Mu katupa emu, bantu kabakuikala kabidi mu dishikila to

NSOMBELU udi wenda amu unyanguka, ne malu adi afikisha bantu ku dishikila adi a bungi. Patu bualu kampanda bututekeshe ku muoyo, tudi mua kumona bitukolela bua kubenga kubungama. Bushuwa, nansha bantu batu banange kuikala ne muoyo badi mua kubungama bikole! Tangila bimue bilejilu bikese ebi:

Muprofete Mose wakateketa mu mikolo e kuambaye ne: ‘Unshipe ku tshianza tshiebe, bingasangana luse ku mêsu kuebe; bua tshitangidi dikenga dianyi nunku.’ (Nomba 11:15) Pavua muprofete Eliya unyema baluishi bende, wakamba ne: ‘Kuakujika mpindieu, Yehowa angata muoyo wanyi.’ (1 Bakelenge 19:4) Muprofete Yona wakamba pende ne: ‘Yehowa, ndi nkusengelela ne: angata muoyo wanyi; bualu bua kufua kudi kupita kushala ne muoyo buakane kundi.’ (Yona 4:3) Kadi ni m’Mose, ni ng’Eliya ni n’Yona kabakadishipa to. Buonso buabu bavua bamanye mukenji wa Nzambi uvua wamba ne: ‘Kushipianganyi.’ (Ekesode 20:13) Bu muvuabu bitabuje Nzambi bikole, bavua bamanye bimpe ne: kakuena bualu budi mua kupanga kuakana, ne bavua bamanye kabidi ne: muoyo ndipa dia Nzambi.

Kadi netuambe tshinyi bua ntatu itudi tupeta mpindieu? Pa kumbusha tunyinganyinga peshi masama makuabu, imue misangu balela betu, bena mutumba ne bena mudimu netu badi batukengesha. Bible udi wakula bua bantu badi ‘bûle tente  ne malu onso adi kaayi makane, ne malu mabi, ne kusaminangana kua mioyo, ne lukinu; ne bûle tente ne mukawu, kushipangana, kutandangana, lubombo, lukuna; bena manunganyi, bena bunsonge, bena lukuna ne Nzambi, bena dikamakama, badisu, bafunyifunyi, babangi ba malu mabi mapiamapia, bapidi ba mêyi a baledi babu, kabayi ne meji, kabayi balama mêyi adibu bapunga, kabayi ne dinanga dia bantu, kabayi ne mitshima ya luse.’ (Lomo 1:28-31) Patudi tusomba pamue ne bantu ba mushindu’eu dituku dionso, muoyo kawena utusankisha kabidi to. Nansha nanku, mmunyi mutudi mua kuambuluisha bantu badi dijinga ne busambi ne diambuluisha?

Tuikale tuteleja

Ntatu ne makenga bidi mua kufikisha muntu ku dipanga kutukija. Muena meji wakamba ne: “Muntu wa meji udi wandamuka mulembakane padibo bamukengesha.” (Muambi 7:7, Mukanda wa Mvidi Mukulu) Nunku kabiena bikengela kumona bu bilele padi muntu ujinga kudishipa to. Ntatu idiye nayi, ni nya mu lungenyi, ku mubidi, mu meji ta mu nyuma, idi mua kulomba bua kumuambuluisha kakuyi njingakanyi. Bushuwa, manga ne ngondapilu ya batoke bitu bishilangana, ne muntu nkayende udi ne bua kudiangatshila dipangadika bua mishindu ya luondapu ludiye musue.​—Galatia 6:5.

Nansha meji a kudishipa wowu mafumine ku bualu kayi, kuikala ne muntu mujinguludi wa malu, muditeki wa pa muaba wa bakuabu ne wa lutulu wa kukuatshila malu kudi mua kuambuluisha bikole. Balela ne balunda badi bitaba bua kuteleja muntu udi mu nsombelu wa nunku badi mua kumuambuluisha. Pa kumbusha meji a buwetu ne bulenga, malu adi akolesha mu mikolo a mu Mukanda wa Nzambi adi mua kuambuluisha bikole aba badi mu dishikila.

