Mmunyi muutu ujikija bilumbu?

DITUKU dionso, tutu tupetangana ne bantu ba mishindu ne mishindu. Misangu mivule patutu tumona bantu aba, tutu tumvua disanka ne tupeta mishindu mipiamipia ya dimona malu. Kadi imue misangu, dipetangana ne bantu ditu ditujudila bilumbu binene anyi tualu tukese menemene. Mushindu utudi tupita ne bilumbu (binene ne bikese) udi ne tshidiwu wenza mu meji etu ne mu mutshima wetu, kabidi ne pa makanda etu a mu nyuma.

Kuenza muetu muonso bua kujikija bilumbu mu mushindu muimpe nekutushiye ne makanda a mubidi mimpe ne nekutuambuluishe bua kusomba mu ditalala ne bakuetu. Lusumuinu lukuabu lua kale ludi luamba ne: ‘Mutshima mupole udi muoyo wa mubidi.’​—Nsumuinu 14:30.

Mbishilangane kule ne kule ne mêyi adi kaayi kuela mpata aa: “Muntu udi kayi mumanye mua kudikanda udi bu musoko wakashimbulabo, udi kauyi ne ngumbu.” (Nsumuinu 25:28) Nnganyi wa kutudi udi mua kuanyisha bua meji mabi atupite makanda ne atufikishe ku dienza malu adi mu mishindu idi kayiyi miakanyine, idi mua kutukebela tuetu ne kabidi kukebela bantu bakuabu makenga? Kuandamuna bualu ne tshiji tshikole kudi mua kutukebela makenga.Yezu wakatubela mu Muyuki wa pa Mukuna bua kukonkonona lungenyi luetu bualu ludi mua kutuambuluisha bikole bua kujikija bimpe bilumbu bionso bitudi mua kuikala nabi ne bantu netu. (Matayo 7:3-5) Pamutu pa tuetu kujana bakuabu, mbimpe tuetu kuela meji bua mushindu utudi mua kukeba ne kulama nabu bulunda nansha mudibu ne ngenyi ne ngikadilu mishilangane ne yetu.

Lungenyi luetu

Bua kujikija tshilumbu kampanda tshiudi mumvue anyi tshidi tshijuke, bualu bua kumpala butudi ne bua kumanya mbua se: meji ne ngenyi mibi bidi mua kutuvuila. Bible udi utuvuluija ne: buonso buetu tutu tuenza mpekatu ‘ne tupanga kupeta butumbi kudi Nzambi.’ (Lomo 3:23) Kabidi, busunguluji budi mua kutuleja ne: ki mmuntu mukuabu udi mukebeshe tshilumbu etshi nansha. Bua bualu ebu, lekela tuanji kukonkonona tshiakenzekela Yona.

Bilondeshile dîyi divua Yehowa mutume, Yona wakaya mu tshimenga tshia Ninewe bua kumanyisha benamu ne: Yehowa ukavua pa kubabutula. Tshipeta tshimpe tshiakapatuka tshivua tshia se: bantu bonso ba mu tshimenga tshia Ninewe bakanyingalala ne kuitabujabu Nzambi mulelela. (Yona 3:5-10) Yehowa wakamona ne: bivua biakanyine kubafuila luse bu muakanyingalalabu bua mibi yabu, nunku wakabenga kubabutula. “Kadi muanda eu wakafikisha Yona munda bikole, ne yeye wakakuatshika tshiji.” (Yona 4:1) Bualu buakenza Yona bua luse luvua Yehowa muleje bantu aba budi bukemesha. Bua tshinyi Yona wakafikila Yehowa munda? Bidi bimueneka ne: Yona ukavua uditatshisha bikole anu bua bivuaye umvua mu muoyo wende, wela meji ne: uvua mujimije mushinga wende ku mêsu kua bantu. Wakapanga kuangata luse lua Yehowa ne mushinga. Yehowa wakenza bua Yona kupeta dilongesha mu mushindu muimpe. Dilongesha edi diakamuambuluisha  bua kushintulula lungenyi luende ne kumanya mushinga mutambe bunene wa luse lua Nzambi. (Yona 4:7-11) Mbimueneke patoke ne: Yona ke uvua ne bua kushintulula lungenyi luende, ki n’Yehowa to.

