Kalolo ka bungi kadi kapetesha disanka

BU MUVUA mupostolo Paulo muikale mutangidi muena Kristo wa dinanga, uvua uditatshisha ne muoyo mujima bua bena kuitabuja nende. (2 Kolinto 11:28) Ke bualu kayi, mu bidimu bia 50 bia Bikondo Bietu ebi pakalongololaye bua basangishe makuta a diambuluisha nawu bena Kristo ba mu Yudeya bavua mu dikenga, Paulo wakakeba mushindu wa kufila dilongesha dilenga bua bidi bitangila kalolo. Wakaleja mudi Yehowa utamba kuanyisha kupa kudi muntu ufila ne disanka. E kuambaye ne: ‘Muntu ne muntu afile bintu bu muakadisunguilaye mu mutshima wende; kafidi ne kanyinganyinga, anyi bu muenzeja ku bukole; bualu bua Nzambi udi musue muena kupa udi ufila ne disanka.’​—2 Kolinto 9:7.

Bapele ba menemene, kadi bikale bena kalolo

Bena Kristo ba bungi ba mu bidimu lukama bia kumpala kabavua bena kantu ku bianza to. Paulo wakamba ne: munkatshi muabu kamuvua “ba bungi [bavua] bakole.” Bavua ‘bintu bitekete bia pa buloba,’ ‘malu mapuekele a pa buloba.’ (1 Kolinto 1:26-28) Tshilejilu, bena Kristo ba mu Makedonia bavua mu ‘bupele bua bungi’ ne “mu makenga.” Kadi bena kuitabuja bena bupuekele aba bakalomba basengelela bua kufilabu pabu bintu bua ‘kukuatshishangana kua bansanto’; ne Paulo wakamba ne: bintu biakafilabu bivua ‘bipite bukole buabu’!​—2 Kolinto 8:1-4.

Kadi, kupa kua kalolo eku kakuvua kulonda bungi bua bintu bivua muntu ufila to. Tshivua ne mushinga mmuoyo uvua usaka muntu, dijinga diende dia kufila ne mushindu uvua mutshima wende. Paulo wakaleja bena Kristo bena Kolinto ne: kufila mapa mbualu budi butangila lungenyi ne mutshima. Wakamba ne: ‘Ndi mumanye kudilongolola kuenu kungakatumbisha bua bualu buenu kudi ba mu Makedonia, ne lukunukunu luenu luakasonsola mitshima ya bantu ba bungi.’ Bavua ‘badisunguile mu mitshima yabu’ bua kufila bintu ne kalolo.​—2 Kolinto 9:2, 7.

‘Nyuma wabu wakabasaka’

Mupostolo Paulo uvua mua kuikala muvuluke tshilejilu tshia kale tshia kupa kua kalolo, musangu uvua bantu bafile bintu mu tshipela (kukavua kupite bidimu bipite pa 1 500 tshikondo atshi). Batshivua bafuma ku dipikula bisa 12 bia Isalele ku bupika mu Ejipitu. Mpindieu bakavua kuinshi kua Mukuna wa Sinai, ne Yehowa kubambila bua kuasabu nzubu wa ntenta wa tshitendelelu ne kutekamu bintu bia kutendelela nabi. Bu muvua mudimu eu ne bua kuangata bintu bia bungi, bakalomba bantu bua kufilabu bintu.

Ntshinyi tshiakenza bena Isalele? “Bakalua, eu yonso uvua ne mutshima umuenzeja, ne bakatuala, eu yonso uvua ne nyuma umusaka, dipa dia Yehowa bua mudimu wa ntenta wa tshisangilu.” (Ekesode 35:21, NW) Bantu bakafila bintu ne kalolo anyi? Eyowa, bakafila bintu bia bungi menemene! Bakalua kuambila Mose ne: ‘Bantu badi balua ne bintu bitambe bungi bia kuenza nabi mudimu wakuamba Yehowa.’​—Ekesode 36:5.

