Tudi ba ku badi ne ditabuja

Badi bamanyisha Bukalenge bua Nzambi mu bidiila bia Fidji

YEZU KRISTO wakakula munga musangu bua njila ibidi. Umue mmualabale ne udi ufikisha ku lufu. Mukuabu udi mubumbakane kadi ufikisha ku muoyo. (Matayo 7:13, 14) Bua kupetesha bantu mushindu wa kusungulabu njila muakane, Yehowa Nzambi wakalongolola bua bayishe lumu luimpe lua Bukalenge pa buloba bujima. (Matayo 24:14) Ke bua tshinyi lelu badi bayisha bantu mukenji wa Bukalenge miaba yonso, ne bamue bantu badi benda basungula bua kuikala ne muoyo, balua “ba ku badi ne ditabuja too ne ku dilama dia anyima ne muoyo.” (Ebelu 10:39, NW) Tudi tukulomba bua ubale muakasungulabu bua kuikala ne muoyo kudi bamue bantu ba mu Fidji ne bikuabu bidiila bia pabuipi lua kuinshi kua Mbuu wa Pasifike.

Bavua beyemene Yehowa

Mere wakumvua mukenji wa Bukalenge musangu wa kumpala mu 1964 (utshivua nsongakaji mulongi wa kalasa). Bu muvuaye musombele mu tshidiila tshia kulekule, kavua utamba kumonangana ne Bantemu ba Yehowa to. Kadi ndekelu wa bionso, wakapeta dimanya dijalame dia Bible. Kadi bu muvuaye mukaji wa mfumu wa tshimue tshifuku tshia bantu ba mu musoko wabu, bayende ne balela ba bayende bakabanga kumukengesha bikole, ne bena musoko pabu e kutuadija kumupepeja. Nansha nanku, wakatambula mu 1991.

Abidi mmale, asatu mmîpi, bayende (Josua) e kushintuluka, kutuadija mene kuteleja pavua Mere ulonga Bible ne bana. Josua kupatukaye mu Mishonyi. Kadi bu muvuaye mfumu, utshivua anu ulombola bisangilu bia mu musoko bia lumingu luonso. Bena musoko bakamona ne: Josua kavua kabidi ne lulamatu, bualu bavua basue Mishonyi bikole kudi bena musoko ba mu Fidji. Nanku, mpasata wa mu musoko wakalomba Josua bua kupinganaye mu Mishonyi.

Josua wakamba ne dikima dionso ne: yeye ne bena dîku diende bavua basungule tshivuabu bamone, badisuike bua kutendelela Yehowa Nzambi “mu nyuma ne mu bulelela.” (Yone 4:24) Mu tshisangilu tshia bena mu musoko tshiakalonda, mfumu munene wakatuma dîyi bua kuipatabu Josua ne dîku diende ne kubambila bua kumbukabu mu musoko. Bakabakosela matuku muanda-mutekete bua kumbukabu mu tshidiila etshi, kushiya nzubu wabu, maloba abu, bimuna ne bia pa madimi, mmumue ne: kantu konso kavuabu bapetela mushindu wa kudiambuluisha nawu.

Bana betu ba mu nyuma ba mu tshidiila tshikuabu bakambuluisha Josua ne dîku diende, kubapeshabu muaba wa kusombela ne wa kudima. Josua ne muanende wa balume mukulumpe bakadi bamane kutambula, muanende wa balume mukuabu ukadi pende muambi wa lumu luimpe udi kayi muanji kutambula. Matuku ashadi aa, Mere mmulue mpanda-njila wa pa tshibidilu (mumanyishi wa Bukalenge wa ku dîba ne ku dîba). Disungula diabu dia kuenzela Yehowa mudimu diakabafikisha ku dijimija dia mianzu ne bintu, kadi anu bu mupostolo Paulo badi bangata bintu ebi bu bia tshianana pa kubifuanyikija ne tshidibu bapete mpindieu.​—Filipoi 3:8.

Disungula bilondeshile kuondo ka muoyo

Bidi bikengela kuikala ne ditabuja ne dikima bua muntu kutumikilaye malu adi kuondo kende ka muoyo kadi kalongesha kudi Bible kamuambila. Ke tshivua Suraang ne bua kuenza, yeye uvua nsongakaji utshivua ufumina ku ditambula musombele mu Tarawa, tshimue tshia ku bidiila bia Kiribati. Suraang wakalomba bua bamuitabile bua kenji umue mudimu wa mu lupitadi muvuaye munganga. Kabakamuitabila to, kadi anu bua bualu abu, bakamutuma bua kuyaye kuenza mudimu ku ka-dispansere kakese kavua mu tshidiila tshia kule, kuvuaye kayi mua kumonangana ne Bantemu nende bakuabu.

