia bafue pakamanyishaye mulayi wa kumpala?
13 Nzambi nkayende wakakula bua dibika dia bafue pakafilaye mulayi wa kumpala mu Edene. Pavuaye ufundila “nyoka au wa kale” anyi Satana Diabolo tshibawu, Nzambi wakamba ne: “Nenteke lukuna pankatshi pebe ne mukaji, ne pankatshi pa dimiinu diebe ne dimiinu diende. Yeye neakuboze ku mutu ne wewe neumuboze ku tshikankanyi.” (Buakabuluibua 12:9; Genese 3:14, 15, NW) Kuboza tshikankanyi tshia dimiinu dia mukaji kuvua kumvuija kushipa Yezu Kristo. Bu muvua Dimiinu adi ne bua kulua kuboza nyoka ku mutu panyima, bidi biumvuija ne: Kristo uvua ne bua kubika ku lufu.
14. Mmu ngumvuilu kayi mudi Yehowa kayi ‘Nzambi wa bafue, kadi muikale Nzambi wa badi ne muoyo’?
14 Yezu wakamba ne: ‘Mose menemene wakatumanyisha bua dibika dia bafue mu luseke ludi luamba bualu bua Katshi, yeye udi ubikila Mukalenge [Yehowa] ne: Nzambi wa Abalahama ne Nzambi wa Isaka ne Nzambi wa Yakoba. Yeye kêna Nzambi wa bafue, udi Nzambi wa badi ne muoyo; bualu bua bonso badi ne muoyo bua bualu buende.’ (Luka 20:27, 37, 38; Ekesode 3:6) Abalahama, Isaka ne Yakoba bakavua bafue, kadi dibabisha ku lufu divua Nzambi mulongolole divua bualu bulelela menemene buvua ne bua kukumbana, ke bua tshinyi ku mêsu kuende bavua anu bu bantu badi ne muoyo.
15. Bua tshinyi Abalahama uvua ne tshijadiki tshivua tshimusaka bua kuitaba dibika dia bafue?
15 Abalahama uvua ne tshijadiki tshivua tshimusaka bua kutekemena dibika dia bafue, bualu pakavuabu bakulakaje bikole yeye ne mukajende Sala, kabayi ne bukole bua kulela bana, benze anu bu bantu bafue, mu tshishima Nzambi wakabapingajila bukole bua kulela. Bualu ebu buvua buenze bu dibisha muntu ku lufu. (Genese 18:9-11; 21:1-3; Ebelu 11:11, 12) Pakakumbaja muanabu Isaka bidimu bu 25, Nzambi wakambila Abalahama bua kumulambulaye muana eu. Kadi pakavua Abalahama pa kushipa Isaka, muanjelu wa Yehowa wakamukanda. Abalahama uvua ‘mumanye ne: Nzambi udi ne bukole bua kumubisha munkatshi mua bafue mene, kuakamuangataye kabidi mu tshifuanyikiji.’—Ebelu 11:17-19; Genese 22:1-18.
16. Abalahama mmufue mpindieu muindile tshinyi?
16 Abalahama uvua mutekemene dibika dia bafue dienzeka mu bukokeshi bua Masiya, Dimiinu divuabu balaye. Patshivuaye mu diulu, Muana wa Nzambi wakamona ditabuja divua nadi Abalahama. Nenku pakaluaye pa buloba, Yezu Kristo wakambila bena Yuda ne: “Tatu wenu Abalahama wakatamba kusanka bua kutangila dituku dianyi; wakadimona, wakasanka.” (Yone 8:56-58; Nsumuinu 8:30, 31) Mpindieu Abalahama ukadi mufue, mmuindile dibika dia bafue dienzeka pa buloba mu Bukalenge bua Nzambi bulombola kudi Masiya.—Ebelu 11:8-10, 13.
