Udi muvuluke anyi?

Nimero ya Tshibumba tshia Nsentedi ya matuku mashale aa mmikusankishe anyi? Nanku anji teta bua kuandamuna nkonko idi ilonda eyi:

• Bua tshinyi tudi mua kujadika ne: dikumbana dia mulayi wa ‘diulu dipiadipia ne buloba bupiabupia’ udi mu Yeshaya 65:17-19 kadivua anu ditangila dipingana dia bena Yuda mu ditunga diabu bafuma ku bupika?

Bualu mupostolo Petelo ne mupostolo Yone, pakafundabu mu bidimu lukama bia kumpala B.B., bakakula bua dikumbana dikuabu mu matuku atshivua alua, mbuena kuamba ne: mabenesha atshidi ne bua kulua. (2 Petelo 3:13; Buakabuluibua 21:1-4)​—15/4, mabeji 10-12.

• Mmalu kayi adi mua kuikala nshindamenu wa mianu ya kale ya bena Greke ya bantu ba tshikisu bavua eku nzambi eku bantu?

Adi mua kuikala dilengeja ne dikudimuna dia muanda wa se: kumpala kua Mvula wa kabutu, bamue banjelu bakavuala mibidi ya bantu ne kudituabu mu nsombelu wa tshikisu ne wa tshiendenda pa buloba. (Genese 6:1, 2)​—15/4, mabeji 26, 27.

• Nnjiwu kayi idi bena Kristo bapie mu nyuma ne bua kuepuka mu mafesto a dibaka?

Mbia mushinga bua kuepuka bisankasanka, bidi mua kutuadija bikalabu belela bantu maala bu mâyi ne kuoku kuikale maja mabi ne mijiki mimba ne dîyi dikole. Bantu badibu kabayi babikile kabena ne bua kuyamu to, anu bikalabu bamanyishe bimpe ne: difesto ndia bantu bonso. Mulume udi ne bua kujadika ne: bena Kristo ba kueyemena nebashale mu difesto adi too ne padidi dijika pa dîba dimpe.​—1/5, mabeji 19-22.

• Ntshinyi tshidi Musambu 128:3 umvuija padiwu wakula bua bana bikale “bu ntonga ya mitshi ya olive” banyunguluke mesa a muntu?

Misangu mivule ntonga itu ipatuka kuinshi kua mutshi wa olive. Patu mutshi ukadi mukulakaje kautshiyi kabidi ukuama mamuma, ntonga idi mua kulua mitshi minene minyunguluke mutshi eu. Bia muomumue, baledi badi mua kusanka pa kumona bana babu bakuama mamuma ne bakuatshila Yehowa mudimu pamue nabu.​—15/5, dibeji 27.

• Mmalu kayi mimpe adi bana bapetela ku nsombelu muimpe wa mu dîku?

Udi ubambuluisha bua kunemeka bimpe bantu badi balombola, kuanyisha malu makane ne kuikala mu malanda mimpe ne bakuabu. Nsombelu wa mushindu’eu udi kabidi mua kubambuluisha bua kushemeja bulunda ne Nzambi.​—1/6, dibeji 18.

• Mu dimue ditunga dia mu Asia, ntshinyi tshiakenzabu bua kukolesha lungenyi lua ne: bena Kristo bonso mbana ba muntu umue?

Bena mu bisumbu bionso bakalonga tshiena-bualu tshivua tshibabela bua kubenga kubikila bamue bena Kristo ne miaku ya badi ne milongo mibandile. Kadi, bonso bavua ne bua kubikilangana ne: “muanetu” mu mushindu wa muomumue.​—15/6, dibeji 21.

• Bantemu ba Yehowa batu bitaba manga menza ne mashi anyi?

Tudi tuitabuja ne: mukenji wa mu Bible wa ‘kulekela mashi’ udi ukandika dielangana dia mashi mu kabujima kawu anyi dia bintu binene bidi bienza mashi (plasma, globile mikunze, globile mitoke ne plakete). (Bienzedi 15:28, 29) Bua tuntu tutambe bukese tudi tufumina ku bintu binene ebi, muena Kristo yonso udi udiangatshila dipangadika yeye nkayende, muvuluke tshidi Bible wamba ne tshidi mua kufikila malanda ende ne Nzambi.​—15/6, mabeji 29-31.

• Kudiku mushindu wa kupeta ditalala dia mu mutshima lelu anyi?

Eyowa. Ku diambuluisha dia Bible, Yezu Kristo udi ulombola bantu mu njila wa ntendelelu mukezuke ne ditalala didibu batele mu Yeshaya 32:18. Kabidi, bantu badi bapeta ditalala edi badi ne ditekemena dia kupeta ditalala dia kashidi pa buloba pakumbana Musambu 37:11, 29.​—1/7, dibeji 7.

• Mmudimu kayi uvua nawu George Young mu malu a teokrasi a tshikondo tshietu etshi?

Kubangila mu 1917, wakalua mufikishi wa butoke bua lumu luimpe lua Bukalenge mu matunga a bungi. Wakenza mudimu wende eu mu ditunga dia Canada, mu bidiila bia Caraïbes, mu Brésil ne mu matunga makuabu a mu Amerike wa ku Sud ne wa Pankatshi, mu ditunga dia Espagne, dia Portugal, mu Union Soviétique wa kale ne mu États-Unis.​—1/7, mabeji 22-27.

• Ntshinyi tshidi 1 Kolinto 15:29 umvuija padiye wakula bua bamue “badi babatijibua bua bantu bafue”?

Bualu budiku mbua se: padibu bela bena Kristo manyi a spiritu munsantu, badi babina mu nsombelu udi ufikisha ku lufu ne dibika diabu mu diulu.​—15/7, dibeji 17.

• Ntshinyi tshivua mupostolo Paulo wenza mu tshikondo tshidibu babikila ne: bidimu biende bidibu kabayi batele?

Bidi mua kuikala se: uvua wambuluisha bua kuasa anyi kukolesha bisumbu mu Sulia ne mu Kilikia. Uvua mua kuikala mupete ntatu ya bungi idiye mutele mu 2 Kolinto 11:23-27 tshikondo atshi, bileja ne: uvua anu utungunuka ne kuenza mudimu.​—15/7, mabeji 26, 27.

• Ntshinyi tshidi mua kutuambuluisha bua kuikala ne meji makanyine mu malu atudi tujinga kuenza?

Tuvuluke ne: Yehowa utu utumvuila. Disambila didi mua kutuambuluisha bua kuikala ne meji makumbanyine, ne didi dileja budipope. Tudi mua kupeta diambuluisha dikuabu pa kuyikila ne mulunda kampanda udi mupie mu nyuma.​—1/8, mabeji 29, 30.