Bamanyishi ba Bukalenge badi balonda

Badi banange Yehowa ke badi ne mushinga ku mêsu kuende

LEBANONA mmumanyike katshia ku kale bua bubanji bua ku tshifukilu butu muomu. (Musambu 72:16; Yeshaya 60:13) Nangananga mitshi minene ya sedre ke ivua ne mushinga wa bungi, bantu bavua bayikeba bikole bua kuibaka nayi nzubu bualu mabaya ayi avua mimpe, ne avua ne dipembu dilenga ne kabidi alala bikole. Mu bidimu lukama bia kumpala, tshintu tshikuabu tshia mushinga wa bungi menemene tshiakafumina mu Lebanona. Evanjeliyo wa Mâko udi ulonda ne: “Bantu bavule bavua bumvue bivua [Yezu] wenza, kuluabo kudiye” bafumine mu Tulo ne Sidona, misoko ivua kale mu tshitupa tshia Lebanona.​—Mâko 3:8, MMM.

Bia muomumue lelu, Lebanona utshidi ukuama mamuma adi ne mushinga wa bungi ku mêsu kua Yehowa. Malu adi alonda aa adi ajadika muanda eu.

• Bakambila nsongalume kampanda Ntemu, diende Wissam, bua kuenzaye muyuki wa minite 30 kumpala kua balongi ba mu kalasa kabu. Wissam wakamona ne: tshivua ne bua kuikala mushindu muimpe wa kuyisha. Nunku wakangata mukanda wa La vie: comment est-elle apparue? Évolution ou création? ne kulongololaye muyuki uvua ne tshiena-bualu tshivua tshiakula bua difuka dia bintu. Kadi pakamona mulongeshi wa ba Wissam muyuki eu, wakambila Wissam bua kuulepesha too ne ku minite 45, bualu uvua ne tshiena-bualu tshia mushinga.

Pakatuadija Wissam kuenza muyuki eu, mulongeshi wakanji kumuimanyika bua kutumaye muntu aye kubikila mulombodi wa tulasa. Katantshi aka mulombodi kufikaye, Wissam kutuadijilula muyuki wende. Pakateleja pende mulombodi eu nkonko ivua Wissam mutuadije nayi muyuki wende, biakamusankisha bikole, kuambaye ne: badi ne bua kupesha mulongi yonso muyuki eu mutentula ku biamu (anyi fotokopi).

Katantshi kakese, mulongeshi mukuabu uvua upita, kumonaye muvua bantu bonso bikale ne disanka mu kalasa, kuebejaye bua kumanya tshivua tshienzeka. Pakamuambilabu, wakebeja bua kumanya tshivua Wissam ujadika, nne ndifukibua anyi didimenena dia bintu. Kumuandamunabu ne: “difukibua dia bintu.” Pakamanyaye ne: Wissam uvua Ntemu wa Yehowa, mulongeshi au wakambila balongi ne: “Nenumvue mu muyuki wende ne: bena meji badi bitaba difukibua dia bintu, kadi ki ndidimenena diabi to.”

Mulongeshi eu wakapeta mukanda wa Création ne ke ukavuaye ulongesha nawu mu iniversite! Kumpala kua kuyaye, wakalomba bua kuluaye ne balongi bende dituku divua dilonda bua Wissam abenzele pabu muyuki wende. Muanda au wakambuluisha kabidi bua kumanyisha malu malenga a Yehowa.

• Nina, nsongakaji wa bidimu 22, uvua ne nyota ya mâyi a bulelela. Dimue edi muana wa tuatuende mukaji wakamupesha Bible ne kumubuejijaye mu nzambi wa bena Mpenta (anyi ba-Pantekotiste). Nina wakabala Bible ne disanka ne kumvuaye ne: bena Kristo badi ne bua kuyisha, ke kutuadijaye kuyisha bantu bavuaye mumanye. Muntu yonso uvuaye uyikila nende uvua umukonka ne: “Udi Ntemu wa Yehowa anyi?” Bivua bimukemesha bikole.

Kunyima kua bidimu bisambombo, Bantemu ba Yehowa bakalua ku nzubu kua Nina ne kumuyishabu bua Bukalenge bua Nzambi. Musangu wa kumpala, wakateta bua kubipisha malongesha a Bantemu. Kadi wakamona ne: mandamuna abu onso avua a meji ne onso mikale afumina mu Bible.

Malu akalua Nina kulonga (dîna dia Nzambi, Yehowa; mabenesha atutuadila Bukalenge ne bikuabu) akamujadikila ne: uvua mupete bulelela. Wakadilambula kudi Nzambi ne kutambulaye. Nina mmuenze mudimu wa ku dîba ne ku dîba bidimu muanda-mutekete biapitshi ebi. Bulelela, Yehowa udi ubenesha bantu badi bamunange tshia bushuwa.​—1 Kolinto 2:9.