Lama lumu luebe

MUNTU utu wibaka nzubu milenga utu upeta lumu lua muibaki wa dilambu. Nsongakaji udi ne meji a bungi mu kalasa utu umanyika bu mulongi wa lungenyi lutue. Nansha muntu utu kayi wenza mudimu udi mua kudiendeshila lumu bu muena lulengu. Bua kuleja bua tshinyi bidi ne mushinga bua kuikala ne lumu lulenga, Bible udi wamba ne: ‘Kuikala ne lumu luimpe kudi kupita kuikala ne bubanji bua bungi buakane, ne kupeta dianyisha kudi kupita kupeta kua tshiamu tshia argent ne tshia or buimpe.’​—Nsumuinu 22:1.

Muntu udi udipetela lumu lulenga ku malu makese-makese mavule adiye wenza munkatshi mua tshikondo kampanda. Kadi anu bualu bubi bumue patupu mbukumbane bua kulunyanga luonso. Tshilejilu, kuenda masandi musangu umuepele patupu kudi mua kunyanga lumu lulenga lua muntu. Mu nshapita 6 wa mukanda wa Nsumuinu, Mukalenge wa Isalele wa kale Solomo udi utudimuija bua tuetu kuepuka bikadilu ne malu mabi adi mua kunyanga lumu luetu ne malanda etu ne Yehowa Nzambi. Munkatshi mua bikadilu ne malu aa mudi kulaya tshintu anyi kudieyeka kakuyi diela dia meji, lulengu, mashimi ne tshiendenda tshia masandi, malu aa pawu ke adi Yehowa utamba kukina. Kuteleja mibelu eyi nekutuambuluishe bua kulama lumu luetu lulenga.

Udipatule mu mitshipu ya didieyeka iudi muenze kuyi muele meji bimpe

Nshapita 6 wa mukanda wa Nsumuinu udi utuadija ne mêyi aa: “Muananyi, pawikala mudieyeke kudi muntu, mudie lupiku bua kufutshila muntu mukuabu dibanza; wewe mulaye ne miaku ya mukana muebe, mudikuate lukole ne meyi a mukana muebe; muananyi, ukadi mudifile mu bianza bia mukuenu, bua kupatuka mu bualu ebu enza nunku: uye kudiela ku makasa a mukuenu ewu, umusengelele.”​—Nsumuinu 6:1-3, MMM.

Lusumuinu elu ludi lutubela bua kuepuka dibuelakana mu malu a bende a makuta adi kaayi atutangila, nangananga a benyi. Bushuwa, bena Isalele bavua ne bua ‘kuambuluisha muanabu uvua umueneka mushikile.’ (Lewitiki 25:35-38, MMM) Kadi bamue bena Isalele ba budimu bavua badiela mu mishinga ya njiwu ne basomba makuta kudi banga bantu, kadi balomba bakuabu bua ‘kudieyeka’ pa muaba wabu buobu, babueja bakuabu aba mu dibanza. Malu a muomumue adi mua kuenzeka lelu. Tshilejilu, bena ku banke itu isombeshangana makuta badi mua kulomba bua kuikale muntu muibidi udi mua kutua tshiâla pa mukanda kumpala kua kuitaba bua kusombesha muntu makuta adibu bamona ne: adi mua kujimina. Kuitaba lukasa-lukasa bua kuimanyina banga bantu mu muanda wa mushindu’eu nkubula kua meji! Bualu kudi mua kutubuejakaja mu mabanza a mfranga, ne kutunyangila mene lumu ku banke ne kudi basombeshanganyi bakuabu ba makuta!