Bena Isalele mu tshikondo atshi bavua ne bintu anyi kabavua nabi? Matuku makese patupu kumpala, bavua bapika, bakenga, ‘babakengesha ne mudimu,’ babenzeja “mudimu mukole,” bavua mu “dikenga.” (Ekesode 1:11, 14; 3:7; 5:10-18) Nenku bidi bimueneka ne: kabavua babanji to. Tshidibi, bena Isalele bakumbuka mu ditunga muvuabu bapika ne mikoko ne ngombe. (Ekesode 12:32) Kadi kayivua mua kuikala ya bungi menemene to, bualu matuku makese kunyima kua buobu bamane kupatuka mu Ejipitu, bakatuadija kudilakana bamba muvuabu kabayi ne munyinyi, kabayi ne tshia kudia.​—Ekesode 16:3.

 Kadi mpindieu nkuepi kuakapetela bena Isalele bintu bia mushinga biakafilabu bua kuasa nzubu wa ntenta? Kudi bena Ejipitu, bamfumu babu ba kale. Bible udi wamba ne: ‘Bena Isalele bakalomba bena Ejipitu bilenga bia argent ne bia or ne bilulu. [Bena Ejipitu] bakabapa bintu biakabalombabu.’ Yehowa ke uvua muenzeje bena Ejipitu bua kupeshabu bena Isalele bintu, ki m’Palô nansha. Bible udi wamba ne: ‘Yehowa wakapa bantu dikasa dimpe ku mêsu kua bena Ejipitu, bakabapa bintu biakalombabu.’​—Ekesode 12:35, 36.

Nanku, anji elabi meji muakumvua bena Isalele. Bantu ba bipungu bivule bavua bakenge bua bupika bubiabubi ne kabidi bua bulanda. Mpindieu bakavua badikadile ne bakavua ne bintu bungi tshianana. Ntshinyi tshivuabu mua kumvua pavuabu babambila bua kufila ndambu wa bintu bivuabu nabi abi? Bavua mua kuikala bele meji ne: buobu mbavua babipete ne bavua ne bukenji bua kubenga kubifila. Kadi, pakabambilabu bua kufila bintu bua kukuatshisha ntendelelu mulelela, bakabifila, kubifila kabayi ne muoyo mubanême munda anyi ku tshimfula muoyo nansha! Bavua bamanye ne: Yehowa ng’uvua muenze bua buobu kupeta bintu abi. Nunku bakafila argent ne or bipite bungi, kufilabu ne nyama kabidi. Bavua ‘bitabuja mu mitshima yabu.’ ‘Mitshima yabu yakabenzeja.’ ‘Nyuma wabu wakabasaka.’ (NW) Bulelela, ‘bakabifila kudi Yehowa bu kupa kuabu kua disanka.’​—Ekesode 25:1-9; 35:4-9, 20-29; 36:3-7.

Bavua badilongolole bua kufila bintu

Butekete bua tshianza anyi kalolo ka mufidi kakatu kamuenekela anu ku bunene bua tshintu tshidiye ufila to. Umue musangu Yezu Kristo uvua utangila muvua bantu bela makuta mu tushete tua tshibutshilu tua mu ntempelo. Babanji bavua belamu bijanja bia bungi, kadi Yezu wakakema pakamonaye mukaji mupele wa mu lufuila welamu tukuta tubidi tua mushinga mukese. Wakamba ne: ‘Bintu biakuela mukaji eu mupele wa mu lufuila bidi bitambe biakuela bakuabu bonso. Wakuela bintu biakadiye nabi bualu, bintu biende bionso bia kudia menemene.’​—Luka 21:1-4; Mâko 12:41-44.

Malu avua Paulo muambile bena Kolinto avua apetangana ne budi Yezu muambe ebu. Paulo wakamba bua difila mapa a kuambuluisha nawu bena kuitabuja bavua mu dikenga ne: ‘Bikala kudilongolola kudiku, bidi bitabujibua bu mudi muntu nabi, ki mbu mudiye kayi nabi.’ (2 Kolinto 8:12) Eyowa, kufila mapa ki mmuanda wa kutembangana anyi kudifuanyikija ne bakuabu to. Muntu udi ufila bilondeshile tshiende tshidiye natshi, ne Yehowa udi wanyisha muntu udi utekeshila bakuabu tshianza anyi muena kalolo.

