Malu a mu nsombelu

Yehowa utu anu usankisha badi bamulamate

MALONDA KUDI VERNON DUNCOMBE

Anu bu pa tshibidilu, ngakajikija kudia biakudia ku dilolo, meme kutemesha mutshi wa makanya. Pashishe ngakakonka mukajanyi Aileen ne: “Tshisangilu tshia dilolo dia lelu ntshipite munyi?”

KUANJIYE kupuwa katupa, pashishe kuambaye ne: “Mbabale mukanda uvua umanyisha mêna a bantu bapiabapia badibu bapeshe midimu, ne mbatele dîna diebe. Mbakuteke musadidi wa biamu bia mêyi. Tshiambilu tshia ndekelu tshia mukanda au tshivua tshiamba ne: ‘Bikala banu ba makanya bikale munkatshi mua bantu aba bapiabapia badibu bateke, tudi tubalomba bua bafundile Société ne: kakuena mushindu wa kuitababu mudimu eu nansha.’” * Ngakamuandamuna ne: “Bushuwa anyi! Ke mudibu bambe nanku!”

Ngakadia dînu ne meme kujima mutshi wa makanya umvua nawu ne kuwela mu keledi ka butu bua makanya kavua ku luseke luanyi. Meme kudiambila ne: “Tshiena mumanye tshidibu bansunguile bua kuenza mudimu eu to. Pabi tshitu muanji kubenga mudimu nansha umue, ne tshiena musue kutuadija kubenga midimu nansha.” Ngakapangadika bua kujila makanya kashidi. Dipangadika adi diakashintulula bikole nsombelu wanyi meme wa muena Kristo ne muimbi wa misambu. Lekelayi mpindieu nnulondele amue malu akamfikisha bua dipangadika edi dingakangata.

Nsombelu utuvua nende mu dîku kumpala

Ndi mulela mu matuku 21 a ngondo wa tshitema, mu 1914, mu tshimenga tshia Toronto, mu ditunga dia Canada. Mvua muanabute mu dîku dia bana ba balume banayi ne ba bakaji babidi. Baledi betu (Vernon ne Lila), bavua benji ba mudimu mukole bakatukolesha bimpe ne dinanga. Mêna a bakunyi banyi ng’wowo aa: Yorke, Orlando, Douglas, Aileen ne Coral. Pantshivua ne bidimu tshitema patupu, mamu wakampesha tshindanda (tshisanji tshia violon) ne kuntuma bua kulonga mijiki mu Tshilongelu tshia Mijiki tshia Harris. Nansha muvua nsombelu mukole  tshikondo atshi, Mamu ne Tatu bavua bapeta mushindu wa kumfutshila njila ne kufuta makuta a mu kalasa. Pashishe ngakalonga malu a mijiki ne mushindu wa kuimba pamue mu diumvuangana mu tshilongelu tshia mu Toronto (Royal Conservatory of Music), ne pamvua ne bidimu 12, ngakadifundisha mu dinaya dia ditembangana dia bimbi ba mijiki ba mu tshimenga tshijima diakenzekela mu Massey Hall, nzubu muimpe wa dikema wa dimbila mijiki mu Toronto. Ngakapatuka wa kumpala ne bakampesha tshisanji tshia violon tshimpe be tshiela mu tshibuta tshienza ne tshiseba tshia ngandu.

Mu bungi bua matuku, ngakalonga kabidi mua kuimba piano ne violon utubu babikila ne: contrebasse. Misangu mivule tuvua tuimba pamue mu mafesto a bantu bakese mu Ditanu ne mu Disambombo dilolo ne mu manaya a dija maja avua balongi balongolola. Mu dimue dinaya dia dija maja dia nunku ke mungakapetangana ne Aileen bua musangu wa kumpala. Mu tshidimu tshianyi tshia ndekelu tshia tulasa tua bikadilu, ngakimba pamue ne bisumbu bia bimbi ba mijiki ba mu tshimenga tshijima. Kunyima kua meme mumane kujikija kalasa, bakambikila bua kubuela mu tshisumbu kampanda tshia bimbi ba mijiki (Ferde Mowry Orchestra), mudimu eu wakashala umpetesha makuta a bungi too ne mu 1943.