 Tshia kuenza ntshinyi biwikala mudikondakaje mu bualu buvua bumueneka bu buimpe kumpala, kadi panyima pa dibukonkonona bimpe bumueneka kabuyi bua meji? Tshia kuenza ntshiotshi etshi: angata lutambishi uteke ku luseke, ‘udiele ku makasa a mukuenu, umusengelele,’ mmumue ne: umutendakene njila ne njila. Tudi ne bua kuenza muetu muonso bua kujikija malu aa. Umue mukanda udi uleja ne: “Enza muebe muonso too ne panumvuangana ne muntu udi nebe tshilumbu ne panuatshijikija, bua se: didieyeka diebe kadilu kukukudimukila wewe anyi dîku diebe.” Kujingakanyi bua kujikija muanda eu to, bualu Solomo udi utungunuka ne: ‘Kuitabuji bua tulu tukukuate ku mêsu ebe, anyi bua tulu tukole tubuikile bilafinyi biebe. Udipandishe bu mudi kabuluku kadisungila mu bianza bia tshilembi, bu mudi nyunyi udipandisha mu bianza bia tshilembi tshia nyunyi.’ (Nsumuinu 6:4, 5) Kudipatula mu lupiku ludi kaluyi luimpe padiku mushindu nkupite buimpe pamutu pa kukubuejakajalu mu tshilumbu.

Ikala ne tshisumi bu tshia kankenene

Solomo udi utubela ne: ‘Wewe, muntu mufube, ya kudi kankenene; welangane meji mudiku kaya mu njila yaku, wikale ne meji.’ Mmeji kayi atudi mua kupetela ku midimu ya kankenene kakese nunku? Mukalenge Solomo udi wandamuna ne: ‘Koko, kakayi ne mukalenge, mutangidi, anyi mukokeshi, katu kadilongoluela bidia biaku mu tshikondo tshia munya mukole; katu kaditekela biakudia biaku mu tshikondo tshia kunowa.’​—Nsumuinu 6:6-8.

Tunkenene tutu ne bulongame bua dikema, ne tutu tukuatshishangana mu mushindu udi ukemesha. Tshingenyingenyi tshiatu ke tshidi tshitusaka bua kulama biakudia bua matuku adi kumpala. Katuena ‘ne mukalenge, mutangidi, anyi mukokeshi.’ Bushuwa, nansha mudiku tshimamuende wa tunkenene, tshituku anu bua kuela mayi ne kutoya tukuabu tunkenene. Katshitu tshitumina tunkenene dîyi to. Nansha mudi tunkenene katuyi ne mulombodi wa kututumina dîyi anyi mutangidi wa kutulondolola, tutu anu tuenza mudimu watu katuyi tuikisha.

Amba tung, katuenaku petu ne bua kuikala ne tshisumi bu tshia tunkenene anyi? Kuenza mudimu bikole ne kudienzeja bua kuulengeja nansha padibu batuludika anyi kabayi batuludika kudi kutupetesha diakalenga. Nenku patudi mu kalasa, ku mudimu, nansha mu midimu yetu ya mu nyuma, tudi ne bua kuyenza ne muoyo wetu mujima. Anu mudi tunkenene tusanka ne bintu bia ku tshisumi tshiatu, nenku Nzambi mmusue bua tuetu petu ‘tusanke bua midimu yetu yonso [mikole].’ (Muambi 3:13, 22; 5:18) Mudimu mukole udi upetesha muntu kuondo ka muoyo katoke ne disanka.​—Muambi 5:12.

Solomo udi utabuluja muntu muena lulengu ne nkonko ibidi eyi idiye wela kayi umulomba diandamuna: ‘Wewe, mufube, neulale panshi musangu bule munyi? Neujuke bua kutabala ku tulu tuebe dîba kayi?’ Mukalenge Solomo udi widikija mutu muena lulengu udiambila ne: ‘Anu tulu tukese, anu kulala tulu tshitupa; anu kudikuata ne bianza bua kubunga tulu kakese. Pashishe bupele buebe nebukukuate bu munyengi, ne tshiyole netshikukuate bu muena mvita.’ (Nsumuinu 6:9-11) Patshidi muena lulengu mulale muele tshiadi muulu apu, bupele budi bumukuata bu munyengianganyi wa bintu, tshiyole tshidi tshimubuelela bu muntu muena mvita. Madimi a muena lulengu kaatu anenga ne kutoloka bisonsa ne mionji ya mpesa. (Nsumuinu 24:30, 31) Mushinga udi muena lulengu wenda kautu unenga ne kukuluka. Kakuena mfumu wa mudimu udi mua kulama muena lulengu mutantshi mule to. Ne mulongi udi ne lulengu lua bungi udiku mua kukuata mu kalasa anyi?

