Udi mua kusemena pabuipi ne Nzambi udi kayi umueneka anyi?
Udi mua kusemena pabuipi ne Nzambi udi kayi umueneka anyi?
PAMU’APA udi mua kudikonka ne: ‘Mmunyi mundi mua kushemeja bulunda ne muntu undi tshiyi mua kumona?’ Lukonko elu ludi mua kuikala luimpe. Kadi tangila bualu ebu:
KUMONA kudi ne mushinga bua kufika ku dinanga muntu ne ku didia nende bulunda bua kashidi anyi? Malu adi kaayi amueneka kaenaku pawu ne mushinga, peshi mikale mene ne mushinga wa bungi menemene anyi? Eyowa! Ke bua tshinyi bamue bantu batu bafike ku dishemeja bulunda ne bakuabu anu ku mikanda ivuabu bafundilangana pa tshibidilu; mikanda yabu ayi ivua ileja bimpe malu atubu basue ne makuabu atubu kabayi basue, bipatshila biabu, bikadilu biabu, bilele bitubu bela ne ngikadilu mikuabu anyi manga malu atu abasankisha.
Bampofu pabu batu baleja ne: kabiena anu bikengela kumona muntu bua kushisha kudia nende malanda mashême to. Tangila tshilejilu tshia Edward ne Gwen, bampofu babidi baselangane. * Edward wakapetangana ne Gwen mu kalasa ka bampofu muvuabu bonso bikale balongi. Edward wakanyisha ngikadilu ya Gwen, nangananga bua diamba bulelela, ngakuilu ne bienzedi biende, kabidi ne bua muvuaye munange kuenza mudimu. Gwen yeye udi wamba ne: uvua munange Edward bualu “uvua ne ngikadilu yonso ivuabu bandongeshe bua kuangata ne mushinga.” Bakatuadija kuseselangana, ne kunyima kua bidimu bisatu buobu e kuselangana.
Edward udi wamba ne: “Panudi basombe pamue, bumpofu kabuena mua kunupangisha bua kudia malanda ne muntu mukuabu to. Bushuwa, kakuakuikala mushindu wa nuenu kumonangana ne mêsu to, kadi biumvuilu bienu biobi bidi bimona.” Mpindieu, kukadi bidimu 57, batshidi anu banangangane bikole. Badi bumvuija ne: kudi malu bu anayi adi makoleshe malanda abu malenga: (1) kumanya ngikadilu ya mukuabu, (2) kuela meji bua ngikadilu eyi ne kusemena kudiyi, (3) diyukilangana dilenga dîba dionso ne (4) kuenza malu pamue.
Malu anayi aa adi ne mushinga bua malanda kuikalawu mimpe, nansha pankatshi pa balunda, pankatshi pa mulume ne mukajende, ne nangananga pankatshi pa bantu ne Nzambi. Mu tshiena-bualu tshidi tshilonda, netumone mudi ditumikila malu aa mua kutuambuluisha bua kudia malanda mashême ne Nzambi, nansha mutudi katuyi mua kumumona. *
[Mêyi adi kuinshi]
^ Mêna mmashintulula.
^ Bishilangane ne malanda atu pankatshi pa bantu ne bantu nabu, bua kufika ku didia malanda ne Nzambi, tudi ne bua kuanji kuitaba se: udiku. (Ebelu 11:6) Bua kumanya malu makuabu adi mua kukufikisha ku ditabuja Nzambi bikole, suaku ubale mukanda wa Y a-t-il un Créateur qui se soucie de vous?, mupatula kudi Bantemu ba Yehowa.