Utu umuenena diakalenga ku tshinyi?

MUKANDA mukuabu udi umvuija diakalenga ne: “dipeta bubanji, dipeta dianyisha anyi dipeta butumbi.” Edi ke diumvuija dionso dia muaku eu anyi? Tudi mua kumuena diakalenga anu ku bubanji, dianyisha peshi butumbi bidi nabi muntu anyi? Kumpala kua kuandamuna, anji ikala mumanye ne: Yezu Kristo kavua ne bubanji bua panu to. Bantu ba bungi kabakamuanyisha to; ne bapatudi ba ngenyi mipiamipia ba mu tshikondo tshiende kabavua bamuangata ne mushinga wa bungi to. Pabi, Yezu uvua ne diakalenga. Mushindu kayi?

Pavuaye pa buloba, uvua ‘mubanji ku mêsu kua Nzambi.’ (Luka 12:21) Kunyima kua dibika diende ku lufu, Nzambi wakamufuta, kumuasa tshifulu tshia “butumbi ne buneme.” Yehowa wakabandisha Muanende ‘[pa muanzu mubandile, NW], wakumupa dîna didi pa mutu pa dîna dionso.’ (Ebelu 2:9; Filipoi 2:9) Tshikadilu tshia Yezu tshiakasankisha mutshima wa Yehowa. (Nsumuinu 27:11) Uvua muntu wa diakalenga bualu wakakumbaja tshivuaye muluile pa buloba. Yezu wakenza disua dia Nzambi ne wakatumbisha dîna Diende. Nzambi pende wakatumbisha Yezu pa kumupa bubanji, kumuanyisha ne kumupa butumbi budi muntu nansha umue udi mumanyike bikole bua tulasa tudiye mulonge, mumanyike mu malu a tshididi anyi  mu manaya kayiku mua kupeta to. Bushuwa, Yezu uvua muntu wa katshia ne katshia wakapeta diakalenga menemene panu pa buloba.

Baledi bena Kristo mbamanye bimpe ne: bana badibu balele buobu balonde mu makasa a Kristo, balue babanji ku mêsu kua Nzambi anu muvua Yezu, nebapete masanka mapite bungi mpindieu ne masanka kaayi kufuanyikija mu Bukalenge bua Nzambi. Kakuena mushindu mukuabu mulenga udi nsonga mua kulonda mu makasa a Kristo kupita eu wa kuenza mudimu wakenza Yezu ne kudifila mu mudimu wa ku dîba ne ku dîba bikalaku mushindu.

Kadi imue miaba, bansonga kabatu ne tshibidilu tshia kuenza mudimu wa ku dîba ne ku dîba to. Padi nsongalume ujikija tulasa, mbindile bua yeye kukeba mudimu, kusela ne kusomba bimpe. Imue misangu, bansonga badi bakolele miaba idi ne lungenyi lua nunku, kabatu basue kuenza mudimu wa ku dîba ne ku dîba to. (Nsumuinu 3:27) Bua tshinganyi? Bualu bantu bakuabu batu babasaka bua kuenza malu mutu bantu bonso benza. Ke tshivua tshienzekele Robert. *

Padi malu a bantu abengangana ne kuondo ka muoyo

Robert uvua mukolele mu dîku dia Bantemu ba Yehowa. Pakavuaye ne bidimu dikumi ne bia pa mutu, bikadilu biende ne balunda bende kabivua bimpe menemene to. Bualu buende buakabanga kutonda mamuende. Nunku, mamuende wakalomba mpanda-njila mukuabu (ministre wa ku dîba ne ku dîba wa mu Bantemu ba Yehowa) bua kuikalaye umukankamija. Robert udi umvuija tshiakenzeka pashishe.

“Mvua nganyisha bikole muvua muanetu mpanda-njila au munsue. Tshilejilu tshiende tshimpe tshiakampesha meji a kubanga kuenza mudimu wa bumpanda-njila diakamue kunyima kua dijikija tulasa. Bualu ebu buakatonda kabidi Mamu. Kuetu, nsongakaji yeye mutuadije bumpanda-njila diakamue padiye ujikija tulasa, ki mbibi to, kadi nsongalume yeye, udi ne bua kuanji kupeta makuta a kudiambuluisha nawu, ne pashishe udi mua kulua kuela meji bua kuenza bumpanda-njila.