Diambuluisha dia mu nyuma bua badi babungame

Udi mua kukema bu wewe mua kumanya mutu dibala dia Bible dikankamijangana. Nansha mudi Bible kayi mukanda udi wondapa masama a mpala, udi mua kutuambuluisha bua kuangata muoyo ne mushinga. Mukalenge Solomo wakamba ne: ‘Ndi mumanye ne: kakuena bualu buimpe bu kusanka ne kuenza malu mimpe matuku onso patshidi muntu ne muoyo. Muntu yonso adie biende, anue biende, asanke biende mu midimu yende yonso, bua eku nkupa kua Nzambi.’ (Muambi 3:12, 13) Pa kumbusha mudimu muimpe udi usankisha muntu, bintu bikese bu mudi lupepele lutalale, munya, bilongo, mitshi ne nyunyi, mmapa a kudi Nzambi adi mua kutupesha disanka.

Bualu budi butamba kutukankamija ndishindika didi Bible utupesha dia se: Yehowa Nzambi ne Muanende mbatunange. (Yone 3:16; 1 Petelo 5:6, 7) Mufundi wa misambu wakambilamu ne: ‘[Yehowa] avudijibue disanka, udi ututuadila bujitu buetu ku dituku ku dituku; Nzambi udi lupandu luetu.’ (Musambu 68:19) Nansha tuetu mua kudimona katuyi ne mushinga anyi bantu ba tshianana, Nzambi udi utulomba bua kumusambila. Ikala mutuishibue se: kakulengulula muntu udi umulomba diambuluisha ne budipuekeshi ne muoyo mujima.

Kakuena muntu udi mua kutekemena nsombelu udi kayi wa ntatu lelu to. (Yobo 14:1) Kadi, bulelela bua mu Dîyi dia Nzambi mbuleje bantu ba bungi ne: kudishipa ki mmushindu muimpe wa kujikija ntatu yabu to. Tangila anu muvua mupostolo Paulo muambuluishe mulami wa nzubu wa lukanu uvua mioyo ya munda mishikile, ‘pakatabalaye; pakamonaye bibi bia nzubu biunzuluke, wakatula muele wende, wakamba kudishipa, wela meji ne: bena lukanu bavua banyeme.’ Dîba adi, mulami wa nzubu wa lukanu au wakamona ne: kudishipa kuvua kuimpe pamutu pa kuluabu kumushipa ne pamu’apa kumuindija bua kumushipa bua muvuaye munyemeshe bena lukanu. Mupostolo Paulo wakamuela dîyi ne: “Kudienzedi bibi, buonso buetu tudiku.” Paulo kakashikidila apu to. Yeye ne Sila bakakolesha mulami wa nzubu wa lukanu eu ne kuandamunabu lukonko luende elu: ‘Bakalenge, bundi nabu mbua kuenza tshinyi bua kusungidibua?’ Bakamuandamuna ne: ‘Itabuja Mukalenge Yezu, neusungidibue ne ba mu nzubu muebe.’ Pashishe bakamuambila dîyi dia Yehowa yeye ne ba mu nzubu muende, ne ‘bakamubatiza lukasa ne bantu bende bonso.’ Mulami wa nzubu wa lukanu au ne ba mu nzubu muende bonso bakasanka bikole ne bakamona muoyo mu mukuabu mushindu.​—Bienzedi 16:27-35.

Lelu’eu, tudi tupeta disulakana patudi tumanya ne: Nzambi ki ngudi ukebesha malu mabi to! Dîyi diende didi dileja patoke ne: nyuma mubi kampanda, ‘udi muidikibue ne: Diabolo ne Satana,’ ke udi ‘mudingi wa ba pa buloba bonso.’ Kadi matuku ende mmatangile ku dijika. (Buakabuluibua 12:9, 12)  Mu katupa kîpi emu, Nzambi neajikije makenga onso adi Satana ne ba-demon bende bakebele bantu pa buloba. Pashishe malu adi afikisha bantu ku dishikila ne ku didishipa neajike kashidi mu buloba bupiabupia budi Nzambi mulaye.​—2 Petelo 3:13.

Busambi bua badi bela lubila bakeba diambuluisha

Nansha mpindieu, aba badi batekete ku muoyo badi mua kupeta busambi mu Bible. (Lomo 15:4) Mufundi wa misambu wakimba ne: ‘Wewe Nzambi, kuena upetula mutshima wa majiya ne udi unyingalala bua bubi buawu.’ (Musambu 51:17) Bulelela, tutu tupeta imue ntatu ne tumona bipeta bia dipanga bupuangane, ne kakutu mushindu wa kubiepuka nansha. Kadi kupeta dimanya dijalame dia Tatu wetu wa mu diulu muena malu malenga, wa dinanga ne wa meji makane nekutupeshe dishindika dia se: tudi ne mushinga ku mêsu kuende. Nzambi udi mua kulua Mulunda ne Mulongeshi wetu mutambe bunene. Tuetu badie malanda mashême ne Yehowa Nzambi, kakutufuisha bundu nansha. Mufuki wetu udi wamba ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendelamu.’​—Yeshaya 48:17.

