Bamanyishi ba Bukalenge badi balonda

Bena Kristo badi bamiamina mâyi ku ntete ya bulelela mu Chili

MU TSHIPELA tshia ku mutu kua ditunga dia Chili, bidimu bidi mua kupita bia bungi kakuyi nansha kamata ka mvula to. Kadi patu mvula iloka, bulaba ebu bûme ne bua mabue butu buandamuka tshia bushuwa budimi bua bilongo bia mekala mashilangane. Ke bualu kayi bantu badi basombele mu bitupa bikuabu bia ditunga edi batu balua kuendakana muaba eu.

Kadi kudi bualu buimpe menemene budi buenda buenzeka munkatshi mua bena mu Chili. Mâyi a bulelela bua mu Bible adi enda apueka matangile ku ntengu yonso ya ditunga edi, ne bantu ba bungi badi basue bulelela badi balua bayidi ba Yezu Kristo benze bu bilongo bisampila. Telefone ntshimue tshintu tshitubu bakuata natshi mudimu bua kutangalaja mâyi a bulelela aa. Malu adi alonda aa adi aleja bipeta bimpe bidi bimueneka bua diyisha ku nshinga.

• Bakalomba Karina (muambi wa lumu luimpe wa ku dîba ne ku dîba) bua kuleja mushindu wa kuyisha ku nshinga mu mpuilu wa tshijengu. Pabi Karina kavuaku muanji kuyisha ku nshinga to. Bua kumukankamija bua kuleja muanda eu mu mpuilu, mukulu mukuabu ne mukajende bakakonkonona ne Karina amue malu a mushindu wa kuyisha ku nshinga. Bakamuambila kabidi bua kulomba Yehowa bua amuambuluishe akumbaje bualu ebu. Wakasambila ne ndekelu wa bionso wakapangadika bua kuteta kubikila muntu ku nshinga.

Karina wakela nshinga mu nimero kampanda wa mu musoko wa pabuipi nabu. Muntu wakalua bua kuita ku nshinga, ne Karina wakamumvuija tshivuaye mumubidikile. Muntu eu wakanyisha malu akamuambila Karina, ne bakumvuangana bua kuyikila kabidi kunyima kua matuku asatu. Bakafika ku dilonga dia Bible ne kakanda ka Ntshinyi tshidi Nzambi utulomba? Kubangila anu dîba adi, mbalonge bimpe ne musangelu, ne Karina utu mutumine muntu mukaji eu mikanda ya malu a mu Bible bua kumuandamuna nkonko yende.

• Bernarda wakapangadika bua kuyisha muntu uvua muele nshinga mu nimero yende ku ntupakanyi. Pamutu pa Bernarda kumvua bibi, wakadimanyisha ne: uvua Ntemu wa Yehowa ne wakamuambila ne: uvua mua kumuambuluisha. Muyuki wakatuadija, ne muntu eu wakateleja muvua Bernarda umumvuija mushindu wikala Bukalenge bua Nzambi ne bua kujikija malu mabi mu katupa kîpi emu. Muntu eu wakapesha Bernarda nimero ya telefone yende ne Bernarda wakayukila kabidi nende misangu ya bungi ku nshinga. Umue musangu pavuabu bayukila, Bernarda wakamubadila mêyi kampanda mu mukanda wa Dimanya didi difikisha ku muoyo wa kashidi. Muntu eu wakamuebeja bua kumanya muvuaye pende mua kuupeta ne Bernarda wakamutuminawu ne Bible mutekelapu. Bakakeba muanetu wa balume uvua musombele pamue ne muntu eu bua kuikalaye uya kumutangila. Muanetu eu udi mpindieu utungunuka ne “kumiamina mâyi” ku “tshikunyibua” etshi tshidi tshienda tshikola.

Bulelela, mu buloba bua tshipela tshia mu nyuma tshia panu apa, mudi ntete idi mu buloba mindile bua kutoloka padi mâyi a bulelela adi afila muoyo afika muaba udiyi. Bantu binunu ne binunu badi ne nyota ya bulelela badi batungunuka ne kulua basadidi ba lulamatu ba Yehowa bu ntete idi ‘imena’ ne pashishe isampila.​—Yeshaya 44:3, 4.