Ndi mfika ku dimanya Yehowa

Baledi banyi bakumvua bua musangu wa kumpala bulelela bua mu Bible katupa kakese kumpala kua Mvita ya Kumpala ya Buloba bujima, pavua tatu wenza mudimu mu magazen a mu tshimenga tshia Toronto. Mu nzubu mukuabu wa tshidiilu, Tatu uvua umvua muvua bena mudimu bakuabu babidi bavua Balongi ba Bible (muvuabu babikila Bantemu ba Yehowa dîba adi) bayikila, ne panyima uvua ulua kuambila Mamu malu avuaye umvua pavuaye upingana ku nzubu dilolo. Kunyima kua bidimu bia bungi (mu 1927), Balongi ba Bible bakenza mpungilu munene mu Toronto mu Muaba wa Mbulamatadi uvuabu Balejila Manaya ne bintu bishilangane mu Canada. Nzubu wetu uvua muangate mpangu ibidi kubangila ku tshibuelelu tshia ku Ouest too ne ku muaba wa dilejila manaya ne bintu bishilangane au, bakatekamu bantu 25 bavua bafumine mu Ohio, ku États-Unis.

Kunyima, Ada Bletsoe (uvua pende Mulongi wa Bible), wakatuadija kulua kuyikila ne Mamu pa tshibidilu, ne uvua umutuadila bibejibeji bipiabipia. Dituku dikuabu wakamba ne: “Inabanza Duncombe, kukadi matuku a bungi ntu nkutuadila bibejibeji muaba eu; ukadiku mubale nansha tshimue anyi?” Nansha muvua Mamu muikale ne bana basambombo, wakapangadika bua kubanga kubala bibejibeji musangu au, ne kakalekela dibibala nansha. Kadi meme tshivua ntamba kubibala to. Mvua ngenza muanyi muonso bua kujikija kalasa ne mvua mudifile bikole mu mijiki.

Mu ngondo muisambombo, mu 1935, meme ne Aileen tuakaselangana mu Ekeleziya wa bena Mishonyi. Katshia ngapatuka mu Ekeleziya wa bena Buobumue pamvua ne bidimu 13, tshivua nya mu tshitendelelu tshikuabu to; nanku ke meme kufundisha pa mukanda wanyi wa dibaka ne: mvua Ntemu wa Yehowa, nansha mumvua tshiyi Ntemu to.

Tuvua bapangadije bua kulela bana mu matuku avua alua ne tuvua basue kuikala baledi bimpe. Ke bualu kayi tuakabanga kubala Dipungila Dipiadipia pamue. Kadi nansha mutuvua ne bipatshila bimpe, makuabu malu akatupumbisha. Tuakateta kabidi bua kubala kunyima kua matuku makese, kadi kabiakakumbana to. Pashishe mu 1935, bakatutumina mukanda muvunga bimpe mu dibeji bu kado ka Nowele, uvua ne tshiena-bualu tshia Lunkombe lua Nzambi (Angl.). Mukajanyi wakamba ne: “Bulelela, aka kado ka Nowele kadi mamu muenu mututumine nka pa buaku.” Kadi pangakalua kuya ku mudimu, wakabanga kuubala ne wakananga malu akabalaye. Ngakenza matuku a bungi tshiyi mumanye tshivuaye musuminyine ne dibala mu mukanda eu to. Bua dijinga dietu dia kukolesha bana kadiakakumbana to. Muana wa bakaji utuakalela mu dia 1 dia ngondo muibidi, mu 1937, wakafua. Biakatupesha kanyinganyinga kakole!