Ikala wamba bulelela

Solomo udi utungunuka umvuija kabidi tshikadilu tshikuabu tshitu tshinyanga lumu lua muntu ne malanda ende ne Nzambi, wamba ne: “Mutshimbakane mmuntu mubi, udi wenda wakula malu a dishima. Udi ubunya disu, ukoka makasa panshi, ulobeshangana ne tshianza. Udi ne bubi mu muoyo wende, welangana meji a kuenzelangana bibi misangu  yonso, ukebangana bilumbu.”​—Nsumuinu 6:12-14, MMM.

Muaba eu badi bumvuija mutu muena mashimi. Muena mafi utu anu ukeba bua kusokoka mashimi ende. Mmushindu kayi? Katu anu “wakula malu a dishima” ne dîyi dia mukana patupu to, kadi utu udinga kabidi ku nyungishilu wende wa mubidi. Mumanyi mukuabu udi uleja ne: “Dinyungisha mubidi, dîyi, nansha tshilunji tshia mpala wende bidi bikale mayele mamana kulongolola a kushima nawu; udi ne tshimuenekelu tshia muntu udi wamba bulelela, kadi munda muende mmusokome meji mabi ne matandu.” Muntu tshianana wa mushindu’eu utu ufuka meji mabi ne misangu yonso ujudija bilumbu. Tshiamufikila ntshinyi?

Mukalenge wa Isalele udi wandamuna ne: “Nanku, neabutuke diakamue, neafue musangu umue kakuyi mushindu mukuabu wa kuenza.” (Nsumuinu 6:15, MMM) Padibu batandula muena mashimi, lumu luende ludi lunyanguka musangu umue. Nganyi witaba kabidi buende bualu? Bushuwa, ndekelu wa bionso tshiende nkabutu, bualu mbatele “bena mashimi bonso” mu mulongo wa bantu bafua lufu lua tshiendelele. (Buakabuluibua 21:8) Mu mishindu yonso, tuikalayi ‘tuenda bimpe [ne bulelela] mu malu onso.’​—Ebelu 13:18.

Kina malu adi Yehowa mukine

Kukina kua malu mabi kudi kutukanda bua kuenza malu adi anyanga lumu luetu. Nanku tudi ne bua kukina malu mabi bikole! Kadi mmalu kayi mine atudi ne bua kukina? Solomo udi wamba ne: ‘Mianda isambombo idiku idi Yehowa ukina; e, mianda muanda-mutekete idi imunyingalaja: mêsu adi ne dipetu, ludimi ludi lushima, ne bianza bidi bimatshisha mashi a badi kabayi ne tshilumbu panshi, mutshima udi upangadija mianda ya meji mabi, makasa adi aya lubilu kudibu benza malu mabi, mumanyi wa malu udi wamba mêyi a kudinga, ne muntu udi uvudija matandu munkatshi mua bena muntu.’​—Nsumuinu 6:16-19.

Malu muanda-mutekete adi Nsumuinu itela aa mmalu manene adi alenga mishindu pabuipi ne yonso ya malu mabi. ‘Mêsu adi ne dipetu’ ne ‘mutshima udi upangadija mianda ya meji mabi’ mmpekatu itu muntu wenzela mu lungenyi luende. “Ludimi ludi lushima” ne ‘mumanyi wa malu udi wamba mêyi a kudinga’ mmpekatu ya mu mêyi. ‘Bianza bidi bimatshisha mashi a badi kabayi ne tshilumbu panshi’ ne “makasa adi aya lubilu kudibo benza malu mabi” mbienzedi bibi. Ne muntu udi Yehowa mutambe kukina ngudi munange kusongakaja bantu bavua mua kuikala basombe mu ditalala. Divula dia malu asambombo aa alua muanda-mutekete didi dileja ne: kaavua ne bua kushikila anu pa bungi kampanda to, bualu bantu batshidi benda bavudija bienzedi biabu bibi.