“Ngakalonga mudimu wa bianza ne meme kubanga kudienzela mudimu. Mudimu wanyi eu wakabanga kungangata mêba a bungi ne tshivua kabidi ne disanka bua kubuela mu bisangilu ne kuyisha to. Kuondo kanyi ka muoyo kakabanga kuntatshisha bualu mvua mumanye bimpe ne: mvua ne mushindu wa kusadila Yehowa bikole. Nansha nanku, bivua mvita mikole bua meme kubenga kulonda tshivua bakuabu bakeba bua meme kuenza, kadi ndi nsanka bualu tshiakenza bu muvua dijinga diabu to. Mpindieu nkadi musele, ne kukadi bidimu bibidi meme ne mukajanyi tudi bampanda-njila. Matuku mashale aa, mbanteke musadidi wa mudimu mu tshisumbu. Bua kuamba bualu pa bualu, ndi mpindieu ne disanka dilelela, ndi nsadila Yehowa ne mutshima wanyi mujima, ne bukole buanyi buonso.”

Tshibejibeji tshiudi ubala etshi ntshikankamije bansonga misangu ne misangu bua kulonga mudimu wa bianza anyi bua kupeta amue mamanya adi ne mushinga lelu patshidibu mu kalasa, bikalaku mushindu. Bua tshipatshila kayi? Mbua kuluabu babanji anyi? Tòo. Tshipatshila tshinene ntshia se: bikale bakumbane mua kudiambuluisha bimpe padibu bakola ne bua basadile Yehowa muabu muonso, nangananga mu mudimu wa ku dîba ne ku dîba. Kadi misangu mivule, bansonga mbalue kudina ne kasuki mu midimu ya bianza, kabatshiyi bangata mudimu wa buambi ne mushinga wa bungi menemene to. Bamue kabatu nansha ne meji a kuenza mudimu wa ku dîba ne ku dîba to. Mbua bualu kayi?

Mumvuija a Robert adi atokesha bualu ebu ndambu. Kunyima kua Robert mumane kulonga mudimu wa bianza, wakapeta mudimu. Abidi mmale asatu  mmîpi, e kudituaye mu midimu ya buatshia buatshia ivua kayiyi ne tshivuayi imutuadila. Tshipatshila tshiende tshivua tshia kuikala kayi ukenga tshintu. Kadi kudiku muntu nansha umue pa buloba apa ukadiku musombe kayi dikenga ne tshintu anyi? Bena Kristo badi ne bua kudienzeja bua kudikumbajila bidibu nabi dijinga, bikale bakumbaja bimpe majitu abu adi alomba mfranga. Kadi badi kabidi ne bua kumanya ne: mu bikondo ebi bidi malu enda anyanguka anu kunyanguka, bantu bakese patupu ke badi mua kuamba mudibu kabayi bakenga tshintu. Ke bualu kayi mêyi a Yezu adi mu Matayo 6:33 adi akolesha bena Kristo ku muoyo bikole.

Robert udi usanka bua muvuaye mupangadije bua kulonda tshivua mutshima wende umuambila pamutu pa kulonda tshivua tshilele tshia kuabu. Lelu’eu, udi wenza mudimu wa ku dîba ne ku dîba. Eyowa, mudimu wa ku dîba ne ku dîba mmudimu wa lumu. Robert udi ne ditalala bualu udi wamba ne: udi usadila Yehowa ‘ne bukole buende buonso.’

Enza muebe muonso ne bipedi biudi nabi

Mu Bantemu ba Yehowa mudi bantu ba bungi badi ne bipedi. Bamue badi ne lungenyi lua bungi; bakuabu mbamanye kuenza midimu ya bianza. Bipedi bionso ebi bidi bifuma kudi Yehowa, udi upesha ‘bantu bonso muoyo ne mupuya ne bintu bionso.’ (Bienzedi 17:25) Tuetu katuyi ne muoyo, bipedi ebi kabiakuikala ne mushinga to.

Nunku, bidi biakanyine menemene bua tuetu kufila mioyo itudi balambule Yehowa mu mudimu wende. Ke dipangadika diakangata nsongalume mukuabu uvua ne bipedi. Uvua ne muoyo mu tshikondo tshivua Yezu pa buloba. Uvua muledibue mu dîku divua dimanyike bikole ne wakapitshisha matuku ende a bunsonga mu tshimenga tshiende lumu tshia Tâso wa mu Kilikia. Nansha muvuaye muena Yuda wa ku mashi, wakalua muena Lomo ku butuangaji bua tatuende. Nunku uvua ne bukenji bua kuenza malu a bungi. Pakakolaye, bakamulongesha Mikenji kudi Gamaliele, umue wa ku “balongeshi” batumbe ba mu tshikondo atshi. Bivua bimueneka ne: kavua mua kuenza matuku a bungi kayi mupete ‘bubanji, dianyisha ne butumbi’ to.​—Bienzedi 21:39; 22:3, 27, 28.