Mu tshikondo atshi, bena mu dîku dietu bavua bayisha bantu ne tshisumi, ne ngakumvua ne: Tatu ke uvua nkayende muambi wa lumu luimpe lua Bukalenge mu dîku uvua kayi muanji kuenzela muntu abonema wa tshibejibeji tshia Consolation (Réveillez-vous! mpindieu). Etshi ke tshipatshila tshivuabu natshi ku ngondo pavuabu baya kuyisha. Nansha mumvua tshiyi muanji kubala mukanda wa Bantemu nansha umue, ngakamumvuila luse ne meme kumuambila ne: “Tatu, ungenzele meme abonema; nanku newikale bu mudi bambi ba lumu luimpe bakuabu.” Tuakafika mu tshikondo tshitu bantu baya mu dikisha, ne tshisumbu tshietu tshia mijiki tshiakumbuka mu tshimenga bua kuya kuimba muaba uvua bantu baya kuikishila. Bibejibeji bia Consolation biakandondela ku poste. Pakajika dikisha, tuakapingana mu Toronto ne tshisumbu tshietu. Bibejibeji bivua anu biluila mu adrese wetu mupiamupia wa mikanda, ne tshivuaku mukangule nansha tshimue bua kubala to.

Mu dikisha kampanda dia Nowele dia matuku makese, ngakatangila mushiki wa bibejibeji ne meme kudiambila ne: bingikala mvua mufutshile bibejibeji ebi makuta, mvua ne bua kubala nansha ndambu bua kumanya malu avuamu. Tshia kumpala tshingakabala  tshiakankemesha. Bavua belamu mafi ne malu mabi a bena tshididi patoke. Ngakabanga kuambila batuvua tuimba nabu mijiki malu amvua mbala. Kadi bakabenga kuitaba bua se: malu amvua ngamba avua malelela, nanku mvua ne bua kutungunuka ne kubala bua meme kumanya mua kubatuisha. Nkavua mubange kuyisha malu avua atangila Yehowa tshiyi mumanye to. Ne kubangila anu dîba adi, tshituku muanji kulekela kubala mikanda milenga ya malu a mu Bible ya “mupika wa lulamatu ne wa budimu.”​—Matayo 24:45, NW.

Nansha mumvua ne mudimu wa bungi munkatshi mua lumingu, meme ne Aileen tuakabanga kubuela mu bisangilu bia mu Dia lumingu. Mu Dia lumingu dikuabu mu 1938 patuakaya bua kubuela mu bisangilu, bana betu babidi ba bakaji bakadi ba mamu bakulakaje bakatuela muoyo, ne umue kuambaye ne: “Muakunyanyi wa balume, ukadi mulamate ku luseke lua Yehowa anyi? Mona, Armagedone nyeye eu ukadi ku tshiibi!” Mvua mumanye ne: Yehowa udi Nzambi umuepele mulelela, ne mvua mutuishibue ne: ebu ke bulongolodi buende. Mvua musue kuikala mu bulongolodi ebu, ke bua tshinyi mu dia 15 ngondo wa dikumi, mu 1938, ngakatambula. Kunyima kua ngondo mitue ku isambombo Aileen wakatambula pende. Ndi ne disanka dia kuamba ne: bantu bonso ba mu dîku dianyi bakalua basadidi ba Yehowa badilambule kudiye.

Ndisankapu kayi dingakapeta bua kudisangisha ne bantu ba Nzambi! Mutantshi eu, meme kubanga kumvua bimpe pamvua munkatshi muabu. Pamvua tshiyi mpeta mushindu wa kuya mu bisangilu, mvua anu njinga kumanya bivuabu bambemu. Dishintuluka dinene diakenzeka mu mudimu wanyi undi ngenzela Yehowa dilolo dia pa buadi adi dindi mutele ku ntuadijilu.