Kakuena muntu udi mua kunemesha Yehowa to, bualu yeye ke muena bintu bionso. Kadi kufila mapa mmushindu wa pa buawu utudi tumuleja ne: tudi bamunange. (1 Kulondolola 29:14-17) Patudi tufila mapa kabiyi bua batumona batuamba, kadi tuafila ne lungenyi luakane bua  kuyisha ntendelelu mulelela kumpala, netupete disanka ne Nzambi neatubeneshe. (Matayo 6:1-4) Yezu wakamba ne: “Disanka dia kupa ndipite dia kupeta.” (Bienzedi 20:35, MMM) Tudi mua kupeta disanka adi patudi tufila makanda etu mu mudimu wa Yehowa ne tulama bimue bintu bitudi nabi bua kukuatshisha ntendelelu mulelela ne kuambuluisha badi menemene mu dikenga.​—1 Kolinto 16:1, 2.

Lelu’eu, tuikalayi petu badilongolole bua kufila

Lelu’eu, Bantemu ba Yehowa badi basanka bikole bua kumona mudi mudimu wa diyisha ‘lumu luimpe elu lua bukalenge’ uya kumpala pa buloba bujima. (Matayo 24:14) Mu bidimu bia 1990, bantu bapite pa 3 000 000 bakatambula bileja ne: bavua badilambule kudi Yehowa Nzambi, bisumbu bipiabipia bitue ku 30 000 e kuenzeka. Tshia bisatu tshia bisumbu bia Bantemu ba Yehowa bidiku lelu’eu bavua babienze mu bidimu dikumi biashadi ebi! Didiunda edi ndimueneke nangananga bua mudimu mukole udi bena Kristo ba muoyo umue benza. Badi bafila dîba diabu ne makanda abu bua kuya kutangila bantu nabu, kubambila malu adi Yehowa mulongolole bua kuenza. Bakuabu bavua benze mudimu mukole mba-misionere, badi bashiya matunga abu ne baya mu matunga a kulekule bua kuambuluisha mu mudimu wa diyisha Bukalenge. Didiunda edi ndifikishe ku dienza dia bijengu bipiabipia, bidi bilomba batangidi ba bijengu bakuabu. Bidi bikengela kabidi Bible ya bungi ya kuyisha nayi ne idi bantu mua kulonga nayi. Bidi bilomba kabidi kupatula mikanda ya bungi. Ne mu matunga a bungi, badi benda badiundisha nzubu ya filiale anyi basa mipiamipia ya minene. Midimu yonso eyi idi yenzeka ku diambuluisha dia mapa a ku budisuile adi bantu ba Yehowa bafila.

Tudi dijinga ne Nzubu ya Bukalenge

Tudi dijinga ne Nzubu ya Bukalenge (miaba ya kuenzela bisangilu) mu mushindu wa pa buawu bualu Bantemu ba Yehowa mbalue kuvula bikole. Dikonkonona divuabu benze ku mbangilu kua tshidimu tshia 2000 divua dileje ne: bidi bikengela Nzubu ya Bukalenge mipite pa 11 000 mu matunga adi kaayi ne bubanji bua bungi. Tshilejilu, tangila ditunga dia Angola. Nansha mudi mvita mikale mu ditunga edi bidimu bivule, bungi bua bamanyishi ba Bukalenge budi buvula ne bia pa lukama bu 10 ku tshidimu tshionso. Kadi, bia bungi bia ku bisumbu 675 bia mu ditunga dinene dia mu Afrike edi bidi bienzela bisangilu pambelu. Mu ditunga dijima mudi Nzubu ya Bukalenge anu 22, ne ku mine eyi anu 12 ke idiku mibuikila kuulu.

Bidi mushindu umue kabidi mu ditunga dia République démocratique du Congo. Mu Kinshasa (tshimenga tshikulu tshia ditunga) mudi bisumbu biamba kufika ku 300, kadi mudi anu Nzubu ya Bukalenge dikumi patupu. Nanku mpindieu bidi bikengela Nzubu ya Bukalenge mipite pa 1 500 mu ditunga dijima. Bua didiunda didi dienzeka ne lukasa lua dikema mu matunga a ku Mputu wa ku Est, mbatumanyishe ne: bidi bikengela kuasa Nzubu ya Bukalenge mipite pa lukama mu ditunga dia Russie ne dia Ukraine. Bua mu Amerike wa ku Sud, didiunda dia lukasa edi didi dimuenekela ku tshidi tshienzeke mu ditunga dia Brésil, mudi Bantemu bapite pa 500 000 ne mudibi bikengela kuasa Nzubu ya Bukalenge ya bungi menemene.