Bushuwa, malu adi Yehowa mukine adi ne bua kuikala atuenza muengu. Tshilejilu, tudi ne bua kuepuka “mesu a dipetu” peshi malu makuabu onso a diditambisha. Ne tudi ne bua kuepuka bijanu, bualu mbipepele bua biobi kukebesha “matandu munkatshi mua bena muntu.” Tuetu tutangalaja biambamba bidi kabiyi bimpe, bijanu bia patupu, peshi mashimi, tudi mua kuikala katuyi ‘tumatshisha mashi a badi kabayi ne tshilumbu panshi,’ kadi bushuwa tubutula lumu lua muntu mukuabu.

‘Bulengele buende kabukusaminyi muoyo’

Solomo udi utuadija tshitupa tshikuabu tshia mibelu yende wamba ne: “Muananyi, ulonde mikenji idi tatuebe ukuelela, kubengi bidi mamuebe ukulongesha. Ulame mikenji eyi mu muoyo webe dîba dionso, uyele mu nshingu muebe.” Tshidiye wambila bualu ebu mbua se: “Neyikuludike mu malu onso audi wenza, neyikukube nansha wewe mulale, paudi ujuka, neyikuambile tshia kuenza.”​—Nsumuinu 6:20-22, MMM.

Mibelu ya mu Bible idiku mua kutukuba bimpe ku buteyi bua tshiendenda tshia masandi anyi? Eyowa! Solomo udi utujadikila ne: ‘Mukenji udi muinda, diyisha diawu didi munya, kubela kudi ne diyisha kudi njila wa muoyo. Biobi nebikulame ku buteyi bua mukaji munyanguke, ku ludimi lua mukaji wa bende ludi luamba mêyi a lubombo.’ (Nsumuinu 6:23, 24) Kuvuluka mibelu ya mu Dîyi  dia Nzambi ne kuyangata bu ‘muendu ku makasa etu ne munya muteme mu njila wetu,’ nekutuambuluishe bua kukandamena mêyi a lubombo adi mukaji anyi mulume wa bibidilu bibi utulobesha nawu bua kuenda nende.​—Misambu 119:105.

Mukalenge wa meji udi utubela ne: ‘Kusaminyi muoyo ku bulengele buende nansha, yeye kakukuatshi mu buteyi ne kuvinya kua mesu ende.’ Bua tshinyi? ‘Bua bualu bua mukaji wa ndumba muntu neashale anu ne tshipesa tshia [diampa anyi] nshima; ne mukaji mubaka udi wenda masandi udi ulemba muoyo wa mushinga mukole wa muntu.’​—Nsumuinu 6:25, 26.

Solomo udi ubikila mukaji udi muende masandi ne: ndumba anyi? Bidi mua kuikala nanku. Peshi udi mua kuikala uleja mudi bipeta bidi bifumina ku dienda masandi ne ndumba bishilangane ne bidi bifumina ku diangata mukaji wa bende. Muntu udi udia bulunda ne ndumba udi mua kutua panshi kushala anu ne ‘tshipesa tshia [diampa anyi] nshima,’ mmumue ne: kulua mulanda wa dikema. Udi mene mua kukuatshika masama mabi a mu bilamba atu atekangana panshi, bu mudi dia SIDA didi dibutulangana edi. Kadi, muntu uvua udia malanda ne mulume anyi mukaji wa bende uvua mua kuikala diakamue mu njiwu mikole mu tshikondo tshia Mikenji ya Mose. Mukaji musela udi wenda masandi udi uteka “muoyo wa mushinga mukole” wa bayende wa mu bundumba mu njiwu. Mukanda mukuabu udi wamba ne: “Mbalongolole . . . bualu bukuabu budi bupite kufua ku malu a buenzavi. Muenji wa mpekatu ngua kufundila tshibawu tshia lufu.” (Lewitiki 20:10; Dutelonome 22:22) Mu mishindu yonso, nansha mukaji wa nunku yeye ne mpala mulengele wa mushindu kayi, ki mmuntu wa tuetu kumvua utusamina muoyo to.