Tshikondo tshia dishintuluka dinene mu nsombelu wetu

Dishintuluka dikuabu dinene diakenzeka mu nsombelu wetu mu dia 1 dia ngondo muitanu, mu 1943. Tuvua babuele bua musangu wa kumpala mu mpungilu munene mu ngondo wa tshitema, mu 1942, mu tshimenga tshia Cleveland, mu Ohio. Mpungilu au uvua ne tshiena-bualu tshia se: “Bukua-panu bupiabupia bulombola kudi Nzambi.” Mu mpungilu au, munkatshi menemene mua mvita ya buloba bujima ivua imueneka bu ivua kayiyi ne ndekelu, tuakateleja Muanetu Knorr (uvua muludiki wa Société Watch Tower dîba adi) wenza ne dikima muyuki wa patoke wa tshikuma, uvua ne tshiena-bualu ne: “Ditalala, nedinenge anyi?” Tudi tuvuluka bimpe muakatulejaye mu Buakabuluibua nshapita wa 17 ne: kuvua ne bua kulua tshikondo tshia ditalala kunyima kua mvita, ne mu ntanta wanenga tshikondo etshi, mudimu wa bungi wa diyisha uvua ne bua kuenzeka.

Tshiakatamba kutulenga ku muoyo mmuyuki ukavua Muanetu Knorr muenze wa: “Yefeta ne mutshipu wende.” Bakela lubila bua kupeta bampanda-njila ba bungi! Tuakatangilangana ne Aileen ne tuetu kuamba (pamue ne bana betu bakuabu ba bungi dîba adi) ne: “Ntuetu aba!” Musangu umue tuakabanga kudilongolola bua kuya kuenza mudimu wa mushinga mukole.

Bavua bakandike mudimu wa Bantemu ba Yehowa mu Canada katshia mu dia 4 dia ngondo wa muanda-mutekete, mu 1940. Patuakatuadija bumpanda-njila mu dia 1 dia ngondo muitanu, mu 1943, mbulamatadi utshivua anu mukandike bua kuyisha malu a Yehowa ne kuabanya mikanda ya Bantemu. Bu mutuvua bena Kristo, tuakambula anu Bible (nkudimuinu wa King James). Matuku makese tuetu bamane kufika muaba wa kumpala uvuabu batutume, mu tshimenga tshia Parry Sound, mu provense wa Ontario, biro biakatuma Stewart Mann, mpanda-njila mupiluke, bua kuenzaye netu mudimu mu budimi. Ndiambuluisha kayipu dilenga! Muanetu Mann uvua muntu wa bikadilu bilenga ne wa mimuemue. Wakatumanyisha malu a bungi ne tuvua basombe nende bimpe. Pakatutuma Biro bietu mu tshimenga tshia Hamilton, tuvua tulonga Bible ne bantu ba bungi. Panyima pa matuku makese, nansha mumvua tshiyi mua kuya ku busalayi bua bungi bua bidimu binkavua nabi, bakafunda dîna dianyi ku bukole. Pangakabenga bua kuya ku busalayi bakankuata mu dia 31 Tshisua-munene 1943. Pakajikijabu kundumbuluisha, bakamfundila mudimu mukuabu, ne ke umvua mushala ngenza too ne mu ngondo wa muanda-mukulu, mu 1945.

Pakandekelabu, bakatutuma diakamue meme ne Aileen bampanda-njila mu Cornwall, mu provense wa Ontario. Matuku makese panyima apu, tuakaya mu  provense wa Québec bua kuenza mudimu wa pa buawu mutupesha kudi Tshibambalu tshia malu a Mikenji tshia Biro bia Bantemu bua kuakuila bawetu ku tubadi tua bampulushi. Mmu tshikondo tshia Kavula-mbedi Duplessis wa mu Québec pavuabu bakengesha Bantemu ba Yehowa bikole menemene. Matuku a bungi ku lumingu luonso, mvua nya ku tubadi tunayi bua kuambuluisha bana betu. Bivua bikondo bia disanka ne bivua bikolesha ditabuja.