Tudiku petu ku misangu ne bua kushintulula bia muomumue lungenyi luetu mu bualu kampanda anyi? Mupostolo Paulo udi utubela ne: ‘Mu bunême muntu ne muntu ateke mukuabu kumpala.’ (Lomo 12:10) Ntshinyi tshivuaye usua kuamba? Udi utukankamija mu mushindu kampanda bua kuikala ne meji mimpe ne kuenzela bena Kristo netu malu ne kanemu kakole, kubangata ne mushinga. Bidi biumvuija kumanya ne: muntu yonso udi ne bukenji bua kudisunguila tshidiye musue. Paulo udi kabidi utuvuluija ne: ‘Muntu ne muntu neadiambuile bujitu buende.’ (Galatia 6:5) Nunku, kumpala kua bilumbu kutufikisha ku dikosangana makasa, nebikale bimpe bushuwa bua tuetu kukonkonona ni bidi bikengela kuakaja lungenyi luetu. Tudi ne bua kudienzeja bikole bua kuleja meji a Yehowa ne kulama ditalala ne bakuabu badi banange Nzambi bulelela.​—Yeshaya 55:8, 9.

Mushindu utudi tupita ne bilumbu

Fuanyikijabi ne: bana batekete babidi badi bafuilakana tshintu tshia kunaya natshi, muana yonso utshikoka bikole. Badi batandangana ne baluangana mvita too ne padi ndekelu wa bionso umue wa kudibu uteketa anyi muntu mukuabu ulua kubasunga.

Mukanda wa Genese udi utulondela ne: Abalahama wakumvua ne: matandu avua majuke pankatshi pa balami ba bimuna biende ne ba bimuna bia Lota, muana wa muanabu. Abalahama wakadiyila kudi Lota ne kuambaye ne: “Kakuikadi matandu pankatshi petu nebe, nansha pankatshi pa balami ba bimuna bianyi ne ba bimuna biebe, bualu tudi bena muntu.” Abalahama uvua mudisuike bua kubenga kulekela matandu anyanga malanda abu. Ntshinyi tshiakenzeka? Wakitaba bua kulekela too ne bukenji buvuaye nabu bua kusungula tshintu kumpala (bu muvuaye muntu mukole); uvua mudilongolole too ne bua kulekela bimue bintu. Abalahama wakanyishila Lota bua kusungulaye muaba uvuaye ujinga kuya kusombela ne dîku diende ne bimuna biende. Ke Lota kusungula tshitupa tshia mu Sodoma ne Amola, muvua bisonsa bisampila bikole. Nenku Abalahama ne Lota bakashiyangana mu ditalala.​—Genese 13:5-12, MMM.

Bua tuetu kusomba mu ditalala ne bakuabu, tutuku badilongolole bua kuenza malu mushindu wakenza Abalahama anyi? Muyuki udi Bible ulonda eu udi utupesha tshilejilu tshimpe tshia tuetu kulonda patudi ne tshilumbu kampanda tshia kujikija. Abalahama wakasengelela Lota ne: “Kakuikadi matandu pankatshi petu nebe.” Dijinga dilelela dia Abalahama divua dia kujikija tshilumbu etshi mu bulunda. Dilomba dia mushindu’eu dia kushala mu ditalala didi mua kuambuluisha bua kujikija matandu onso bulelela. Abalahama wakamba kabidi ne: “bualu tudi bena muntu.” Bua tshinyi kushipa malanda a mushinga wa bungi nunku anu bua tshidi muntu nkayende musue anyi bua lutambishi? Abalahama wakatamba kuimanyina pa bualu buvua ne mushinga. Wakenza nunku ne didinemeka ne bunême, eku muikale wangata muana wa muanabu ne mushinga.

Nansha mutu malu ajuka ne alomba bua bantu bakuabu kulua kuajikija, bitu bitambe buimpe kuajikija pankatshi pa bantu babidi nkayabu. Yezu udi utukankamija bua kuikala ba kumpala bua kukeba ditalala ne muanetu, pa kumulomba luse padibi bikengela kuenza nunku. * (Matayo 5:23, 24) Bidi bikengela kuikala ne budipuekeshi anyi bupuekele. Petelo wakafunda ne: ‘Nudiluatshishe ne bupuekele, bua kukuatshishangana; bualu bua Nzambi udi upidia badi badisue, kadi [“udi ufuila bapuekele luse,” MML].’ (1 Petelo 5:5) Mushindu utudi tuenzela bena Kristo netu malu udi utangila buludi malanda etu ne Nzambi.​—1 Yone 4:20.

Mu tshisumbu tshia bena Kristo, badi mua kutulomba bua kulekela bualu kampanda budi ku  bukenji buetu, bua kumona mua kushala mu ditalala. Ba bungi badi balue mpindieu Bantemu ba Yehowa mbabuele mu dîku dia Nzambi dia batendeledi bende balelela mu bidimu bitanu bishale ebi. Bushuwa bualu ebu budi butusankisha bikole! Malu atudi tuenza adi mua kubakudimuna buobu ne bakuabu kabidi badi mu tshisumbu. Ke bualu bua mushinga butudi ne bua kukonkonuena ne ntema mushindu utudi tujikija lutetuku anyi tupitshisha kapepa, kukonkonona malu anyi mudimu bitudi tuenza, bikale tuangata ne mushinga mushindu udi bakuabu mua kutumona. Bimue bienzedi bietu anyi mêyi etu bidiku mua kumueneka bibi ne nunku kulenduisha bakuabu anyi?