Mu tshidiila atshi muenyi yonso udi ufikamu udi ne bua kuanji kulambula “bakishi” bintu. Bena mu tshidiila atshi batu bamanye ne: muntu yeye kayi mufile mulambu, tshiende netshikale anu lufu. Bu muvua Suraang  mubenge bua kabamuenzedi tshilele tshia ditendelela bintu etshi ne bua katshienzeki mu difesto diende, bena musoko bakashala bindile ne: bakishi bavua Suraang munyingalaje nebamufiekele mu nshingu ne kumushipa. Bu muvua Suraang kayi mupete diakabi nansha dimue peshi njiwu kayiyi mifike mu difesto diende, bualu ebu buakamunzuluila njila wa kuyisha bantu ba bungi.

Mateta a Suraang kaakashikila apu to. Bamue bansongalume ba mu tshisanga etshi batu benza muabu muonso bua kuenda ne nsongakaji yonso udi ulua mu musoko wabu. Kadi, Suraang wakabenga bionso bivuabu bamulobesha nabi e kulamaye muoyo wende mutoke ku mêsu kua Nzambi. Bushuwa, nansha muvuaye munganga wenza mudimu munya ne butuku, uvua mpanda-njila wa pa tshibidilu.

Kumpala kua difesto divuabu benzele Suraang pakavuaye udilongolola bua kumbuka mu tshisanga etshi, bakulumpe ba musoko au bakamba ne: yeye ke uvua misionere wa bushuwa wa kumpala uvua mufike mu musoko au. Bantu bakuabu ba mu tshidiila etshi bakitaba mukenji wa Bukalenge ne muoyo muololoke bualu Suraang uvua mulamate bikole ku mêyi a mu Bible.

Ntatu bua bisangilu

Diasa dia imue misoko mitantshi mile didi dileja ne: bantu ba Yehowa badi ne bua kudienzeja bikole bua kumona mua kuyisha ne kubuelabu mu bisangilu biabu. Tangila tshilejilu tshia Bantemu banayi batambule: muntu mulume umue ne bantu bakaji basatu; batu benza mêba a bungi mu njila mu diya nansha mu difumina mu bisangilu. Batu basabuka misulu isatu mu njila au. Dîba ditu misulu ayi yuwula, muanetu wa balume au utu wowela uya dia muamua kumpala, wenda upulumuna luesu lunene lutubu belela bibuta biabu, mikanda, ne bilamba bia kubuela nabi mu bisangilu. Pashishe, upingana kabidi dishiya dia muamua bua kusabula bana betu ba bakaji.

Kasumbu kakuabu ka bana betu batu baya kubuela mu bisangilu mu tshidiila tshia kule tshia Nonouti mu Kiribati batu pabu bamona ntatu mishilangane. Nzubu utubu benzela bisangilu utu ukumbana anu bantu muanda-mutekete anyi muanda-mukulu. Bakuabu batu balonda bisangilu basombele pambelu, baponguela pa masoso a tukanu tudibu bele bu bimanu bia nzubu. Muaba udibu benzela bisangilu mpa njila udi bena musoko babanda bapueka padibu baya anyi bafuma mu bitanda biabu binene bia nzambi. Bulelela, basadidi ba Yehowa mbajadike se: tshidi ne mushinga ku mêsu kua Nzambi ki nnzubu minene to, kadi mbantu. (Hagai 2:7) Muanetu wa bakaji umuepele udi mutambule wa mu tshidiila etshi mmuntu mukulakaje udi kayi mua kuenda ntanta mule to. Kadi batu bamuambuluisha mu buambi kudi munga nsongakaji mumanyishi wa lumu luimpe udi kayi muanji kutambula utu wendakana nende umupusa mu ka-ditempu kende. Bushuwa, bana betu aba mbaleje mudibu banyishe bulelela!

Bamanyishi ba lumu luimpe bapite pa 2 100 badi bayisha mu bidiila bia Fidji mbadisuike bua kutungunuka ne kumanyisha lumu luimpe lua Bukalenge bua Nzambi. Mbashindike kabidi ne: bantu bakuabu ba bungi nebalue pabu ‘ba ku badi ne ditabuja too ne ku dilama dia anyima ne muoyo.’

[Karte mu dibeji 8]

(Bua kumona malu bimpe, tangila mu mukanda)

Australie

Fidji