Kunyima kua mpungilu wa mu Cleveland mu 1946, bakantuma mu mudimu wa tshijengu ne wa distrike, mudimu uvua mutuendeshe meme ne mukajanyi mu ditunga dijima dia Canada. Malu avua enda lukasa. Mu 1948 bakatubikila bua kubuela mu kalasa ka 11 ka Gilada (Tshilongelu tshia Bible tshia Société Watchtower). Mu kalasa ketu muvua balongi 108, munkatshi muabu muvua bela manyi 40, kusangisha ne Muanetu Albert Schroeder ne Muanetu Maxwell Friend, babidi ba ku balongeshi betu. Bu mutuvua ne bantu ba bungi bakavua basadile Yehowa mutantshi mule, tshivua tshikondo tshimpe ne tshia masanka!

Dimue edi, Muanetu Knorr wakalua kutumona umbukila ku Brooklyn. Mu muyuki wakenzaye, wakalomba bua bantu 25 bitabe bua kulonga tshiena-Japon. Buonso buetu 108 tuakitaba! Muanetu Knorr nkayende ke uvua ne bua kukosa tshilumbu atshi bua kusungula bavuabu ne bua kulongesha muakulu eu. Ndi ngela meji ne: Yehowa wakalombola disungula adi bualu diakenzeka bimpe. Ba bungi ba munkatshi mua bantu 25 aba bakapeta diakalenga dia kunzulula mudimu mu Japon, batshidi anu mu mudimu eu nansha mukadibu bakulakaje. Bamue, bu mudi Lloyd Barry ne Melba Barry, bakabatuma miaba mikuabu. Lloyd uvua mu Kasumbu Kaludiki too ne ku lufu luende tshidimu tshishale. Tudi tusanka nabu buonso bua mabenesha adi Yehowa mutupeshe.

Dituku dia kuangata mapolome diakafika, ne bakatutuma mu Jamaïque. Kadi bu muvua bilumbu kabiyi bijika ku tubadi mu Québec, bakatulomba bua kupingana mu Canada.

Mijiki mikuabu ya bungi!

Nansha mumvua mulekele mijiki bua kuenza mudimu wa bumpanda-njila, biakamueneka ne: mijiki yoyi kayivua mindekele to. Tshidimu tshiakalonda, Nathan Knorr (uvua mulombodi wa Société dîba adi) ne mufundi wende Milton Henschel, bakalua mu tshipalu tshia manaya tshia Maple Leaf Gardens, mu Toronto. Muyuki wa patoke wa Muanetu Knorr uvua ne tshiena-bualu ne: “Numanye ne: dîba dikadi dipite bikole!” wakasankisha muntu yonso. Bua musangu wanyi wa kumpala, bakandomba bua kulombola tshisumbu tshia bimbi ba mijiki mu mpungilu. Tuakadilongolola bua kuimba imue misambu ya bikuma bisatu ivua bantu bamanye bikole ya mu Mukanda wa misambu ya mudimu wa Bukalenge (Angl.) wakapatuka mu 1944. Biakamueneka ne: bana betu bakayanyisha. Pakajika ndongamu wa mu Disambombo mu mapingaja, tuakambulula misambu ituvua balongolole bua kuimba mu Dia lumingu. Ngakamona Muanetu Henschel ufuma dia muamua dia tshipalu ulua mutangile kutudi, ke meme kuimanyika bimbi ba mijiki, kuya kusangila nende. Kunkonkaye ne: “Udi ne bimbi ba mijiki bungi munyi mu tshisumbu tshiebe etshi?” Meme kumuandamuna ne: “Patu bonso bikaleku, tutu tufika ku 35.” Kuambaye ne: “Neuvudije bungi abu misangu ibidi mu New York mu mushipu wa tshidimu tshialua.”