‘Kuteki kapia mu tshiadi tshiebe’

Bua kumvuija njiwu itu tshiendenda tshikebesha, Solomo udi webeja ne: ‘Muntu udi mua kuteka kapia mu tshiadi tshiende, bivualu biende kabiyi bipia anyi? Muntu udi mua kudiata pa makala a kapia adi atema, makasa ende kaayi ashila anyi?’ Solomo udi umvuija tshilejilu etshi ne: ‘Bidi muomumue kudi muntu udi ubuela kudi mukaji wa muena mutumba nende; muntu yonso wamulenga bianza neakengeshibue.’ (Nsumuinu 6:27-29) Muenji wa mpekatu wa mushindu’eu neapete dinyoka nansha bia munyi.

Bible udi utuvuluija ne: ‘Bantu kabena bapetula muibi, bibaye tshia kudia pumvuaye nzala.’ Nansha nanku, ‘biamukuatabu, neapingaje bintu bivudija misangu muanda-mutekete; neafile biuma bionso bidi mu nzubu muende.’ (Nsumuinu 6:30, 31) Kale mu Isalele, muivi uvua ne bua kufuta nansha pavuabi bikengela kufila bintu biende bionso. * Nanku muntu uvua wenda ne mukaji wa bende uvua muntu wa kunyoka bikole, bualu kêna ne bualu bua kudingila bua kubingisha tshidiye muenze etshi to!

Solomo udi wamba ne: ‘Udi wenda masandi ne mukaji kêna ne lungenyi.’ Muntu udi kayi ne lungenyi katu wela meji bimpe to, bualu udi “udibutula.” (Nsumuinu 6:32) Udi mua kuikala umueneka bu muntu wa lumu lulenga, kadi mundamunda kayi muntu wa malu makane to.

Kudi malu mavule adi muntu udi muende ne mukaji wa bende upeta. “Nebamutute, bamudiwule, neikale ne bundu kashidi. Bualu mukawu udi ulundula tshiji tshia bayende wa mukaji, dituku dia disombuela kakuikala ne luse. Kakuanyisha bua bamufute tshibawu, nansha wewe mufile bintu bia bungi, kena wanyisha.”​—Nsumuinu 6:33-35, MMM.

Muivi udi mua kufuta bintu bivuaye muibe, kadi muntu udi muende ne mukaji wa bende kêna ne tshidiye mua kufuta muena mukaji. Ntshintu kayi tshidiye mua kufuta mulume eu udi ne tshiji? Nansha muenji wa bibi eu yeye mumusengelele mushindu kayi, udi mua kubenga bua kumufuila luse. Muntu udi muende ne mukaji wa bende kêna ne tshidiye mua kufuta bua mpekatu wende nansha bia munyi. Nebashale anu bamupenda ne bundu buende kabuakujika. Kabidi, nansha bia munyi, kêna mua kudipikula anyi kumbusha dinyoka didibu bamukosele to.

Nanku mbia meji bua tuetu kudilama ku buendenda ne ku bikadilu ne bienzedi bikuabu bidi mua kunyanga lumu lulenga lutudi nalu ne bidi mua kupendesha Nzambi. Tuikale badimukile didieyeka didi kadiyi dia meji. Tuenzayi bua tshisumi ne diamba dia malu malelela bilengeje lumu luetu. Ne mutudi tudienzeja bua kukina malu adi Yehowa mukine, tukebayi bua kuikala ne lumu lulenga kumpala kuende ne kua muntu netu.

[Mêyi adi kuinshi]

[Tshimfuanyi mu dibeji 25]

Wikale mudimukile ditua dia biâla pa mikanda ya basombeshanganyi ba makuta

[Tshimfuanyi mu dibeji 26]

Ikala ne tshisumi bu tshia kankenene

[Tshimfuanyi mu dibeji 27]

Epuka bijanu