Bua kukumbaja majinga adi mu matunga aa, Bantemu ba Yehowa mbabangishe programe wa diasa Nzubu ya Bukalenge ne mitalu. Mfranga idi yenzeja mudimu eu mmapa a kalolo adi bana betu ba buloba bujima bafila bua bisumbu bia bawetu badi mu bulanda bapete muaba muakanyine wa kutendelela Nzambi.

Anu bu mu tshikondo tshia Isalele wa kale, mudimu wa bungi udi mua kuenzeka bualu bena Kristo ba muoyo umue badi ‘batumbisha Yehowa ne biuma biabu.’ (Nsumuinu 3:9, 10) Bua bualu ebu, Kasumbu Kaludiki ka Bantemu ba Yehowa kadi kela tuasakidila wa manza tente kudi eu yonso udi mutshima wende mumuenzeje bua kufila biende bintu ku budisuile. Ne tudi bajadike se: nyuma wa Yehowa neatungunuke ne kusaka mitshima ya bantu bende bua bakuatshishe mudimu wa Bukalenge eu udi wenda amu udiunda.

Bu mudi mudimu wenda anu udiunda pa buloba bujima, tukebayi dîba dionso bua kuleja muoyo muololoke, badiakaje bua kufila makanda etu, dîba dietu ne bintu bitudi nabi. Nenku netupete disanka dilelela didi kupa kua mushindu eu kufila.

[Kazubu mu dibeji 29]

“NUATULE BIMPE!”

“Ndi ne bidimu dikumi. Ndi nnutumina makuta aa bua nuenu kusumba nawu mabeji anyi tshintu tshikuabu tshionso bua kupatula mikanda.”​—Cindy.

“Ndi nnutumina makuta aa bua nutupatuile mikanda ya bungi. Mvua mupete makuta aa pamvua ngambuluisha Papa. Nunku nuatule bimpe!”​—Pam, bidimu muanda-mutekete.

“Mvua mumvue bibi pakangambilabu bua tshipepele tshikole tshivua tshienzeke. Ndi ngela meji ne: nudi bimpe. Makuta aa [dolare 2] ke onso avua mu kashete kanyi.”​—Allison, bidimu binayi.

“Dianyi ndi Rudy, ndi ne bidimu 11. Muakunyanyi wa balume Ralph udi ne bidimu bisambombo. Ne muakunyanyi wa bakaji Judith udi yeye ne bidimu bibidi ne tshitupa. Tudi balame mu ngondo isatu makuta atubu batupesha, bua kuambuluisha bana betu badi mu [tshitupa tshidi mu mvita]. Tuvua bakumbaje dolare 20 itudi tunutumina mpindieu eyi.”

“Ndi ngumvua luse bua bana betu [bavua tshipepele tshikole tshikengeshe]. Mvua mupete dolare 17 mu mudimu umvua muenze ne Papa. Tshiena ntuma makuta aa bua bualu kampanda busunguluke to, ndi musue bua nuenze nawu tshinuamona atshi.”​—Maclean, bidimu muanda-mukulu.

 [Kazubu mu dibeji 31]

Mishindu idi bamue bafila

MAPA BUA MUDIMU WA PA BULOBA BUJIMA

Bantu bavule batu balama ndambu wa mfranga, pashishe bayela mu tushete tulongolola bua mapa tudi ne miaku eyi: “Mapa bua mudimu wa pa buloba bujima wa Bantemu ba Yehowa​—Matayo 24:14.” Ku ngondo yonso bisumbu bitu bituma mfranga eyi ku biro bia buloba bujima ku Brooklyn, mu New York, kudibu balombuela midimu ya Bantemu ba Yehowa, peshi ku biro bia ditunga didibu basombele.

Mfranga yenu eyi inudi nufila ku budisuile nudi nansha mua kuyituma diakamue ku Biro bia Treasurer’s Office (Biro bia Mulami wa tshibutshilu) mu adrese eu: Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, anyi ku biro bia Société bidi mu ditunga dinudi. Nudi mua kufila nansha bilengejilu peshi bintu bikuabu bia mushinga. Tudi tunulomba bua kutuma mapa aa pamue ne ka-mukanda kafunda mu tshikoso kadi kaleja ne: aa mmapa a buludiludi.