Kumpala kua tuetu kufika mu ngondo ya mushipu ayi, bakambikila ku Brooklyn. Bua malu avuabu bambikidile, Aileen kavua mua kuya nanyi to. Dîba adi nzubu mupiamupia wa mu musesu wa Columbia Heights (nimero wa 124) kavua muanji kujika to. Nunku bakampesha bulalu ku Betele wa kale mu nzubu mukese mutuvua ne bana betu bela manyi babidi: Muanetu Payne ukavua mukulumpe ne Karl Klein, bangakamanya bua musangu wa kumpala dîba adi. Nzubu au uvua mukese, kadi bantu bikale ba bungi anyi? Eyowa uvua mukese. Nansha nanku, tuakasomba nabu bimpe. Bana betu aba bakavua bantu bakole bavua ne lutulu lua bungi. Ngakenza muanyi muonso bua kubenga kubanyingalaja! Divua dilongesha dimpe dia malu adi nyuma wa Nzambi mua kuenza. Dimanyangana ne dienza mudimu ne Muanetu Klein diakampesha masanka a bungi be! Misangu yonso uvua wenzelangana malu malenga ne wambuluishangana. Tuakenza mudimu bimpe kaba kamue ne tudi bashale balunda bidimu 50 ne pamutu.

Tuakimba kabidi mijiki mu mpungilu wa mu 1950, wa mu 1953, wa mu 1955 ne wa mu 1958 yakenzekela mu tshipalu tshia Yankee Stadium, ne tuakalombola kabidi tshisumbu tshia bimbi ba mijiki ne Al Kavelin mu mpungilu wa mu 1963 wakenzekela mu tshipalu tshia Rose Bowl, mu tshimenga tshia Pasadena, ku Californie. Mu mpungilu wa mu 1953 mu Yankee Stadium, tuakimba mijiki mu Dia lumingu kumpala kua muyuki wa patoke. Erich Frost wakamanyisha Edith Shemionik (wakalua kuangata dîna dia Weigand), wakimba musambu uvuaye yeye (Erich) muenze utu ne tshiena-bualu tshia se: “Ndayi kumpala, nuenu Bantemu!” pamue ne tshisumbu tshietu tshia mijiki. Pashishe tuakasanka bikole patuakumvua bua musangu wetu wa kumpala mêyi mashême ne malenga a bana betu ba balume ne ba bakaji ba mu Afrike. Misionere Harry Arnott uvua mulue ne bande muimpe mukuata mêyi a misambu bua kutusanguluja, uvua mufume nende mu ditunga dia Rhodésie du Nord (Zambie).  Mêyi a misambu ayi akakuatakana mu tshipalu tshijima.

Tudi tukuata mijiki ya mukanda wa misambu wa mu 1966

Utshidi muvuluke mukanda wa misambu wa tshizubu tshikole tshia mubidi mukunzubile uvua ne tshiena-bualu tshia se: “Chantant et vous accompagnant de musique dans votre cœur” anyi? Pakavua mukanda eu pa kupatuka, Muanetu Knorr wakamba ne: “Tudi basue kukuata imue misambu. Ndi musue bua ulongolole kasumbu kakese ka bimbi ba mijiki, ne violon mikese patupu ne ndambu wa nshiba. Tshiena musue kumona muntu mukuabu wela mpungi wende nansha!” Nzubu wa Bukalenge wa ku Betele ke muaba utuvua ne bua kukuatshila misambu eyi, kadi tuvua tuelakana bua kuyikuatshilamu. Ntshinyi tshivua mua kuenzeka pavua mêyi akuma ku bimanu kabiyi turton tutu tukengedibua, panshi pela sima ne nkuasa ya biamu ya dibunya ivuamu? Nnganyi uvua mua kutuambuluisha bua bintu ebi bivua mua kunyanga mêyi? Muanetu mukuabu wakamba ne: “Tommy Mitchell udi mua kutuambuluisha. Udi wenza mudimu mu Kumpanyi wa Nzubu ya Dikuatshila Mêyi mu Amerike (anyi ABC).” Tuakamonangana ne Muanetu Mitchell ne wakitaba bua kutuambuluisha.