Malu adi Mikenji ne Misambu bijadika
17. Mmunyi muvua ‘malu adi mu Mikenji’ makule bua dibika dia Yezu Kristo?
17 Ditekemena dia dibika dia bafue divua nadi Paulo divua dipetangana ne ‘malu adi mu Mikenji.’ Nzambi wakambila bena Isalele ne: ‘Nulue bienu ne bintu binudi nupuola diambedi kudi muakuidi; [mu dia 16 Nisana] yeye neanyukule tshisumbu tshia bintu kumpala kua Yehowa, bualu bua kunuitabujija kudi Yehowa.’ (Lewitiki 23:9-14) Pamu’apa Paulo uvua mutume meji ku mukenji eu pakafundaye ne: ‘Kristo wakamana kubishibua ku bafue, bu mamuma a kukuama diambedi a bantu bakulala tulu mu lufu.’ Bu muvuaye “mamuma a kukuama diambedi,” Yezu wakabika ku lufu mu dia 16 Nisana 33 B.B. Pashishe, mu tshikondo tshia dikalaku diende [mu bumfumu], kuvua ne bua kuikala dibika dia bafue dia ‘mamuma a kukuama pashishe,’ mmumue ne: bayidi bende bela manyi a spiritu.—1 Kolinto 15:20-23; 2 Kolinto 1:21; 1 Yone 2:20, 27.
18. Mmunyi muakaleja Petelo ne: Misambu ikavua mimanyishe bua dibika dia Yezu ku lufu?
18 Misambu payi idi ijadika bua dibika dia bafue. Mu dituku dia Pentekoste wa mu 33 B.B., mupostolo Petelo wakatela mêyi a mu Musambu 16:8-11, wamba ne: ‘Davidi udi wamba bualu [bua Kristo] ne: Ngakamona Mukalenge [Yehowa] ku mêsu kuanyi matuku onso; bualu bua yeye udi ku tshianza tshianyi tshia balume bua meme tshiyi muzakale. Nunku mutshima wanyi wakasanka, ludimi luanyi luakamba disanka dianyi; ne bualu bukuabu, mubidi wanyi neulale ne ditekemena, bua wewe kuena ushiya muoyo wanyi mu [Hades], kuena ufila webe wa tshijila bua kubolaye.’ Petelo wakamba pende ne: ‘[Davidi] wakadianjila kutangila bualu ebu diambedi, wakamba bua dibika dia Kristo ku lufu ne: Kabakamushiya mu [Hades], mubidi wende kawakabola. Yezu eu, Nzambi wakamubisha ku lufu.’—Bienzedi 2:25-32.
19, 20. Ndîba kayi diakatela Petelo mêyi a mu Musambu 118:22, ne mmunyi muvua mêyi aa atangila lufu ne dibika dia Yezu?
19 Kunyima kua matuku, Petelo wakimana kumpala kua kabadi ka Sanedren ne kutelaye kabidi mêyi a mu Misambu. Pakamuebejabu mushindu uvuaye muondape mulema uvua mulombi wa ka-pa-luse, mupostolo eu wakamba ne: “Nuenu bonso ne tshisa tshijima tshia Israele numanye bimpe ne: muntu ewu mmuimane kumpala kuenu ne bukole mu dina dia Yezu Kristo wa mu Nazarete, unuvua bapopele pa mutshi wa tshibawu ne udi [Nzambi] mubishe ku bafue, amu mu dina diende yeye, ki mmu dina dia muntu mukuabo nansha. Yezu ndibue dinuvua nuenu bibaki balekele, ke didi dishale mpindiewu dibue dia mu ditumba. Bualu bua panu panshi, kakuena dina dikuabo dipa bantu, didi mua kutupandisha.”—Bienzedi 4:10-12, MMM.
20 Muaba eu Petelo wakatela mêyi a mu Musambu 118:22, kulejaye mudiwu akula bua lufu ne dibika dia Yezu. Bena Yuda bakapidia Yezu bualu bavua babasake kudi bamfumu ba bitendelelu biabu. (Yone 19:14-18; Bienzedi 3:14, 15) ‘Dilekela dia dibue kudi bibaki’ diakafikisha Kristo ku lufu, kadi ‘dilua dia dibue edi dia mu ditumba’ divua diumvuija dibishibua diende bua kuikalaye muntu wa mu nyuma udi ne butumbi mu diulu. Anu mukavua mufundi wa misambu mumanyishe, ‘mudimu au uvua wa Yehowa.’ (Musambu 118:23) Kuvuija “dibue” Mutu wa mu ditumba kuvua kumvuija kubandisha Yezu bua kuikalaye Mukalenge Musungula.—Efeso 1:19, 20.
