Nkonko ya babadi

Yeshaya nshapita wa 53 udi ne mulayi mumanyike bimpe udi wakula bua Masiya. Mvese wa 10 (NW) udi wamba ne: “Yehowa nkayende wakumvua disanka bua kumuzaza; wakamusamisha.” Mêyi aa adi asua kumvuija tshinyi?

Mbipepele bua kumona tshidi lukonko elu lujukile bua Yeshaya 53:10. Bena Kristo balelela kabena bela meji ne: Nzambi wetu wa luse eu ne wa dinanga udi mua kumvua disanka bua kuzaza anyi kusamisha muntu yonso nansha. Bible udi utupesha bijadiki bidi bitusaka bua kuitaba ne: Nzambi kêna umvua disanka bua kukengesha muntu udi kayi ne bualu to. (Dutelonome 32:4; Yelemiya 7:30, 31) Mu bidimu nkama mivule bikadi bipite ebi Yehowa udi mua kuikala mulekele makenga bua malu adi umvuangana ne meji ne dinanga diende. Kadi kavuaku mukebele Muanende munanga Yezu makenga nansha. Nanku ntshinyi menemene tshidi mvese eu usua kuamba?

Bushuwa, tudi mua kupeta tshidibi biumvuija bu tuetu mua kubala mvese eu mujima ne kutangila bimpe miaba ibidi idi muaku eu “disanka” umueneka. Yeshaya 53:10 udi wamba ne: “Yehowa nkayende wakumvua disanka bua kumuzaza; wakamusamisha. Wewe muteke anyima wende bu mulambu wa dipila, neamone ndelanganyi yende, nealepeshe matuku ende, ne tshidi disanka dia Yehowa netshikumbane mu tshianza tshiende.”

Lungenyi lunene lua mu Bible ludi luleja ne: “disanka dia Yehowa” didibu batele ku ndekelu kua mvese eu ndia kukumbaja dilongolola diende ku diambuluisha dia Bukalenge. Pakumbaja Yehowa dilongolola diende edi, bualu ebu nebubingishe bumfumu buende ne nebufile mushindu wa kumbushila bantu bena butumike mpekatu udibu bapiane, mpekatu yetu mene. (1 Kulondolola 29:11; Musambu 83:18; Bienzedi 4:24; Ebelu 2:14, 15; 1 Yone 3:8) Bua bionso ebi kuenzeka bivua bilomba bua Muana wa Nzambi alue muntu pa buloba ne afile mulambu bua kupikula bantu. Anu mutudi bamanye, bua kufikilaku Yezu wakakenga. Bible udi utuambila ne: “wakayila ditumikila ku malu akakengeye n’au.” Nanku makenga au akambuluisha Yezu.​—Ebelu 5:7-9.

Yezu uvua mudianjile kumanya ne: njila mulenga uvuaye ne bua kulonda uvua ne bua kuikala ne amue makenga. Bualu ebu budi bumuenekela bimpe mu mêyi ende adi mu Yone 12:23, 24 (MMM), atudi tubala ne: “Diba dia kutumbisha Muana wa muntu ndimane kukumbana. Bulelela, bulelela, ndi nnuambila ne: lutete lolo kaluyi lumate mu buloba, kaluyi lufue, ludi lushala nkayalu; kadi lolo lufue, ludi lukuama bimuma bivule.” Bushuwa, Yezu uvua mumanye ne: uvua ne bua kushala ne lulamatu, kufika too ne ku lufu. Bible udi utungunuka wamba ne: “‘Mpindiewu muoyo udi undubakana. Ngambe tshinyi? Tatu, umpandishe ku bualu budi busua kungenzekela mpindiewu. Kadi bualu ebu ke bundi mufikile diba edi. Tatu, tumbisha dina diebe.’ Ke diyi kumvuika mu diulu ne: ‘Nkadi muditumbishe, nenditumbishe tshiakabidi.’”​—Yone 12:27, 28, MMM; Matayo 26:38, 39.

Mêyi aa ke adi mua kutuambuluisha bua kumvua bimpe Yeshaya 53:10. Yehowa uvua mumanye bimpe ne: mu malu avua ne bua kufikila Muanende muvua ne bua kuikala dimuzaza mu ngumvuilu kampanda. Kadi bu muvuaye mumanye bualu bunene buimpe menemene buvua ne bua kufumina ku dimuzaza edi, Yehowa wakumvua disanka bua malu avua ne bua kufikila Yezu. Mu ngumvuilu au ke muvua Yehowa ‘mumvue disanka bua kumuzaza,’ anyi dizaza dia Masiya. Ne Yezu pende wakumvua disanka bua malu avuaye mua kuenza ne akenzaye. Bushuwa, anu mudi mêyi a ndekelu a Yeshaya 53:10 amba, ‘tshidi disanka dia Yehowa tshiakakumbana mu tshianza tshiende.’