Kueyemena Nzambi nkuambuluishe bantu ba bungi be. Tshilejilu, Mara ukavua mutekesha kudi dibungama dia mutantshi mule pakaluaye kabidi kufuisha muanende umuepele mu njiwu ya mashinyi. * Lungenyi luakamujimina ne wakakeba bua kudishipa. Kadi mpindieu utu ujuka pa dinda bua kuenza midimu ya mu nzubu muende. Mmusue kuteleja mijiki ne kuambuluisha bantu bakuabu. Ditekemena dia se: “dibika dia bafue nedikaleku, ne dia bakane ne dia babi,” ndijikije tumue tunyinganyinga tuvuaye natu bua lufu lubi lua muanende munanga, ne ditekemena edi ndikoleshe ditabuja didiye nadi kudi Nzambi. (Bienzedi 24:15) Bu muvua Mara kayiku muanji kupeta dijinga dia kulua bu muanjelu mu diulu, mêyi a mu Musambu 37:11 adi alonda aa akalenga mutshima wende: ‘Badi ne mitshima mipuekele nebapiane buloba, mioyo yabu neyisanke mu ditalala dikumbane.’

Sandra mmamu wa bana basatu wa mu ditunga dia Brésil wakadienzeja bikole bua kulua mamu wa tshitembu. Udi wamba ne: “Mvua ne malu a bungi menemene a kuenza pakafua tatu mu tshimpitshimpi ne kabidi anu mu tshine tshikondo atshi pangakumvua ne: bayanyi uvua mubanjije mukaji mukuabu, tshiakelaku meji nansha bua kulomba  Nzambi diambuluisha to.” Mioyo ya munda yakashikila Sandra ne kujingaye bua kudishipa. Ntshinyi tshiakamuambuluisha bua kubenga kudishipa? Wakangata malu a mu nyuma ne mushinga. Udi wamba ne: “Butuku buonso kumpala kua meme kulala, ntu mbala Bible ne ntu nteta kuditeka mu nsombelu wa bantu bena malu andi mbala. Ntu kabidi mbala tshibejibeji tshia Tshibumba tshia Nsentedi ne tshia Réveillez-vous! ne ntu musue nangananga miyuki ya malu a mu nsombelu bualu itu ingambuluisha bua kuitaba nsombelu undi nende.” Bu mudiye mumanye ne: Yehowa mmulunda wende munene, mmulonge mua kuikala ulomba malu masunguluke mu masambila.

Nsombelu kayi wa dishikila mu matuku atshilualua

Kumanya ne: makenga a bantu adiku bua tshitupa tshîpi mmuanda udi utukolesha ku muoyo! Mu Bukalenge bua Nzambi, bana ne bantu bakole badibu benzele malu mabi bua kansungasunga nebasanke. Anu muvuabi bimana kumanyisha mu musambu mukuabu wa tshiprofete, Yezu Kristo, Mukalenge udi Yehowa muteke ‘neapikule mupele udi umubila, ne mukengedi udi kayi ne diambuluisha.’ ‘Neafuile [kabidi] muena dikenga ne mupele luse, neapandishe muoyo wa bapele.’ ‘Neabasungidile ku tshinyangu ne dikenga, mashi abu neikale ne mushinga ku mêsu kuende.’​—Musambu 72:12-14, MMM.

Tshikondo tshikala mêyi a tshiprofete aa mua kukumbana tshikadi pabuipi. Bidiku bikusankisha bua kuikala ne muoyo wa kashidi pa buloba mu nsombelu eyi anyi? Bikalabi bikusankisha, udi ne bua kusanka ne kunanga muoyo, bualu ndipa dia Nzambi. Ne biwambila bakuabu milayi ya mu Bible eyi idi isamba bantu, udi mua kuambuluisha bantu badi bela lubila bakeba diambuluisha mu buloba ebu mudi bantu kabayi ne luse ne dinanga bua kupetabu disanka divule mu nsombelu wabu.

[Mêyi adi kuinshi]

[Tshimfuanyi mu dibeji 6]

Kudi bintu bia bungi bidi bitupetesha disanka lelu

[Tshimfuanyi mu dibeji 7]

Udiku mutekemene bua kusomba pa buloba kapayi dishikila anyi?