Bakolesha kudi ditekemena dia dibika dia bafue
21, 22. Nditekemena kayi divua nadi Yobo didibu bafunde mu Yobo 14:13-15, ne mmunyi mudidi mua kukolesha badi bafuishe lelu’eu
21 Nansha mutudi katuyi banji kudimuena muntu udibu babishe ku lufu, tudi bamone imue miyuki ya mu Bible idi itujadikila bua dibika dia bafue. Nanku tudi mua kuikala ne ditekemena divua nadi muntu muakane Yobo. Pavuaye mu dikenga, wakadila ne: ‘Ngakadi kusua bua wewe [Yehowa] unsokoke mu [Sheol], bua wewe unsunguile tshikondo tshijalame ne bua wewe umvuluke! Biafua muntu, neikale ne muoyo kabidi anyi? Wewe neumbikile ne meme nengitabe kuudi; wewe neunjinge, meme mudimu wa bianza biebe.’ (Yobo 14:13-15) Nzambi ‘neajinge mudimu wa bianza biende,’ neajinge ne muoyo mujima bua kubisha Yobo. Muanda eu udi utupesha ditekemena dikole!
22 Muntu wa mu dîku dienu udi utshina Nzambi udi mua kubanga kusama bikole bu Yobo, peshi muluishi wetu lufu udi mene mua kumukuata. Aba badi bafuishe badi mua kudila ne kanyinganyinga anu bu muakadila Yezu pakafua Lazalo. (Yone 11:35) Kadi bidi bitukolesha bua kumanya ne: Nzambi neabikile ne bantu badiye muvuluke nebitabe! Nebikale anu bu bantu bafume ku luendu, kabayi basama anyi batapike, kadi bajima tumatuma.
23. Mmunyi mudi bamue baleje ne: mbeyemene ditekemena dia dibika dia bafue?
23 Lufu lua muena Kristo mukulakaje wa lulamatu luakasaka bena Kristo nende bua kufundila muanende ne: “Suaku witabe kanyinganyinga ketu kakole bua lufu lua mamuebe. Mu katupa kîpi emu netumuakidile paluaye ne muoyo, mulengele mpala ne muikale ne bukole bua mubidi!” Baledi bakafuisha muanabu wa balume bakamba ne: “Tudi batekemene ne muoyo kuulu-kuulu dituku diabika Jason! Pakenzakanaye, neamone Mparadizu uvuaye muindile katshia kuonso aku. . . . Bualu ebu nebutusake tuetu bavua bamunange bua kuikalapu petu dituku adi.” Bushuwa, tudi ne dianyisha dia bungi bua mudi ditekemena dia dibika dia bafue dikale bualu bulelela!
Diandamuna diebe didi tshinyi?
• Mmunyi mudi ditabuja dia se: Nzambi mmulongolole bua kubisha bafue mua kutuambuluisha?
• Mmalu kayi adibu bafunde mu Bible adi atusaka bua kutekemena dibika dia bafue?
• Bua tshinyi tudi mua kuamba ne: dibika dia bafue nditekemena divua nadi bantu katshia ku kale?
• Nditekemena kayi didi dikolesha ditudi mua kuikala nadi bua bafue?
[Nkonko ya dilonga]
[Tshimfuanyi mu dibeji 10]
Eliya wakabisha muana wa mukaji mukamba ne bukole bua kudi Yehowa
[Tshimfuanyi mu dibeji 12]
Pavua Yezu mubishe muana wa bakaji wa Yailo, baledi bende bakakema ne disanka kadiyi kuamba
[Tshimfuanyi mu dibeji 15]
Dituku dia Pentekoste wa mu 33 B.B., mupostolo Petelo wakajadika ne dikima ne: Nzambi uvua mubishe Yezu ku lufu