Nsongalume au uvua nganyi? Diende uvua Shaula. Kadi wakalua kulua muena Kristo ne pashishe kumubikilabu ne: mupostolo Paulo. Wakalekela malu manene avuaye wipatshila kumpala, kuluaye muena Kristo ne kufila muoyo wende mujima mu mudimu wa Yehowa. Paulo wakalua kumanyika, ki mbu mumanyi wa malu a mikenji wa pa buende to, kadi wakalua kumanyika bu muyishi wa lumu luimpe wa lukunukunu. Kunyima kua yeye mumane kuenza bidimu bitue ku 30 mu mudimu wa bu-misionere, wakafundila balunda bende ba ku Filipoi mukanda. Wakabalondelamu amue malu avuaye muenze kumpala kua yeye kulua muena Kristo ne pashishe kuambaye ne: “[Bua Yezu Kristo] ndi musue kujimija bionso, mbitangila bu bintu bia kuimansha ku diala, bua mmone mua kupeta Kristo.” (Filipoi 3:8, MMM) Bulelela, Paulo kakanyingalala bua mushindu uvuaye mupitshishe matuku ende a muoyo nansha!

Kadi netuambe tshinyi bua malu avua Gamaliele mulongeshe Paulo? Avuaku ne dikuatshisha kudiye anyi? Eyowa! Misangu ne misangu Paulo wakadiambuluisha nawu mu “kuvidila ne mu kujadika kua lumu luimpe.” Kadi mudimu munene wa Paulo uvua wa kuikala kuyisha lumu luimpe, mudimu uvua tulasa tuvuaye muenze katuyi mua kumulongesha to.​—Filipoi 1:7; Bienzedi 26:24, 25.

Bia muomumue lelu, bamue badi benza mudimu ne mapa ne bipedi biabu, nansha mamanya a mu tulasa bua kuyisha malu a Bukalenge kumpala. Tshilejilu, Amy udi ne dipolome dia iniversite mu malu a bungenda ne dikuabu mu malu a mikenji. Kumpala uvua wenza mudimu wa makuta a bungi mu biro bia balumbuluidianganyi, kadi lelu’eu udi wenza mudimu wa ku budisuile mu bimue bia ku biro bia Société Watch Tower kabayi bamufuta difutu. Udi wamba bua nsombelu udiye nende mpindieu ne: “Ndi ngela meji ne: ndi musungule tshintu tshitambe buimpe bua matuku anyi a muoyo. . . . Tshiena musue kushintakaja mudimu wanyi eu ne wa muntu nansha umue wa ku batuvua nabu mu iniversite nansha. Ndi ndiumvua bimpe bua mudimu eu undi musungule. Ndi ne bionso bindi nabi dijinga ne bindi musue: nsombelu mulenga ne wa disanka, ne mudimu udi unsankisha.”

Amy wakasungula luseke luakamupetesha ditalala dia mu mutshima, disanka ne dibenesha dia Yehowa. Bulelela, malu a buena aa ke adi baledi bena Kristo bajinga bua enzekele bana babu!

Diakalenga mu mudimu wa bena Kristo

Bushuwa, bidi bikengela kuikala ne mmuenenu muakanyine wa diakalenga mu mudimu wa bena  Kristo. Tutu tudiumvua bulelela ne disanka patudi bapitshishe dîba dilenga mu mudimu wa budimi, babanye mikanda idi ya kulonga nayi Bible anyi bayikile ne bantu bakuabu pa malu a mu Bible. Kadi dîba ditudi katuyi tutamba kupeta bantu banyisha bua tuetu kuyukila nabu, tudi mua kufika ku dimona ne: tudi tujimija dîba dietu tshianana. Kadi anji vuluka ne: diakalenga didi kabidi diumvuija ‘dipeta dianyisha.’ Tudi tukeba bua nganyi atuanyishe? Yehowa. Yehowa udi mua kutuanyisha nansha bantu buobu bateleja anyi kabayi bateleja mukenji wetu. Bua bualu ebu Yezu wakapesha bayidi bende dilongesha dinene.