Tuakafika mu Disambombo dia kumpala mu dinda bua kukuata misambu, ne pavuabu benda bamanyisha mêna a bana betu bimbi ba mijiki, muanetu mukuabu uvua ne mpungi munene (trombone) muela mu tshibuta. Ngakavuluka mêyi a Muanetu Knorr a se: “Tshiena musue kumona muntu mukuabu wela mpungi wende nansha!” Mpindieu ntshinyi tshimvua mua kuenza? Ngakashala mutangile muvua muanetu eu upatula trombone mu tshibuta, umuakaja ne ubanga kudibidija bua kuimba. Uvua muanetu Tom Mitchell, ne note mikese yakatetaye bua kuimba ivua mishême ya dikema. Wakenza bua dîyi dia trombone diumvuike bu dia violon! Ngakamba ne: ‘muanetu eu udi ne bua kuimba netu!’ Kadi Muanetu Knorr kakabenga to.

Mu tshisumbu tshia bimbi ba mijiki abu, tuvua ne kasumbu ka bimbi bimpe ba mijiki bavua kabidi bana betu ba balume ne ba bakaji. Kakuvua bantu bapange bukalanga to! Kukuata misambu kuvua mudimu mukole, kadi kakuvua muntu uvua udiabakena nansha. Pakajika mudimu eu, tuakadila patukavua pa kushiyangana; ne bulunda bukole buakashala pankatshi pa aba bakakuata misambu eyi. Muntu yonso wa kutudi wakanyisha mudimu eu, ne tuakawenza ne diambuluisha dia Yehowa.

Midimu mikuabu yakansankisha

Kunyima kua bidimu bia bungi menemene, ndi anu mutungunuke ne kuenza mudimu wa ku dîba ne ku dîba. Ndi muenze bidimu 28 muikale mutangidi wa tshijengu ne wa distrike; midimu yonso ibidi eyi ivua isankisha. Kunyima ngakalua kuenza bidimu bitanu ntangila Nzubu wa Mpuilu wa mu Norval mu provense wa Ontario. Meme ne Aileen tuvua ne mudimu wa bungi bualu kuvua mpuilu ya tshijengu mu Disambombo ne Dia lumingu dionso ne mpungilu ya distrike ya mu miakulu ya mu matunga menyi. Mu 1979 ne mu 1980, bibaki ba nzubu ne ba-enjenyere bakasombela ku Nzubu wa Mpuilu bua kulongolola diibaka dia biro bia Société mu matuku atshivua alua mu tshimenga tshia Halton Hills. Kunyima kua mudimu utuakenza ku Nzubu wa Mpuilu, mudimu mukuabu wakatufikisha kabidi ku dimba mijiki mu Brooklyn, kubangila mu 1982 too ne mu 1984.

Mukajanyi munanga wakafua mu dia 17 Kabalashipu 1994, matuku muanda-mutekete kunyima kua mufikilu wa 59 wa dibaka dietu. Tuvua benze nende bidimu 51 mu mudimu wa bumpanda-njila.

Pandi ngela meji bua malu a bungi andi muenze ne mumone mu matuku anyi a muoyo, ndi mvuluka mudi Bible mutulombole bimpe bitambe. Pamu’apa, ntu mbala Bible wa Aileen ne ngumvua disanka dia bungi pandi mmona malu avua alenga mutshima wende: mvese mijima, biambilu bisunguluke, ne miaku yende yeye ivuaye mufunde. Anu muvua Aileen wenza, meme panyi ndi ne mvese idi ne diumvuija dia pa buadi buanyi meme. Mvese umue ngua Musambu wa 137, udi ne disambila edi dilenga: ‘Yelushalema, bingapua bualu buebe muoyo, tshianza tshianyi tshia balume tshipange mudimu watshi! Ludimi luanyi lulamate mu tshilakalaka tshianyi, bingikala tshiyi nkuvuluka; bingikala tshiyi ntumbisha Yelushalema pa mutu pa disanka dianyi didi ditamba bunene!’ (Musambu 137:5, 6) Nansha mundi munange mijiki, disanka dianyi dinene ndia kusadila Yehowa ne lulamatu, Udi mumpeshe muoyo ne nsombelu mûle tente ne disanka.

[Mêyi adi kuinshi]

[Tshimfuanyi mu dibeji 28]

Meme ne Aileen mu 1947

[Tshimfuanyi mu dibeji 30]

Patuakabanga kukuata misambu