Mupostolo Paulo udi utuvuluija ne: ‘Malu onso adi mimpe a kuenza, kadi malu onso kaena atukuatshisha; malu onso adi mimpe a kuenza, kadi malu onso kaena atudiundisha. Muntu kakebi mua kudisankisha, kadi akebe mua kusankisha mukuabu.’ (1 Kolinto 10:23, 24) Bu mutudi bena Kristo, tudi tuditatshisha ne muoyo umue bua kukolesha dinanga ne buobumue bua bana betu bena Kristo.​—Musambu 133:1; Yone 13:34, 35.

Tuikalayi ne mêyi adi asanguluja

Mêyi adi mua kuambuluisha bikole bua kujikija bilumbu. ‘Mêyi malengele adi bu dikatshi dia buitshi, adi mashemakane ku muoyo ne adi asanguluja mubidi.’ (Nsumuinu 16:24) Muyuki wa Gideona udi uleja muakepukaye mvita ne bena Efelayima, udi ujadika ne: lusumuinu elu ludi luamba bulelela.

Pavua Gideona mu mvita mikole ne bena Midiyana, wakabikila tshisa tshia Efelayima bua kulua kumuambuluisha. Kadi mvita mimane kujika, bena Efelayima bakakudimukila Gideona ne kumukanyina bikole bualu kavua mubabikile patshivua mvita ku ntuadijilu to. Bible udi uleja ne: “bakamutandisha bikole.” Gideona wakabakudimuna ne: ‘Bualu kayi bungakuenza budi butamba bunuakuenza? Kupuola kua tumuma tua mvinyo tua Efelayima kakuena kupita kupuola kua tumuma tua Abiezê buimpe anyi? Nzambi wakafila bana ba mukalenge wa Midiyana, Oleba ne Zêbe, mu bianza bienu; meme ndi mumanye mua kuidikija bualu buanyi ne bualu buenu anyi?’ (Balumbuluishi 8:1-3) Gideona wakepuka tshivua mua kulua mvita ya kabutu ya bisa bua mêyi ende masungula bimpe ne mapole. Bena mu tshisa tshia Efelayima bavua mua kuikala badimone ne mushinga wa bungi ne lutambishi mu tshilumbu etshi. Kadi, abi kabiakapangisha Gideona bua kudienzeja bua kujikija bualu ebu mu ditalala nansha. Tudiku petu mua kuenza mushindu wa muomumue anyi?

Bantu bakuabu badi mua kutukuatshila tshiji munda ne kutukebela bilumbu. Ikala mumanye ne: badi ne muabu mudibu badiumvua anyi mudibu bena meji, ne enza bua kumvua bidibu bamba. Tudiku mua kuikala mu mushindu kampanda benze bualu budi bubafikishe ku didiumvua mushindu’eu anyi? Bikalabi nanku, bua tshinyi kubenga kuitaba tshietu tshilema tshituvua benze tshidi tshijudije tshilumbu tshidi panshi etshi ne kuleja mutudi tubungama petu bua bualu ebu? Mêyi makese mimpe a meji adi mua kuakajilula malanda adi manyanguke. (Yakobo 3:4) Bamue badi babungame badi mua kuikala anu dijinga ne mêyi etu mimpe. Bible udi uleja ne: ‘pikalaku kakuyi nkunyi, kapia kadi kajima.’ (Nsumuinu 26:20) Mêyi masungula bimpe mapatula mu mushindu muimpe adi mua ‘kutuyisha tshiji’ ne kusanguluja muntu.​—Nsumuinu 15:1, MMM.

Mupostolo Paulo udi wamba ne: “Binuamanya mua kuenza nunku mu bienzedi bienu, nuikale ne bantu bonso ditalala.” (Lomo 12:18) Bulelela katuena ne bukokeshi pa mushindu udi bakuabu badiumvua anyi bela meji nansha, kadi tudi ne bua kuenza bua ditalala dikaleku. Pamutu pa tuetu kulekela mandamuna etu mabi anyi adi bakuabu bafila bua dipanga bupuangane atutonda, tudi ne bua kudienzeja bua kutumikila mikenji idi mishindamene pa Bible. Kujikija bilumbu mu mushindu udi Yehowa utulongesha bua kubijikija, nekutupe ditalala ne disanka dia bungi.​—Yeshaya 48:17.

[Mêyi adi kuinshi]

[Tshimfuanyi mu dibeji 24]

Tutu tutamba kuenzeja bakuabu bua bitabe anu tshitudi tuetu basue anyi?

[Tshimfuanyi mu dibeji 25]

Abalahama wakashiya tshilejilu tshimpe tshia kulekela malu makuabu bua kumona mua kujikija tshilumbu