MAPA MAFILA NE DÎYI DITEKELAPU

Muntu udi mua kupesha Société Watch Tower mfranga ne kumvuangana nende mu mushindu wa pa buawu bua amupingajileyi diakamue padiye nayi dijinga. Bua mamanyisha makuabu, suaku ufundile biro bia Treasurer’s Office (Biro bia Mulami wa tshibutshilu) mu adrese udi kuulu eku.

MAPA MALONGOLOLA

Pa kumbusha mapa a mfranga mafila buludiludi ne mapa mafila ne dîyi ditekelapu, kudi mishindu mikuabu ya difila bintu bua kuambuluisha mudimu wa Bukalenge wa pa buloba bujima. Mona imue mishindu:

Tshieya: Muntu udi mua kupesha Société Watch Tower bukenji bua kuangata mfranga yende ya tshieya anyi ya pansio bua kuenzaye nayi mudimu.

Konte ya ku banke: Muntu udi mua kufundisha konte yende ya ku banke, mikanda ya mfranga mitekesha anyi konte yende ya mfranga ya pansio mu dîna dia Société Watch Tower anyi udi mua kufunda bua kuyifutabu Société dîba dia lufu luende, bilondeshile mikenji ya banke wa muaba udiye.

Lupetu ne nsombu: Badi mua kupesha Société lupetu ne nsombu bu dipa dia buludiludi.

Nzubu: Muntu udi mua kupesha buludiludi Société Watch Tower nzubu udiye nansha mua kusumbisha peshi kutungunuka ne kusombelamu patshidiye ne muoyo kadi mushale mu dîna dia Société. Bidi bikengela kumanyisha Société kumpala kua kumupesha dipa dia nzubu.

Bintu bia bumpianyi ne bintu bitekesha: Muntu udi mua kushila Société Watch Tower nzubu anyi mfranga ku diambuluisha dia mukanda wa bumpianyi mumanya kudi Mbulamatadi, peshi badi mua kufunda dîna dia Société mu mukanda wa tshipungidi bu eu udi ne bukenji bua kuangata bintu bitekesha. Kudi mushindu wa kufuta bitadi bikese padi bintu bikale bitekesha mu dîna dia tshitendelelu.

Anu mudi miaku eyi: “mapa malongolola (charitable planning)” ileja, mishindu ya mapa eyi idi ilomba bua muafidi adianjile kudilongolola. Bua kuambuluisha bantu badi bajinga bua kukuatshisha Société ne mapa malongolola mu mushindu kampanda, Société mmupatule kakanda ka mu Anglais kadi ne tshiena-bualu tshia: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Bavua bafunde kakanda aka bua kuandamuna nkonko ya bungi idibu bele Société bua mapa, bintu bia bumpianyi ne bintu bitekesha. Kadi kabidi ne mumvuija makuabu a mushinga bua nzubu, mfranga ne bitadi bilongolola. Ne nkenza bua kuambuluisha bena mu États-Unis badi balongolola bua kupesha Société dipa dia pa buadi mpindieu anyi bua kumushila bintu dîba dia lufu, bua kusungula mushindu udi mutambe buimpe ne muakanyine bua kufila mapa aa mu diumvuangana ne mêku ne nsombelu yabu. Wewe dijinga ne kakanda aka, udi mua kukalomba buludi ku biro bia Charitable Planning Office (Biro bia Mapa Malongolola).

Kunyima kua bantu ba bungi bamane kubala kakanda aka ne bayukile ne aba badi benza mudimu ku Biro bia Mapa Malongolola (Charitable Planning Office), bakafika ku dikuatshisha Société ne kubambuluishabi bua kabatudi makuta a bitadi a bungi. Bidi bikengela kumanyisha Biro bia Mapa Malongolola ne kubitumina mukanda wonso udi utangila tshilumbu etshi. Biwikala mulongolole bua kufila mapa, udi ne bua kufundila Biro bia Mapa Malongolola anyi kuela nshinga mu adrese udi kuinshi eku peshi ku biro bia Société bidi biambuluisha ditunga diudi musombele.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telefone: (845) 306-0707