Ikala muvuluke ne: Yezu wakatuma bayishi ba Bukalenge 70 “mu misoko yonso ne mu miaba yonso, yakadiye wamba kuya.” (Luka 10:1) Bavua ne bua kuyisha mu bimenga ne mu misoko kabayi ne Yezu to. Kabavua banji kuenza bualu bua nunku to. Ke bualu kayi Yezu wakabambila malu avuabu ne bua kuenza ku bumue ku bumue kumpala kua kubatumaye. Pavuabu bapeta “muana wa ditalala,” bavua ne bua kumuyisha malu a bungi avua atangila Bukalenge. Kadi, pavua bantu bababenga, bavua ne bua kutungunuka ne mudimu wabu, kabiyi bibatonda to. Yezu wakamba ne: bantu bavua babenga bua kuteleja balongi bende aba, bavua mene babenga bua kuteleja Yehowa.​—Luka 10:4-7, 16.

Pakajikija bayidi aba mudimu wabu wa kuyisha, bakatuadila Yezu luapolo ‘ne disanka, bamba ne: Mukalenge, bademon mene badi batumikila dîyi dietu mu dîna diebe.’ (Luka 10:17) Bivua ne bua kuikala disanka dia bungi be bua bantu aba bavua kabayi bapuangane kuipatabu nyuma mibi nansha mudiyi ne bukole! Kadi Yezu wakadimuija bayidi bende bena musangelu abu ne: ‘Kanusanki bua nyuma mibi idi itumikila dîyi dienu, kadi nusanke bua mêna enu adi mafunda mu diulu.’ (Luka 10:20; tuetu mbadi baladike maleta.) Pamu’apa, bayidi 70 aba kabavua misangu yonso ne bukole bua kuipata bademon to, kabavua misangu yonso bapeta bipeta bimpe mu mudimu wa diyisha nansha. Kadi bu buobu mua kushala ne lulamatu, Yehowa uvua anu ne bua kubanyisha.

Utuku wanyisha basadidi ba ku dîba ne ku dîba anyi?

Nsongalume mukuabu wakambila mukulu muena Kristo ne: “Pandi njikija tulasa tubandile, nentuadije kukeba mudimu. Meme tshiyi mupete, apu nenshishe kutangila ni ndi mua kubuela mu mudimu kampanda wa ku dîba ne ku dîba.” Kadi eu ki mmuenenu wa malu wa bantu ba bungi badi batuadije mudimu wa bumpanda-njila to. Bamue mbalekele midimu ivua ibapetesha makuta a bungi bua kumona mua kuenza bumpanda-njila. Bakuabu mbabenge mene kutungunuka ne tulasa. Anu bu mupostolo Paulo, mbadipangishe bimue bintu; kadi anu bu muvua Paulo, Robert ne Amy bamona pabu, kabena banyingalala bua tshidibu basungule bua kuenza to. Badi banyisha diakalenga diabu dia kuenza mudimu ne bipedi biabu bua kusamuna Yehowa, udi muakanyine bintu bitambe buimpe bidibu nabi.

Bua malu mashilashilangane, Bantemu ba Yehowa ba lulamatu bavule kabena ne mushindu wa kulua bampanda-njila. Pamu’apa badi ne majitu adi Bible ubalomba bua kuambula. Nansha nanku, buobu bikale basadila Nzambi ne ‘mutshima wabu wonso ne muoyo wabu wonso ne lungenyi luabu luonso,’ badi basankisha Yehowa. (Matayo 22:37) Nansha mudibu kabayi ne mushindu wa kulua bampanda-njila, mbamanye bimpe ne: aba badi bampanda-njila mbasungule mudimu mulenga.

Mupostolo Paulo wakafunda ne: ‘Kanudifuanyikiji ku malu a mu tshikondo etshi.’ (Lomo 12:2) Bilondeshile mubelu wa Paulo eu, katuena ne bua kulekela bilele bia kuetu anyi bia bantu ba tshikondo etshi bishintulula ngelelu wetu wa meji to. Nansha wewe mua kulua anyi kuyi mua kulua mpanda-njila, enza bua mudimu wa Yehowa wikale mudimu wa mushinga mukole mu nsombelu webe. Newikale ne diakalenga bualu Yehowa udi ukuanyisha.

[Mêyi adi kuinshi]

[Tshimfuanyi mu dibeji 19]

Kunangidi kudifila mu midimu ya buatshia buatshia idi kayiyi ne tshidiyi ikutuadila to